1-2. (a) Omwatsi owali omwa Isaya 41:10 mwahamba athi oku mwali wethu Yoshiko? (b) Yehova mwalhangira athi omwatsi oyu akatheghibawa busana n’erighasira abahi?

MWALI wethu Omukristayo omuthaleghulha ya Yoshiko mwathunga engulhu nyibi. Omudokita wiwe mwamubwira athi akisiya mezi make buyira iniaholha. Yoshiko mwakolhaki? Mwibuka erisako eryo anzire kutsibu omwa Biblia, Isaya 41:10. (Soma.) Inianathekene mwabwira omudokita wiwe athi syakwire buba, kundi Yehova anamuhambire okwa byalha. * Omwatsi owakahumulikanaya owali omw’isako eryo mwawathikya mwali wethu mwanzwa oyo eriyikethera ndeke Yehova. Erisako iryan’eryo lyangana thuwathikya erisighalha ithunathekene thukabana ebitsibu. Eriyitheghererya ngoku lyanga thuwathikya, thutsuke erilebya ekyaleka Nyamuhanga iniaha Isaya y’omwatsi oyu.

² Yehova alhaghira Isaya erihandika ebinywe ebyo erihumulikania Abayuda abangabere banyewa e Babeli. Aliwe, Yehova mwalhangira athi omwatsi oyo akatheghibawa isi busana n’erighasira Abayuda abanyewa basa aliwe n’abandu biwe abosi eritsuka okwa buthuku obo erihika lino. (Isa. 40:8; Abar. 15:4) Munabwire, thuli omwa “mighulhu eyikalire,” kandi kwilhaba kera, thukayithagha erihumulikanibwa eriri omwa kitabu kya Isaya.​—2 Tim. 3:1.

3. (a) Ni milhaghe yahi eyiri omu Isaya 41:10, erisako erisombwerwe busana n’omwaka owa 2019? (b) Busana naki thukayithagha erikakasibwa eriri omwa milhaghe eyi?

³ Omo mwatsi ono, thukendi hira omuwatho okwa milhaghe isathu ya Yehova eyikahimba erikirirya eyiri omu Isaya 41:10:  (1) Yehova akendibya haghuma nethu, (2) ni Nyamuhanga wethu, na (3) akendi thuwathikya. Thukayithagha erikakasibwa eri * kundi, nethu nga Yoshiko, thukabana ebitsibu omwa ngebe. Kandi thuwithe n’ebitsibu ebikalethawa busana n’ebindu bibi ebikabya omwa kihugho. Abandi omw’ithwe nibya banemubana eriendereribwa erilhua okwa syogavumente. Thulebaye emilhaghe isathu eyi mughuma okwa mughuma.

4. (a) Erikakasibwa ly’erimbere erya thukayakanayako ly’eryahi? (Lebaya n’omwatsi ahikwa.) (b) Ni binywe byahi ebikakanganaya eriyowa lya Yehova busana nethu? (c) Ebinywe bya Nyamuhanga bikaleka iwayowa wuthi?

⁴ Yehova akatsuka omw’ithuhumulikania omwa binywe bino: ‘Siwubahe, kusangwa indi haghuma nawu.’ * Yehova akakanganaya ngoku ane haghuma nethu omw’ithuhulikirira ndeke n’erithukangania olhwanzo lhwiwe. Lhangira ebinywe ebya Yehova akakolesaya erikania okw’ibuya-buya n’olhwanzo lhwiwe lhunene. Yehova athi: ‘Wuli w’obughuli bunene omwa meso waghe, wabirisikibwa kandi nabirikwanza.’ (Isa. 43:4) Omwa buhangwa bwosi sihali ekyanga kakirya Yehova erikangania abakamukolera b’olhwanzo; syanga thuleghulhako. (Isa. 54:10) Olhwanzo n’obunywani bwiwe bikathuha amani. Namunabwire akendi thutheya ngoku anatheghaya Abramu (Abrahamu) munywani wiwe. Yehova mwamubwira athi: “Siwubahe, Abramu; Ingye indi ngabo busana nawu.”​—Enz. 15:1.

5-6. (a) Thukaminya thuthi ngoku Yehova anzire erithuwathikya omwa bitsibu byethu? (b) Eky’erileberyako kya Yoshiko kikathweghesayaki?

⁵ Thunasi ngoku Yehova anzire erithuwathikya omwa bitsibu byethu kundi akalhaghanisaya abandu biwe athi: ‘Omughulhu wukalhaba omwa maghetse, nasyabya haghuma nawu, n’erilhaba omwa syonyusi, sisyendi syakubwayirako. Omughulhu wukalhaba omwa muliro siwendi syahya, kutse ekirimi ky’omuliro sikyendi syakuhisya.’ (Isa. 43:2) Ebinywe ebi bikamanyisayaki?

⁶ Yehova syali lhagha erighunzaho ebitsibu ebikaleka engebe iyakalha, aliwe syendi lighira  ebitsibu ebiri ‘ng’esyonyusi n’omuliro’ erithusendya kutse erithuhuthalya kera na kera. Akayilhagha eribya nethu, erithuwathikya “erilhaba” omwa bitsibu ebyo. Yehova akendi kolhaki? Akendi thuwathikya erithulerya obuba bwethu nuku thubye ithune bathaleghulha okw’iyo, nomuthwangaholha. (Isa. 41:13) Yoshiko, oyulyakanibawako okw’itsuka, mwayilhangirira ekyo. Mwali wiwe akabugha athi: “Muthwasima mama eribya inianathekene. Muthwalhangira ndeke-ndeke ngoku Yehova mwamuha erithekana omwa muthima. Erihika okw’iholha, Mama iniakakaniraya abathambiri n’abandi balhwere oku Yehova n’okwa milhaghe yiwe.” Eky’erileberyako kya Yoshiko kikathweghesayaki? Omughulhu thukayikethera omulhaghe wa Nyamuhanga owa “Nasyabya haghuma nawu,” nethu thukabya n’obuthubaha n’amaaka thukaghumira ebitsibu.

7-8. (a) Ni kakasibwa lyahi eryakabiri erya thukayakanayako, kandi erihangya-hangya kikamanyisayaki? (b) Ni kyahi ekyaleka Yehova iniabwira Abayuda abanyewa athi ‘sibahanga-hangaye’? (c) Ni binywe byahi ebiri omu Isaya 46:3, 4 ebya humulikanaya emithima y’abandu ba Nyamuhanga?

⁷ Lhangira erikakasibwa eryakabiri erya Isaya ahandika erikwamana ne Biblia eya New World Translation: “Siwuhanga-hangaye, kundi Indi Nyamuhanga wawu.” Ebinywe ebihambire okw’ihangya-hangya ebi bikamanyisayaki? Hano ekinywe “erihangya-hangya” ekyakolesibawa e Biblia yikahandikwa kirimo “omundu eriyikeba-keba akasagha akabi” kutse “erihandabuka busana n’eribya omwa mibere eyikalire.”

⁸ Ni kyahi ekyaleka Yehova Nyamuhanga iniabwira Abayuda abangabere banyewa e Babeli athi ‘sibahanga-hangaye’? Kundi abya inianasi ngoku abikalhani b’ekihugho ekyo bangakwire obuba. Ni kyahi ekyangalekire ibakwa obuba? Okw’ihwererera ly’emyaka 70 Abayuda ibane omwa bunyewa, amahe w’amaaka w’Abamedi n’Abapersia angabambire e Babeli. Yehova angakolesirye amahe aya erilhusya abandu biwe omwa bunyewa mwe Babeli. (Isa. 41:2-4) Abanya Babeli n’ab’ebindi bihanda ab’obuthuku obo babere bakaminya ngoku enzighu yabu yinemwasa, mubalengesya erikangania obuthubaha omw’ibwirana bathi: “Wuhande omuthima.” Kandi mubongera erikolha esyosanamu, ibanawithe amaha bathi sikendi batheya. (Isa. 41:5-7) Banemukolha ekyo, Yehova mwahumulikania emithima y’Abayuda ababya omwa bunyewa omw’ibugha athi: “Iwe, Israeli, [erithendibya ng’abikalhani bawu] wuli mughombe waghe . . . Siwuhanga-hangaye, kundi indi Nyamuhanga wawu.” (Isa. 41:8-10, NW) Lhangira ngoku Yehova mwabugha athi: “Indi Nyamuhanga wawu.” Omwa binywe ebyo, Yehova mwakakasya abaramya biwe abathaleghulha ngoku syali athab’ibirirwa​—abya iniakine Nyamuhanga wabu, nabu ibakine bandu biwe. Mwababwira athi: “Nasyabaheka! . . . nasyabalhamya.” Ahathe erithika-thika ebinywe by’erikakasya ebyo mubyahumulikania Abayuda ababya omwa bunyewa.​—Soma Isaya 46:3, 4.

9-10. Busana naki sihatholere hakabya ekyangaleka ithubaha? Iha eky’erileberyako.

⁹ Lino kwilhaba kera, abandu abathuthimbireko bakahanga-hangaya busana n’emibere y’ekihugho eryongera eritsanda. Kuthya nethu, ebitsibu ibyan’ebyo bikathuhambako. Aliwe sihali ekyangaleka ithubaha. Yehova akathubwira athi: ‘Indi Nyamuhanga wenyu.’ Busana naki ebinywe ebyo ni nzumwa ngulhu eyangaleka ithwasighalha ithunathekene?

¹⁰ Thalengekania oku kino: Abalhume babiri, Jim na Ben, bane omwa ndegge eyiri omwa kiyagha kinene. Ekiyagha kikabya kinemuthwalha endegge y’eyi n’eyi, omulenge akasira omwa mizindalo athi: “Mubohe ndeke emikoba yenyu. Thukendi ghunza ndambi ithune omwa kiyagha  kino.” Jim akakwa obuba bunene. Aliwe oyukaghendaya endegge akathasyabugha athi: “Simuhanga-hangaye. Ingye pailoti wenyu n’ingye ngabugha.” Neryo Jim iyo, akatsingaya omuthwe n’eriyibughako athi, “Obo oyu iniana thubwira athi bikendyuwana?” Akabya akasamalira Ben, akalhangira iyo inianasikire. Jim akamubulhaya: “Busana naki iwe wunathekene?” Ben akasenyenyaya n’eribugha athi: “Kundi pailoti oyu nganamwasi ndeke. Ni thatha waghe!” Neryo Ben athi: “Leka ngathakubwira oku thatha waghe. Ngakyasi ngoku wukendibya wabirimuminya n’eriminya amaaka wiwe, nawu wukendi thekana.”

11. Ni byahi ebya thwang’igha omwa ky’erileberyako kya Jim na Ben?

¹¹ Ni byahi ebya thwang’igha okwa ky’erileberyako eki? Nethu nga Ben, sithukwire obuba kundi thunasi ndeke Thatha wethu w’elhubulha, Yehova. Thunasi ngoku akendi thusondolha ndeke omwa bitsibu ebiri ng’ekiyagha kinene ebya thukabana omwa biro by’enyuma-nyuma by’omughulhu ono. (Isa. 35:4) Thuyikethere Yehova, neryo thwangana sighalha ithunathekene abandi omwa kihugho ibanakwire obuba bunene. (Isa. 30:15) Kandi thukakolha nga Ben thukabwira abataka bethu okwa syonzumwa esikaleka ithwayikethera Nyamuhanga. Neryo nabu ibangana yikethera ngoku nomubangabana bitsibu bingahi, Yehova akendi bawathikya.

12. (a) Ni kakasibwa lyahi erya kasathu erya thukayakanayako? (b) Ebinywe “okuboko” kwa Yehova bikathw’ibukaya ekwenene yahi?

¹² Lhangira erikakasibwa erya kasathu erya Isaya ahandika: ‘Ngendikuha amaaka, kwenene ngendi kuwathikya.’ Isaya abya iniabirisoborera emibere Yehova angaheremo abandu biwe amaaka, kutse eribaghumya, akabugha athi: ‘Yehova asyasa n’amaaka, n’okuboko kwiwe kwa syamuthabalira.’ (Isa. 40:10) Mughulhu mungyi e Biblia yikakolesaya ekinywe “okuboko” erimanyisya obuthoki. Neryo ebinywe  “okuboko kwiwe kwa syamuthabalira” bikathw’ibukaya ngoku Yehova ni Mwami w’obuthoki bunene. Mwakolesya akaghalha kiwe akalengethukireyo erisighika n’erilhwira abaghombe biwe aba kera, kandi na munabwire anemulholha embere erighumya n’eritheya abakamuyikethera.​—Ebi. 1:30, 31; Isa. 43:10.

13. (a) Kutsibu-tsibu ni mughulhu wahi Yehova akaberereraya omulhaghe wiwe w’erithuha amaaka? (b) Ni mulhaghe wahi owakaleka ithwaghuma n’erisika?

¹³ Kutsibu-tsibu esyonzighu syethu sikabya sikathwendererya, Yehova akaberereraya eriyilhagha liwe lino: “Ngendikuha amaaka.” Munabwire omwa bindi bitsweka, esyonzighu syethu sinemulengesya kutsibu eryimania omubiiri wethu w’erithulira kutse ekithunga kyethu. Nomwabine, ebitsibu ng’ebyo sibirileka thukahangya-hangya kutsibu. Yehova abirithuha omulhaghe owakaleka ithwaghuma n’erisika. Akathulhagha athi: “Sihali kindu ky’amalhwa ekikahesawa erilhwa nawu ekikendi syaghasa.” (Isa. 54:17) Ebinywe ebyo bikathwibukaya bindu bikulhu-bikulhu bisathu.

14. Busana naki sithuli sweka esyonzighu sya Nyamuhanga sikalhwa nethu?

¹⁴ Eky’erimbere, ithwe ng’abakwamire Kristo, thwasi ku thuli b’eriponwa. (Mt. 10:22) Yesu mwabugha athi abigha biwe bakendi syendereribwa kutsibu omwa biro by’enyuma-nyuma. (Mt. 24:9; Yn. 15:20) Ekyakabiri, omwa buminyereri bwa Isaya, thukasangwa thwabwirwa ngoku esyonzighu syethu sisyendithupona buyira; bakendi kolesya eby’amalhwa muthina-muthina erilhwa nethu. Eby’amalhwa ebyo muli amabehi awabisamire, amabehi w’ekinyamwisi, n’eriendererya erikalire kutsibu. (Mt. 5:11) Yehova syendimania esyonzighu erikolesya eby’amalhwa ebi erilhwa nethu. (Efe. 6:12; Erib. 12:17) Aliwe sithutholere thuk’ubaha. Busana naki?

15-16. (a) Ekindu kyakasathu ekyathutholere ithwibuka ni kyahi, kandi Isaya 25:4, 5 hakasighika hathi eki? (b) Isaya 41:11, 12 hakasoborera hathi ekikendi hika okwa bakalhwa nethu?

¹⁵ Lhangira ekindu kyakasathu ekya thutholere ithw’ibuka. Yehova mwabugha athi “sihali kindu ky’amalhwa” ekikakolesibawa erilhwa nethu “ekikendi syaghasa.” Ngoku olhuhimbo  lhukanathutheghaya okwa kibulha ekiri mw’ekiyagha ekikatsandaya, na Yehova akathutheghaya okwa “muka w’abandu babi.” (Soma Isaya 25:4, 5.) Esyonzighu syethu sisyendi syathoka na kera erithukolhako ekyanga thwaghalya kera na kera.​—Isa. 65:17.

¹⁶ Yehova akathasyaghumaya eriyikethera lyethu omw’iyo omw’isoborera ndeke-ndeke ekikendi hika okwa ‘bakathuhithanako.’ (Soma Isaya 41:11, 12.) Esyonzighu syethu nomusyangathurwanisya bungahi kutse amalhwa n’omw’angakalha athi, ekikalhuamo kyan’ekighuma: Esyonzighu syosi sy’abandu ba Nyamuhanga ‘syasyabya busa n’erihera.’

17-18. (a) Erisoma e Biblia lyanga thuwathikya lithi eryongera eriyikethera Nyamuhanga? Iha eky’erileberyako. (b) Erighanirya okw’isako ly’omwaka owa 2019 kyanga thuwathikya kithi?

¹⁷ Thukongera eriyikethera lyethu omu Yehova omw’imuminya ndeke. Kandi enzira nguma nyisa y’eriminya ndeke Nyamuhanga ly’erisoma ndeke e Biblia n’erighanirya okwa bya thukasoma. Omwa Biblia muli emyatsi y’eriyikethera eyikasoborera ngoku Yehova atheghaya abandu biwe kera. Emyatsi eyo yikaleka ithwasika ngoku akendi thutheya lino.

¹⁸ Ng’eky’erileberyako thaghanirya okwa binywe ebya Isaya akakolesaya erikangania ngoku Yehova akathutheghaya. Akahulha Yehova mwa mulisya n’abaghombe ba Nyamuhanga mwa byana by’esyombuli. Isaya akabugha oku Yehova athi: “Asyabaghalira ebyana by’esyombuli omo byalha biwe, n’erihekabyo okwa kikuba kiwe.” (Isa. 40:11) Thukabya thukaminya ngoku Yehova anathuhirireko ebyalha biwe by’amaaka, thukayowa ithuli omwa butheya n’erithekana. Erithuwathikya eribya ithunathekene n’omwa bitsibu ebya thukabana, omughombe oyutheleghulha n’ow’amenge, abirisombolha Isaya 41:10 eribya lisako ly’omwaka owa 2019, “Siwuhanga-hangaye, kundi Indi Nyamuhanga wawu.” Ghaniraya okwa binywe ebikasikaya omuthima ebi. Bikendi leka iwaghuma wukalhaba omwa bitsibu ebiri embere.