OMWATSI W’ERIGHA 51
OLHWIMBO 3 Amaha, Amaaka, n’Erisika Lyethu
Emisoni Yawu ni y’Obughuli Embere sya Yehova
“Wabirisaka emighanzo y’emisoni yaghe. Siyisakire omo kitabu kyawe kwehi?”—ESY. 56:8.
EKIGHENDERERWA
Ngoku Yehova akayitheghereraya ndeke obulhumi bwethu kandi ngoku akathuha erihumulikanibwa erikayithaghisibawa.
1-2. Ni mibere yahi eyanga leka ithwathoghongya emisoni?
ITHWE bosi thwanathoghongirye emisoni. Hamabya ekikathutsemesaya kutsibu, thwangana thoghongya emisoni y’obutseme. Obundi muthwalira omughulhu ekindu kikulhu kutse eky’embaghane kyathubyako—ng’eky’erileberyako, omughulhu omwana wawu abuthawa, omughulhu wuk’ibuka ekindu ekyakutsemesaya kutsibu, kutse omughulhu wathangirira munywani wawu mwanzwa oyo wabya iwamabirighunza myaka mingyi isiwuli lholhako.
2 Nomwabine, mughulhu mungyi emisoni yikakanganaya obulhumi obuli omwa mithima yethu. Ng’eky’erileberyako, thwangana lira omundu mulebe amathuponesya kutsibu. Ithwangana thoya emisoni busana n’obulhumi obukalhwiririra omw’ilhwalha kutsibu kutse eriholerwa omwanzwa wethu. Okwa buthuku ng’obo, ithwangana yowa ngoku omuminyereri Yeremia ayowa omughulhu abanya Babeli bathoghothaya e Yerusalemu. Yeremia mwabugha athi: “Eriso lyaghe likasenda mw’esyonyusi sy’amaghetsi . . . Ameso waghe akasendaya emisoni, butsira eryumbya.”—Eki. 3:48, 49.
3. Yehova akayowa athi akalhangira abaghombe biwe bakaghalhwa? (Isaya 63:9)
3 Yehova anasi nga thwabirithoghongya emisoni mingahi busana n’ebitsibu ebikalire. E Biblia yikathukakasaya ngoku anasi emibere eyikaletha obulhumi eyo abaghombe biwe bakalhabamo, kandi akathwowa thukamusaba obuwathikya. (Esy. 34:15) Aliwe Yehova syali subulira okw’ikwama kyathulhangira n’erithwowa. Ng’omubuthi w’olhwanzo, akahambawako kutsibu akalhangira abaana biwe bakalira, kandi anayitheghekire erithuwathikya.—Soma Isaya 63:9.
4. Ni by’erileberyako byahi bye Biblia ebyo thukendi kaniako, kandi ni byahi ebyo thukend’igha oku Yehova?
4 Omwa Kinywe kiwe, Yehova akathubisulira ekya abya akakolha abaghombe biwe bakathoghongya emisoni. Thwangana lhangira ekyo omw’ilebya eky’erileberyako kya Hana, Dawudi, n’Omwami Hezekia. Ni kyahi ekyaleka ibathoghongya emisoni? Yehova mwakolhaki bakasaba obuwathikya? Kandi eby’erileberyako byabu byanga thuwathikya bithi thukathoghongya emisoni ey’obulighe, ey’erighoberibwa, kutse ey’erihwa amani?
EMISONI Y’OBULIGHE
5. Emibere eyo Hana abyamo muyaleka iniayowa athi?
5 Hana mwalhaba omwa bitsibu muthina-muthina ebyaleka iniathoghongya emisoni y’obulighe. Ekighuma ky’okwa bitsibu ebi ly’eribya omwa butheke obw’omulhume oyuwithe abakali babiri, kandi owundi mukali wa mwira wiwe, ya Penina, iniamuponire. Ekilhabire okw’aho, Hana syabya awithe omwana, aliwe Penina iniawithe abaana bangyi. (1 Sam. 1:1, 2) Penina iniakabera erisekererya Hana ahabw’eribya mughumba. Wanga yowire wuthi omwa mibere ng’eyo? Hana mwahithana kutsibu erihika ‘okw’ilira n’eriyira [erighana] akalyo,’ kandi mwabya “n’obulighe omo muthima.”—1 Sam. 1:6, 7, 10.
6. Hana mwakolhaki erithoka erihumulikanibwa?
6 Hana mwakolhaki erithoka erihumulikanibwa? Ekindu kighuma ekyamuwathikaya ly’erighenda ahali eriramya ly’okwenene, omwa hema y’erihindanamo. Iniane eyo, obundi hakuhi n’obw’ingiriro bw’ekibugha ky’ehema y’erihindanamo, “mwasaba Omwami Mukulhu, kandi mwalira kutsibu emisoni.” Mwalemba-lemba Yehova athi: ‘Samalira kwenene obulighe bw’omughombe wawu w’obukali, n’erinyibuka.’ (1 Sam. 1:10b, 11) Hana mwabwira Yehova y’eriyowa liwe lyosi omwa musabe. Yehova angabya imwahambwako kutsibu akalhangira emisoni ya mwali wiwe ow’obughuli oyu!
7. Hana abere abiribwira Yehova y’ebyosi ebiri omwa muthima, ni humulikanibwa lyahi erya athunga?
7 Hana mwayowa athi enyuma w’eribwira Yehova y’ebyosi ebiri omwa muthima wiwe omwa musabe n’eribana erihumulikanibwa ly’Omuhereri Mukulhu Eli? E Biblia yikabugha yithi: “Omukali oyo mwaghenda athya, kandi mwalya; n’obusu bwiwe isibukiri n’obulighe kandi.” (1 Sam. 1:17, 18) Nomwakine indi emibere eyikalire eyo Hana alhabamo muyathahinduka, mwathekana. Abya iniabirighusira Yehova y’omuheke wiwe w’obulighe. Yehova mwalhangira obulighe bwiwe, amowa akalira, n’enyuma waho amamutsumulha omw’imulighira eriheka obukule.—1 Sam. 1:19, 20; 2:21.
8-9. Ngoku kiri omwa Abaebrania 10:24, 25, busana naki thutholere ithwalengaho erihindana okwa mihindano y’Ekikristayo? (Lebaya n’ekisasani.)
8 Amasomo agho thuk’igha. Mbwino wunemughumira emibere eyikalire eyikaleka iwathoghongya emisoni y’obulighe? Obundi wuli omwa bulighe busana n’eriholerwa omughuma w’okwa bahughu bawu kutse omunywani. Okwa buthuku ng’obo, ni kya buli kiro erianza eribya iwuwene. Ngoku Hana anahumulikanibawa n’erihimbwa omw’ighenda okwa hema y’erihindanamo, nawu wangana humulikanibwa omw’ihindana okwa mihindano y’Ekikristayo—nomuwangabya isiwuli yowa ndeke. (Soma Abaebrania 10:24, 25.) Thunemuhulikirira emyatsi ye Biblia eyikahumulikanaya ithune okwa mihindano, Yehova angana thuwathikya erisubya omwa mwanya ow’amalengekania owathuwene mw’awuwene. Ekyo kyangana thuwathikya erithekana, emibere eyo thulimo nomuyangaghana erihinduka aho n’aho.
9 Kandi okwa mihindano yethu, thukatsema eribya haghuma n’abalikyethu ab’olhukeri abakathuhimba, abakaleka ithwayowa ndeke busana n’erithukangania ku bathutsomene n’erithwanza. (1 Tes. 5:11, 14) Thalengekania okwa kyalholirweko kya mughalha wethu omutemburi w’embaghane oyuwaholerawa mukali wiwe. Mwabugha athi: “Ngakina thoghongaya emisoni. Hakanayira ingabya ingyuwene n’erikwama kyalira. Ngabana erihumulikanibwa erya ngayithagha okwa mihindano yethu. Ebinywe ebikahamba ebya balikyethu bakabugha bikaleka ingayowa ndeke. Nomwakine indi ngayowa inabirihangya-hangya kutse eryubaha ngathe ngahika okwa mihindano, ngayowa ndeke nabirihikayo.” Omughulhu thuli okwa mihindano, Yehova angana kolesya balikyethu erithuwathikya.
Abaramya balikyethu bangana thuhumulikania (Lebaya enungu 8-9)
10. Eky’erileberyako kya Hana kyanga thuwathikya kithi thukayowa nabi kutsibu?
10 Hana mwathasyahumulikanibwa omw’ibwira Yehova y’eriyowa liwe lyosi erilhabira omwa musabe. Nawu wangana ‘hira erihangya-hangya lyawu lyosi oku [Yehova],’ iwunayikethere ngoku akendi kuhulikirira. (1 Pet. 5:7) Mwali wethu oyo mwira wiwe ithibawa n’abibi ak’ibuka bino: “Munayowa omuthima waghe ngabiribbunangwa mwa hitaho-hitaho kandi nga syendi syalhama. Munabana erihumulikana ingasaba Thatha waghe w’elhubulha ow’olhwanzo, Yehova. Okwa bundi buthuku, iningabulha ebinywe ebitholere eby’erikolesya, aliwe iniakanyiyitheghereraya. Omughulhu nabya ingayowa nabi, iningamusaba obuthekane. Iningayowa ingabirithekana omwa bulengekania n’omwa muthima neryo ingalholha embere.” Wukabya wukabwira Yehova y’eriyowa lyawu lyosi, emisoni yawu y’obulighe yikamuhambako kutsibu, iniayitheghererya obulhumi obuli omwa muthima wawu. Nomwakine indi ebikaleka iwahangya-hangya bikasighalha ibikineho, Yehova akahumulikanaya omuthima wawu owali mw’obulighe kandi iniakuwathikya erithekana. (Esy. 94:19; Fil. 4:6, 7) Kandi akendisya kuhemba busana n’eriyiyinia lyawu buthaleghulha.—Ebr. 11:6.
EMISONI Y’ERIGHOBERIBWA
11. Ebitsibu ebya Dawudi abana mubyaleka iniayowa athi?
11 Omwa ngebe yiwe, Dawudi mwaghumira ebitsibu muthina-muthina ebikabbuna omuthima ebyaleka iniathoghongya emisoni. Mwakanganibwa obuyighu n’erighoberibwa n’abandu abo ayikethere. (1 Sam. 19:10, 11; 2 Sam. 15:10-14, 30) Buthuku bughuma, mwahandika athi: “Namalhuha omw’isimba lyaghe; obuli kiro ngatsapaya engyingo yaghe omo misoni, ngatsapaya aho ngaghotsera busana n’erilira.” Ni kyahi ekyaleka Dawudi iniayowa athya? Akasoborera athi: “Busana n’esyonzighu syaghe syosi.” (Esy. 6:6, 7) Ebyo abandi bakolha ebyaponesaya Dawudi mubyaleka iniayowa iniali omwa bulhumi kandi kyamaleka iniathoghongya emisoni.
12. Ngoku kiri omwa Esyonyimbo 56:8, ni kyahi ekya Dawudi aby’akakasirye?
12 Nomwakine indi Dawudi mwabana ebitsibu, abya inianakakasirye ngoku Yehova amwanzire. Mwahandika athi: “Kundi Omwami Mukulhu [Yehova] akowa erilira lyaghe.” (Esy. 6:8) Okwa bundi buthuku, Dawudi mwabugha ebinywe ebikahimba ebiri omwa Esyonyimbo 56:8. (Soma.) Ebinywe ebyo bikathukanganaya ndeke-ndeke ngoku Yehova athwanzire kandi ngoku athutsomene. Dawudi mwayowa Yehova ng’amasorokerya emisoni yiwe y’omwa tsupa kutse erihandikayo omwa kitabu. Dawudi abya inianakakasirye ngoku Yehova akalhangira n’eryibuka obulhumi bwiwe. Dawudi abya inianakakasirye ngoku Thatha wiwe w’elhubulha ow’olhwanzo syali subulira okw’iminya ebyo abirilhabamo aliwe kandi anasi nga byabirimuhambako bithi.
13. Abandi bamathuponesya, ni kyahi ekyanga thuhumulikania? (Lebaya n’ekisasani.)
13 Amasomo agho thukigha. Mbwino wunemughumira obulighe obukalhwiririra omw’iponesibwa kutse omw’ighoberibwa n’omundu oyo wukayikethera? Obundi omuthima wawu anemulhuma busana n’obuthethane bwawu erithwika kutse obutheke erithwika kitsumbukirania, kutse obundi omundu oyo wanzire mwakanaleka erikolera Yehova. Mughalha wethu oyo mukali wiwe asingira n’erimusighania akabugha athi: “Munasweka kandi munathakikirirya. Munayowa mwa wabbule, namabya omwa bulighe, n’erihithana.” Wamabya iwune mughumira erighoberibwa n’eriponesibwa, bana erihumulikana busana n’eriminya ngoku Yehova syendi syakusighania. Mughalha wethu oyo akabugha athi: “Nabiriminya ngoku obunywani obwa thuwithe n’abandu bwanganahwa aliwe Yehova ni Muhanganiri wethu. Nomuhangabyaki, akabya iniane nethu. Syendi syasighania abathaleghulha biwe.” (Esy. 37:28) Kandi wibuke, olhwanzo lhwa Yehova lhulengire olhw’omundu wosi-wosi. Obulhumi obwa wukathunga wukaghoberibwa n’omundu mulebe n’omubwangabya bungahi, sibuli hamba okw’itsomana eryo Yehova akuwithire. (Abar. 8:38, 39) Enzumwa yiri yithi: Omundu n’omwanga kukolhaki, Thatha wawu w’elhubulha akwanzire.
Ekitabu ky’Esyonyimbo kikathukakasaya ngoku Yehova ali hakuhi n’ab’emithima eyibbunangikire (Lebaya enungu 13)
14. Ni kakasya lyahi erya thukabana omwa Esyonyimbo 34:18?
14 Omughulhu thukaghumira ekitsibu eky’erighoberibwa, thwangana thasyabana erihumulikanibwa omwa binywe bya Dawudi ebiri omwa Esyonyimbo 34:18. (Soma.) Ekitabu kighuma kikabugha kithi “ab’emithima yibbunangikire” kyangana manyisya “abathawithe amaha wosi-wosi.” Yehova akawathikaya athi abawithe eriyowa ng’eri busana n’eriponesibwa? Ng’omubuthi w’olhwanzo oyukabuyabuya omwana wiwe n’erimuhumulikania omughulhu ali omwa bulighe, Yehova “ali hakuhi” nethu—ni w’olhukeri mughulhu wosi kandi akabya inianayitheghekire erithuwathikya emithima yethu yamabya iyabiribbunika busana n’erighoberibwa kutse eriherya ekindu kirebe. Yehova anayitheghekire erihumulikania emithima yethu yamabya iyabiribbunika kandi thwamayowa mwa babbule. Kandi abirithulhaghanisya ebindu bingyi ebya thulindirire ebikathuwathikaya erighumira ebitsibu ebya thuwithe munabwire.—Isa. 65:17.
EMISONI Y’ERIHWA AMANI
15. Ni kitsibu kyahi ekyo Hezekia alhabamu ekyaleka inialira?
15 Iniane w’emyaka 39, Omwami Hezekia owe Yuda mwaminya ngoku abirilhwalha obulhwere obukalire. Omuminyereri Isaya mwathulha omwatsi wa Yehova owakakanganaya ngoku obulhwere bwa Hezekia obo bukendi mw’itha. (2 Bam. 20:1) Muhabya nga sihali maha busana na Hezekia. Omwatsi oyu abere abirikukubalya Hezekia, mwalira kutsibu. Amasaba Yehova ya kutsibu.—2 Bam. 20:2, 3.
16. Yehova mwakolhaki Hezekia akamulemba-lemba inianemuthoghongya emisoni?
16 Yehova mwahambwako busana na Hezekia erimulemba-lemba iniane mulira, neryo omwa lhukeri Yehova mwabugha athi: “Nabiriowa erisaba lyawu, namalhangira emisoni yawu; lebaya, ngendi kulhamya.” Erilhabira omu Isaya, omwa lhukeri, Yehova mwalhaghanisya ery’ongera engebe yiwe n’erilhamya e Yerusalemu omwa byalha by’Abasuria.—2 Bam. 20:4-6.
17. Yehova akathuwathikaya athi omughulhu thuwithe ekitsibu ky’obulhwere obukalire? (Esyonyimbo 41:3) (Lebaya n’ekisasani.)
17 Amasomo agho thuk’igha. Mbwino wunemughumira obulhwere obukabya nga sibwendi syalhama? Bwira Yehova omwa musabe, nibya iwune muthoghongya emisoni. E Biblia yikathukakasaya yithi “Thatha w’erighanyira, na Nyamuhanga w’erikirania lyosi” akendi thuhumulikania omwa bitsibu byethu byosi. (2 Kor. 1:3, 4) Munabwire, sithwanga lengekania thuthi Yehova akendi ghunzaho ebitsibu byethu byosi, aliwe thunasi ngoku akendi thuwathikya. (Soma Esyonyimbo 41:3.) Erilhabira omwa mulimu wiwe abuyirire, Yehova akathuha amaaka, amenge, n’obuholho bw’omuthima erithoka eribighumira. (Emi. 18:14; Fil. 4:13) Kandi akathuhumulikanaya omw’ithuha amaha aw’aseghemere okwa Biblia aw’erisyalhangira emiringo yosi y’amalhwere yikahwaho.—Isa. 33:24.
Yehova akendi subirya emisabe yethu omw’ithuha amaaka, amenge, n’obuholho bw’omuthima (Lebaya enungu 17)
18. N’isako lyahi erikakuhumulikanaya omughulhu wukaghumira ekitsibu ekikalire kutsibu? (Lebaya akasanduko “ Ebinywe Ebikahumulikanaya Ebitholere Eryumya Emisoni Yethu.”)
18 Ebinywe bya Yehova mubyahumulikania Hezekia. Nethu thwangana humulikanibwa erilhabira omwa Kinywe kya Nyamuhanga. Yehova abirithuha e Biblia omuli ebinywe ebikahumulikanaya ebikaleka ithwayowa ndeke thukabana ebitsibu. (Abar. 15:4) Omughulhu mwali wethu owe West Africa apimawamo ekansa, iniakabera eririra. Akabugha athi: “Erisako erikanyihumulikanaya kutsibu ly’eriri omu Isaya 26:3. Nomwakine indi sithwanga kakirya kutse erighunzaho ebitsibu ebyo thukalhabamo, omulhondo oyo akanyikakasaya ngoku Yehova anganathuha obuholho bw’omuthima obwangaleka ithwabya ithunathekene thukayira eky’erikolha omughulhu thuwithe ebitsibu.” Mbwino hane erisako erikakuhumulikanaya omughulhu wuwithe ekitsibu ekikakulengako kutsibu, obundi nibya ekikabya nga sikyangahwaho?
19. Ni kyahi ekya thulindirire omwa buthuku obukasa?
19 Thuli haali omwa biro by’enyuma-nyuma, kandi thunakyasi ngoku ebikaleka ithwathoghongya emisoni bikendi yongera. Aliwe ngoku thwanamabirilhangira omwa ky’erileberyako kya Hana, Dawudi, n’Omwami Hezekia, Yehova akalhangira emisoni eya thukathoghongoya kandi akahambawako kutsibu. Emisoni yethu ni y’obughuli embere siwe. Neryo omughulhu thukabana ebitsibu ebikalire, ahathe erithika-thika thwanzire ithwabwira Yehova y’ebyosi ebiri omwa mithima yethu omw’isaba. Ambi isithwasyayisolholha oku balikyethu ab’olhwanzo abali omwa kithunga. Kwesi ka thulhole embere erihumulikanibwa omwa binywe ebikahumulikanaya ebiri omwa Biblia. Ithwangana kakasya ngoku thwamalholha embere eriyiyinia buthaleghulha, Yehova akendi syathuhemba. Ekyo mwamune n’omulhaghe mubuyanga owakakanganaya ngoku omwa buthuku obuthe bw’ahaali Yehova akendi sangulha omwa meso wethu mw’emisoni y’obulighe, ey’erighoberibwa, n’ey’erihwa amani. (Erib. 21:4) Neryo thukendi syathoghongya emisoni y’obutseme misa.
OLHWIMBO 4 ‘Yehova Ni Mulisya Waghe’
