KYAKASATHU omwa ngyakya, biro 24 Okwokubanza, 2018, Abanya Beteli be Amerika ne Kanada mubatsema bakowa ekirango ky’embaghane: Mughalha wethu Kenneth Cook, Jr., abiryongerwa okwa Kathunga Akakasondolha ak’Abema ba Yehova.

Mughalha wethu Cook abuthirawa n’erikulira e south-central Pennsylvania, U.S.A. Iniakisiya iniaghunza esukuru, mwaminya ekwenene erilhua okwa oyobakasoma nayu kandi abatizibawa biro 7 Okwomukagha, 1980. Mwatsuka obutemburi bw’omughulhu wosi Okwomwenda 1, 1982. Abere akaghunza myaka ibiri omwa butemburi, mwakokibwa okwa Beteli, amatsuka omubiiri wiwe we Beteli e Wallkill, New York, Okwerikumi 12, 1984.

Emyaka 25 eyakwamako, Mughalha wethu Cook mwakolha mibiiri muthina-muthina Ahabakahulhukiraya ebitabu n’omwa ofisi okwa Beteli. Mwathahya mukali wiwe, Jamie, omwa 1996, nayu mwamuyiyungako omwa mubiiri we Beteli e Wallkill. Omwa Kwerikuminibiri 2009, Mughalha wethu na Mwali wethu Cook mubathumwa omwa Watchtower Educational Center e Patterson, New York, eyo Mughalha wethu Cook aheberawa omubiiri w’erikolera omwa Dipatimenti ey’eby’Esyobaruha. Omo Kwakani 2016, buthuku buke imwanamabirisuba e Wallkill, Mughalha wethu na Mwali wethu Cook mubasuba e Brooklyn, New York. Enyuma w’amezi athano, mubasuba okwa kyaghanda kikulhu e Warwick, New York. Okwokubanza 2017, Mughalha wethu Cook mwasombolhwa eribya muwathikya w’okwa Komiti ey’eby’Erihandika ey’Akathunga Akakasondolha.