1. Olhwanzo lhwa Nyamuhanga lhukaleka iwayowa wuthi?

OMUKWENDA Yoane mwahandika athi “Nyamuhanga ni lhwanzo.” (1 Yn. 4:8) Ebinywe byolho ebyo bikathwibukaya ekwenene eno: Nyamuhanga ni Nzuko y’engebe, kandi ni Nzuko y’olhwanzo. Yehova athwanzire. Olhwanzo lhwiwe lhukaleka ithwayowa buholho, ithwatsema, kandi ithwathekana.

2. Ngoku kiri omu Matayo 22:37-40, ebihano bikulhu-bikulhu bibiri by’ebyahi, kandi busana naki kyangana kalha erighendera okwa kihano ekyakabiri?

² Abakristayo sibanga thwamu nga banakanganaye olhwanzo kutse eyihi. Ni kihano kutse ekilhaghiro. (Soma Matayo 22:37-40.) Thwamabiriminya Yehova ya ndeke, kikathwolhobera erighendera okwa kihano ky’erimbere. Yehova ahikene, emibere Yehova akathuthwaliramu yikakanganaya kw’athutsomene kandi kw’athwanzire. Aliwe kyangana thukalira erighendera okwa kihano kyakabiri. Busana naki? Kundi balikyethu, ng’abaghuma b’okwa baliranwa bethu, sibahikene. Hanganayira ibabugha kutse erikolha ebindu ebithe kanganaya eritsomana kutse olhukeri. Yehova abya inianasi ngoku thwangana bana ekitsibu eki, neryo mwasondolha abaghuma b’okwa bahandika e Biblia erihandika erihabulha lirebe ngoku thwanganzana n’ekyangaleka. Omughuma w’okwa bahandiki abo ni Yoane.​—1 Yn. 3:11, 12.

3. Ni kyahi ekyo Yoane akanganaya?

³ Omwa bya Yoane ahandika, ngendo nyingyi mwakangania ngoku Abakristayo batholere ibakangania olhwanzo. Omo mwatsi wiwe owahambire oko ngebe ya Yesu, Yoane yukakanaya kutsibu oko lhwanzo kwilhaba abandi bahandiki basathu  ab’ebitabu by’Enjiri. Yoane abya w’emyaka nga kikumi akahandika ekitabu kiwe ky’Enjiri n’esyobaruha siwe isathu. Ebihandikire ebyo bikakanganaya ngoku obuli kindu eky’Omukristayo akakolha kitholere ikyakolhwa busana n’olhwanzo. (1 Yn. 4:10, 11) Aliwe, mukyathwalha buthuku Yoane erisalha igha erisomo eryo.

4. Yoane mwanakangania abandi b’olhwanzo mughulhu wosi?

⁴ Yoane iniakine mulhwana, isyali kanganaya olhwanzo mughulhu wosi. Ng’eky’erileberyako, buthuku bughuma, Yesu n’abigha biwe mubalhaba e Samaria bakaghenda e Yerusalemu. Ab’omwa kyalu kirebe e Samaria mubaghana eribakokya. Yoane mwakolhaki? Mwabulya Yesu athi nga babirikire omuliro alhue elhubulha erithoghothya abandu bosi b’omwa kyalu ekyo! (Lk. 9:52-56) N’okwa bundi buthuku, Yoane mwalemwa erikangania abakwenda balikyabo b’olhwanzo. Kilhangirikire iyo na mughalha wabu ya Yakobo ku mubalombota mama wabu bathi abwire Yesu athi abahe ebitsumbi by’embere-mbere omo Bwami. Abandi bakwenda babere baminya ekyo Yakobo na Yoane babirikolha, mubahithana kutsibu! (Mt. 20:20, 21, 24) Nomwakine indi Yoane mwakolha ebisobyo byosi ebi, Yesu iniamwanzire.​—Yn. 21:7.

5. Omo mwatsi ono thukendi kania okuki?

⁵ Omo mwatsi ono, thukendi kania okwa ky’erileberyako kya Yoane n’emyatsi mirebe eyo ahandika eyihambire oko lhwanzo. Thukakolha ekyo, thukend’igha ngoku thwanga kangania balikyethu b’olhwanzo. Kandi thukend’igha okwa nzira ngulhu eyo omuthwe w’eka angakanganiryamo kw’anzire eka yiwe.

6. Yehova abirikangania athi kw’athwanzire?

⁶ Mughulhu mungyi thukanalengekanaya thuthi erikangya olhwanzo ly’eribugha ndeke n’abandu. Aliwe olhwanzo eribya lhwanzo lhw’okwenene, lhutholere ilhwakanganibwa omwa mikolere. (Thasyalebaya na Yakobo 2:17, 26.) Ng’eky’erileberyako, Yehova athwanzire. (1 Yn. 4:19) Kandi akakanganaya olhwanzo lhwiwe erilhabira omo binywe ebyuwene kutsibu ebiri omwa Biblia. (Esy. 25:10; Abar. 8:38, 39) Aliwe, thukaligha ngoku Nyamuhanga athwanzire butsira busana n’ebyo akabugha bisa aliwe kandi busana n’eby’akakolha. Yoane mwahandika athi: “Olhwanzo lhwa Nyamuhanga lhwabiriminyikalha okw’ithwe omo mwatsi ono, athi, Nyamuhanga mwathuma Mughalha mubuthwa mughuma wiwe omo kihugho, ithwathoka eribana engebe busana nayu.” (1 Yn. 4:9) Yehova mwalighira Mughalha wiwe mwanze eriaghalhwa n’eriholha busana nethu. (Yn. 3:16) Ahathe erithika-thika, Yehova athwanzire kutsibu.

7. Ni kyahi ekyo Yesu akolha erikangania kw’athwanzire?

 ⁷ Yesu mwakakasya abigha biwe athi abanzire. (Yn. 13:1; 15:15) Mwakangania ng’anzire bungahi abigha biwe haghuma nethu omwa by’abugha n’omwa by’akolha. Yesu mwabugha athi: “Sihali mundu oyuwithe olhwanzo lhulengire olhu, athi omundu akasigha engebe yiwe busana n’abira biwe.” (Yn. 15:13) Ni kyahi ekyo thutholere ithwakolha omughulhu thukalengekanaya okwa ebyo Yehova na Yesu babirithukolera?

8. Thutholere ithwakolhaki erikwamana n’ebiri omu 1 Yoane 3:18?

⁸ Thukakanganaya ku thwanzire Yehova na Yesu omw’ibowa. (Yn. 14:15; 1 Yn. 5:3) Kandi Yesu mwathulhaghira athi thwanzane. (Yn. 13:34, 35) Thutholere ithwakangania ku thwanzire balikyethu omo byathukabugha kandi ithwakangania ku thubanzire omwa byathukakolha. (Soma 1 Yoane 3:18.) Neryo ibbwa ni byahi ebyo thwanga kolha erikangania ku thubanzire?

9. Olhwanzo mulhwaleka Yoane iniakolhaki?

⁹ Yoane angana thwiremo erikalha na thatha wiwe kandi iniakolha esyosente omwa mubiiri w’eka yabu ow’obusohe. Omwakanya k’eyo, mwakolesya engebe yiwe yosi eriwathikya abandi erigha ekwenene eyihambire oku Yehova na Yesu. Engebe eyo Yoane athwamu erikwama siyabya nyolho. Mw’endereribwa kandi okw’ihwererera ly’ekighana ky’erimbere iniamabiribya musyakulhu, mwathwalhwa omo bunyewa. (Emib. 3:1; 4:1-3; 5:18; Erib. 1:9) Nibya iniane omwa bunyewa mw’eyo busana n’erithulha ebihambire oku Yesu, Yoane mwakangania kw’anzire abandi. Ng’eky’erileberyako, iniane okwa kitsinga kye Patemo, mwahandika ekitabu ky’Eribisulirwa neryo amakithumira ebithunga nuku baminye emyatsi “eyikendi syabya lhuba.” (Erib. 1:1) Neryo obundi iniamabiriboholhwa erilhua omo bunyewa mwe Patemo, Yoane mwahandika Enjiri yiwe eyihambire okwa ngebe n’erithulira lya Yesu. Kandi mwahandika esyobaruha siwe isathu busana n’erihumulikania n’erighumya balikyabo. Wanga gherererya wuthi engebe ya Yoane ey’eriyihayo?

10. Wanga kangania wuthi ku wanzire abandu?

¹⁰ Wangana kangania ku wanzire abandu omwa mibere wukathwamu erikoleseryamo engebe yawu. Ekihugho kya Sitani kyanzire iwakolesya obuthuku bwawu obwosi n’akaghalha omw’iyilengekaniako n’erilengaho erisondekania esyosente kutse eriyikolera erina. Aliwe abakayihayo erithulhughania Obwami omwa kihugho kyosi bakakolesaya obuthuku bunene bakathulha engulhu yuwene n’eriwathikya abandu eriyithunda hakuhi na Yehova. N’abandi nibya babirithoka erithulira n’erikangirirya mughulhu wosi.

11. Abathuliri bangyi abathaleghulha bakakanganaya bathi ku banzire Yehova n’abalikyabo?

¹¹ Abakristayo abangyi abathaleghulha bakathekawa erikolha buthuku bwosi eribana ebiyithawa byabu n’eby’amaka wabu. Nomwabine, abathuliri abathaleghulha aba bakasighika ekithunga kya Nyamuhanga omwa nzira yosi-yosi ngoku banga thoka. Ng’eky’erileberyako, abandi bakawathikaya ahawire ebitsinduli, abandi ibakolha okwa by’obuhimbe, kandi obuli mundu awithe akaghisa ak’erihayo esyosente erisighika omubiiri w’ekihugho kyosi. Bakakolha ebi kundi banzire Nyamuhanga n’abandi. Obuli wiki, thukakanganaya ku thwanzire balikyethu omw’ihindana okwa mihindano n’erisangira muyo. Nomuthwangabya ithulhuhire, thukaghenda okwa mihindano. Nomuthwangakwa engitsi thukasubiraya. Nomwakine indi ithwe bosi thunawithe ebitsibu, thwangana himba abandi emihindano yithe yatsuka kandi  yikahwamo. (Ebr. 10:24, 25) Thukasima emibiiri eyo abikirirya balikyethu bakakolha!

12. Ni yindi nzira yahi eyo Yoane akanganirayamu kwanzire balikyabo?

¹² Yoane mwakangania kwanzire balikyabo omw’ibasima n’eribahabulha. Ng’eky’erileberyako, omwa syobaruha siwe, Yoane mwasima balikyethu busana n’erikirirya lyabu n’emibiiri yabu mibuya, aliwe kandi mwabakunga okw’ikolha ekibi. (1 Yn. 1:8–2:1, 13, 14) Nethu thutholere ithwasima balikyethu busana n’ebindu bibuya ebyo bakakolha. Aliwe omundu amatsuka erikangania omubere mubi kutse omutse mubi, omwa menge thutholere ithwamukangania olhwanzo omw’imubwira eky’erikolha. Kikayithagha obuthubaha erihabulha omunywani, aliwe e Biblia yikabugha yithi abanywani babuya bakaghusungulhana, kutse erihengulhana.​—Emi. 27:17.

13. Thutholere ithwayihighulha okw’ikolhaki?

¹³ Okwa bundi buthuku, thukakanganaya ku thwanzire balikyethu omwa bya thukaghana erikolha. Ng’eky’erileberyako, sithuli hithana lhuba-lhuba okwa by’abakabugha. Thalengekania okwa kyabya kyabere oku Yesu iniane okwa kihugho. Mwabwira abigha biwe athi eribana engebe, batholere ibalya omubiri wiwe n’erinywa omusasi wiwe. (Yn. 6:53-57) Ebinywe ebyo mubyathikya abandu kyamaleka abangyi b’okwa bigha biwe ibamusighania​—aliwe butsira banywani biwe ab’okwa ndungu, imwamuli na Yoane. Mubasighalha ibane nayu buthaleghulha. Mubathayitheghererya ebyo Yesu abugha, kandi nabu byangabya imubyabaswekya. Aliwe abanywani ba Yesu abathaleghulha mubathalengekania bathi ebyo abugha biwire kandi mubithaleka bakahithana. Omwakanya k’ekyo, mubamuyikethera, ibanasi ngoku ebyo abugha ni kwenene. (Yn. 6:60, 66-69) Kwesi ni kikulhu ithwe erithendi hithana lhuba-lhuba busana n’ebya banywani bethu bakabugha! Aliwe thutholere ithwabaha akaghisa k’erithusoborera nga bakamanyisayaki.​—Emi. 18:13; Omu. 7:9.

14. Busana naki sithutholere thukapona balikyethu?

¹⁴ Yoane kandi mwathubwira athi isithwapona balikyethu. Thwamalemwa erighendera okw’ihabulha eryo ithukendibya ithwamaha Sitani y’akaghisa k’erithukolesya. (1 Yn. 2:11; 3:15) Eki mukyabya okwa bandi okw’ihwererera ly’ekighana ky’erimbere E.K. Sitani mwakolha ekyosi-kyosi ekyo angathoka erihira omwa bandu ba Nyamuhanga mw’eriponangana n’erighabulhana. Yoane akahandika esyobaruha  siwe, abalhume ababya ibabirikangania omuthima owali ng’owa Sitani babya ibabiringira omwa kithunga. Ng’eky’erileberyako, Diotrefe mwahira omwa kithunga kighuma mw’erighabulhana erikalire. (3 Yn. 9, 10) Isyali sikaya abalebererya abo akathunga akakasondolha kabya kakathuma. Nibya mwalhusya omwa kithunga mw’abandu ababya bakakokya abandu abo iyo aponire! Abya mulhume mubi kitsibu! Namunabwire Sitani akinalengaho erighabulha n’erilemesya abandu ba Nyamuhanga eriwathikania. Ambi isithwalighira eriponangana likathughabulha.

15. Ni kyahi eky’omuthwe w’eka atholere in’ibuka?

¹⁵ Enzira ngulhu eyo omuthwe w’eka akakanganirayamu kw’anzire ab’eka yiwe ly’eribaha ebiyithawa byabu by’ekinyamubiri. (1 Tim. 5:8) Aliwe atholere in’ibuka ngoku ebindu by’ekinyamubiri sibyanga berererya ebiyithawa by’eka yiwe eby’obunyakirimu. (Mt. 5:3) Lengekanaya okwa ky’erileberyako ekyo Yesu abirihiriraho emithwe y’eka. Ngoku kiri omwa Njiri ya Yoane, Yesu iniakisiya iniaholha okwa muthi w’amaghali, abya iniakinalengekanaya okwa b’eka yabu. Yoane na mama wa Yesu iya Maria babya iban’imene aho Yesu ithibirawa okwa muthi. Yesu nomwanabya omwa bulhumi bunene mwabwira Yoane athi atsomane Maria. (Yn. 19:26, 27) Yesu abya inianawithe abaana babu abangana tsomene ebiyithawa bya Maria eby’ekinyamubiri aliwe bakabya ngababya isibali babya bigha biwe. Neryo Yesu anza erilhangira athi Maria akatsomanawa kinyamubiri na bunyakirimu.

16. Ni ngwamirwa syahi esyo Yoane aby’awithe?

¹⁶ Yoane abya awithe esyongwamirwa nyingyi. Iyo ng’omughuma w’okwa bakwenda, aby’atholere erikangania omuhwa omwa mubiiri w’erithulira. Kandi angabya iniabya athahirye, neryo iniatholere iniatsomana eka yiwe kinyamubiri na bunyakirimu. (1 Kor. 9:5) Eki kikeghesayaki emithwe y’eka eya munabwire?

17. Busana naki ni kikulhu omuthwe w’eka eritsomana eka yiwe bunyakirimu?

¹⁷ Mughalha wethu oyuwithe amaka angana thunga esyongwamirwa esirithohire nyingyi. Ng’eky’erileberyako, atholere iniakolha kutsibu omubiiri wiwe w’ekihugho nuku emibere yiwe yihe olhukengerwa oku Yehova. (Efe. 6:5, 6; Tito 2:9, 10) Kandi anganabya iniawithe esyongwamirwa omwa kithunga, ng’eribungira balikyethu n’erisangira omwa mubiiri w’erithulira. Kandi ikyabya ini kikulhu iyo eribya inianemwigha e Biblia na mukali wiwe na baana  biwe mughulhu wosi. Neryo ibakendi sima akaghalha ako akahiraho eribatsomana kinyamubiri, omw’iyowa, kandi bunyakirimu.​—Efe. 5:28, 29; 6:4.

18. Ni kyahi ekyo Yoane aby’akakasirye?

¹⁸ Yoane mwaghunza emyaka mingyi kandi ni bingyi ebyabya omo ngebe yiwe. Mwabana emiringo yosi y’ebitsibu ebyanga tsekirye erikirirya liwe. Aliwe mughulhu wosi mwalengaho erighendera okwa bihano bya Yesu, imwamuli n’eky’erianza balikyabo. Busana n’ekyo, Yoane abya akakasirye ngoku Yehova na Yesu bamwanzire kandi ngoku bakendimuha amaaka w’erighumira ekitsibu kyosi-kyosi. (Yn. 14:15-17; 15:9, 10; 1 Yn. 4:16) Sihali ekya Sitani n’ekihugho kiwe bakolha erikakirya Yoane okw’ibya n’olhwanzo n’erilhukangania omwa by’abugha n’erikolha.

19. Erikwamana na 1 Yoane 4:7, thukahirawa mw’omuhwa w’erikolhaki, kandi busana naki?

¹⁹ Nga Yoane, nethu thw’ikere omwa kihugho ekikathabalhawa na Sitani, nyamuhanga w’ekihugho kino oyuthawithe olhwanzo. (1 Yn. 3:1, 10) Nomwakine indi anzire erithulemesya erianza balikyethu, ekyo sikyangabya mbwino ithunalyamulighira. Ka thuthwemu erianza balikyethu, erikangania olhwanzo olho omwa byathukabugha n’omwa byathukakolha. Neryo ithukendi tsemera eribya omw’ihiika lya Yehova kandi ithwatsemera engebe.​—Soma 1 Yoane 4:7.