1. Omukania owalhabibawa okwa lhuhindano lhunene omwa 1935 mwahamba athi okwa mulhwana mughuma?

OMULHWANA mulebe abya awithe emyaka 18 akabatizibwa omwa 1926. Ababuthi biwe babya Bigha be Biblia, eryabya lina ly’Abema ba Yehova okwa buthuku obo. Babya bawithe abaana b’obulhume basathu na b’obukali babiri, kandi mubabakangirirya erikolera Yehova n’erigherererya Yesu Kristo. Ng’abandi Bigha abosi be Biblia okwa buthuku obo, omulhwana oyo iniakalya okwa biminyisyo okwa Kihulho ky’Omukama eky’Erigholho eky’obuli mwaka. Aliwe, amaha wiwe mwahinduka omukania owathe ang’ibiriranwa owa “Endeko Nene” akalhabibwa. Mughalha wethu J.  F.  Rutherford yuwalhabaya omukania oyo omwa 1935 okwa lhuhindano lhunene e Washington, D.C., Amerika. Ni kyahi ekyabisulhawa okwa lhuhindano olho?

2. Ni kwenene yahi eyikasisimulha eyo Mughalha wethu Rutherford abisulha omwa mukania wiwe?

² Omwa mukania wiwe, Mughalha wethu Rutherford mwaminyikalya “endeko nene” eyikanibweko omwa Eribisulirwa 7:9. Omukania oyo athali alhabibwa, abigha be Biblia ibakalengekanaya bathi endeko nene ni yindi gurupu y’abandu nabu abakendi syaghenda elhubulha aliwe abawithe erikirirya like. Mughalha wethu Rutherford mwakolesya Amasako erisoborera ngoku endeko nene sibendi syaghenda elhubulha, aliwe ku ni sindi mbuli * sya Kristo abakendi syasabuka obulighe bunene kandi  ib’ikalha okwa kihugho kera na kera. (Erib. 7:14) Yesu mwalhaghanisya athi: “Kandi nyiwithe esindi mbuli, esithe sy’omwa butsunga obu; litholere inalethasyo nibya, nasyo syasyowa omulenge waghe; syasyabya kihangulho kighuma n’omulisya mughuma.” (Yn. 10:16) Ab’esindi mbuli abo ni Bema ba Yehova abathaleghulha abawithe amaha w’erisyikalha okwa kihugho Paradiso kera na kera. (Mt. 25:31-33, 46) Thulebaye eriyitheghererya lihya-lihya eri nga mulyahamba lithi okwa maha w’abangyi b’okwa bandu ba Yehova, imwamune na mughalha wethu oyuwabya awithe emyaka 18.​—Esy. 97:11; Emi. 4:18.

3-4. Okwa lhuhindano lhunene olhwa 1935, ni kyahi ekyo bangyi baminya okwa maha wabu, kandi busana naki?

³ Okwa lhuhindano olho mukyatsemesya abahulikiriri embuyi yikababwira yithi: “Abosi abawithe amaha w’erisyabya okwa kihugho kera na kera mbwino mwangana hangana?” Mughalha wethu mughuma oyuwahindana okwa lhuhindano olho akabugha athi mwalhangira abandu abalhabire okwa mbindi y’abandu nga 20,000 ababya bahindene bakahangana. Neryo Mughalha wethu Rutherford mwabugha athi: “Lebaya! Endeko nene!” Neryo abandu mubutha obogho bunene bw’etseme. Abahangana mubaminya ngoku sibawithe amaha w’erighenda elhubulha. Mubaminya ngoku sibathahakabibwa omwa mulimu wa Nyamuhanga. Okwa kiro ekyakwamako okwa lhuhindano olho, abandu 840 mubabatizibwa eribya Bema ba Yehova, abangyi b’okw’ibo ini b’esindi mbuli.

⁴ Omukania oyo abere abirilhabibwa, omulhwana oyo thulyakanayako ahighulhu n’abandi bangyi mubaleka erithasyabya bakalya okwa muggati n’erinywa okwa vini okwa Kihulho ky’Omukama eky’Erigholho-gholho. Omw’iyikehya mughalha wethu mughuma mwakangania eriyowa liwe n’ery’abandi akabugha athi: “Eryibuka erya 1935 ly’eryabya ly’erighunzerera ingye erirya okwa biminyisyo. Munaminya ngoku Yehova syathanyihira mwa maha w’erighenda elhubulha erilhabira omwa mulimu wiwe abuyirire; aliwe ngoku ngawithe amaha w’erisyabya okwa kihugho n’erisangira omwa mubiiri w’erikolhakyo mwa paradiso.” (Abar. 8:16, 17; 2 Kor. 1:21, 22) Eritsuka-tsukana naho, omughanzo w’endeko nene abiriyongera kandi banemukolha haghuma n’emisighalira y’abahakabibwa. *

5. Yehova akalhangira athi ababirileka erithasyalya okwa biminyisyo eby’okw’Ibuka?

⁵ Yehova akalhangira athi abaleka erithasyalya okwa biminyisyo eby’okw’Ibuka enyuma wa 1935? Kandi ibbwa munabwire Omwema wa Yehova oyubatizibirwe amalya okwa muggati n’erinywa okwa vini okwa Kihulho ky’Omukama eky’Erigholho-gholho neryo enyuma waho akaminya ngoku simuhakabibwa? (1 Kor. 11:28) Abandi babirirya okwa biminyisyo busana n’erithendi yitheghererya ndeke amaha wabu. Aliwe bamaminya ekisobyo kyabu, bakaleka erithasyalya okwa biminyisyo, kandi bakalholha embere erikolera Yehova buthaleghulha, Yehova iniakendi baghanza ng’ab’esindi mbuli. Nomubangabya isibakirya okwa muggati n’erinywa okwa vini, batholere ibahindana okw’Ibuka kundi bakasima kutsibu ebya Yehova na Yesu babiribakolera.

6. Yesu abirilhaghira abamalaika athi bakoleki?

⁶ Obulighe bunene bunemuseghera hakuhi, kyuwene erikania okwa ebya Eribisulirwa  sura 7 hakathasyongera erikania okwa Bakristayo abahakabibwa n’endeko nene ey’ab’esindi mbuli. Yesu akabwira abamalaika athi balhole embere erihambirira amahunga ani aw’erithoghothya. Sibatholere bakalhwikira amahunga ayo w’okwa kihugho erihika aho Abakristayo abahakabibwa abosi bakendihiribwa kw’akaminyikalho k’erighunzerera, ni bugha ambu, erihamibwako na Yehova. (Erib. 7:1-4) Baghalha bobu Kristo bakendi syahembwa busana n’obuthaleghulha bwabu omw’ibya bami na bahereri haghuma nayu elhubulha. (Erib. 20:6) Abosi abali omwa kitsweka ky’elhubulha eky’erihiika lya Nyamuhanga bakendi syatsema bakalhangira abahakabibwa 144,000 bakathunga olhuhembo lhwabu olhw’elhubulha.

7. Ngoku kiri omwa Eribisulirwa 7:9, 10, ni bahi abo Yoane alhangira omwa syonzoli, kandi babya bakakolhaki? (Lebaya ekisasani ky’okwa kidipa.)

⁷ Yoane abere abirikania oko bami n’abahereri 144,000 aba, mwakania okwa kindu ekikatsemesaya, “endeko nene” abakalhama okwa Harmagedoni. Mbaghane n’egurupu y’erimbere, egurupu yakabiri eyi ni nene kutsibu kandi siyiwithe mughanzo. (Soma Eribisulirwa 7:9, 10.) “Bambithe esyokanzu nyeru-nyeru,” erikangania ngoku babiriyihighulha okwa bithisirire eby’ekihugho kya Sitani n’erisighalha bathaleghulha oku Nyamuhanga na Kristo. (Yak. 1:27) Bakabirikira omwa mulenge munene bathi babirilhamibwa busana n’ebya Yehova na Yesu, Ekyana ky’Embuli kya Nyamuhanga, babirikolha. Kandi bawithe okwa mithahi y’amabondo omwa byalha byabu, erikangania ngoku omwa butseme bunene bakaligha Yesu ng’Omwami oyo Yehova abirisombolha.​—Thasyalebaya na Yoane 12:12, 13.

8. Eribisulirwa 7:11, 12 hakathubwira hathiki okwa bali omw’ihiika lya Yehova ery’elhubulha?

⁸ Soma Eribisulirwa 7:11, 12. Abali omwa lhubulha mubayowa bathi? Yoane akalhangira abosi abali omw’ihiika lya Yehova ery’elhubulha bakatsema n’eripipa Nyamuhanga bakalhangira endeko nene. Abali omw’ihiika lya Yehova ery’elhubulha bakendi syatsema kutsibu bakalhangira esyonzoli esi sikabererera omughulhu endeko nene yikendi syasabuka obulighe bunene.

9. Ngoku kiri omwa Eribisulirwa 7:13-15, ab’endeko nene banemukolhaki?

⁹ Soma Eribisulirwa 7:13-15. Yoane akabugha athi ab’endeko nene “babiryerya esyokanzu syabu n’eriyirasyo mo nyeru-nyeru omo musasi w’Ekyana ky’Embuli.” Eki kikamanyisaya kithi bawithe obunyamuthima-thima obuhenirye n’emimanire eyuwene embere sya Yehova. (Isa. 1:18) Ni Bakristayo ababiriyihayo n’eribatizibwa, abawithe erikirirya erighumire omwa kihongo kya Yesu kandi bawithe obughuma na Yehova. (Yn. 3:36; 1 Pet. 3:21) Busana n’ekyo, bakatholera erimana embere sy’ekithumbi ky’obwami bwa Nyamuhanga ‘erimukolera omo musibo n’omwa kiro’ omwa kibugha ky’ehekalu yiwe ey’obunyakirimu ey’okwa kihugho. Ibane n’omuhwa, b’abakakolha omubiiri omunene ow’erithulhughania Obwami n’eriyira abigha kandi bakahira Obwami bwa Nyamuhanga bw’embere omo ngebe syabu.​—Mt. 6:33; 24:14; 28:19, 20.

10. Ab’endeko nene bayikethereki, kandi ni mulhaghe wahi owabakendi syalhangira akabererera?

¹⁰ Ab’endeko nene abakalhua omwa bulighe bunene bayikethere ngoku Nyamuhanga akendi lholha embere eribatsomana, kundi “oyo wikere oko kithumbi ky’obwami asyikalha omo kathi-kathi kabu.” Omulhaghe ogho esindi mbuli babirikandira akendi syabya: “[Nyamuhanga] asyasangulha emisonia yosi oko meso wabu. Kandi olhuholho silhwendi syaswabyaho, erisusumana kutse eririra, kutse eriaghalhwa.”​—Erib. 21:3, 4.

11-12. (a) Ngoku kiri omwa Eribisulirwa 7:16, 17, ni mighisa yahi eyo ab’endeko nene balindirire? (b) Ni kyahi ekyo ab’esindi mbuli banga kolha okw’Ibuka, kandi busana naki?

 ¹¹ Soma Eribisulirwa 7:16, 17. Na lino, abaghuma b’okwa baghombe ba Yehova banemwaghalhwa n’enzalha busana n’eby’emingirirye erikalha kutse busana n’akatabanguko n’esyonyuhi. Abandi bane omwa ngomo busana n’erikirirya lyabu. Aliwe, ab’endeko nene bakatsema bakaminya ngoku bakendisyabya babirilhama okw’ithoghothibwa ly’omughulhu mubi ono, bakendi syabya ibanawithe ebyalya bingyi eby’ekinyamubiri n’eby’obunyakirimu. Ekihugho kya Sitani kikendi syabya kikathoghothibwa, ab’endeko nene bakendi syalhama okwa kihuhania ekikahisaya eky’ekinigha kya Yehova ekyo akendisy’uthulira okwa bihanda. Obulighe bunene bukendi syabya bukahwa, Yesu akendi syasondolha abakendi syalhama aba okwa “maghetse w’engebe” y’erikotha. Thakilengekaniako: Ab’endeko nene bawithe amaha mabuyanga. Okwa syobbiliyoni sy’abandu ababirithabyaho, ab’endeko nene sibendi syaholha!​—Yn. 11:26.

¹² Ab’esindi mbuli bawithe amaha mabuyanga awakaleka ibasima Yehova na Yesu! Sibawithe amaha w’erisyaghenda elhubulha, aliwe ni b’obughuli embere sya Yehova. Abahakabibwa n’ab’esindi mbuli bangana pipa Nyamuhanga na Kristo. Enzira nguma eyo bakakolera mw’eki ly’erihindana okwa Kihulho ky’Omukama eky’Erigholho-gholho.

13-14. Busana naki obuli mundu atholere iniahindana okw’Ibuka olhuholho lhwa Kristo?

¹³ Omwa myaka eya lino-lino, omundu nga mughuma omwa bandu 1000 abakahindana yukalya okwa muggati n’erinywa okwa vini. Ebithunga bingyi sibiwithe oyukalya okwa biminyisyo. Abangyi abakahindana okw’Ibuka bawithe amaha w’erisyabya okwa kihugho. Neryo busana naki bakahindana okwa Kihulho ky’Omukama eky’Erigholho-gholho? Bakahindana habw’enzumwa eyiri ng’eyikaleka abandu ibaghenda okwa bugheni bwa munywani wabu. Bakasa okwa bugheni kundi banzire erikangania ku banzire kandi ku bakasighika abakaherukanaya. Neryo ab’esindi mbuli bakahindana okw’Ibuka kundi banzire erikangania ku banzire kandi ku bakasighika Kristo n’abahakabibwa. Kandi ab’esindi mbuli bakahindana erikangania ku bakasima ekihongo kya  Yesu ekik’ibukawa okwa kiro ky’Eryibuka, ekihongo ekikaleka ikyathokekana ibo erisyabya okwa kihugho kera na kera.

¹⁴ Eyindi nzumwa eyikaleka ab’esindi mbuli ibahindana okw’Ibuka, ly’erikangania ku bakaghendera okwa kihano kya Yesu. Yesu abere akatsukisya ekihulho eky’embaghane eki n’abakwenda biwe abathaleghulha, mwababwira athi: “Mukole muthya busana n’erinyibuka.” (1 Kor. 11:23-26) Neryo ab’esindi mbuli bakalholha embere erihindana okwa Kihulho ky’Omukama eky’Erigholho-gholho kundi emisighalira y’okwa bahakabibwa bakine okwa kihugho. Kandi nibya, ab’esindi mbuli bakakokaya obuli mundu erihindana haghuma nabu okw’Ibuka.

15. Thwanga kolhaki eripipa Nyamuhanga na Kristo okw’Ibuka?

¹⁵ Okw’Ibuka, thukathunga akaghisa k’eripipa Nyamuhanga na Kristo omw’imba n’erisaba. Omukania owakendi lhabibwa omwaka ono ni “Sima Ekya Yehova na Kristo Babirikukolera!” Akendi leka ithwongera erisima Yehova na Kristo. Ebiminyisyo bikabya bikalhabibwa, thuk’ibuka ekyo bikimanira​—omubiri wa Yesu n’omusasi wiwe. Thukendi sy’ibuka ngoku Yehova mwalighira Mughalha wiwe eriholha omwa bwethu nuku thubane engebe. (Mt. 20:28) Obuli mundu oyuwanzire Thatha wethu w’elhubulha na Mughalha wiwe akendi syanza erihindana okw’Ibuka.

16. Abahakabibwa n’ab’esindi mbuli bingene omwa nziraki?

¹⁶ Embaghane eyiri ahakathi-kathi k’abahakabibwa n’ab’esindi mbuli siyirileka abandi bakabya nga balengire abandi embere sya Nyamuhanga. Esyogurupu syosi ibiri ni b’obughuli embere siwe. Kundi nibya, Nyamuhanga mwathuha omuhendo mughumerere, engebe ya Mughalha wiwe mwanzwa, erighulha abahakabibwa n’ab’esindi mbuli. Embaghane eyiri ahakathi-kathi k’esyogurupu ibiri esi yiri yithi bawithe amaha awathasosene. Abosi batholere ibasighalha bathaleghulha oku Nyamuhanga na Kristo. (Esy. 31:23) Kandi wibuke, omulimu wa Nyamuhanga akakolera omw’ithwe bosi okwa lhulengo lhughuma. Eki kikamanyisaya kithi Yehova akaha obuli mundu y’omulimu wiwe abuyirire erikwamana n’ekyo mundu oyo akayithagha.

17. Ni kyahi ekyo emisighalira y’okwa bahakabibwa bakakandira?

¹⁷ Abakristayo abahakabibwa sibali buthawa n’amaha w’erighenda elhubulha. Nyamuhanga yukahira amaha ayo omwa mithima yabu. Bakalengekanaya okwa maha ayo, ibasaba busana nagho, kandi balindirire kutsibu erithunga olhuhembo lhwabu lhw’elhubulha. Sibasi emibiri yabu y’ekirimu nga yikendi syasosa yithi. (Fil. 3:20, 21; 1 Yn. 3:2) Aliwe, bakakandira  erilholha oku Yehova, Yesu, abamalaika, n’abandi bahakabibwa. Kandi banzire erisyabya haghuma nabu omo Bwami bw’elhubulha.

18. Ab’esindi mbuli balindirireki?

¹⁸ Ab’esindi mbuli bakasima kutsibu amaha wabu w’obuhangiranwa aw’erisyabya okwa kihugho kera na kera. (Omu. 3:11) Balindirire ekiro bakendi syawathikya erikolha ekihugho kyosi mwa paradiso. Bakakandira ekiro bakendi syahimba amanyumba wabu, ibalima amalima wabu, n’erikulya abaana, kandi abosi ibanawithe amaghalha awahikene. (Isa. 65:21-23) Bakakandira erisyarambura ekihugho​—ebithwe byakyo, emisithu, esyongetse esinene-sinene​—n’erisy’igha okwa bihangikwa bingyi bya Yehova. Ekikulhu kutsibu, bakatsema bakaminya ngoku obughuma bwabu na Yehova bukendi syayongera erighuma kandi ibayithunda ndeke hakuhi nayu.

19. Eryibuka likathuha akaghisa k’erikolhaki, kandi Eryibuka likendibya kiroki omwaka ono?

¹⁹ Yehova abiriha obuli mughombe wiwe oyuyihereyo okw’iyo amaha mabuyanga. (Yer. 29:11) Eryibuka olhuholho lhwa Kristo likaha obuli mughuma w’okw’ithwe akaghisa ak’embaghane ak’eripipa Nyamuhanga na Kristo busana n’ebyo babirithukolera nuku thubane engebe y’erikotha. Ahathe erithika-thika, Eryibuka w’omukonga mukulhu ogho Abakristayo ab’okwenene bakahindanako obuli mwaka. Likendi syabya biro 27 Kyamukagha, Okwakasathu 2021 eryuba lyabirilenga. Omwaka ono abangyi abali omwa myanya eyirimo obwiranda bakendi hindana okwa mukonga oyu. Abandi bakendi syahindana nomuhane erihakanisibwa. Abandi bakendi sy’ibuka olhuholho lhwa Yesu ibane omwa ngomo. Yehova, Yesu, n’abandi abali omwa kitsweka ky’erihiika lya Nyamuhanga eky’elhubulha bakendisyabya banasamalire, ambi obuli kithunga, egurupu, n’obuli mundu, imwathunga Eryibuka libuya!