1. Abandi bangana yowa bathi bikahika okw’ibyaho kera na kera?

 ABANDU bangyi bakayitheghaya bikahika okwa ebya bakalya n’erilengaho erikolha ebisasayizi mughulhu wosi, erithoka eribya ibanawithe amaghalha awuwene. Nomwabine, sibali lengekanaya bathi bangana byaho kera na kera. Eriyisunza eryo likabya nga siryanga thokekana kandi wangana ghana eriyisunza ekyo ahabw’amalighe awakasa busana n’erikulha omwa myaka. Nomwabine, Yesu mwakania ndeke okwa “engebe y’erikotha,” ngoku kikanganibwe omu Yohana 3:16 na 5:24.

2. Ni byahi ebya Yohana sura 6 hakabugha okwa ngebe y’erikotha? (Yohana 6:39, 40)

² Kiro kighuma, omwa nzira y’ekithiko-thiko Yesu mwalisya esyongumi sy’abandu b’emiggati n’esiswe. a Ekyo kyabya kibuya, aliwe ebyo abugha ekiro ekyakwamako mubyaswekya kutsibu. Ekikumulha ky’abandu kyabya kyabirimukwama e Kapernaumu, hakuhi n’omusike w’Engetse ye Galilaya, eyo mwabwira abandu ngoku bakendi syalhubukibwa n’eribana engebe y’erikotha. (Soma Yohana 6:​39, 40.) Wun’ibukire ekyo, ibuka banywani bawu n’abanzwa bawu ababiriholha. Ebinywe bya Yesu bikakanganaya ngoku abangyi ababiriholha bakendi syalhubukibwa kandi ngoku iwe haghuma n’abanzwa bawu mwangana syabana engebe y’erikotha. Nomwabine, ebinywe ebyo Yesu ongerako ebiri omwa Yohana sura 6 byabirikalira abangyi eriyitheghererya. Thuthabikaniako.

3. Ngoku kiri omu Yohana 6:51, ni byahi ebyo Yesu ayibisulhako?

³ Ekikumulha ky’abandu ababya e Kapernaumu mubalhangira erisosana eriri ahakathi-kathi k’emiggati eyo Yesu abya iniabiribaha n’emana eyo Yehova aha abathatha-kulhu wabu. Omo kwenene, amasako akahulha emana mwa “kalyo  [omuggati] akakalhua elhubulha.” (Esy. 105:40; Yn. 6:31) Yesu mwakolesya emana eyi ng’omusingyi w’ebya akangiriraya ebyakwamako. Nomwakine indi Nyamuhanga mwahayo emana omwa nzira y’ekithiko-thiko, erighunzerera, abalya kuyo mubaholha. (Yn. 6:49) Mbaghane n’ekyo, Yesu mwayahulhamo “omuggati w’okwenene erilhua elhubulha,” “omuggati wa Nyamuhanga,” kandi “muggati w’engebe.” (Yn. 6:32, 33, 35) Yesu mwakangania embaghane ngulhu eyiri ahakathi-kathi kiwe n’emana eyo. Mwabugha athi: “Ingye indi muggati owaliho owandaghalha erilhua elhubulha. Omundu wosi-wosi amalya okwa muggati oyu iniakendi syabyaho kera na kera.” (Soma Yohana 6:51.) Abayuda abo mubakukubalha. Busana naki Yesu iniabugha athi iyo ni “muggati” owalhua e lhubulha owalengire emana eyo Nyamuhanga aha abathatha-kulhu wabu omwa nzira y’ekithiko-thiko? Neryo Yesu mwabaha eky’erisubirya ekikaswekaya omw’ibugha athi: “Omuggati ogho ngendiha . . . w’omubiri waghe.” Angabya iniamanyisayaki? Thutholere ithwanza eriyitheghereryakyo kundi eky’erisubirya ekyo kikakanganaya ngoku kithokekene ithwe n’abanzwa bethu eribana engebe y’erikotha. Leka thulebaye ekya Yesu amanyisaya.

OMUGGATI W’ENGEBE N’OMUBIRI WIWE

4. Ni kyahi ekyaleka ebya Yesu abugha ibyaswekya abandi?

⁴ Abangyi b’okwa bahulikirira Yesu mubasweka akabugha athi akendi hayo ‘omubiri wiwe’ busana n’engebe y’ekihugho. Mbwino mubalengekania bathi akayabaha omubiri wiwe owonyine-nyine nuku balyegho, ekindu ekyanga manyisirye erirya omundu? (Yn. 6:52) Aliwe lhangira ebyo Yesu ongerako ebyaswekaya kutsibu bino: “Mwamathendirya omubiri w’Omughalha w’omundu n’erinywa omusasi wiwe, isimuwithe engebe.”—Yn. 6:53.

5. Busana naki ithwakakasya ngoku Yesu syamanyisaya athi abandu banganywire omusasi wiwe owonyine-nyine?

⁵ Omwa biro bya Noa, Nyamuhanga mwabwira abandu athi isibalya omusasi. (Enz. 9:3, 4) Yehova mwathasyasuba omwa Mughambo oyo akaha Abaisraeli b’ebihano biwe. Owosi-wosi oyukalya omusasi abya ‘w’erihiwa [erithibwa].’ (Law. 7:27) Yesu mwasighika Omughambo oyo. (Mt. 5:17-19) Neryo sikihikire erilengekania thuthi Yesu angabwire ekikumulha ky’Abayuda athi balye omubiri wiwe owonyine-nyine kutse erinywa omusasi owali omwa mikyi yiwe. Ahathe erithika-thika, omw’ibugha ebinywe ebikaswekaya ebi, Yesu abya iniali okw’ikangirirya abandu ngoku bangabana “engebe y’erikotha.”—Yn. 6:54.

6. Thutholere ithwayitheghererya thuthi ebinywe bya Yesu ebihambire okw’irya omubiri wiwe n’erinywa omusasi wiwe?

⁶ Yesu abya akamanyisyaki? Kilhangirikire ngoku Yesu abya akakania omwa nzira y’omusyo ngoku anakolha ekyo omughulhu akanaya n’omukali Omusamaria athi: “Oyukanywa okwa maghetse agho ngendi muha syendi syakwa enyotha nahake, aliwe amaghetse agho ngendi muha akendi syabya ngununuko omw’iyo eyikendi syamuha engebe y’erikotha.” (Yn. 4:7, 14) b Yesu syabya akabwira omukali Omusamaria athi angabwene engebe y’erikotha omw’ikwama kyathanywa amaghetse malebe awonyine-nyine. Kuthya, Yesu syabya akabwira ekikumulha ky’abandu abo akanaya nabu e Kapernaumu athi bangabereho kera na kera kubalya omubiri wiwe owonyine-nyine n’erinywa omusasi wiwe owonyine-nyine.

 OWUNDI MUGHULHU OGHO YESU ABUGHIRAMO EBINYWE EBIRI NG’EBYO

7. Abandi bakabugha bathiki okwa binywe bya Yesu ebiri omwa Yohana 6:53?

⁷ Abandi banya madini bakabugha bathi ebinywe bya Yesu ebiri omu Yohana 6:53 ebihambire okw’irya omubiri wiwe n’okw’inywa omusasi wiwe mubyakangania ekyabya kitholere erikolhwa okwa Kihulho ky’Omukama ky’Erigholho ahabw’eribya imwakolesya ebinywe ebikabya nga bisosene. (Mt. 26:26-28) Bakabugha bathi abosi abakahindana okwa Kihulho ky’Omukama ky’Erigholho batholere ibalya okwa muggati n’erinywa okwa vini ebikalhabibawa. Mbwino ekyo kinahikire? Ni kikulhu ithwe erilebya ndeke ebyo bakabugha ebyo nga binahikire kundi obuli mwaka esyomiliyoni sy’abandu erithimba omwa kihugho kyosi bakahindana nethu okwa mukonga oyo. Thukendi lhangira esyombaghane esiri ahakathi-kathi k’ebinywe ebiri omu Yohana 6:53 n’ebyo Yesu abugha okwa Kihulho ky’Omukama ky’Erigholho.

8. Ni mbaghane syahi esiri ahakathi-kathi k’emighulhu ibiri eyikanibweko? (Lebaya n’ebisasani.)

⁸ Leka thulebaye esyombaghane ibiri esiri ahakathi-kathi k’emighulhu ibiri eyi. Ey’erimbere, ni mughulhu wahi kandi ni hayi aho Yesu abughira ebinywe ebiri omwa Yohana 6:53-56? Abibwira ekikumulha ky’Abayuda ababya e Galilaya omwa 32 E.K. Habya ihakine omwaka nga mughuma imwatsukisya  Ekihulho ky’Omukama eky’Erigholho e Yerusalemu. Eyakabiri, ebinywe biwe ebi abibwira bahi? Abangyi b’okwa bamuhulikirira e Galilaya babya bakanza ery’ughuthya ebiyithawa byabu by’ekinyamubiri ahabw’obuthuku buke omwakanya k’ery’ughuthya ebiyithawa byabu by’obunyakirimu. (Yn. 6:26) Omo kwenene, Omughulhu Yesu abugha ebya bathayitheghereraya, aho n’aho mubabya isibakimw’ikirirye. Nibya n’abaghuma b’okwa bigha biwe mubalekera aho erimukwama. (Yn. 6:14, 36, 42, 60, 64, 66) Lebaya embaghane eyiri ahakathi-kathi k’ebyabya okwa mughulhu oyo n’ebyabya mwaka mughuma enyuma waho Yesu akatsukisya Ekihulho ky’Omukama eky’Erigholho omwa 33 E.K. Okwa mughulhu oyo, abakwenda biwe 11 abathaleghulha babya haghuma nayu nomwakine indi mubathayitheghererya ndeke ebyosi ebyo abakangiriraya. Nomwabine, mbaghane n’ababya e Galilaya, abakwenda biwe abathaleghulha babya ibanakakasirye ngoku Yesu oyuwalhua elhubulha abya Mughalha wa Nyamuhanga. (Mt. 16:16) Mwabasima athi: “Aliwe inywe, n’inywe mwabirinyamakirira omw’ilengwako lyaghe.” (Lk. 22:28) Nibya esyombaghane ibiri esi nyisa sikakanganaya ngoku sithutholere thukabugha thuthi ebinywe bya Yesu ebiri omwa Yohana 6:53 bikahiraho eky’erileberyako eky’erighenderako okwa Ekihulho ky’Omukama eky’Erigholho. Thuthasyalebaya obundi bwema.

NGOKU EBINYWE BYA YESU BIKAKUHAMBAKO

9. Ebinywe ebya Yesu abugha okwa Kihulho ky’Omukama eky’Erigholho bihambire okwa gurupu yahi?

⁹ Okwa Kihulho ky’Omukama eky’Erigholho, Yesu mwaha abakwenda biwe b’omuggati owathemo kihamya n’eribabwira athi akimanira omubiri wiwe. Neryo mwabaha evini n’eribugha athi yikimanira ‘omusasi wiwe w’endaghane.’ (Mk. 14:22-25; Lk. 22:20; 1 Kor. 11:24) Ekyo ni kikulhu kutsibu. Yesu akolha endaghane nyihya-nyihya ‘n’ab’ekithunga [ky’obunyakirimu] kya Israeli’ abakendi syabya “omo Bwami bwa Nyamuhanga,” butsira n’abandu bosi. (Ebr. 8:6, 10; 9:15) Abakwenda mubathayitheghererya ekyo okwa buthuku obo, aliwe babya ibakisiya ibahakabibwa omwa mulimu abuyirire n’eringiribwa omwa ndaghane nyihya-nyihya erithoka eribana omwanya w’erisyabya na Yesu omwa lhubulha.—Yn. 14:2, 3.

10. Ebyo Yesu abugha iniane e Galilaya biri bithi mbaghane okwa ebyo abugha okwa buthuku bw’Ekihulho ky’Omukama eky’Erigholho? (Lebaya n’ekisasani.)

¹⁰ Lhangira ngoku okwa Kihulho ky’Omukama eky’Erigholho, Yesu mwahwerya amalengekania w’okwa “kihyo kike.” Egurupu nyike eyo yatsukisibawa n’abakwenda biwe abathaleghulha ababya nayu omwa kisenge ekyo. (Lk. 12:32) Ibo n’abandi abangabere omwa gurupu eyo babya batholere eribya bakalya okwa biminyisyo bibiri—omuggati n’evini. N’ibo bakendi syahebwa omwanya ow’eribyamo haghuma na Yesu elhubulha. Ebya abwira abakwenda biwe okwa mughulhu oyo biri mbaghane okwa ebyo abwira ekikumulha ky’abandu e Galilaya, eyo akaniraya ebihambire okwa bandu bangyi. Ebinywe ebyo bihambire okwa mughanzo munene w’abandu.

11. Ni byahi ebyo Yesu abugha iniane e Galilaya ebikakanganaya ngoku syabya akakania okwa gurupu y’abandu bake?

¹¹ Omughulhu Yesu abya e Galilaya omwa 32 E.K., kutsibu-tsibu abya akakanirya Abayuda ababya banzire abahe akalyo. Aliwe, Yesu mwabawathikya erilengekania okwa kindu eky’omughaso munene kwilhaba ebyalya ebyonyine-nyine. Mwababwira ekindu ekyanga bawathikirye eribana engebe y’erikotha.  Kandi Yesu mwabugha athi ababiriholha bakendi syalhubukibwa okwa kiro ky’enduli n’eribyaho kera na kera. Syabya akakania okwa bayisoghawa bake, omughanzo muke, ngoku akolha enyuma waho okwa Kihulho ky’Omukama eky’Erigholho. Omwakanya k’ekyo, e Galilaya, mwakania okwa mighisa eyo abandu bosi bangabwene. Kundi n’ibya, mwabugha athi: “Omundu wosi-wosi amalya okwa muggati oyu iniakendi syabyaho kera na kera . . . Omuggati ogho ngendiha busana n’engebe y’ekihugho w’omubiri waghe.”—Yn. 6:51.

12. Ni kyahi ekikayithaghisibawa erithoka eribana emighisa eyo Yesu akanayako?

¹² Yesu mwathabwira Abayuda abe Galilaya athi abandu bosi ababirithabyaho kutse abangana syabuthwa bakendi syabana omughisa oyu. ‘Abakalya okwa muggati oyu’ basa, ni bugha ambu abakamw’ikiriraya, b’abakendi syaghasirwa. Abangyi abakayahulhamo Bakristayo bakayowa ibangana lhamibwa bamakwama “kyathikirirya omu [Yesu]” ng’omulhamya wabu. (Yn. 6:29, King James Version) Nomwabine, abandi ababya omwa kikumulha ky’abandu abanabya bikirirye omu Yesu, mubamusighania. Busana naki?

13. Ni kyahi ekikayithaghisibawa eribya mw’igha wa Yesu ow’okwenene?

¹³ Abangyi omwa kikumulha ky’abandu ekyo Yesu alisaya babya ibanayitheghekire erimukwama ekikulhu amabya inianemubaha ebyo bakayithagha. Babya bakanza abalhamaye kw’amalhwere wabu omwa nzira y’ekithiko-thiko, abahe ebyalya bya bbule, kutse esyongangirirya esyo banzire ibowa. Nomwabine, Yesu mwabakangania ngoku ni bingyi ebikayithaghisibawa okwa bigha biwe ab’okwenene. Syasa okwa kihugho ahabw’erikwama  ky’athaha abandu b’ebyo banzire eby’ekinyamubiri. Babya batholere eriligha erikokya liwe ‘ery’eryasa okw’iyo’ omw’imuligha n’erighendera okwa byosi ebya abakangiriraya.—Yn. 5:40; 6:44.

14. Ni kyahi ekya thutholere ithwakolha erithoka erighasirwa omwa mubiri n’omusasi wa Yesu?

¹⁴ Yesu mwabwira ekikumulha ky’abandu ngoku kikayithaghisibawa ibo erikangania erikirirya. Erikirirya omuki? Omwa maaka w’erilhamya agho mubiri wiwe n’omusasi wiwe ebyo abya iniakisiya iniahayo ng’ekihongo. Erikirirya ng’eryo lyabya likayithaghisibwa okw’Abayuda, kandi likinayithaghisibawa na munabwire. (Yn. 6:40) Omo kwenene, ithwe erithoka erighasirwa omwa mubiri n’omusasi wa Yesu, ngoku kikanibweko omu Yohana 6:53, thukayithagha erikirirya omwa ndongolya. Ekyo kithokekene okw’abandu bangyi.—Efe. 1:7.

15-16. Ni mighisa yahi eyiri omu Yohana sura 6 eya thutholere ithwabya ithune mulengekaniako?

¹⁵ Ebiri omwa Biblia omu Yohana sura 6 bikathughasira kutsibu kuthya n’abanzwa bethu. Bikakanganaya ndeke-ndeke olhukeri olho Yesu awithire abandu. Iniane e Galilaya, mwalhamya abalhwere, amakangirirya ebihambire oko Bwami, kandi amalhangira athi abandu bakabana ekiyithawa kyabu ky’ebyalya. (Lk. 9:11; Yn. 6:2, 11, 12) Ekikulhu kutsibu, mwababwira ngoku iyo ni “muggati w’engebe.”—Yn. 6:35, 48.

¹⁶ Abo ahulhamo ‘ab’esindi mbuli’ sibalirya okwa muggati n’erinywa okwa vini okwa Kihulho ky’Omukama eky’Erigholho eky’obuli mwaka kandi sibatholere bakakolha ekyo. (Yn. 10:16) Nomwabine, bakaghasirawa omwa mubiri n’omusasi wa Yesu Kristo. Bakakolha ekyo omw’ikangania ku bikirirye amaaka aw’erilhamya aw’ekihongo kiwe. (Yn. 6:53) Mbaghane n’ekyo, abatholere erirya okwa muggati n’erinywa okwa vini bakakanganaya ngoku babiringiribwa omwa ndaghane nyihya-nyihya ng’abakendi syasighalya Obwami bw’elhubulha. Busana n’ekyo, mbulha thuli bahakabibwa kutse ab’esindi mbuli, omwatsi owali omu Yohana sura 6 akathughasira kutsibu. Akathukanganaya omughaso ow’eribya n’erikirirya eryanga leka ithwabana engebe y’erikotha.