Wunewasoma ndeke esyogazeti sy’Akaleberyo esy’omwaka ono? Leka thulebaye nga wangana subirya okwa bibulyo bino:

Ni ky’erileberyako kyahi ekya Yehova akahiraho bikahika okw’ikolongana n’abakali?

Syali basolholha, eritsomana abalhume kwilhaba abakali. Nyamuhanga akahulikirira abakali, atsomene eriyowa lyabu n’ebikabalyambaya. Kandi akabayikethera omw’ibaha omubiiri wiwe.—w24.01, olhup. 15-16.

Thwanga ghendera thuthi okwa binywe ebiri omwa Abanya Efeso 5:7, ahakabugha hathi: “Neryo simusangane nabo”?

Omukwenda Paulo mwathughusa kw’akasali ak’erithendi sangira n’abandu abangaleka ikyathukalira ery’amakirira ebihano bya Nyamuhanga. Obunywani obuthuwene ng’obo bw’obw’abanywani aba thukabya nabo busu okwa busu n’abathukakaniranaya nabo okwa mithahulha y’enganirania.—w24.03, olhup. 22-23.

Ni binyambwirwa byahi ebya thutholere ithwayitheyako?

Thutholere ithwayitheya okwa myatsi eyithasibwe nga nina y’okwenene eyikalhua okwa banywani, esyomeseji esikalhua okwa bandu abo thuthasi, n’abakayisamambulha okwa kwenene abakabya nga bakatsemera omwatsi wethu.—w24.04, olhup. 12.

Ni byahi ebyo thwasi n’ebyo thuthasi ebihambire okwa mibere Yehova akendi syatsweramo Omwami Solomona haghuma n’abandu abaholha omwa mughulhu we Sodomo ne Gomora n’omwa buthuku bw’Erighunga ly’Amaghetse?

Omo kwenene, sithwasi Yehova ng’abiribatswera olhw’erisyathoghothibwa kera na kera. Aliwe, thunasi ngoku anasi ebyosi ebibahambireko kandi oswire n’obughanyiri.—w24.05, olhup. 3-4.

Nyamuhanga eribya ini “lhukuka” kikathukakasayaki? (Ebi. 32:4)

Thwangana bana obusaghiro omu Yehova. Iyo ni muyiketherwa, akaberereraya emilhaghe yiwe mughulhu wosi. Kandi syali segha-seghana, syalihindulha emibere yiwe n’ebilhubirirwa biwe.—w24.06, olhup. 26-28.

Ni kyahi ekyanga thuwathikya eribeghera ekindi kithunga?

Yikethere Yehova, oyukendi kuwathikya ngoku anawathikaya aboghombe biwe kera. Yihighule okw’ilinganisya ekithunga ekyo wabyamo kera n’ekyo wulimo lino. Ibya n’ebingyi by’erikolha omwa kithunga ekihyaka, kandi sondaya abanywani abahyaka.—w24.07, olhup. 26-28.

Ni masomo wahi agho thuk’igha omwa mikya isathu eyiri omwa Matayo sura 25?

Omukya w’esyombuli n’esyombene akahira omuwatho okw’ibya muthaleghulha. Omukya w’abasika abathebathabana mulhume ab’amenge n’abakiru akahira omuwatho okw’ibya ibanayitheghekire kandi ibanatheghirye. N’omukya ow’esyotalanta akakanganaya omughaso w’eribya w’omuhwa.—w24.09, olhup. 20-24.

Obuseku bw’ehekalhu ya Solomona bwabya bw’obuuli burahi?

Omwa 2 Emyatsi y’Emigulu 3:4, NWT, ebitabu birebe ebya kera bikabugha bithi esyomita “55.53,” ekyangana manyisya kithi bwabya bw’esyofuti 175. Aliwe awandi masako awayiketherwe akabugha athi ni esyomita “9.25”, erileka ibwabya bw’obuuli bw’esyomita mwenda (futi 30). Obu bwangabya ibw’obunene bw’olhuhimbo lhw’ehekalhu.—w24.10, olhup. 31.

Kikamanyisayaki abaghombe abawathikya eribya ‘balhume abawithe mukali mughuma-mughuma.’? (1 Tim. 3:12)

Kikamanyisaya kithi athahirye mukali mughuma musa kandi syatholere akasingira. Eryongera okw’ekyo, syali thunga amalengekania awathatholere okwa bandi bakali.—w24.11, olhup. 19.

Busana naki ithwabugha thuthi ebiri omwa Yohana 6:53 sibyabya bitholere erikolhwa okwa Kihulho ky’Omukama ky’Erigholho?

Yohana 6:53 hakakanaya okwa kiyithawa ky’erirya omubiri wa Yesu n’erinywa omusasi wiwe. Yesu abugha ebinywe ebi omwa 32 E.K., iniane e Galilaya, akabibwira Abayuda ababya abakinayithagha erimw’ikirirya. Nomwakine, Ekihulho ky’Omukama ky’Erigholho kyatsukisibawa mwaka mughuma enyuma waho, e Yerusalemu. Okwa mughulhu oyo Yesu akanaya n’abo akendi syabya nabo elhubulha.—w24.12, olhup. 10-11