Wunayitheghekere ‘Erisighalya Ekihugho’?
ITHWE bosi thukalhangira omulhaghe wa Yesu mwa w’obughuli: “Obutseme buli okwa b’omuthima mwolho, kundi basyasighalya ekihugho.” (Mt. 5:5, NWT) Abahakabibwa bakendi syasighalya ekihugho bakathabalha ng’abami na Yesu elhubulha. (Erib. 5:10; 20:6) Munabwire, Abakristayo bangyi ab’okwenene balindirire erisyasighalya ekihugho n’er’ikalha kukyo kera na kera omo ngebe eyihikene, eyirimo obuholho, n’etseme. Ekyo erithokekana ndeke, bawithe bingyi by’erisyakolha. Thukanaye okwa bisathu: erighondya ekihugho, erighetha-ghetha abakendi syalhubukibwa, n’erikangirirya abakendi syalhubukibwa. Kandi thulebaye nibya na lino nga wanga kangania wuthi ku wanzire erisyasangira omw’ikolha ebindu ebi.
ERIYITHEGHEKERA ERIGHONDYA EKIHUGHO
Omughulhu Yehova alhaghira abandu athi “musulhaye ekihugho, mughondayekyo,” aby’akakangania ngoku erighunzerera ekihugho kyosi kyangabere paradiso. (Enz. 1:28) Abakendi syasighalya ekihugho bakendisyabya b’erighondera ekihano ekyo. Nomwabine sihendi syabya eparadiso y’eritsukirako kundi eririma lye Edeni sirikiriho. Okw’itsuka hakendi syabya bingyi by’erikolha eryuwania emyanya eyabiritsandibwa. Oyo k’akendisyabya mubiiri munene!
Eki kikathw’ibukaya omubiiri ogho Abaisraeli bakolha bakalhua e Babeli. Ekihugho kyabu kyabya ikyamabirighunza myaka 70 isimw’ikere bandu. Aliwe Isaya mwalhaghulha athi busana n’obuwathikya bwa Yehova, bangathokire erikisuba-subania. Obuminyereri bukabugha buthi: “Nasyayira embwarara yiwe nga Edeni, n’olhukurutsu lhwiwe ng’eririma ly’Omwami Mukulhu.” (Isa. 51:3) Abaisraeli mubathoka. Kuthya, busana n’obuwathikya bwa Yehova, abakendi syasighalya ekihugho bakendisya thoka erighondyakyo. Nibya nawu lino wangana kangania ku wukayisunza erisyasangira mugho.
Enzira nguma eya wanga koleramo ekyo ly’erilhangira wuthi oko wawu n’ebikuthimbireko bikabya ibinayonzire kandi ibine omo buyithondeke. Wangana kolha ekyo abataka bawu nomubangabya isibali kikolha. Kandi wangana wathikya okw’iyonza n’erisugha Ekisenge kyenyu ky’Obwami n’Ekyumba ky’Olhuhindano. Kandi emibere eya wulimu yamakulighira, iwangana yihayo eriwathikya ahawire ekitsinduli. Aho iwukendi kangania ku wanayitheghekire eriwathikya kikayithaghisibwa. Yibulhaye, ‘Mbwino nangan’igha emibiiri eyo nangana syakolha namasyabana omughisa w’erisighalya ekihugho?’
ERIYITHEGHEKERA ERIGHETHA-GHETHA ABAKENDISYA LHUBUKIBWA
Yesu abere anabirilhubukya mwali wa Yairo, mwabugha athi omwana oyo ahebawe eky’erirya. (Mk. 5:42, 43) Kyanganabya imukithakalha eritsomana omusika w’emyaka 12 oyo. Aliwe thalengekania nga ni byahi ebikendi syayithaghisibwa Yesu akaberererya omulhaghe wiwe owa, “abosi abali omo masinda wabo basyowa omulenge wiwe. Basyalhua omo masinda wabo.” (Yn. 5:28, 29) Nomwakine indi e Biblia siyirithubwira bingyi, ithwangana kilhangira ngoku abakendisya lhubukibwa bakendi syayithagha erihebwa eby’erirya, ah’er’ikalha, n’esyongyimba. Mbwino lino wangana kangania ku wunayitheghekire erisyawathikya? Hano hane ebibulyo birebe ebyo wanga lengekaniako.
Ni byahi ebya wangakolha munabwire erikangania ku wunayitheghekere erisighalya ekihugho?
Omwa kithunga kyenyu mwamalhaba ekirango ngoku omulebererya w’omuthimbo akendi babungira, wukanayihayo erimukokya okwa ky’erirya? Abali omwa mubiiri w’omughulhu wosi ow’embaghane bamalhusibwa okwa Beteli n’erithumwa omw’ithulira kutse omughulhu omulebererya w’omuthimbo akabya w’erileka olhusunzo lhwiwe, mbwino wangana bawathikya eribana ah’erikalha? Olhuhindano lhw’erijoni kutse olhw’embaghane lhwamabya ilhukendibya omwa bulhambu bwenyu, mbwino wangana yihayo eriwathikya olhuhindano lhuthe lhwabya kutse lhukahwamo kutse eriyihayo erithangirira abakasyahindana?
ERIYITHEGHEKERA ERIKANGIRIRYA ABAKENDISYA LHUBUKIBWA
Ngoku kiri omwa Emibiri 24:15, thulindirire esyobbiliyoni sy’abandu erilhubukibwa. Abangyi mubathabana akaghisa k’eriminya Yehova. Bakendi syabana akaghisa ako bakalhubukibwa. a Abaghombe ba Nyamuhanga abasi bingyi kandi abathaleghulha bakendi syasangira omwa mubiiri w’erikangirirya ng’oyo. (Isa. 11:9) Charlotte, oyuwabirithulira omwa Europe, South America, ne Afrika, alindirire ekyo kya kutsibu. Inianatsemire akabugha athi: “Ngalindirire erisyakangirirya abakendi syalhubukibwa. Ngabya ingasoma okwa mundu mulebe oyuwabyaho kera, mughulhu mungyi ngalengekanaya indi: ‘Omundu oyu kwanathaminya Yehova, engebe yiwe yangabere mbaghane.’ Ngalindirire erisyabwira abakendisya lhubukibwa ebya bathalhako.”
N’abaghombe ba Yehova abathaleghulha ababyaho Yesu athali asa okwa kihugho bakendi sy’igha bingyi. Thalengekania nga thukendi syabya n’etseme n’olhusunzo lhungahi erisoborera Danieli eribererera ly’amaminyereri agho ahandika aliwe agho athayitheghereraya. (Dan. 12:8) Kandi ibbwa eriwathikya Ruta na Naomi eriminya ngoku efamile yabu ni nguma y’okwa syalhuamo Masiya? Ka bukendisyabya butseme bunene erisangira omwa mubiiri w’ekihugho kyosi w’erikangirirya, isihakiri akahathikano n’ebikalengemeraya ebiriho munabwire omwa kihugho kibi!
Lino wanga kangania wuthi ku wanzire eriyitheghekera erisyasangira omo ndegheka eyo? Enzira nguma eyilhangirikire ly’erilengaho eryuwania emibere yawu y’erikangirirya n’erisangira mughulhu wosi omwa mubiiri w’erithulira omwa kihugho kyosi munabwire. (Mt. 24:14) Mbulha emyaka kutse emibere eyawulimu lino bikakulemesaya, akaghalha ako wukahiraho kangana kangania ku wunayitheghekire erisyakangirirya abakendisya lhubuka.
Kwesi, ekikulhu eky’eriyibulya kyakino, Mbwino kwenene wunemukandira erisyasighalya ekihugho? Wunemukandira erisyaghondya ekihugho, kuthya n’erighetha-ghetha n’erikangirirya abakendisya lhubukibwa? Wangana kangania ku wunayitheghekire omw’ikolesya ehighisa hyosi-hyosi munabwire ehy’erisangira omwa mibiiri eyiri ng’eya wulindirire erisyakolha wukasighalya ekihugho!
a Lebaya omwatsi “Abandu Bangyi Eribana Ekithunganene” omwa Akaleberyo ak’Okwomwenda 2022.
