1. Ng’Omwami Dawudi, abandi omw’ithwe bangana bulya bathiki?

ITHWE bosi thwanzire ithwabya ithunathekene n’eribya buholho. Sihali oyukatsemera eribya omwa maghaniryo. Aliwe, hanganayira ithwabya n’amaghaniryo mangyi. Abandi baghombe ba Yehova bangana bulya ekibulyo ekiri ng’ekyo Mwami Dawudi abulhaya Yehova kino: “Erikolyahi obulighe bwasyusulya omuthima waghe omo musibo n’omo kiro kwehi?”​—Esy. 13:2.

2. Thukendi kania okuki omo mwatsi ono?

² Nomwakine indi sithwangabya butsira maghaniryo, hane ebyo thwanga kolha erikehyagho. Omo mwatsi ono thukendi tsuka erilebya nga ni byahi ebyanga thulethera amaghaniryo. N’enyuma waho ithwakania okwa bindu mukagha ebyanga thuwathikya eribya ithunayibombekire kutse erithekana thukabana ebitsibu.

3. Ni bindu nga byahi ebikaletha amaghaniryo, kandi mbwino thwangana bikakirya?

³ Hane ebyanga thulethera amaghaniryo ebya thuthe thwanga thoka erikakirya. Ng’eky’erileberyako, obuli mwaka ebbeyi y’ebyalya, ey’esyongyimba, n’ey’eripangisya enyumba yikayongera, kandi ekyo sithwanga thoka erikikakirya; kandi sithwangathoka erikakirya amalengekania w’abathukakolha nabu kutse abathukasoma nabu abanganza erithulengako erithwingirya omwa by’erithendibya b’ekwenene kutse omwa by’obutswatswa. Kandi sithwanga kakirya obubi obuthuthimbireko. Thukabana ebitsibu ebi kundi thuli omwa kihugho ekiri mw’abandu bangyi abawithe amalengekania awathaseghemere  okwa misingyi ye Biblia. Sitani nyamuhanga w’ekihugho kino anasi ngoku abandi bandu bakendi lighira “amaghali w’ekihugho” kino eribalemesya erikolera Yehova. (Mt. 13:22; 1 Yn. 5:19) Neryo sikirithuswekaya ekihugho eribya ikyuswire mw’ebitsibu ebikalethera abandu b’amaghaniryo!

4. Eriyilhalikirira ebyangabya omo ngebe kyangana leka ithwayowa thuthi?

⁴ Thwangana yilhalikirira kutsibu okwa byanga thuhikako omo ngebe ibyathulethera amaghaniryo mangyi. Ng’eky’erileberyako, thwangana bulha nga thunemwendi bana esyosente esikaghunza eribana ebiyithawa byethu kutse ithwalengekania thuthi thwangana lhwalha ithwabya isithwanga thasyakolha mubiiri kutse ithwaherya omubiiri wethu. Kandi ithwangana yilhalikirira thuthi thwangana leghulha thwamalengwako erithwa ekihano kya Nyamuhanga. Sitani akisiya iniakolesya abandu abo akasondolha eribambira abandu ba Nyamuhanga, neryo thwangana yilhalikirira nga thukendi syakolhaki thukabambirwa. Ithwangana yibulya, ‘Nina kibi erihangya-hangya busana n’ebindu ng’ebi?’

5. Yesu amanyisayaki akabugha athi: “Simuyilhuhaye n’amaghaniryo”?

⁵ Thunasi ngoku Yesu mwabwira abakamukwama athi: “Simuyilhuhaye n’amaghaniryo.” (Mt. 6:25) Mbwino eki kikamanyisaya kithi Yesu abugha athi isithwahanga-hangaya nahake? Kwabithe bithya. Nibya kera abandi b’okwa baghombe ba Yehova abathaleghulha mubanabya omo maghaniryo, aliwe mukithaleka Yehova akabaghana. * (1 Bam. 19:4; Esy. 6:3) Yesu abya iniakathughumaya. Abya isyanzire thukahangya-hangya kutsibu busana n’engebe eno kikaleka thukalemwa erikolera Nyamuhanga. Neryo kwesi, ni byahi ebyo thwanga kolha erikehya amaghaniryo?​—Lebaya akasanduko “ Ngoku Kyanga Kolhwa.”

6. Ngoku kiri omwa Abanya Filipi 4:6, 7, ni kyahi ekyanga thuwathikya eribya ithunathekene?

⁶ (1) Saba mughulhu wosi. Abakristayo abawithe amaghaniryo bakabana erithekana bakasaba Yehova erilhua oko muthima. (1 Pet. 5:7) Yehova angana subirya emisabe yawu omw’ikuha “obuholho bwa Nyamuhanga, obulhabire amenge wosi” w’abandu. (Soma Abanya Filipi 4:6, 7.) Erilhabira omo maaka wiwe w’omulimu abuyirire, Yehova akaleka ithwabya ithunayibombekire kutse erithekana omughulhu thuwithe amaghaniryo.​—Gal. 5:22.

7. Thutholere ithwabya ithun’ibukireki thukasaba Nyamuhanga?

⁷ Wukakania na Yehova omwa musabe, mubwire ebyosi ebiri okwa muthima. Bugha ekyonyine-nyine. Mubwire ekitsibu nga niki, kandi musoborere nga wukayowa wuthi busana nakyo. Hamabya ihane eky’erikolha, musabe amenge aw’erikibana n’amaaka w’erikolhakyo. Hamabya isihali ekyanga kolhwa okwa kitsibu kyawu, saba Yehova akuwathikaye nuku amaghaniryo aleke erikubundamirya. Wamabugha ekyonyine-nyine omwa musabe wawu, endambi iyikendi hika iwayilhangirira ngoku Yehova abirisubirya. Wamathendi bana eky’erisubirya okwa misabe yawu aho naho, isiwabikyako. Yehova anzire ithwabugha ekyonyine-nyine kandi ithwahathikana erisaba.​—Lk. 11:8-10.

8. Ni byahi ebyo thwangahira omwa misabe yethu?

⁸ Wukaghusira Yehova y’amaghaniryo wawu omwa musabe, lhangira wuthi wukahira mw’ebinywe by’erimusima. Kyuwene erilengekania okwa mighisa eyo thuwithe nibya ithune n’omwa mibere eyikalire. Hamabya ihakanayira  iwalemwa eribana ebinywe ebitholere erisoborera eriyowa lyawu, ambi iwibuka ngoku Yehova akasubiraya n’emisabe ey’ebinywe bike nga ‘Kisi ngwathikaye!’​—2 Emy. 18:31; Abar. 8:26.

9. Obutheya bw’okwenene bwanga banika buthi?

⁹ (2) Yikethere amenge wa Yehova butsira awawu. Kera omwa kighana ky’omunani E.K.K., Abasuria mububahisya Abayuda. Omw’iyibulha-bulha busana n’eribya isibanzire eribya ahisi sy’obusondoli bw’Abasuria, Abayuda mubasaba Abanya Misiri abakafiri b’obuwathikya. (Isa. 30:1, 2) Yehova mwababwira athi ekyo kikendi lhwiririra mw’ebitsibu. (Isa. 30:7, 12, 13) Erilhabira omu Isaya, Yehova mwabwira Abayuda ngoku banga bana obutheya bw’okwenene. Mwabugha athi: “Omw’iyibombeka n’eriyikethera [Yehova] ni maaka wenyu.”​—Isa. 30:15b.

10. Ni mibere nga yahi eyo thwanga kanganiryamu ku thuyikethere Yehova?

¹⁰ Thwanga kangania thuthi ku thuyikethere Yehova? Thulebaye eby’erileberyako birebe. Thubughe thuthi iwahebwa omubiiri owali kw’esyosente nene owakendi kuyithaghako obuthuku bwawu bunene kandi iningirira n’endegheka yawu y’obunyakirimu. Kutse thubughe thuthi omundu mulebe aho wukakolera iniatsuka erikukolera eby’olhwanzo, aliwe omundu oyo si mughombe wa Nyamuhanga oyubatizibirwe. Kutse omuhughu wawu iniakubwira athi akendi kughana wamalholha embere erikolera Yehova. Omwa buli kighuma, iwukendi kolha erithwamu erikalire, aliwe Yehova iniakendi kuha obusondoli obo wukayithagha. (Mt. 6:33; 10:37; 1 Kor. 7:39) Ekibulyo kya kino, Iwune mwendi yikethera obusondoli obo n’eribughenderako?

11. Ni myatsi yahi eye Biblia eyo thwang’ighako nuku thusighale ithunathekene thukahakanisibwa?

¹¹ (3) Ighira okwa by’erileberyako ebyuwene n’ebithuwene. E Biblia muli myatsi mingyi eyikakanganaya omughaso w’erilholha embere eribya iwunathekene n’eriyikethera Yehova. Wukasoma emyatsi eyi, lhangira ekya wathikaya abaghombe ba Nyamuhanga eribya ibanathekene bakabana erihakanisibwa erikalire. Ng’eky’erileberyako, ab’ekoti ngulhu ey’Abayuda babere bakahamulha bathi abigha baleke erithasyathulira, abakwenda mubathakwa obuba. Aliwe, omo buthubaha mubabugha bathi: “Litholere ithwakenga Nyamuhanga kwilhaba abandu.” (Emib. 5:29) Abakwenda mubathakwa obuba nibya ibabirinaswiribwa. Busana naki? Kundi babya ibanasi ngoku Yehova ane okwa lhuhandi lhwabu. Mwabatsemera. Neryo mubalholha embere erithulhughania engulhu yuwene. (Emib. 5:40-42) N’omwigha Setefano iniakayithibawa, mwasighalha inianathekene kandi iniane buholho n’obusu bwiwe mubwasosa “ng’obusu bw’omumalaika.” (Emib. 6:12-15) Busana naki? Kundi abya inianasi ndeke-ndeke ngoku anasimirwe na Yehova.

12. Ngoku kiri omu 1 Petero 3:14 na 4:14, busana naki ithwatsema omughulhu thukendereribawa?

¹² Abakwenda babya ibabiriyilhangirira ebikakanganaya ngoku Yehova ane haghuma nabu. Abya iniabiribaha amaaka w’erikolha ebithiko-thiko. (Emib. 5:12-16; 6:8) Ithwe munabwire si thuwithe amaaka ayo. Aliwe erilhabira omo Kinywe kiwe, omo lhwanzo Yehova akathukakasaya ngoku thwamaghalhwa busana n’erikolha ekithunganene, thwangana tsema kundi Yehova akathutsemera kandi omulimu wiwe ane haghuma nethu. (Soma 1 Petero 3:14; 4:14.) Neryo omwakanya k’eribera eriyilhalikirira nga thukendi syakolhaki thukabana eriendereribwa erikalire omwa buthuku obukasa, thutholere ithwahwerya amalengekania w’okwa kya thwanga kolha lino erighumya eriyikethera lyethu omo maaka wa Yehova aw’erithuwathikya n’erithulhamya. Ngoku  abigha ba kera abo bakolha, nethu thutholere ithwayikethera omulhaghe wa Yesu ono: “Nasyabaha ebinywe n’amenge ayo sihali enzighu yenyu yasyathoka erisinga kutse eriyighana.” Yesu mwathulhaghanisya athi: “Busana n’erihathikana lyenyu mwasyabana engebe yenyu.” (Lk. 21:12-19) Isiwibirirawa ngoku Yehova akabya inian’ibukire n’ehindu hike-hike ehihambire oko baghombe biwe abakaholha ibane bathaleghulha. Kundi anasi ebibahambireko akendi syabalhubukya.

13. Thwanga ghasirwa thuthi omw’igha okwa by’erileberyako eby’abo abalemawa eribya ibanathekene n’eriyikethera Yehova?

¹³ Kandi thwangan’ighira n’okwa by’erileberyako eby’abo abalemawa eribya ibanathekene n’eriyikethera Yehova. Erigha okwa by’erileberyako ebithuwene ebyo kikendi thuwathikya eriyihighulha okw’ikolha ebisobyo ebiri ng’ebyo bakolha. Ng’eky’erileberyako, Omwami Asa owe Yuda mwayikethera Yehova omughulhu amahe manene awe Etiopia asyamubambira, kandi Yehova mwamutsumulha amakinda. (2 Emy. 14:9-12) Aliwe enyuma waho, amahe make aw’Omwami Baasa owe Israeli abere akasyalhwa na Asa, Asa mwaghulha amahe we Suria omwakanya k’eriyikethera Yehova erimulhamya ngoku akolha kera. (2 Emy. 16:1-3) Asa abere akalhwalha obulhwere obukalire erisindi holha, mwathayikethera Yehova erimuwathikya.​—2 Emy. 16:12.

14. Ebisobyo bya Asa bikathweghesayaki?

¹⁴ Okw’itsuka, Asa iniakabya akabana ebitsibu iniakayikethera Yehova. Aliwe enyuma waho mwalemwa erisaba Nyamuhanga y’obuwathikya, amathwamu eriyighunzira emyatsi. Wukathakilhangira, erithwamu lya Asa ery’erisaba Abasuria b’obuwathikya obw’erilhwa n’Abaisraeli mulyabya nga likendi kolha. Aliwe akaholho akababana omwa Yuda mukabya k’obuthuku buke. Yehova mwabwira Asa erilhabira omwa muminyereri athi: “Kusangwa wabiriyikethera omwami we Suria, isulithayikethera Omwami Mukulhu Nyamuhanga wawu, busana n’eki, omulhondo w’omwami we Suria amabalha erilhua omo byalha byawu.” (2 Emy. 16:7) Thutholere ithwayitheya okw’iyikethera amaaka wethu aw’erianza eriyighunzira emyatsi thukalemwa erisaba Yehova y’obusondoli erilhabira omwa Kinywe kiwe. Nomuthwangabya ithuli b’erithwamu aho naho, thutholere ithwayikethera Yehova, nayu akendi thuwathikya erithwamu ndeke.

15. Ni kyahi ekyo thwanga kolha thukasoma e Biblia?

¹⁵ (4) Hambira amasako we Biblia omwa muthwe. Wamabana omo Biblia mwa masako awakakanganaya ngoku thukabana amaaka omw’ibya ithunathekene n’eriyikethera Yehova, lengaho erihambiragho omwa muthwe. Erithoka eki, kyuwene erisomagho omwa mulenge owakowika kutse erihandikagho n’eribya iwunemusomagho. Yehova mwabwira Yosua athi asome ekitabu ky’Emighambo mughulhu wosi nuku angathoka ndeke. Emighambo eyi yanga muwathikirye erithendibya mw’obuba obwangabwene omo mibere eyo abyamu. (Yos. 1:8, 9) Amasako mangyi awali omo Kinywe kya Nyamuhanga anganaleka iwathekana omo malengekania n’omwa muthima omughulhu wuli omwa mibere eyanga leka iwabya n’erihangya-hangya kutse amaghaniryo.​—Esy. 27:1-3; Emi. 3:25, 26.

16. Yehova akakolesaya athi ekithunga erithuwathikya eribya ithunathekene n’erimuyikethera?

¹⁶ (5) Bana obuthuku obw’eribya iwune n’abandu ba Nyamuhanga. Yehova akakolesaya balikyethu erithuwathikya eribya ithunathekene n’erimuyikethera. Okwa mihindano yethu, thukaghasirawa omwa mikania, erisubirya erya balikyethu, n’erikanirania erikahimba erya thukathunga n’abalikyethu. (Ebr. 10:24, 25) Kandi thwangana humulikanibwa kutsibu thukabwira  banywani bethu abayiketherwa ab’omwa kithunga eriyowa lyethu. “Ekinywe kibuya” ekyo omunywani angathubwira kyangana thuwathikya omughulhu thuwithe amaghaniryo.​—Emi. 12:25.

17. Ngoku kiri omwa Abaebrania 6:19, amaha wethu w’Obwami angathughumya athi omughulhu thuli omwa mibere eyikalire?

¹⁷ (6) Lholha embere erighumya amaha wawu. Amaha w’Obwami “awakasikaya emithima yethu,” akaleka ithwaghuma omughulhu thuli omwa mibere eyikalire kutse omwa maghaniryo. (Soma Abaebrania 6:19.) Ghaniraya okwa mulhaghe wa Yehova ow’obuthuku obukasa obuthendi syabyamu ebyanga thulethera erihangya-hangya. (Isa. 65:17) Thera akasasani iwune omwa kihugho kihya-kihya eky’obuholho omuthendi syabya amaghaniryo. (Mika 4:4) Kandi wukendi ghumya amaha wawu omw’ibwira kugho kw’abandi. Kolha ekyosi-kyosi ekyo wanga thoka omwa mubiiri w’erithulira n’eriyira abigha. Wamakolha ekyo iwukendi kangya ‘omuhwa wawu erihika oko nduli.’​—Ebr. 6:11.

18. Ni bitsibu byahi ebyo thulindirire, kandi ni kyahi ekyo thwanga kolha?

¹⁸ Omughulhu mubi ono akendibya anemuseghera okwa nduli yagho, thukendi bana ebitsibu bingyi ebyanga leka ithwahangya-hangya kutsibu. Erisako lyethu ly’omwaka owa 2021 likendi thuwathikya erighumira ebitsibu ebyo kandi ithunayibombekire kutse erithekana, butsira omo maaka wethu aliwe omw’iyikethera Yehova. Omo mwaka ono, thuthwemu erikangania omo mikolere yethu ngoku thw’ikirirye omwa mulhaghe wa Yehova ono: ‘Eriyibombeka n’eriyikethera ni maaka wenyu.’​—Isa. 30:15.