1-3. (a) Ni kyahi ekyaleka Yehova inianza Solomona, kandi ni mighisa yahi eyo Solomona abana? (b) Ni bibulyo byahi ebya thukendi subiryako omwa mwatsi ono?

SOLOMONA abya mwami we Israeli iniakine mulhume mulere. Okw’itsuka ly’erithabalha liwe, Yehova mwamubuthukirako omwa nzoli n’erimubwira athi: “Bulhaya ekyo nangakuha.” Solomona mwasubirya athi: “Naghe indi mulhwana mulere musa; sinyasi ngoku nanga hulhuka kutse eriingira. . . . Busana n’ekyo, wuhe omughombe wawu omuthima w’eriminya eritswera abandu bawu.” (1 Bam. 3:5-10) “Omuthima w’eriminya” kutse ow’obwowa​—eri ka lyabya isaba erikakanganaya eriyikehya! Sikiri swekaya kwesi Yehova eribya imwanza Solomona! (2 Sam. 12:24) Nyamuhanga wethu mwatsemera erisubirya ly’omwami mulere oyo kyamaleka iniaha Solomona ‘y’omuthima w’amenge n’ow’obwowika.’​—1 Bam. 3:12.

² Iyo eribya iniane muthaleghulha, Solomona mwathunga emighisa mingyi. Mwathunga ekitsumbi ky’erihimba ehekalu “busana n’erina ly’Omwami Mukulhu, Nyamuhanga wa Israeli.” (1 Bam. 8:20) Mwaminywa busana n’amenge agho Nyamuhanga amuha. N’ebinywe eby’abugha akasondolibwa na Nyamuhanga binahandikire omwa bitabu bisathu bye Biblia. Ekighuma ky’okw’ebi ky’ekitabu ky’Emisyo.

³ Omwa New World Translation, omuthima akahulhawa hakuhi mirundi nga kikumi omwa kitabu kye Emisyo. Ng’eky’erileberyako, Emisyo 4:23, thukasoma thuthi: “Theghaya omuthima wawu n’omuhwa wosi.” Omwa mulhondo oyu, ekinywe “omuthima” kikamanyisayaki? Omo mwatsi ono thukendi subirya ekibulyo ekyo. Kandi thukendi kania okwa by’erisubirya by’ebindi  bibulyo bibiri: Sitani angatsandya athi omuthima wethu? Kandi thwanga kolhaki eritheya omuthima wethu? Erisighalha bathaleghulha oku Nyamuhanga, thutholere ithwayitheghererya eby’erisubirya okwa bibulyo by’omughaso ebyo.

4-5. (a) Esyonyimbo 51:6 hakathuwathikaya hathi eriyitheghererya ekinywe “omuthima” nga kikamanyisayaki? (b) Amaghalha wethu akakanganaya athi ekyo thuli omwakathi?

⁴ Omwa Emisyo 4:23, ekinywe “omuthima” kikakolesibawa erimanyisya omundu oyo thuli omwakathi. (Esy. 51:6, NW.) Ni bugha ambu, “omuthima” akamanyisaya eriyowa, ebilhubirirwa, eriyisunza n’amalengekania, ebiri omw’isi syethu. Y’omundu oyo thuli omwakathi, butsira oyo thuli eyihya.

⁵ Thulebaye amaghalha wethu ng’akakanganaya athi ekya thuli omwakathi. Eky’erimbere, emibiri yethu eribya iyine omwa mibere eyuwene, thutholere ithwalya ebyalya ebyuwene, kandi thukayithagha eribya ithunemubegheresya omubiri. Kuthya, eribya ithune omwa mibere eyuwene bunyakirimu, thutholere ithwalya ebyalya by’obunyakirimu ebyuwene n’erilholha embere erikangania erikirirya lyethu omu Yehova. Thukakanganaya ku thwikirirye omu Yehova omw’ikolesya ebyo thukigha n’erikania okw’ikirirya lyethu. (Abar. 10:8-10; Yak. 2:26) Ekyakabiri, erisighikira n’emisosere y’eyihya, thwangana lengekania thuthi thunawithe amaghalha awuwene kwesi nibya ithunalhwere omwakathi. Kuthya, erisighikira okwa syondegheka syethu sy’ekiteokrasi, ithwangana lengekania thuthi erikirirya lyethu linaghumire, kwesi esyongumbu nyibi isine muthukuliramu. (1 Kor. 10:12; Yak. 1:14, 15) Thutholere ithwibuka ngoku Sitani iniakendianza erithuhira mw’amalengekania wiwe. Kutsibu-tsibu, angalengesya athi erikolha ekyo? Kandi thwanga yitheya thuthi?

6. Sitani awithe kilhubirirwaki, kandi akalengesaya athi erikiberererya?

⁶ Sitani akanza ithwabya ng’iyo​—omuyisamambuli oyukagheghena ebihano bya Yehova kandi oyukayitsomana. Sitani syanga thukaka erilengekania n’erikolha ngoku akakolha.  Neryo akalengesaya eriberererya ekilhubirirwa kiwe omwa sindi nzira. Ng’eky’erileberyako, akathuthimbayako abandu abo abiritsandya. (1 Yn. 5:19) Akalengekanaya athi thukendi thwamu erisiba nabu, nomwakine indi thunasi abanywani babi ku “bakatsandaya” amalengekania n’emikolere yethu. (1 Kor. 15:33) Omwami Solomona mwawa omwa kithegho ekyo. Mwathahya abakali bangyi abakafiri, bamamuhambako kutsibu n’erighunzerera “mubabindulha omuthima wiwe” erilhua oku Yehova.​—1 Bam. 11:3.

7. Sitani akakolesayaki erilhalhania amalengekania wiwe, kandi busana naki thutholere ithwayitheya kugho?

⁷ Sitani akakolesaya esyofilimu n’esyotivi erilhalhania amalengekania wiwe. Anasi ngoku eribwirwa emyatsi omwa mibere y’olhughano siriri thutsemesaya lisa; likahamba okwa malengekania, eriyowa, n’emikolere yethu. Yesu mwakolesya enzira mbuya eyi omw’ikangirirya. Ng’eky’erileberyako, omusyo wiwe ow’Omusamaria mubuya n’omwana oyuwatsaha. (Mk. 4:34; Lk. 10:29-37; 15:11-32) Aliwe, ababiritsandibwa omwa malengekania wa Sitani, bangana kolesya enzira eyi erithutsandya. Thutholere ithwabya n’obuyitheghererya. Esyofilimu n’esyondegheka sy’esyotivi syanga thutsemesya n’erithweghesya isisithatsandya obulengekania bwethu. Aliwe thutholere ithwayitheya. Omughulhu thukasombolha eby’eriyitsemesya, thutholere ithwayibulya, ‘Mbwino efilimu eyi kutse endegheka y’etivi eyi yikanyikangiriraya yithi kihikire erighendera okwa syongumbu syaghe sy’omubiri?’ (Gal. 5:19-21; Efe. 2:1-3) Wutholere iwakolhaki wamalhangira endegheka eyo iyikakulha-kulhanaya amalengekania wa Sitani? Iwayitheya kuyo ngoku wanga yitheya okwa bulhwere obukasighalira!

8. Ababuthi banga wathikya bathi abaana babu eritheya emithima yabu?

⁸ Ababuthi, muwithe olhukwamirwa lhw’embaghane olhw’eritheya abaana benyu okwa kaghalha ka Sitani ak’erianza eritsandya emithima yabu. Ahathe erithika-thika mukakolha  ekyosi-kyosi ekyo mwanga thoka eritheya abaana benyu okwa malhwere. Mukayonza emiyi yenyu, kandi mukaghusa ekyosi-kyosi ekyanga leka inywe kutse abaana benyu ibalhwalha. Kuthya, wutholere iwatheya abaana bawu okwa syofilimu, esyondegheka sy’etivi, emisathu, n’emithahulha ye Intaneti eyanga bahira mw’amalengekania wa Sitani. Yehova abiribaha ehamuli y’eritheya obunyakirimu bw’abaana bwenyu. (Emi. 1:8; Efe. 6:1, 4) Neryo isimwasagha erihira omw’eka yenyu mw’ebilhaghiro ebiseghemere okwa misingyi ye Biblia. Bwira abaana bawu abalere ebya batholere erilebya n’ebya bathatholere erilebya, kandi bawathikaye eriyitheghererya ekikaleka iwathwamu wuthya. (Mt. 5:37) Abaana bawu bakendibya banemukulha, beghesaye ngoku banga ghabulha ekihikire n’ekibi erikwamana n’emisingyi ya Yehova. (Ebr. 5:14) Kandi wibuke ngoku abaana bawu bakend’ighira okwa bya wukabugha kandi kwilhabirirya okwa bya wukakolha.​—Ebi. 6:6, 7; Abar. 2:21.

9. Ni kilengekanio kyahi ekya Sitani akakulha-kulhanaya, kandi busana naki ni ky’akabi?

⁹ Kandi Sitani akalengesaya eritsandya omuthima wethu omw’ileka thuyikethere amenge w’abandu omwakanya k’amalengekania wa Yehova. (Kol. 2:8) Thalebya amalengekania wa Sitani ano​—athi eribya mughuda kitholere ikyabya kilhubirirwa kikulhu omwa ngebe. Abakalengekanaya bathya bangana thunga ebindu binene, kutse eyihi. Mbulha ni kyahi okw’ebi, bali omwa kabi. Busana naki? Kundi banganahwerya amalengekania wabu okw’isondekania esyosente ibathatsomana amaghalha wabu, obughuma bw’eka yabu, nibya n’obughuma bwabu na Nyamuhanga banamathahika okwa kilhubirirwa kyabu. (1 Tim. 6:10) Thukasima Thatha wethu w’elhubulha ow’amenge erithuwathikya eribya n’amalengekania awatholere okwa by’esyosente.​—Omu. 7:12; Lk. 12:15.

10-11. (a) Thutholere ithwabya ithwangana thoka erikolhaki erithoka eriyitheya? (b) Kera abatheya ibakakolhaki, kandi obunyamuthima-thima bwethu bwangabya buthi ng’omutheya wethu?

¹⁰ Thwamabya b’erisingura eritheya omuthima wethu, thutholere ithwabya ithwangana lhangira akabi n’eriyira eky’erikolha omwa bya lhuba eriyitheya. Ekinywe ekikahindulhawamu “theghaya” omwa Emisyo 4:23 kikathwibukaya omubiiri ogho mutheya akakolha. Omwa biro by’Omwami Solomona, abatheya ibakabya okwa lhuhimbo lhw’omuyi eritheyagho n’erighusa okwa bandu kw’omulenge bamalhangira akabi kakasa. Erithera akasasani k’ekyo kikathuwathikaya eriyitheghererya ekya thutholere ithwakolha erikakirya Sitani eritsandya amalengekania wethu.

¹¹ Kera, abatheya ibakakolongana ndeke n’abakabya okwa syongyo sy’omuyi. (2 Sam. 18:24-26) Abosi haghuma, ibakawathikaya eritheya omuyi omw’ilhangira bathi esyongyo sikakingawa enzighu yikasa. (Neh. 7:1-3) Obunyamuthima-thima bwethu obukangiriribwe ne Biblia * bwangana kolha ng’omutheya wethu n’erithumanyisya Sitani akanza erithahirira omuthima wethu​—ni bugha ambu, akanza eritsandya amalengekania, eriyowa, ebilhubirirwa, kutse esyongumbu syethu. Omughulhu obunyamuthima-thima bwethu bukathukunga, thutholere ithwahulikirira ndeke n’erikolha ekyosi-kyosi ekyo thwanga thoka eriyitheya.

12-13. Thwangana lengwako erikolhaki, aliwe thutholere ithwakolhaki?

¹² Thulebaye eky’erileberyako ngoku thwanga  yitheya okw’itsandibwa omwa malengekania wa Sitani. Yehova abirithukangirirya athi “simuleke obusingiri, kutse ebithisirire byosi, kutse obururu, bikahulhwa omwa kathi-kathi kenyu.” (Efe. 5:3) Aliwe thwanga kolhaki abanywani okwa mubiiri kutse okwa sukuru bamatsuka erikania okwa by’obutswatswa? Thunasi ngoku thutholere ‘ithwaghana emikolere eyithekenga Nyamuhanga n’esyongumbu sy’ekihugho.’ (Tito 2:12) Omutheya, obunyamuthima-thima bwethu, bwangana thukunga. (Abar. 2:15) Aliwe ithunemwendi buhulikirira? Ithwangana lengwako, ithwahulikirira ebya banywani bethu kutse erisamalira ebisasani ebya banga thuthumira. Aliwe thutholere ithwakinga esyongyo sy’omuyi, ni bugha ambu erihindulha omukania kutse eriyilhuiraho.

¹³ Kikayithagha obuthubaha erirwanisya akahathikano k’abanywani bethu ak’erilengekania kutse erikolha ebithuwene. Thwangana yikethera ngoku Yehova akalhangira akaghalha akathukahiraho, kandi akendi thuha amaaka n’amenge w’erirwanisya amalengekania wa Sitani. (2 Emy. 16:9; Isa. 40:29; Yak. 1:5) Aliwe ibbwa, thwanga lholha thuthi embere eritheya emithima yethu?

14-15. (a) Thutholere ithwakyungulira omuthima wethu waki, kandi thwanga kikolha thuthi? (b) Emisyo 4:20-22 hakathuwathikaya hathi erighasirwa ndeke thukasoma e Biblia? (Lebaya n’akasanduko “ Ngoku Wangaghanirya.”)

¹⁴ Eritheya omuthima wethu, siriri subulira okw’ighana amalengekania awathuwene aliwe mwamuli n’erilighira amalengekania awuwene. Thasyalengekanaya okwa ky’erileberyako ky’omuyi owaliko olhuhimbo. Omutheya w’olhukyo iniakakinga olhuyi lhw’omuyi erikakirya esyonzighu eringiramu, aliwe iniakanakingulha esyongyo sy’omuyi nuku ebyalya n’ebindi bindu bingiremo. Esyongyo sy’omuyi syamabya buthakyungulhwa, abali omwa muyi ibakendiwira. Kuthya nethu, thutholere mughulhu wosi ithwakingulira amalengekania wa Nyamuhanga eringira omwa mithima yethu.

¹⁵ E Biblia muli amalengekania wa Yehova, neryo obuli somayo, thukabya ithukalighira amalengekania wiwe erisondolha amalengekania, eriyowa, n’emikolere yethu. Thwanga ghasirwa thuthi ndeke thukasoma e Biblia? Erisaba ni rikulhu. Mwali wethu mughuma akabugha athi: “Ngathe ngasoma e Biblia, ngatsuka erisaba Yehova, anyiwathikaye ‘erilhangira ndeke emyatsi y’ekwenene y’eriswekera’ eyiri omwa Kinywe kiwe.” (Esy. 119:18) Kandi thutholere ithwaghanirya okwa byathukasoma. Thukabya thukasaba, erisoma, n’erighanirya, Ekinywe kya Nyamuhanga kikingira kutsibu “omwa muthima” wethu, neryo ithwanza amalengekania wa Yehova.​—Soma Emisyo 4:20-22; Esy. 119:97.

16. Abangyi babirighasirwa bathi omw’irebya endegheka eya JW tivi?

¹⁶ Eyindi nzira ey’erilighira amalengekania wa Nyamuhanga erithusondolha ly’erilebya emyatsi eyiri okwa JW tivi^®. Omulhume mughuma na mukali wiwe bakabugha bathi: “Endegheka y’obuli kwezi yabirisuba omwa misabe yethu! Yikathuhimba n’erithughumya omughulhu thuli omwa bulighe kutse omwa mbwera. Kandi thukahulikirira mughulhu wosi esyonyimbo sy’embaghane. Thukasiwatha thukatsumba, thukakolha obuyonzo, kutse thukanywa ekyayi.” Esyondegheka esi sikathuwathikaya eritheya omuthima wethu. Sikathukangiriraya erilengekania nga Yehova n’eriyihighulha okwa malengekania wa Sitani.

17-18. (a) Bikabya bithi thwamaghendera okwa bya thukigha oku Yehova, ngoku kikanganibwe omu 1 Abami 8:61? (b) Eky’erileberyako ky’Omwami Hezekia kyanga thweghesyaki? (c) Erikwamana n’omusabe wa Dawudi owali omu Esyonyimbo 139:23, 24, ni byahi ebyo thwangasaba?

¹⁷ Obuli lhangira emighaso y’erikolha kihikire, erikirirya lyethu likaghuma. (Yak. 1:2, 3) Thukayowa ndeke kundi thwabirileka Yehova  iniathuyisyethera erithwahulhamo baana biwe, n’eriyisunza lyethu ly’erianza erimutsemesya iryongera. (Emi. 27:11) Obuli lengwako likathuha akaghisa k’erikangania ngoku thwanzire kutsibu erikolera Thatha wethu oyuthutsomene. (Esy. 119:113) Thukakanganaya ngoku thwanzire Yehova n’omuthima wosi, ow’abirithwamu eriowa ebihano biwe n’erikolha erisonda liwe.​—Soma 1 Abami 8:61.

¹⁸ Mbwino thwangana sobya? Ee; sithuhikene. Thwamathwikalha, ambi ithwibuka eky’erileberyako ky’Omwami Hezekia. Mwasobya. Aliwe mwayisubamu kandi amalholha embere erikolera Yehova “n’omuthima ahikene.” (Isa. 38:3-6; 2 Emy. 29:1, 2; 32:25, 26) Neryo, thughane ebithegho bya Sitani eby’erianza erithuhira mw’amalengekania wiwe. Thusabe erithunga “omuthima w’eriminya” kutse ow’obwowa. (1 Bam. 3:9; soma Esyonyimbo 139:23, 24.) Thwangana sighalha bathaleghulha oku Yehova, thwamatheya omuthima wethu kwilhaba ekindu kindu kyosi-kyosi.