Omukwenda Paulo mwahandikira omusyakulhu w’ekithunga mulikyabo ya Timoteo athi: “Ngakuhana embere sya Nyamuhanga, n’embere sya Kristo Yesu, n’embere sy’abamalaika abo ayisogha nyithi, wukwame amathegheko aya, siwutswere wuthe wathondesya, kandi siwulebaye ndi nandi.”—1 Tim. 5:21.

Thutsuke eriminya abathe b’okwa bamalaika aba. Kilhangirikire ngoku si baghuma b’okwa bandu 144,000. Omughulhu Paulo ahandikira Timoteo, erilhubukira elhubulha ery’Abakristayo abahakabibwa lyabya isiririryatsuka. Abakwenda n’abandi bahakabibwa babya isibali babya bihangikwa by’ekirimu, neryo sithwanga bugha thuthi n’ibo ‘abamalaika abayisoghawa.’—1 Kor. 15:50-54; 1 Tes. 4:13-17; 1 Yn. 3:2.

Kandi, ‘abamalaika abayisoghawa’ sibangabya ib’abamalaika abaghana eriowa omwa buthuku bw’erighunga ly’amaghetse. Abamalaika abo mubayiyunga oku Sitani n’eribya esyombinga, neryo bamabya nzighu sya Yesu. (Enz. 6:2; Lk 8:30, 31; 2 Pet. 2:4) Omwa buthuku obukasa, bakendi syaghuswa omwa buhya obuthawithe kabuno ahabw’emyaka 1,000 n’enyuma waho ibathoghothibwa haghuma na Diabolo.—Yuda 6; Erib. 20:1-3, 10.

‘Abamalaika abayisoghawa’ abo Paulo akanayako batholere eribya ib’abamalaika ababya elhubulha ibane okwa lhuhandi lhwa “Nyamuhanga na Kristo Yesu,” abakanibweko omwa mulhondo iwan’oyo.

Hali esyongumi nyingyi sy’abamalaika abathaleghulha. (Ebr. 12:22, 23) Sithutholere thukalengekania thuthi obuli mughuma w’okw’ibo awithe olhukwamirwa lhughumerera mughulhu wosi. (Erib. 14:17, 18) Wibuke ngoku buthuku bulebe omumalaika mughuma mwahebwa omubiiri ow’erithoghothya abasirikali 185,000 Abasuria. (2 Bam. 19:35) Abamalaika bangyi bangabya imubahebwa omubiiri ‘w’erilhusya omo Bwami bwiwe [Yesu] mw’ebyosi ebikathwikalhaya n’abandu abakathwa ebilhaghiro.” (Mt. 13:39-41) Abandi “basyahindania abasombolhwa biwe” elhubulha. (Mt. 24:31) Kandi nibya abandi bakahamulhawa erithutheya omwa syonzira syethu syosi.’—Esy. 91:11; Mt. 18:10; thasyalebaya na Mt. 4:11; Lk. 22:43.

‘Abamalaika abayisoghawa’ abakanibweko omu 1 Timoteo 5:21 bangabya ib’abamalaika abahebawa esyongwamirwa sy’embaghane eriwathikya abandu ba Nyamuhanga. Erikwamana n’ebithimbire okwa mwatsi oyu, Paulo mwaha erihabulha eryuwene erihambire okwa basyakulhu, abo ekithunga kitholere ikyasikya. Ibo ng’abasyakulhu, batholere ibakolha esyongwamirwa syabu ahathe “akasolholho” kandi sibatholere bakathwamu kutse eritswera omw’iharabana. Enzumwa ngulhu eyikaleka ibaghendera okw’ihabulha lya Paulo eryasondolibawa n’omulimu, ni kundi bakendi syalhuthonda “embere sya Nyamuhanga, n’embere sya Kristo Yesu, n’embere sy’abamalaika abo ayisogha.” Kwesi, kilhangirikire ngoku abandi bamalaika bakahebawa esyongwamirwa sy’eriwathikya ekithunga, ng’eritheya abali mukyo, erilebererya omubiiri w’erithulira, n’eribwira Yehova y’eripoti y’ebyo bakalhangira.—Mt. 18:10; Erib. 14:6