1-2. (a) Ni kyahi ekya Yehova akalhangira esyomiliyoni sy’abandu bakahindana okwa Kihulho ky’Omukama eky’Erigholho? (Lebaya ekisasani ky’okwa kidipa.) (b) Omo mwatsi ono thukendi kania okuki?

THATHERA akasasani Yehova ng’akalhangira kyahi esyomiliyoni sy’abandu bakahindana okwa Kihulho ky’Omukama eky’Erigholho. Syali subulira okw’isamalira endeko nene y’abandu; akasamalira obuli mundu oyuwahindene. Ng’eky’erileberyako, akasamalira abathaleghulha abakasa obuli mwaka. Omw’ibo, mwanganabya imune abakasa nomubane mubana eriendereribwa erikalire. Abandi sibalyasa okwa yindi mihindano, aliwe bakalhangira erihindana okw’Ibuka ng’ekindu kikulhu ekyo batholere erikolha. Yehova akalhangira n’abakahindana okw’Ibuka omurundi wabu w’erimbere, obundi busana n’erithanza eriminya ebikabyaho.

² Ahathe erithika-thika, Yehova akatsema akalhangira abandu bangyi bakahindana okw’Ibuka. (Lk. 22:19) Aliwe, si bugha indi, ekya Yehova atsomene kutsibu w’omughanzo w’abakasa. Eky’atsomene kutsibu y’enzumwa eyikaleka ibasa. Omo mwatsi ono, thukendi kania okwa kibulyo kikulhu kino: Busana naki sithuli hindana okw’Ibuka lisa aliwe thukahindana n’okwa mihindano y’obuli wiki eya Yehova akahiriraho abamwanzire?

3-4. (a) Ni kyahi ekikaleka ithwahindana? (b) Erihindana lyethu likathubisulhakoki? (c) Erikwamana na 1 Abanya Korinto 11:23-26, busana naki si thutholere thukabulha okw’Ibuka?

³ Enzumwa ngulhu eyikaleka ithwahindana okwa mihindano y’ekithunga ly’eribya kundi ni kitsweka ky’okw’iramya lyethu.  Kandi thukahindana kundi thukakangiriribawa na Yehova okwa mihindano. Abandu b’emiyiheko sibalyanza erikangiriribwa ekyosi-kyosi. (3 Yn. 9) Ithwe thuli mbaghane, thwanzire erikangiriribwa na Yehova n’ekithunga ekyo anemukolesya.​—Isa. 30:20; Yn. 6:45.

⁴ Erihindana lyethu likakanganaya ku thuyikehirye​—ithunayitheghekire n’erianza erikangiriribwa. Omw’igholho-gholho ly’Eryibuka olhuholho lhwa Yesu, thukahindana okwa mukonga mukulhu oyu kundi thukayowa ithutholere erihindana kandi kundi omw’iyikehya thukaghendera okwa kihano kya Yesu kino: “Mukole muthya busana n’erinyibuka.” (Soma 1 Abanya Korinto 11:23-26.) Omuhindano oyu akaghumaya amaha wethu w’obuthuku bw’embere n’erithwibukya ngoku Yehova athwanzire kutsibu. Aliwe, Yehova anasi ku thutholere erihimbwa n’erighumibwa butsira murundi mughuma musa omo mwaka. Neryo akathuha emihindano obuli wiki n’erithubwira athi thuhindane kuyo. Eriyikehya likaleka ithwabya bowa. Obuli wiki thukakolesaya esyosaha nyirebe erithegheka n’erihindana okwa mihindano eyo.

5. Busana naki abandu abayikehirye bakaligha erikokya lya Yehova?

⁵ Obuli mwaka, abandu bangyi abayikehirye bakaligha erikokya lya Yehova ery’erikangiriribwa nayu. (Isa. 50:4) Bakatsemera erihindana okw’Ibuka, neryo ibatsuka n’erihindana okwa yindi mihindano. (Zek. 8:20-23) Ithwe bosi haghuma n’abahyaka, thukasima erikangiriribwa n’erisondolhwa na Yehova, “omuwathikya [wethu] n’omulhamya [wethu].” (Esy. 40:17) Omo kwenene, hane ekyanga tsemesya kutsibu​—kutse eky’omughaso munene​—kwilhaba eriligha erikokya ery’erikangiriribwa na Yehova na Yesu, Omughalha oyo anzire kutsibu?​—Mt. 17:5; 18:20; 28:20.

6. Eriyikehya mulyawathikya lithi omulhume mughuma erihindana okw’Ibuka?

⁶ Obuli mwaka, thukahiraho akaghalha erikokya bandu bangyi ngoku thwanga thoka erihindana okw’Ibuka olhuholho lhwa Yesu. Abandu bangyi abayikehirye babirighasirwa omw’iligha erikokibwa eri. Thuthaha eky’erileberyako. Myaka mingyi enyuma, omulhume mwahebwa ekada eyikamukokaya okw’Ibuka, aliwe mwabwira mughalha wethu oyuwamuhayo athi syendi syathoka erihindana. Aliwe, ekiro ky’Eryibuka, mughalha wethu mwasweka akalhangira omulhume oyo akingira omwa Kisenge ky’Obwami. Omulhume mwatsemera emibere balikyethu bamuthangiriramu kyamaleka iniatsuka eribya akahindana okwa yindi mihindano ey’obuli yenga. Erithwalira haghuma, mwathalha okwa mihindano isathu misa omwaka owosi. Ni kyahi ekya muwathikaya erithwamu erihindana mughulhu wosi? Aby’ayikehirye kutsibu kyamaleka iniahindulha amalengekania wiwe. Mughalha wethu oyuwamukokaya enyuma waho mwabugha athi, “Ni mulhume oyuyikehirye.” Ahathe erithika-thika, Yehova yuwaletha omulhume oyu erimuramya, neryo lino ni mughalha wethu oyubatizibirwe.​—2 Sam. 22:28; Yn. 6:44.

7. Ebya thukigha okwa mihindano n’ebya thukasoma omwa Biblia bikathuwathikaya bithi eriyikehya?

⁷ Ebya thukigha okwa mihindano n’ebya thukasoma omwa Biblia byangana thuwathikya eriyikehya. Mayenga make Eryibuka irikisiya iryahika, emihindano yethu yikakanaya kutsibu okwa ky’erileberyako kya Yesu n’eriyikehya eryo akanganaya akahayo engebe yiwe ng’embanulho. Kandi n’omwa biro by’Eryibuka, thukahirawa mw’omuhwa w’erisoma emyatsi ye Biblia eyihambire okwa lhuholho n’erilhubuka lya Yesu. Ebya thukigha okwa mihindano eyo n’ebya thukasoma omo myatsi  ye Biblia eyo bikaghumaya erisima lyethu ery’ekihongwa ekya Yesu athuha. Thwanzire erigherererya omubere w’eriyikehya oyu n’erikolha erisonda lya Yehova, nibya n’omughulhu kikalire.​—Lk. 22:41, 42.

8. Yesu mwakangania athi obuthubaha?

⁸ Kandi thukalengesaya erigherererya Yesu omw’ikangania obuthubaha. Thalengekania okwa buthubaha obw’akanganaya omwa biro athali aholha. Abya inianasi ndeke ngoku esyonzighu siwe sikendi muhemulikania, erimuswirya, n’erimwitha. (Mt. 20:17-19) Aliwe, mwaligha eriholha. Endambi yabere yikahika, mwabwira abigha biwe abatheleghulha, ababya nayu e Getesemane athi: “Muhangane, thughende! Mulebaye, oyukanyighothera y’oyu hano.” (Mt. 26:36, 46) Abandu abali n’emiyali babere bakasyamuhamba, mwasa eyo bali, amayiminyikalya, n’eribwira abasirikali athi baleke abakwenda biwe baghende. (Yn. 18:3-8) Yesu mwakangania obuthubaha bunene! Munabwire, Abakristayo abahakabibwa n’abandi ab’esindi mbuli bakalengaho erigherererya Yesu omw’ikangania obuthubaha. Bathi?

9. (a) Busana naki thwangana yithagha obuthubaha erihindana mughulhu wosi? (b) Eky’erileberyako kyethu kyanga hamba kithi oku balikyethu abali omwa ngomo busana n’erikirirya lyabu?

⁹ Erihindana mughulhu wosi, thwangana yithagha erikangania obuthubaha n’omwa mighulhu eyikalire. Abandi balikyethu bakahindana okwa mihindano nomubangabya omwa bulighe bw’eriholerwa, erihwa amani, kutse ebitsibu by’amaghalha. Buthubaha, abandi bakahindana abahughu kutse abanya buthoki nomubanga baletha kw’erihakanisibwa erikalire. Thalengekania hake eky’erileberyako kyethu nga kikahamba kithi okwa balikyethu abali omwa ngomo busana n’erikirirya lyabu. (Ebr. 13:3) Bakabya bakowa ku thunemukolera Yehova nomuthunawithe ebitsibu, kikabaha amaaka w’eribya n’erikirirya, obuthubaha, n’obuthaleghulha. Omukwenda Paulo mwabya omwa mibere eyiri ng’eyi. Omughulhu abya omwa ngomo e Roma, iniakatsema akowa ngoku balikyabo banemukolera Yehova buthaleghulha. (Fil. 1:3-5, 12-14) Buthuku buke ahanyumaho kutse imwanamaboholhwa, Paulo mwahandikira Abaebrania. Omwa baruha eyo mwahira omwa Bakristayo abathaleghulha mw’omuhwa ‘w’erianzana ng’abasubeneko’ n’erihindana mughulhu wosi.​—Ebr. 10:24, 25; 13:1.

10-11. (a) Ni bahi abo thutholere ithwakokya okw’Ibuka? (b) Abanya Efeso 1:7 hakaha nzumwa yahi ey’erikolha ekyo?

¹⁰ Thukakanganaya obuthubaha thukakokya abahughu, abathukakolha nabu, n’abataka okw’Ibuka. Busana naki ithwabakokya? Thukasima kutsibu ekya Yehova na Yesu bathukolera ikyaleka ithwanza erikokya n’abandi okw’Ibuka. Thwanzire nabu ibigha ngoku banga ghasirwa omwa “lhukogho” lhwa Yehova erilhabira omwa mbanulho.​—Soma Abanya Efeso 1:7; Erib. 22:17.

 ¹¹ Thukabya thukakangania obuthubaha omw’ihindana haghuma, thukakanganaya owundi mubere mubuya, owa Nyamuhanga na Mughalha wiwe bakakanganaya kutsibu.

12. (a) Emihindano yethu yikaghumaya yithi olhwanzo olhwa thuwithire Yehova na Yesu? (b) Ekitabu kya 2 Abanya Korinto 5:14, 15 kikathuhiramo kithi omuhwa w’erigherererya Yesu?

¹² Olhwanzo olhwa thuwithire Yehova na Yesu lhukaleka ithwahindana. Neryo, ebya thukigha okwa mihindano bikaghumaya olhwanzo olhwa thuwithire Yehova na Mughalha wiwe. Mughulhu wosi okwa mihindano thuk’ibukibawa okwa kya babirithukolera. (Abar. 5:8) Kutsibu-tsibu Eryibuka likathwibukaya olhwanzo lhunene olhwa bathuwithire, nibya n’okw’abo abathasi omughaso w’embanulho. Busana n’erisima linene, thukalengaho erigherererya Yesu omwa ngebe yethu ya buli kiro. (Soma 2 Abanya Korinto 5:14, 15.) Eryongera okw’ekyo, emithima yethu yikathusukuma eripipa Yehova busana n’erithuha embanulho. Enzira nguma eyo thwanga mupipiramu ly’erisubirya erilhua okwa muthima omwa mihindano yethu.

13. Thwanga kangania thuthi obunene bw’olhwanzo olhwa thuwithire Yehova na Mughalha wiwe? Soborera.

¹³ Thwangana kangania obunene b’olhwanzo olhwa thuwithire Yehova na Mughalha wiwe omw’ibya ithwangana sighania ebindi busana nabu. Mughulhu mungyi, thukabya ithutholere eriyithalya okwa bindu muthina-muthina nuku thuthoke erihindana. Ebithunga ebinene bikabya n’omuhindano w’omw’igholho ow’omwakathi-kathi k’eyenga abangyi nibya ibabirilhuha. N’owundi muhindano akabya okwa wikendi abandi bandu bakalhuhuka. Mbwino Yehova akanalhangira ku thukanahindana nibya ithunalhuhire? Ahathe erithika-thika akakilhangira! Yehova akalhangira kandi akasima akaghalha akathukahiraho erihindana okwa mihindano.​—Mk. 12:41-44.

14. Yesu mwathuhiriraho athi eky’erileberyako eky’erikangania olhwanzo olhw’eriyihayo?

¹⁴ Yesu mwathuhiriraho eky’erileberyako eky’erikangania olhwanzo lhw’eriyihayo. Mwakolha eki omw’ibya inianayitheghekire eriholera abigha biwe kandi buli kiro iniakahira ebiyithawa byabu by’embere okwa biwe. Ng’eky’erileberyako, iniakahindana n’abigha biwe nibya n’omughulhu alhuhire kutse ahwere amani. (Lk. 22:39-46) Kandi  iniakalengekanaya okwa by’angaha abandi, butsira ibo erimuha. (Mt. 20:28) Olhwanzo olhwa thuwithire Yehova na balikyethu lhwamabya ilhughumire, ithukendi kolha ngoku thwanga thoka erihindana okwa Kihulho ky’Omukama eky’Erigholho n’eyindi mihindano y’ekithunga.

15. Kutsibu-tsibu ni bahi abo thwanzire eriwathikya?

¹⁵ Thuli lhughanda lhughuma olhw’abalikyethu Abakristayo omwa kihugho kyosi, kandi thukatsema erikolesya obuthuku bunene erikokya abahyaka erithuyiyungako. Aliwe, kutsibu-tsibu thwanzire eriwathikya “abali omo kithunga ky’abikirirya” aliwe ababirisebebera. (Gal. 6:10) Thukakanganaya ku thubanzire omw’ibahira mw’omuhwa w’erihindana, kwilhabirirya okw’Ibuka. Nga Yehova na Yesu, thukatsema kutsibu omughulhu oyuwabirisebebera akasuba oku Yehova, Thatha wethu w’olhwanzo kandi Omulisya.​—Mt. 18:14.

16. (a) Thwanga himbangana thuthi, kandi emihindano yethu yikendi thuwathikya yithi? (b) Busana naki buno bw’obuthuku obuwene omwa mwaka eryibuka ebinywe bya Yesu ebiri omu Yoane 3:16?

¹⁶ Omo mayenga awakasa, kokaya abangyi ngoku wanga thoka erihindana okw’Ibuka erikendi syabya Kyakathano omw’igholho, biro 19 Okwakani, 2019. (Lebaya akasanduko “ Wunemwendi Bakokya?”) Omwaka owakasa, thulengeho erihirana mw’omuhwa w’erihindana mughulhu wosi okwa mihindano yosi eya Yehova akathuha. Enduli yinemuseghera hakuhi, thwanzire emihindano yethu iyathuwathikya eribya n’eriyikehya, obuthubaha, n’olhwanzo. (1 Tes. 5:8-11) N’omuthima wethu wosi, thukanganaye eriyowa lyethu erya thuwithire Yehova na Yesu busana n’erithwanza kutsibu!​—Soma Yoane 3:16.