1. Mughulhu mungyi Yehova akasubiraya athi emisabe y’abaghombe biwe?

 WUNALHUE wasi ngoku Yehova anganakukolesya erisubirya omusabe w’omundu mulebe owakalhua okwa muthima? Ekyo ku kiri kithya mbulha wuli musyakulhu w’ekithunga, omughombe omuwathikya, mutemburi, kutse muthuliri. Ku kiri kithya mbulha wuli mulere kutse wukulire kutse wuli ndugu kutse dada. Omughulhu omundu oyuwanzire Yehova akamusaba obuwathikya, mughulhu mungyi Nyamuhanga wethu akakolesaya abasyakulhu n’abandi baghombe biwe abathaleghulha eriwathikya omundu oyo ya kutsibu. (Kol. 4:11) Ka ni lhusunzo erikolera Yehova n’abalikyethu omo nzira eyo! Thwangana thoka erikolha ekyo hamabuthuka obulhwere, ekitsinduli, kutse eriendereribwa.

2. Busana naki kyangana kalha eriwathikya abandi hakabuthuka obulhwere?

² Eributhuka ly’obulhwere lyangana leka ikyathukalira eriwathikania. Ng’eky’erileberyako, thwanganabya ithwanzire eribungira banywani bethu, aliwe ikyabya isikithakangania eriyirinda. Thwangananza erikokya abo kikakalira eribana esyosente okwa ky’erirya, aliwe nakyo ikyabya nga sikyanga thokekana. Thwangananza eriwathikya abandi, aliwe ekyo kyangana kalha ab’okw’ithwe bamabya nabu ibanemwaghalhwa. Nomwabine, thwanzire eriwathikya balikyethu, kandi Yehova akatsema thukakolha ekyosi-kyosi ekyo thwanga thoka busana nabo. (Emi. 3:27; 19:17) Thwanga kolhaki?

3. Thuk’ighaki okwa ky’erileberyako ky’abasyakulhu ab’omwa kithunga kya Desi? (Yeremia 23:4)

 ³ Ebyo abasyakulhu banga kolha. Wamabya iwuli musyakulhu, minya ndeke esyombuli. (Soma Yeremia 23:4.) Desi, mwali wethu oyukanibweko omo mwatsi owahwere, akabugha athi, “Abasyakulhu ab’omwa gurupu yethu y’eriyathulira, kera ibakabya ibanemuyiyunga okw’ingye n’abandi omw’ithulira n’okw’iyitsemesya.” b Akaghalha ako abalisya abo bahiraho mukaleka ikyabolhobera eriwathikya Desi hakabya ekihunzo ky’ekorona [COVID-19] n’enyuma w’eriholerwa abaghuma b’okwa bahughu biwe busana n’ekorona.

4. Busana naki abasyakulhu mubathoka eriwathikya Desi, kandi erisomo ni ryahi?

⁴ Desi akabugha athi, “Kundi nabya inabiriminya abasyakulhu ng’abanywani, mukyanyolhobera eribabwira eriyowa lyaghe n’ebikanyilyambaya.” N’isomo lyahi ery’abasyakulhu bang’igha? Mubungire abali ahisi sy’obutheya bwenyu ekitsibu kithe kyabya. Mubanywane. Hamabuthuka obulhwere obwanga leka imuthabahikako busu oko busu, mukolesaye esindi nzira. Desi akabugha athi; “Okwa bundi buthuku abasyakulhu muthina-muthina ibakananyitherera kutse erinyithumira esyomeseji oko kiro kighumerere. Amasako agho babya bakanyisomera iniakanyihika oko muthima, nomwakine indi nabya inganasigho ndeke.”

5. Abasyakulhu banga minya bathi ebyo balikyabo bakayithagha, kandi banga bawathikya bathi?

⁵ Enzira nguma eyawanga minyiramo ebya balikyethu bakayithagha ly’eriminya amalengekania wabu omw’ibabulya ebibulyo. (Emi. 20:5) Mbwino banawithe ebyalya ebikaghunza, omubatsi, n’ebindi biyithawa? Mbwino bakisiya ibaherya omubiiri wabu kutse enyumba yabu? Mbwino bakayithagha ithwe eribawathikya ibo eribana obuwathikya bw’egavumente? Desi mwabana obuwathikya bw’ekinyamubiri erilhua oku balikyethu. Aliwe obuwathikya bw’obunyakirimu n’obw’omw’iyowa obo abasyakulhu bamuha bw’obwa muwathikaya kutsibu erilhaba omwa kitsibu kiwe. Akabugha athi: “Abasyakulhu mubasaba haghuma naghe. Nomwakine indi singakibukire ebyonyine-nyine ebyo babugha, ng’ibuka ngoku nayowa. Yabya nzira ya Yehova ey’eribugha athi, ‘Siwuli iwuwene.’”​—Isa. 41:10, 13.

6. Abangyi omwa kithunga banga kolhaki eriwathikya abandi? (Lebaya ekisasani.)

⁶ Ebyo abandi banga kolha. Thunasi ngoku  abasyakulhu b’abatholere erisondolha. Aliwe Yehova akakokaya ithwe bosi erihimba n’eriwathikya abandi. (Gal. 6:10) Nibya n’akandu kake ak’erikangania olhwanzo kanganahamba ndeke oko mundu oyulhwere. Omwana angana ghenda n’omubuthi wiwe omubuthi akayahumulikania mulikyethu. Omunyethu angana ghendera mwali wethu y’omwa kathali kutse erimukolera eyindi mibiiri. Kandi ibbwa eritsumbira omulhwere y’ebyalya n’erimuthwalirabyo? Ni kwenene, obulhwere bwamabirilhandaghana, obuli mundu omwa kithunga akayithagha erihumulikanibwa. Obundi ithwangana ghunza akathuku ithunemukanirania n’abalikyethu emihindano yikahwamo mbulha busu okwa busu kutse okwa nganirania y’evidiyo. Abasyakulhu nabu bakayithagha erihumulikanibwa. Abandi Bema bakathumira abasyakulhu b’ehibaruha hy’eribasima, abo mughulhu mungyi bakabya bbize kwilhaba kera omughulhu hakabuthuka obulhwere. Ka ni kibuya erikolha owethu ‘ow’erisibikania n’erihimbana’!​—1 Tes. 5:11.

7. Ekitsinduli kyanga hamba kithi okwa ngebe y’omundu?

⁷ Ekitsinduli kyangana hindulha engebe y’omundu omw’ikohya ly’eriso. Abakahambawako bangana herya ebindu byabu, amanyumba wabu, kutse nibya abanze babu. Ebindu ebikalire ebi bikahika n’oku balikyethu. Thwanga kolhaki eriwathikya?

8. Abasyakulhu n’emithwe y’eka banga kolhaki ekitsinduli kithe kyabya?

⁸ Ebyo abasyakulhu banga kolha. Abasyakulhu, muwathikaye balikyethu eriyithegheka ekitsinduli kithe kyabya. Mulhangire muthi abosi omwa kithunga bakabya ibanasi eby’erikolha eribya ibanatheghibirwe n’erithoka eritherera abasyakulhu. Margaret, oyukanibweko omo mwatsi owahwere, akabugha athi: “Abasyakulhu bethu mubalhabya ebiyithawa by’ekithunga, erithughusa kw’akasali ngoku obuthuku bw’omuliro sibuli bwahwa. Mubabugha bathi ab’obuthoki bamabugha bathi thuhume kutse emibere yamabya nga yamakalha, thutholere ithwahuma aho naho.” Omwatsi oyo mwasira okwa buthuku kundi enyuma w’esyowiki ithano omuliro mwabuthuka. Omw’iramya ly’eka, emithwe y’eka yangana yibukya ekya obuli mughuma omw’eka angakolha. Iwe n’abaana bawu mwamabya imunayitheghekire, imwangana sighalha imunathekene hakabya ekitsinduli.

9. Abasyakulhu banga yithegheka bathi ekitsinduli kithe kyabya kandi kyabiribya?

⁹ Wamabya iwuli mulebererya w’egurupu y’eriyathulira, isiwalinda ekitsinduli eritsuka eribya imuwabana ebihambire okwa bosi abali omwa gurupu eyo ebihikire. Ibya n’elisiti yabu kandi ibya iwunemulhaba muyo. Neryo ihakendibya hakabya ekitsinduli, iwukendi thoka erikanirania n’obuli muthuliri eriminya ebyo akayithagha. Aho n’aho thumira emyatsi eyo y’omusangania w’akathunga k’abasyakulhu, nayu oyukendi kanirania n’omulebererya w’omuthimbo. Erikolera haghuma eri lyangana wathikya. Habere habiribya omuliro, omulebererya w’omuthimbo wobu Margaret mwaghunza esyosaha 36 inianalholire akawathikania n’abasyakulhu eritherera n’eritsomana balikyethu nga 450 abahumibawa. (2 Kor. 11:27) Busana n’ekyo, abosi abayithagha ah’erikalha mubabanaho.

10. Busana naki abasyakulhu bakalhangira eribungira balikyabo mwa kindu kikulhu? (Yoane 21:15)

¹⁰ Ekitsweka ky’okwa mibiiri eya basyakulhu bakakolha ly’eriha obuwathikya bunyakirimu n’omw’iyowa. (1 Pet. 5:2) Hamabya ekitsinduli, abasyakulhu batholere ibatsuka erilhangira bathi obuli mulikyethu ane omwa butheya kandi  anawithe ebyalya, eky’eriambalha n’ah’er’ikalha. Aliwe ahabw’amezi mangyi enyuma waho, abalyalhama ibangana yithagha obuwathikya bunyakirimu n’omw’iyowa. (Soma Yoane 21:15.) Harold oyukakolha okwa Komiti y’Ekyaghanda ky’Omuthahulha kandi oyuwabiribanangana n’abalikyethu bangyi abahambawako omwa kitsinduli, akabugha athi, “Kikathwalha buthuku erisuba-subana. Bangana tsuka eribeghera, aliwe sibang’ibirirwa ow’okw’ibo oyuwaholha, ebindu byabu by’obughuli, kutse emibere eyikalire eyo babaliramo okwa kasali. Ebi byangana leka obulighe ibwabera erisubulha. Ekyo sibugha indi sibawithe erikirirya aliwe ni yowa lya buli kiro.”

11. Ni biyithawa byahi ebyo esyofamile sikendibya isinawithe?

¹¹ Abasyakulhu bakaghendera okw’ihabulha erya “mulire haghuma n’abakalira.” (Abar. 12:15) Abakalhama bakanayithagha erikakasibwa ngoku Yehova abanzire kuthya n’abalikyabo Abakristayo. Abasyakulhu ibakendianza eriwathikya esyofamile erighenda-ghendania n’endegheka yasyo y’obunyakirimu, imwamuli erisaba, eriyeghesya, erihindana, n’erisangira omw’ithulira. Kandi abasyakulhu banganahira omwa babuthi mw’omuhwa w’eriwathikya abaana babu erihira amalengekania okwa bindu ebyo ekitsinduli kithe kyanga tsandya. Ababuthi, mwibukaye abaana benyu ngoku Yehova akendibya inina Munywani wabu kandi kw’akendibya iniane haghuma nabu. Kandi mulhangire muthi mukabasoborera ngoku bangana sighalha ibane omwa lhughanda lhw’ekihugho kyosi olhwa balikyethu abanayitheghekire eribawathikya.​—1 Pet. 2:17.

12. Abandi banga kolhaki eriwathikya ahawire ekitsinduli? (Lebaya ekisasani.)

¹² Ebyo abandi banga kolha. Ekitsinduli kyamawa hakuhi n’ewenyu, bulhaya abasyakulhu nga wanga wathikya wuthi. Obundi iwanganaha ababirihuma b’ah’erikalha ahabw’obuthuku buke kutse iwawathikya okwa by’obuhimbe. Iwangana lethera abathuliri abawithe obuyithawa b’ebyalya n’ebindi bindu. Ekitsinduli kyamawa haali, paka iwangana wathikya. Wuthi? Omw’ihira abahambirweko b’omwa misabe. (2 Kor. 1:8-11) Iwangana wathikya ahawire ekitsinduli omw’ihayo wukasighika omubiiri w’ekihugho kyosi. (2 Kor. 8:2-5) Wamabya iwangana ghenda ahawire ekitsinduli eriyawathikya, bulhaya abasyakulhu nga wanga wathikya wuthi. Wamalighirwa erikolha ekyo, iwangana hebwa erithendekwa lirebe nuku wubye  iwangana kolesibwa aho kyamayithaghisibwa kandi mughulhu wahi.

13. Ni bitsibu byahi ebyo balikyethu abali omwa bihugho eyo mubiiri wethu imanibirwe bakabana?

¹³ Omwa bihugho eyo omubiiri wethu imanibirwe, eriendereribwa likongera erikalya engebe. Balikyethu omwa bihugho ebyo kandi bakabana n’ebitsibu by’emingirirye, amalhwere, n’eriholerwa. Aliwe busana n’erimanibwa eryo, abasyakulhu bangana lemwa erighenda kutse erikanirania bwiranda n’abakayithagha erihumulikanibwa. Ekyo mukyabya oku Andrei, oyukanibweko omo mwatsi owahwere. Mwali wethu omwa gurupu yiwe y’eriyathulira aby’awithe ekitsibu ky’esyosente. Mwathunga e aksidenti. Mwayithagha erisemezibwa mirundi mingyi kandi isyanga kolha. Nomuhanabya ebikakiryo n’ekihunzo, balikyethu mubakolha ekyosi-kyosi ekyo banga thoka eriwathikya, kandi Yehova abya inianalhangire.

14. Abasyakulhu banga hiraho bathi eky’erileberyako omw’iyikethera Yehova?

¹⁴ Ebyo abasyakulhu banga kolha. Andrei mwasaba kandi amakolha ngoku angathoka. Yehova mwakolhaki? Mwahira omwa bikirirya balikyabo mw’omuhwa w’eriwathikya. Abandi ibakathwalha mwali wethu oyo eyiri dokita. Abandi ibamuha esyosente sy’erimuwathikya. Yehova mwabahira mw’omuhwa w’erikolha ekyo banga thoka, kandi mwatsumulha akaghalha kabu k’erikolha buthubaha kandi omwa bughuma. (Ebr. 13:16) Abasyakulhu, omughulhu omubiiri aliko olhukako, muhe abandi b’esyongwamirwa. (Yer. 36:5, 6) Ekikulhu kutsibu, muyikethere Yehova. Angana bawathikya eriberererya ebiyithawa bya balikyethu.

15. Thwanga theya thuthi obughuma bwethu bw’Ekikristayo hakabya eriendereribwa?

¹⁵ Ebyo abandi banga kolha. Omughulhu hali erimanibwa, ithwanganabya thukahindanira omwa syogurupu nyike-nyike. Neryo lino kwilhaba kera ni kikulhu eribya buholho n’abandi. Rwanisaya Sitani, butsira erirwanisania. Kyurukaya ebisobyo by’abalikyethu by’ameso, kutse lengaho erighunzaho lhuba erithendi yitheghererania lyosi-lyosi. (Emi. 19:11; Efe. 4:26) Ibya iwunayitheghekire eriwathikya abandi. (Tito 3:14) Obuwathikya obo abandi baha mwali wethu oyuwabya awithe obuyithawa mubwahamba ndeke oko bandi omwa gurupu yabu y’eriyathulira. Mubabya bughuma ng’efamile.​—Esy. 133:1.

16. Ngoku kiri omwa Abanya Kolosai 4:3, 18, thwanga wathikya thuthi balikyethu abak’endereribawa?

 ¹⁶ Esyongumi sy’abalikyethu bakalholha embere erikolera Yehova nomuhane olhukako erilhua oko gavumente. Abandi b’okw’ibo bakahirawa omwa ngomo busana n’erikirirya lyabu. Thwangana saba busana nabu, esyofamile syabu, n’abakatsama obwiranda bwabu eritsomana balikyabo bunyakirimu, kinyamubiri, n’omwa bilhaghiro. c (Soma Abanya Kolosai 4:3, 18.) Isiwaghaya amaaka w’emisabe yawu!​—2 Tes. 3:1, 2; 1 Tim. 2:1, 2.

17. Wanga yitheghekera wuthi lino eriendereribwa?

¹⁷ Iwe n’efamile yawu mwangana yitheghekera lino eriendereribwa. (Emib. 14:22) Isiwalengaho erithera akasasani k’ebyosi ebithuwene ebyangabya. Omwakanya k’ekyo, ghumaya obunywani bwawu na Yehova kandi wathikaya abaana bawu erikolha ikyan’ekyo. Okwa bundi buthuku wamahangya-hangya, bwira Nyamuhanga ebyosi ebiri oko muthima. (Esy. 62:7, 8) Ng’efamile, mukanaye okwa syonzumwa esyosi esyanga leka imwamuyikethera. d Bikahika okwa kitsinduli, iwe eriyithegheka n’eriyikethera Yehova kyangana leka abaana bawu ibabya bathubaha kandi ibabya buholho.

18. Ni kyahi ekya thulindirire?

¹⁸ Obuholho bwa Nyamuhanga bukaleka ithwabya omwa butheya. (Fil. 4:6, 7) Erilhabira mubwo, Yehova akaleka ithwathekana nomuhane amalhwere, ebitsinduli, n’eriendereribwa ebyanga thuhambako munabwire. Akakolesaya abasyakulhu abakakolha kutsibu erithutsomana. Kandi ithwe bosi akathuha olhusunzo lhw’eriwathikania. Obuholho bwa Nyamuhanga obwa thuwithe lino bukendi syaleka ithwathoka erighumira ebitsibu ebinene-binene ebikayasa, nibya ‘n’obulighe bunene.’ (Mt. 24:21) Okwa buthuku obo, thukendi syayithagha erisighalha ithune n’obuholho bwethu n’eriwathikya abandi erikolha ekyo. Aliwe enyuma w’obulighe bunene, sihendi syabya ebitsibu ebikaleka ithwahangya-hangya. Erighunzerera thukendi syatsemera ekyo Yehova abiribya inianemuthusunzira​—obuholho obuhikene kandi obwa kera na kera.​—Isa. 26:3, 4.