1-2. (a) Busana naki ikithathuswekya Yesu eribya imwathuhiriraho enzira eyolhobire ey’eryibukiramu olhuholho lhwiwe? (b) Ni mibere yahi eya Yesu eyathukendi kaniako?

WANGANA soborera ebikabya okwa Mukonga w’Eryibuka olhuholho lhwa Kristo ow’obuli mwaka? Ahathe erithika-thika, abangyi omw’ithwe thwangan’ibuka ebikakoleka okwa Kihulho ky’Omukama eky’Erigholho. Busana naki? Kundi ekihulho ekyo sikiri mwa bingyi, ni ndegheka eyikakolhawa omwa nzira nyolho. Nomwabine, oyu ni mukonga mukulhu. Neryo ithwangana yibulya, ‘Busana naki endegheka y’ekihulho ekyo yitheghekirwe omwa nzira nyolho?’

² Omw’ithulira liwe hano okwa kihugho, Yesu iniasibwe ng’oyukakangiriraya ekwenene omwa nzira nyolho, eyilhangirikire, kandi eyolhobire eriyitheghererya. (Mt. 7:28, 29) Kuthya, mwathuhiriraho enzira nyolho aliwe ini y’omughaso ey’eryibuka * olhuholho lhwiwe. Thulebaye ndeke endegheka y’ekihulho ky’Eryibuka eyi n’ebindu ebya Yesu abugha n’erikolha. Thukendyongera eriyitheghererya eriyikehya, obuthubaha, n’olhwanzo lhwa Yesu, kandi thukendi lhangira ngoku thwang’ongera erimugherererya.

3. Ngoku kiri omu Matayo 26:26-28 ekihulho ky’Eryibuka ekya Yesu atsukisaya yabya yolhobire yithi, n’ebindu bibiri ebya kolesibawa byabya bik’imaniraki?

³ Yesu mwatsukisya Eryibuka olhuholho lhwiwe iniane n’abakwenda abathaleghulha 11. Mwakolesya ebyasaka okwa kihulho  ky’Erikyuruka amakolha omukonga owalhobire oyu. (Soma Matayo 26:26-28.) Mwakolesya omuggati owathe mwa kihamya n’evini ebyabyaho. Yesu mwabwira abakwenda biwe athi ebindu bibiri ebyo bik’imanira omubiri n’omusasi wiwe owahikene, eby’abya iniakisiya iniahayo busana nabu. Abakwenda banganabya imubathasweka omukonga muhyaka kandi mukulhu oyu eribya iniolhobire. Busana naki?

4. Erihano erya Yesu aha Marata likathuwathikaya lithi eriyitheghererya ekyaleka Yesu iniolhobya endegheka y’ekihulho ky’Eryibuka?

⁴ Thalebya ebyabya mezi malebe enyuma, omo mwaka wakasathu w’erithulira lya Yesu, akabungira banywani biwe​—Lazaro, Marata, na Maria. Omwa mibere eyithekene eyo, Yesu mwatsuka erikangirirya. Marata abya inianeho, aliwe iniabiriyirisulhusuthya omw’itheghekera omugheni wiwe w’ekitsumbi y’ebyalya bingyi. Yesu abere alhangira eki, omwa bwolho-bwolho mwahabulha Marata, amamuwathikya erilhangira ngoku sikiriyithagha mughulhu wosi eritsumba byalya bingyi. (Lk. 10:40-42) Ihakisiya syosaha nyike iniaholha, Yesu mwaghendera okw’ihabulha liwe eryo. Mwalhangira athi endegheka y’ekihulho ky’Eryibuka yikabya nyolho. Eki kikathweghesayaki oku Yesu?

5. Endegheka y’ekihulho eyi eribya nyolho kikathweghesayaki oku Yesu, kandi eki kikahambangana kithi na Abanya Filipi 2:5, 7, 8?

⁵ Yesu aby’ayikehirye omwa byosi abugha n’erikolha. Neryo sikiriswekaya eribya imwakangania eriyikehya linene okw’ithumbi ly’erighunzerera ly’engebe yiwe okwa kihugho. (Mt. 11:29) Abya inianasi ngoku akayahayo obuhere bukulhu kutsibu omw’ibyaho ly’abandu kandi ngoku Yehova akendi mulhubukya eribya mwami elhubulha. Nomwanabya asi eki, mwathayikangania omw’ibya n’omukonga munene ow’eryibuka olhuholho lhwiwe. Omwakanya k’ekyo, mwabwira abigha biwe athi batholere ibamw’ibuka murundi mughuma omo mwaka omw’ibya n’ekihulho kyolho eki. (Yn. 13:15; 1 Kor. 11:23-25) Ekihulho kyolho aliwe ekitholere kikakanganaya ngoku Yesu syabya mw’emiyiheko. Thwangana tsema eribya eriyikehya ini mughuma w’okwa mibere mikulhu-mikulhu ey’Omwami wethu oyu ow’elhubulha.​—Soma Abanya Filipi 2:5, 7, 8.

6. Thwanga gherererya thuthi eriyikehya lya Yesu thukabana ebitsibu?

⁶ Thwanga gherererya thuthi eriyikehya lya Yesu? Omw’ihira ebiyithawa by’abandi by’embere. (Fil. 2:3, 4) Subaya ameso w’enyuma okw’ithumbi ly’erighunzerera lya Yesu okwa  kihugho. Yesu abya inianasi ngoku akendi holha olhuholho lhubi; aliwe, abya inianatsomene kutsibu abakwenda biwe abathaleghulha, ababya ibakayabya omwa bulighe busana n’olhuholho lhwiwe. Neryo erithumbi ly’erighunzerera eryo mwalighunza inianemubathendeka, eribahimba, n’eribaghumya. (Yn. 14:25-31) Omw’iyikehya, Yesu mwakangania eritsomana abandi kwilhaba iyo eriyitsomana. Mwathuhiriraho eky’erileberyako kibuyanga!

7. Yesu mwakangania athi obuthubaha bunene enyuma w’eritsukisya Ekihulho ky’Omukama eky’Erigholho?

⁷ Yesu imwanamabiritsukisya Ekihulho ky’Omukama eky’Erigholho, mwakangania obuthubaha bunene. Athi? Yesu mwaligha erisonda lya Thatha wiwe, nomwakine indi abya inianasi erikolha ekyo kikendi leka in’ithibwa ng’omutsumi. (Mt. 26:65, 66; Lk. 22:41, 42) Yesu mwakangania ndeke-ndeke obuthaleghulha nuku erina lya Yehova lihabawe ekitsumbi, erisighika ehamuli ya Nyamuhanga y’erithabalha, n’erileka kithokekane abandu abakayisubamu erisyabana engebe y’erikotha. Okwa ndambi iya n’eyo, Yesu mwathegheka abigha biwe busana n’ebyabya ibikayabahikako.

8. (a) Ni kyahi ekya Yesu abwira abakwenda biwe abathaleghulha? (b) Emyaka eyakwamako Yesu iniabiriholha, abigha biwe mubakwama bathi eky’erileberyako kiwe eky’obuthubaha?

⁸ Yesu kandi mwakangania obuthubaha omw’ihira erihangya-hangya lyosi ery’angabya iniabya awithe lya lhuhandi n’omw’itsomana ebiyithawa by’abakwenda biwe abathaleghulha. Ekihulho ekyolho eky’atsukisaya iniamabirihulhukyamu Yuda, kyang’ibukirye abangabere bahakabibwa biwe omughaso w’omusasi wa Yesu owuthibawa n’erisangira omwa ndaghane nyihya-nyihya. (1 Kor. 10:16, 17) Eribawathikya eribya bathaleghulha n’eribya na Yesu omwa lhubulha, Yesu mwabwira  abamukwamire ebya iyo na Thatha wiwe bakabayithaghako. (Yn. 15:12-15) Yesu kandi mwabwira abakwenda biwe okwa bitsibu ebya bakendi bana. Neryo, eribahira mw’omuhwa w’erikwama eky’erileberyako kiwe, mwababwira athi ‘bahande emithima!’ (Yn. 16:1-4, 33) Enyuma w’emyaka mingyi, abigha ba Yesu babya ibakina kwama eky’erileberyako kiwe eky’eriyihayo n’erikangania obuthubaha. Nomwakine indi si kyabya kyolho, mubawathikania omwa bitsibu byabu muthina-muthina.​—Ebr. 10:33, 34.

9. Thwanga gherererya thuthi Yesu omw’ikangania obuthubaha?

⁹ Namunabwire, thukagherereraya eky’erileberyako kya Yesu eky’erikangania obuthubaha. Ng’eky’erileberyako, kikayithagha obuthubaha eriwathikya balikyethu abakendereribawa busana n’erikirirya lyabu. Hanganayira balikyethu ibahirwa omwa ngomo. Ekyo kyamabya, thutholere ithwakolha ekyo thwanga thoka, imwamuli n’eribalhwirako. (Fil. 1:14; Ebr. 13:19) Eyindi nzira ey’erikanganiryamu obuthubaha ly’erilholha embere erithulira “butsira eryubaha.” (Emib. 14:3) Nga Yesu, thukathulhughanaya omwatsi w’Obwami, abandu nomubanga thuhakanisya n’erithwendererya. Aliwe, hanganayira ithwayisanga ithwabya isithuwithe obuthubaha. Thwanga kolhaki?

10. Mayenga malebe Eryibuka likayahika, thutholere ithwakolhaki, kandi busana naki?

¹⁰ Thwangana ghumya obuthubaha bwethu omw’ilengekania okwa maha awathuwithe busana n’ekihongwa kya Kristo. (Yn. 3:16; Efe. 1:7) Mayenga malebe Eryibuka likayahika, thukabya n’akaghisa k’embaghane eryongera erisima lyethu busana n’embanulho. Omwa buthuku obo, kwama-kwamanaya obusomi bwe Biblia obuhambene n’Eryibuka n’erighanirya kutsibu okwa byabya Yesu iniakisiya iniaholha. Neryo thukahindana okwa Kihulho  ky’Omukama eky’Erigholho, ithukendi yitheghererya ndeke ekya biminyisyo by’Eryibuka bik’imanira n’ehongo y’embaghane kutsibu eya bikimanira. Thwamayitheghererya ekya Yesu na Yehova babirithukolera kandi ngoku kikathughasira n’abanze bethu, amaha wethu akaghuma, kandi kikathuhira mw’omuhwa w’eriyiyinia buthubaha erihika okwa nduli.​—Ebr. 12:3.

11-12. Thwamabirithaminyaki?

¹¹ Thwamabirithalhangira ngoku Ekihulho ky’Omukama eky’Erigholho sikiri subulira okwa mbanulho ey’obughuli aliwe kandi kikathwibukaya eriyikehya n’obuthubaha bwa Yesu. Thukasima Yesu erilholha embere erikangania emibere eyi iyo ng’Omuhereri wethu Mukulhu ow’elhubulha, oyukathusabira! (Ebr. 7:24, 25) Erikangania erisima erikalhua okwa muthima, thutholere ithw’ibuka buthaleghulha olhuholho lhwa Yesu, ngoku analhaghira. (Lk. 22:19, 20) Eki thukakikolha okwa kiro ekihambene ne Nisani 14, ekiro kikulhu kutsibu omo mwaka.

¹² Ekihulho ky’Omukama eky’Erigholho kyangana thasyathweghesya owundi mubere owaleka Yesu iniathuholera. Iniane hano okwa kihugho, aby’asibwe busana n’omubere oyu. Ni mubere wahi?

13. Yoane 15:9 na 1 Yoane 4:8-10 hakasoborera hathi olhwanzo olho Yehova na Yesu babirikangania, kandi lhukaghasira abahi?

¹³ Omwa byosi akolha, Yesu mwakangania ndeke-ndeke olhwanzo lhunene olhwa Yehova athuwithire. (Soma Yoane 15:9; 1 Yoane 4:8-10.) Ekikulhu kutsibu, Yesu mwayihayo erilhua okwa muthima erihayo engebe yiwe busana nethu. Mbulha thuli b’okwa bahakabibwa kutse ‘ab’esindi mbuli,’ thukaghasirawa omo lhwanzo olho Yehova na Mughalha wiwe babirithukangania erilhabira omwa kihongwa ekyo. (Yn. 10:16; 1 Yn. 2:2) Kandi lengekanaya okwa bya kolesibawa okwa Kihulho ky’Eryibuka; kikakanganaya olhwanzo n’eritsomana lya Yesu okwa bigha biwe. Kithi?

14. Yesu mwakangania athi abigha biwe b’olhwanzo?

¹⁴ Yesu mwakangania olhwanzo okwa bigha biwe abahakabibwa omw’itsukisya, omukonga w’eryibuka owolhobire butsira owakalire. Obuthuku bwangabere bunemulhaba, abigha abahakabibwa banga lholire embere Eryibuka olhuholho lhwa Yesu obuli mwaka, omwa mibere muthina-muthina, imwamune n’abali omwa ngomo. (Erib. 2:10) Mubanathoka erikolha ekya Yesu abugha? Ee, mubathoka!

15-16. Abandi babirithoka bathi eryibuka Ekihulho ky’Omukama ky’Erigholho nibya n’omwa mibere eyikalire?

¹⁵ Erihika namunabwire, Abakristayo ab’okwenene babirihiraho akaghalha eryibuka olhuholho lhwa Yesu. Babiribya ibanemukwama endegheka y’Ekihulho ky’Omukama eky’Erigholho ngoku bangathoka, nibya n’omwa mibere eyikalire. Eby’erileberyako bya bino. Mughalha wethu Harold King iniane iyuwene omwa kisenge ky’engomo eky’Abachaina, mwalhangira athi akabana enzira ey’eryibukiramu olhuholho lhwa Yesu. Bubiso-biso, mwathegheka ebiminyisyo by’Eryibuka, omw’ikolesya ebindu ebyo aby’awitheko. Kandi mwabaririra ndeke ekiro ky’Eryibuka. Endambi y’Eryibuka yabere yikahika, iyo​—iyuwene omwa kasenge kiwe​—mwimba, amasaba, n’erilhabya omukania.

¹⁶ Ekindi ky’erileberyako kyakino. Bali bethu ibanabohere omwa kampu omwa Lhuhi Lhwakabiri lhw’Ekihugho Kyosi, mubatsama engebe yabu banamath’ibuka Ekihulho ky’Omukama eky’Erigholho. Aliwe kundi ebindu ebikakolesibawa sibikalire, mubathoka eribya n’Eryibuka eryo bubiso-biso. Mubabugha bathi: “Muthw’imana haghuma thwamathimba  okwa kameza akasesire kw’olhukimba olhw’enzeru ikunathekire ebiminyisyo. Muthwakolesya akatadoba, kundi amasenyerezi angalekire ithwalhangirwa. . . . Muthwathasyalhagha buhyaka Thatha wethu ngoku thukendi kolesya amaaka wethu wosi erihamya erina Liwe eribuyirire.” Ka mubakangania erikirirya linene! Na Yesu mwakangania olhwanzo lhunene erileka kibye ikyangana thokekana eryibuka olhuholho lhwiwe nibya n’omwa mibere yikalire!

17. Ni bibulyo byahi ebya thwanga yibulya?

¹⁷ Eryibuka linemuseghera hakuhi, ni kibuya eriyibulya ebibulyo bino: ‘Nangongera indi erigherererya ndeke Yesu omw’ikangania olhwanzo? Nganalengekanaya kutsibu okwa biyithawa by’abalikyethu kwilhaba ebyaghe? Nganza balikyethu ibakolha kwilhaba ebya banga thoka, kutse nganasi erilemererwa lyabu?’ Mughulhu wosi thugherereraye Yesu ‘n’erianzana ng’abasubeneko.’​—1 Pet. 3:8.

18-19. (a) Thwangana kakasya kyahi? (b) Wamathwamu erikolhaki?

¹⁸ Eryibuka olhuholho lhwa Kristo sirikiwithe buthuku bunene lithe lyahwa. Yesu akendibya akasa okwa bulighe bunene, akendi kuma-kuma emisighalira ‘y’abayisoghawa’ eribathwalha elhubulha, neryo Eryibuka iryahwera aho.​—1 Kor. 11:26; Mt. 24:31.

¹⁹ Nibya n’omughulhu Eryibuka likendi syabya isirikikolhawa, thwangana kakasya ngoku abandu ba Yehova bakendi syabya bak’ibuka ngoku ekihulho kyolho eki kyabya kikakangania eriyikehya, obuthubaha, n’olhwanzo olhwa kanganibawa abandu. Okwa buthuku obo, ahathe erithika-thika, ababya bakahindana okwa kihulho ky’embaghane eki bakendi syakibwirako abandi nuku kibaghasire. Aliwe erighasirwa lino omwa kihulho eki, thutholere ithwalhangira thuthi thukagherereraya eriyikehya, obuthubaha, n’olhwanzo lhwa Yesu. Thwamakolha ekyo, ithukendi yikethera ngoku Yehova akendi syathuha olhuhembo lhwethu.​—2 Pet. 1:10, 11.