1. Omuggati abya akalhangirwa athi omwa buthuku bwe Biblia?

 OMUGGATI abya iby’ebyalya bikulhu eby’abangyi omwa buthuku bwe Biblia. (Enz. 14:18; Lk. 4:4) Kwesi, kyabya kitholere okwa bundi buthuku e Biblia erikolesya ekinywe “omuggati” yikakania okwa byalya ebyosi. (Mt. 6:11; Emib. 20:7) Kandi omuggati abya kitsweka kikulhu omwa bithiko-thiko bibiri bya Yesu ebyasibwe. (Mt. 16:9, 10) Thukabana omughuma w’okwa myatsi eyo omu Yohana sura 6. Thukakania okwa omwatsi ono, thukendi sondyamo amasomo agho thwanga ghenderako munabwire.

2. Ni mughulhu wahi habya ekiyithawa ky’ebyalya?

² Abakwenda ba Yesu babere baghunza erithulira, Yesu mwaghenda nabo omwa bwathu eyisirya w’Engetse ye Galilaya nuku balhuhuke. (Mk. 6:7, 30-32; Lk. 9:10) Mubaghenda omwa mwanya owayisolhwere, omwa kitsweka kye Betesaida. Aliwe enyuma waho, esyongumi sy’abandu mubahikaho, n’ery’usulhaho. Yesu mwathabagheghena. Omwa lhukeri, mwathwamu eribakangirirya okwa Bwami n’erilhamya abalhwere. Bwabere bunemwira, abigha mubabulha abandu bosi abo nga bakendi bana bathi eby’erirya. Obundi abaghuma bʼokwʼibo babya ibanawithe ebyalya bike, aliwe abangyi omw’ibo mubayithagha erighenda omwa byalu eriyaghulha ebyalya. (Mt. 14:15; Yn. 6:4, 5) Yesu angakolireki?

EKITHIKO-THIKO KY’ERIHA ABANDU B’EMIGGATI

3. Yesu mwakolhaki eriberererya ebiyithawa by’ekikumulha ky’abandu? (Lebaya ekisasani ky’okwa kidipa.)

³ Yesu mwabwira abakwenda biwe athi: “Sibatholere bakaghenda; mubahe eky’erirya.” (Mt. 14:16) Eki kyanga kalire kundi habya abalhume nga 5,000. Neryo iwamongerako abakali n’abaana, bangabya ibabya abandu nga 15,000 ababya batholere erilisibwa. (Mt. 14:21) Anderea mwabugha athi: “Hano  hane omulhwana oyuwithe emiggati ithano y’ekisusu n’ehiswe hibiri. Aliwe ebi ibyanahika abandu bosi aba?” (Yn. 6:9) Abanakwa n’abandi bangabya ibabya bakalya kutsibu emiggati y’ekisusu, kandi n’othuswe thuke-thuke thwangabya ithwabya thw’omunyu kandi othwumire. Nomwabine, mbwino esiswe n’emiggati eby’omulhwana abya nabyo, byangan’ughuthirye abandu bangyi aba?

4. Ni byahi ebya thwang’igha omu Yohana 6:11-13? (Lebaya n’ebisasani.)

⁴ Busana n’erianza eritsomana ekikumulha ky’abandu, Yesu mwabwira abigha biwe athi b’ikalhaye abandu ahisi okwa bithi mwa bigurupu-gurupu. (Mk. 6:39, 40; soma Yohana 6:​11-13.) Neryo Yesu mwaha ewasingya oku Thatha wiwe busana n’emiggati n’esiswe. Kyabya kitholere erisima Nyamuhanga, kundi kwenene yuwabathokesaya eribana akalyo. Yesu mwathuhiriraho eky’erileberyako ekyuwene ekyo thwanga gherererya, ekikathw’ibukaya ngoku thutholere ithwasaba thuthe thwalya nomuthwangabya ithwibene kutse ithune n’abandi. Neryo Yesu mwalhayira athi ebyalya bighabawe, neryo abandu mubyalya kandi bamubughutha. Nibya muhabya ebyasaka, ebyo Yesu athabya anzire bik’uthibwa. Neryo mubasorokya ebyasaka, obundi ebyanga kolesibirwe enyuma waho. Yesu mwathuhiriraho eky’erileberyako bikahika okw’ikolesya ndeke ebya thuwithe. Wamabya iwuli mubuthi, mukanaye n’abaana benyu okwa masomo agho mwang’igha omo mwatsi oyu.

5. Abandu mubanza erikolhaki busana n’ekya Yesu akolha ekiro ekyo, kandi Yesu mwasubirya athiki?

⁵ Esyonzira esya Yesu akolesaya akakangirirya n’ebithiko-thiko ebyo akolha mubyatsemesya abandu. Eriminya ngoku Musa abya  iniabirilhaghanisya athi Nyamuhanga angahanganirye omuminyereri w’embaghane, bangabya imubayibulya bathi, ‘Mbwino angabya ini Yesu?’ (Ebi. 18:15-18) Kyamabya ikyabya kithya, kyanga lhangirikire indi angabere muthabali ow’amaaka manene, obundi oyuwanga thokire eriha ekihanda kyosi ky’ebyalya. Ky’ekyaleka ekikumulha ky’abandu ibanza ‘erimuhamba n’erimuyiramo mwami.’ (Yn. 6:14, 15) Yesu kw’aligha ekyo, angabere iniamasangira omwa by’ekipolitiki by’Abayuda, ababya ahisi sy’obuthabali bwe Roma. Mwanaligha? Eyihi. E Biblia yikabugha yithi omwa menge, Yesu ‘mwathasyasuba okwa kithwe.’ Neryo nomwanabya akabana akahathikano erilhua okwa bandi, isyali yingiraya omwa by’ekipolitiki. Eri ka n’isomo okw’ithwe!

6. Thwanga kangania thuthi ku thwanzire erigherererya eky’erileberyako kya Yesu? (Lebaya n’ekisasani.)

⁶ Ni kwenene, abandi sibendi thusaba erikanyia ebyalya kutse erilhamya abalhwere omwa nzira y’ekithiko-thiko; kutse erilengesya erithuyira mw’abami kutse abathabali. Aliwe bangananza thw’ingire omwa by’ekipolitiki omw’ikoma omundu oyo bakalengekanaya bathi angan’uwania emyatsi kutse erianza thumusighike. Aliwe, eky’erileberyako kya Yesu kilhangirikire. Mwaghana eriyingirya omwa myatsi ey’ekipolitiki, nibya n’enyuma waho mwabugha athi: “Obwami bwaghe si bw’ekihugho kino.” (Yn. 17:14; 18:36) Munabwire, Abakristayo  batholere ibagherererya amalengekania n’emikolere ya Yesu. Thukasighika Obwami bwiwe, ithwaha obwema obuhambire kubo, kandi ithwasaba thuthi bwase. (Mt. 6:10) Thuthasuba okwa mwatsi wa Yesu ow’eriha abandu b’ebyalya omwa nzira y’ekithiko-thiko n’erilebya nga ni kindi kyahi ekyo thwang’igha.

‘ERIYITHEGHERERYA EBY’EMIGGATI’

7. Ni kyahi ekya Yesu n’abakwenda biwe bakolha? (Yohana 6:16-20)

⁷ Yesu abere abirilisya ekikumulha ky’abandu, mwabwira abigha biwe athi balhue omwa mwanya oyo baghende e Kapernaumu omwa bwathu, nayu amaghenda okwa kithwe nuku akakiraye abandu abanza erimuyira mwa mwami. (Soma Yohana 6:​16-20.) Abakwenda babere bane omwa bwathu, ekiyagha mukyahitha, kyamaletha erihunga linene n’ebisunda. Neryo Yesu mwasa eyo bali, iniane muthandayira okwa maghetse. Kandi mwabwira omukwenda Petero athi akole ikyan’ekyo. (Mt. 14:22-31) Yesu abere abirihika omwa bwathu, ekiyagha mukyathekana. Eki mukyaleka abigha ibabugha bathi: “Kwenene wuli Mughalha wa Nyamuhanga.” a (Mt. 14:33) Nomwabine, mubathalhangira erisosana eryabya ahakathi-kathi k’ekithiko-thiko eki n’ekya kolerawa ekikumulha ky’abandu. Mariko akathasyabugha okwa mwatsi iwan’oyo athi: “[Abakwenda] mubasweka kutsibu, kundi nibya babya isibali bayitheghererya eby’emiggati, aliwe babya ibakinathere omwa bulengekania.” (Mk. 6:50-52) Omo kwenene, mubalemwa eriyitheghererya Yehova ng’abya iniabiriha Yesu y’akaghalha kangahi ak’erikolha ebithiko-thiko. Buthuku buke enyuma waho, Yesu mwathasyakania okwa kithiko-thiko ky’emiggati, kandi mwathasya thweghesya erind’isomo.

8-9. Busana naki ekikumulha ky’abandu mukyakwamirira Yesu? (Yohana 6:26, 27)

⁸ Ekikumulha ky’abandu ekyo Yesu alisaya mubahwerya amalengekania wabu okw’ighuthya ebiyithawa byabo by’ekinyamubiri n’eriyisunza lyabo. Bathi? Ekiro ekyakwamako, mubalhangira ngoku Yesu n’abakwenda biwe babirighenda. Neryo ekikumulha ky’abandu mukyasamba omwa mathu awalhua e Tiberio, n’erighenda e Kapernaumu erithoka eribana Yesu. (Yn. 6:22-24) Mbwino enzumwa ngulhu eyaleka ibakolha ekyo ly’erithasyowa bingyi ebihambire okwa Bwami? Eyihi. Ekikulhu kutsibu ekyo babya bakalengekaniako ky’ekiyithawa kyabo eky’ekinyamubiri eky’ebyalya. Thukaminya ekyo kya thuthi?

⁹ Lhangira ekyabya omughulhu ekikumulha ky’abandu kyeghaya Yesu hakuhi ne Kapernaumu. Yesu mwababwira ahathe eribisirira ngoku ekikulhu okw’ibo ly’erighuthya ebiyithawa byabo by’ekinyamubiri eby’akathuku kake. Mwaminya ngoku ‘mubalya okwa miggati bamughutha’ ebyalya “ebikatsanda.” Omwakanya k’ekyo, mwababwira athi bakolere “ebyalya ebikabyaho busana n’eriha engebe y’erikotha.” (Soma Yohana 6:​26, 27.) Yesu mwababwira athi Thatha wiwe angabahere ebyalya ng’ebyo. Eky’eribugha indi ebyalya byangana kolya okwa ngebe y’erikotha kitholere eribya imukyabaswekya! Ni byalya mulingoki ebyangakolire ekyo, kandi abahulikiriri ba Yesu banga bibwene bathi?

10. “Emibiiri ya Nyamuhanga” eya abandu babya batholere eriminya y’eyahi?

¹⁰ Kilhangirikire ngoku, Abayuda abo bangabya imubayowa ibatholere eriyira eky’erikolha eritholera erihebwa ebyalya ng’ebyo. Obundi mubalengekania okwa “mibiiri” eyiri omwa Mighambo ya Musa. Nomwabine, Yesu mwababwira athi: “Emibiiri ya Nyamuhanga y’eno, yithi mw’ikiriraye oyo athuma.” (Yn. 6:28,  29) Erikangania erikirirya omwa muthumwa wa Nyamuhanga kikayithaghisibawa erithoka erihebwa “engebe y’erikotha.” Kundi nibya Yesu abya inianakikaniryeko. (Yn. 3:16-18, 36) Kandi enyuma waho angabere n’ebingyi by’erikania ebikakanganaya nga thwangabana thuthi engebe y’erikotha.—Yn. 17:3.

11. Abayuda mubakangania bathi ngoku ekya babya bakayithagha kisa b’ebyalya? (Esyonyimbo 78:24, 25)

¹¹ Abayuda abo mubathaligha esyongangirirya sya Yesu esihambire oko “mibiiri ya Nyamuhanga” emihyaka. Mubamubulya bathi: “Ni kiminyikalho kyahi ekya wukayakolha, nuku thwanga kilhangira kandi thwanakw’ikirirya?” (Yn. 6:30) Mubabugha bathi abasokulhu babu ab’omwa biro bya Musa mubahebwa emana, eyangana linganisibwa n’omuggati. (Neh. 9:15; soma Esyonyimbo 78:​24, 25.) Kilhangirikire ngoku, amalengekania wabu, abya okw’iw’uthibwa n’omuggati owonyine-nyine. Mubalemwa eribulya Yesu nuku abasoborere ndeke akathasyakania okwa “omuggati owalhua elhubulha,” awalinganisibawa n’emana eyalhua elhubulha eyikaha engebe. (Yn. 6:32) Erihwerya amalengekania w’okwa biyithawa by’ekinyamubiri mukyaleka ibagheghena ekwenene ey’obunyakirimu eyo Yesu abya akalengaho eribabwira. Omwatsi oyu akathweghesayaki?

EKYA THUTHOLERE ITHWAHWERYAKO AMALENGEKANIA

12. Yesu mwakangania athi eky’omughaso kutsibu ky’ekyahi?

¹² Hano hane erisomo likulhu eryo thuk’ighira omu Yohana sura 6. Thutholere ithwahwerya amalengekania okwa biyithawa byethu by’obunyakirimu. Wibuke ngoku Yesu mwabugha enzumwa eyo omughulhu aghana erilengwako na Sitani. (Mt. 4:3, 4) Kandi omw’Ikangirirya ly’okwa Kithwe, mwahira omuwathu w’okw’iminya ngoku thuwithe ekiyithawa ky’eby’obunyakirimu. (Mt. 5:3) Neryo, ithwangana yibulya thuthi, ‘Mbwino engebe yaghe yinakanganirye ngoku ngahweraya kutsibu amalengekania okw’iberererya ebiyithawa byaghe by’obunyakirimu omwakanya k’eryughuthya eriyisunza lyaghe ly’ekinyamubiri?’

13. (a) Busana naki si kibi ithwe eritsemera akalyo? (b) N’ikunga lyahi eryo thutholere ithwalengekaniako? (1 Abanya Korinto 10:6, 7, 11)

¹³ Kinatholere ithwe erisaba busana n’ebiyithawa byethu by’ekinyamubiri n’eribitsemera. (Lk. 11:3) Erikolha kutsibu likaleka ‘ithwalya n’eripulya,’ ekindu ekikathulethera etseme kandi ekyo ‘Nyamuhanga abirithuha.’ (Omu. 2:24; 8:15; Yak. 1:17) Nomwabine, thutholere ithwahira eby’ekinyamubiri omwa mwanya wabyo. Omukwenda Paulo mwakania okw’eki akahandikira Abakristayo ababyaho omughulhu w’Ekiyuda iniakisiya iniahwa. Mwakania okwa bindu birebe ebyabya okwa Baisraeli, imwamune n’ebyabya ibane hakuhi n’Ekithwe Sinai. Mwaghusa n’okwa Bakristayo kw’akasali athi sibabye bakakwama “esyongumbu sy’emyatsi mibi, ngoku abo nabu [Abaisraeli] bakwama esyongumbu esyo.” (Soma 1 Abanya Korinto 10:​6, 7, 11.) Abaisraeli mubalighira erianza ebyalya bya kutsibu, nibya kyamaleka n’ebithiko-thiko ebya Yehova abakolera ibyabya nga ni “emyatsi mibi.” (Emig. 11:4-6, 31-34) Kandi omughulhu baramaya ekyana ky’ende eky’esyamaghetse, mubalya, bamanywa kandi bamatsema. (Eri. 32:4-6) Paulo mwahandika ebya bahikako ng’erikunga okwa Bakristayo ababyaho okw’ihwererera ly’omughulhu we Kiyuda omwa mwaka we 70 E.K. Lino thuli okw’ihwererera ly’omughulhu mubi ono, neryo thutholere ithwaghendera ndeke okw’ihabulha lya Paulo.

14. Bikahika okwa byalya, ni byahi ebyo thutholere ithwalindirira omwa kihugho kihya-kihya?

¹⁴ Yesu akakania okwa “ebyalya byethu eby’ekiro ekya munabwire,” mwakania okwa buthuku  omughulhu erisonda lya Nyamuhanga likendi syakoleka okwa “kihugho ngoku liri omwa lhubulha.” (Mt. 6:9-11) Ni kasasani kahi akakasa omwa bwongo bwawu? E Biblia yikakanganaya ngoku erisonda lya Nyamuhanga busana n’ekihugho mwamuli eribya n’akalyo akuwene. Ngoku kiri omu Isaya 25:6-8, thukendi syatsemera ebyalya bingyi eby’ekinyamubiri ebyuwene ahisi sy’Obwami bwa Yehova. Esyonyimbo 72:16 hakalhaghulha hathi: “Engano yibye nene omwa kihugho; n’ehithwe hyusule mw’ebyalya.” Mbwino wunalindirire erikolesya engano eyo eritsumba ebyalya birebe ebyo wukatsemera kutse eritsumba ebyalya birebe ebyo wuthe wathatsumba? Ery’ongera okw’ebyo, iwangana syatsemera eby’erinywa ebikalhua omwa bighuma ebyo wayiherera. (Isa. 65:21, 22) Kandi obuli mughuma okwa kihugho akendi syatsemera ebindu ebyo.

15. Ni kangiriribwa lyahi erikendi syabyaho okw’abo abakendi syalhubuka? (Yohana 6:35)

¹⁵ Soma Yohana 6:35. Abalya emiggati n’esiswe ebyo bahebawa na Yesu balindirireki? Omw’ilhubuka ly’obuthuku obukasa, wangana syabanangana n’abaghuma b’okw’ibo. Nomwakine indi omwa buthuku obo mubathakangania erikirirya, bangana syalhubukibwa. (Yn. 5:28, 29) Abali ng’abo bakendisyabya b’eriminya ebinywe bya Yesu bino nga bikamanyisayaki: “Ingye indi muggati w’engebe. N’oyukasa okw’ingye syendi syakwa enzalha nahake.” Bakendi syayithagha erikulha-kulhania erikirirya omwa kihongwa ky’endongolya, erikirirya ngoku mwahayo engebe yiwe busana nabu. Okwa buthuku obo, hakendi syabya endegheka ey’erikangiriribwa ly’obunyakirimu oko babirilhubukibwa n’abaana abakendi syabuthwa okwa buthuku obo. Ka kikendi syatsemesya erisangira omwa ndegheka ey’erikangiriribwa eyi! Iwe erikolha ekyo kikendi syatsemesya kutsibu kwilhaba erirya omuggati wonyine-nyine. Erithwalira haghuma, emyatsi y’obunyakirimu y’eyikendi syabya mikulhu.

16. Thukendi syakania okuki omo mwatsi owakakwamako?

¹⁶ Thwamabirikania okwa bighuma by’okwa biri omwa mwatsi owali omu Yohana esura 6, aliwe Yesu abya inianawithe ebindi bingyi eby’erikangirirya ebihambire okwa “ngebe y’erikotha.” Abayuda abo babya batholere erihulikirira ndeke omwatsi oyo, nethu kuthya munabwire. Thukendi lholha embere erikania oku Yohana sura 6 omo mwatsi owakakwamako.