Harvey yuwabya mukulhu omwa baana babu b’obulhume bbani. Eka yabu baminya ekwenene iban’ikere e Midland Junction, e Australia, omughulhu eby’emingirirye byabya bikalire kutsibu omwa myaka eya 1930. Harvey mwanza Yehova kandi mwabatizibwa inianawithe emyaka 14. Mwalhuaho in’igha erithendi ghana omubiiri wosi-wosi w’ekiteokrasi. Buthuku bughuma iniakine mulere, abere akasabwa erisoma Akaleberyo omwa muhindano, mwaghana iniakalengekanaya athi syali atholera. Aliwe mughalha wethu oyuwakanaya na Harvey mwamubwira athi, “Omundu omwa kithunga kya Yehova amakubwira athi wukole ekindu kirebe, akabya iniabirilhangira athi wunatholere!”—2 Kor. 3:5.

Ingye, mama waghe, na mwali wethu omukulhu, thw’ighira ekwenene ye England. Okw’itsuka thatha mwathuhakanisya, aliwe enyuma waho nayu mwaligha ekwenene. Munabatizibwa inganawithe emyaka mwenda, aliwe thatha isyanzire. Munayihiriraho ekilhubirirwa ky’eribya mutemburi n’enyuma waho eribya mumisyonare. Aliwe thatha mwaghana ekyo, iniakabugha athi ngendisyakolha obutemburi nabihikya  emyaka 21. Sinabya nganzire erilinda habw’obuthuku bwosi obo. Neryo nabere ingahikya emyaka 16, mwabugha athi ngayikale na mwali wethu omukulhu e Australia, oyuwabya iniabirihumira omwa kihugho ekyo. Neryo nabere ingahikya emyaka 18, munatsuka obutemburi.

E Australia yanabana Harvey. Muthwakania okw’iyisunza lyethu ery’erikolera Yehova ng’abamisyonare. Muthwathahania 1951. Thwabere thwabirikolha obutemburi habw’emyaka ibiri, muthwasabwa erikolha ng’abalebererya b’omuthimbo. Omuthimbo wethu abya ahambire ekitsweka kinene eky’Ebulengera lyuba bwe Australia, neryo ikikathuyithaghisaya erifugha ematoka erilhaba omwa mbwarara n’omwa myanya ya haali.

Omwa 1954, muthwabirikirwa okwa sukuru ye Gileadi eya 25. Ekilhotho kyethu ky’eribya bamisyonare kyabya ikikayabererera! Muthwahika e New York omwa meri n’eritsukiraho erigha e Biblia yo kutsibu. Omwa bya thwabya thutholere erisoma, mwabya erigha omubughe w’Olhuspanish, olhwakalira Harvey kundi isyangathoka erisobolha enyughuta r.

Okwa sukuru, abakangirirya mubaranga bathi abanzire eriyakolera e Japan bayihandikisaye okw’ingira omwa klasi ey’erigha Olhujapani. Ithwe muthwathwamu thuthi ekithunga kya Yehova kya kithusombolere. Buthuku buke enyuma waho, Albert Schroeder, omughuma w’okwa bakangirirya be Gileadi, mwaminya ngoku sithuthayihandikisya. Mwathubwira athi: “Muthasya kilengekanayako.” Thwabere thwabirighanira ighuma, Mughalha wethu Schroeder mwabugha athi: “Ingye n’abandi bakangirirya thwabiribahandikisya. Mulebaye nga mwangan’igha Olhujapani. Mukyolhobera Harvey erigha Olhujapani.

Muthwahika e Japan omwa 1955 iyiri abathuliri 500 basa. Harvey aby’awithe myaka 26, naghe 24. Muthwathumwa omwa tawuni ye Kobe, eyo thwathulira habw’emyaka ini. Muthwatsema bakathasyathusubya omwa mubiiri w’obulebererya bw’omuthimbo, kandi muthwakolera hakuhi n’etawuni ye Nagoya. Muthwatsemera ebyosi ebihambire okwa mubiiri wethu oyu—balikyethu, ebyalya, n’ekihugho ekyo. Aliwe, muhathalhaba buthuku thuthe thwabana akandi kaghisa ak’erithendi ghana ekya Yehova akabugha athi thukole.

Enyuma w’emyaka isathu omwa mubiiri w’obulebererya, ekyaghanda kye Japan mukyathusaba kithi nga thwanganaligha erighenda e Taiwan eriyathulira  abandu b’eyo abakabugha Olhuamis. Abandi balikyethu be Taiwan babya ibabiriyisamambulha okw’ikirirya, neryo muyayithagha erighenda mughalha wethu oyuwasi ndeke Olhujapan eriyabawathikya. * Ithwanzire omubiiri wethu e Japan, neryo eryo lyabya ithwamu erikalire. Aliwe Harvey iniabirigha erithendighana omubiiri, neryo muthwaligha.

Muthwahikayo Okwerikuminakughuma 1962. E Taiwan yabya abathuliri 2,271, abangyi okw’ibo ibakabugha Olhuamis. Aliwe ithutholere ithwatsuka erigha Olhuchaina. Ithuwithe ekitabu ky’omubughe w’Olhuchaina n’omukangirirya oyuthasi Olhusungu, aliwe muthwalhwigha.

Thwabere thukanahika e Taiwan, Harvey mwasombolhwa eribya mughombe w’ekyaghanda ky’eyo. Ekyaghanda ekyo kyabya kike, neryo Harvey iniakabana obuthuku bw’erikolha emibiiri yiwe ye ofisi kandi iniabana n’obuthuku bw’erikolha n’abaghalha bethu abakabugha Olhuamis habw’amayenga asathu obuli kwezi. Kandi Harvey ihakanayira iniakolha ng’omulebererya w’edistrikiti, omubiiri owabya mw’erilhabya emikania okwa mihindano minene-minene. Harvey inianganalhabirye emikania omwa Lhujapan, n’abaghalha bethu Abaamis ibayitheghererya. Aliwe egavumente iyikalighira emihindano y’edini eribya omwa Lhuchaina lhusa. Neryo Harvey, iniakin’igha Olhuchaina, mwalhulhabya mw’emikania na mughalha wethu inianemumuhindulha omwa Lhuamis.

Okwa buthuku obo, e Taiwan yabya yikathabalhwa kinyamahe, neryo balikyethu ibatholere ibatsuka erilighirwa erithunga emihindano minene-minene. Ekyo sikyabya kyolho, kundi abapolisi ibakanaghana eribalighira lhuba. Ewiki y’olhuhindano iyamahika isibali babalighira, Harvey iniakayikalha okwa polisi erihika aho bakendimulighira. Kundi abapolisi ibakayowa nga bamahemuka ow’ehandi erisiba okwa polisi akalindirira eriwathikibwa, neryo ibakalhuaho ibamulighira.

Omwa syowiki esyo thwabya thukaghunza n’abalikyethu, mughulhu mungyi ithukaghenda esyosaha esilhabire okwa nguma, ithwahethuka ebithwe n’erisoka esyonyusi. Ng’ibuka omurundi waghe w’erimbere erihethuka ekithwe. Thwabere thwabirirya lhuba-lhuba eky’engyakya, muthwahamba ebbasi eya saha 11:30 esy’engyakya-ngyakya eriya omwa kyalu kye haali, thwamasoka esyonyusi, n’erihethuka ekithwe ekimene. Kyabya kimene kutsibu indi ebisandu bya mughalha wethu oyuwabya embere syaghe ibya ngalhangira.

Engyakya eyo, Harvey mwathulira n’abandi baghalha bethu, naghe munathulira omwa kyalu kike eyikere abandu abakabugha Olhujapan. Syabere sikahika nga saha musanju, munahwa mani kundi inabirighunza esyosaha nene isingathalya. Erighunzerera nabere ingabana Harvey, habya isihakiri mughalha wethu hakuhi. Harvey abya iniabirighaba esyogazeti ibabirimuhamo amaya asathu aw’engoko. Mwanyikangania ngoku nangalya eriya omw’irithobolha mw’akuna endatha n’ekabuno neryo amalihulhulira. Nomwakine indi munabulha nga ngatsuke indi eririrya, munalengesya lighuma. Neryo nindi oyuwangalire eryakasathu? Munalirya, kundi Harvey syangathokire erinyandaghalya okwa kithwe inabirihononoka n’enzalha.

Okwa lhuhindano lhughuma olhw’omuthimbo, munabana ekindu ekithe kya buli kiro. Muthwabya ewa mughalha wethu hakuhi n’Ekisenge ky’Obwami. Kundi Abaamis ibakalhangira eryogha mwa kindu kikulhu kutsibu, mukali w’omulebererya w’omuthimbo mwathutheghekera amaghetse w’eryogha. Harvey aby’awithe bingyi by’erikolha, neryo mwambwira athi ningye ngatsuke eriyogha. Habya ebindu bisathu by’erikolesya: embaketi eyirimo amaghetse awahuhirire, eyiri mw’awahuhire, n’ebbafu eyithe mwaki. Ekyanyiswekaya, mukali w’omulebererya abya iniabirithekagho eyihya omwa tengenene ye Kisenge ky’Obwami okwabya baghalha bethu ibanemuwathikya okw’itheghekania olhuhindano. Munamusaba olhukimba olhwanga nyibisa. Mwanyilethera ekivera ekiraba-rabirye! Munalengesya erighenda ekanyuma k’enyumba omwa kitsutsu, aliwe yabya esyombata isinahulhukirirye emithwe yasyo omwa kaghuthu erianza erisokolha owosi-wosi oyukendiseghera hakuhi nasyo. Munayibwira indi: ‘Balikyethu bane omwa mibiiri yabu sibendinyilhangira. Kandi namathendyogha, abalyanyikokaya ibakendipona. Leka ngakwame ky’eryogha!’ Neryo munogha.

Harvey mwaminya ngoku kikakalira balikyethu Abaamis erikulha-kulhana bunyakirimu kundi sibasi erisoma kandi sihabya ebitabu omwa mubughe wabu. Kundi Olhuamis lhwabya ilhwamabiritsuka erihandikwa, mukyabya ky’amenge eryeghesya balikyethu erisoma omubughe wabu. Oyu abya mubiiri munene, aliwe erighunzerera balikyethu mubathoka erigha oku Yehova omwa mubughe wabu. Ebitabu by’Olhuamis byatsuka erihulhuka okw’ihwererera ly’emyaka ya 1960, n’omwa 1968, Akaleberyo k’Olhuamis mukatsuka erihulhukibwa.

Aliwe, egavumente muyithanza ebitabu ebithe omwa Lhuchaina. Neryo eriyitheya okwa bitsibu, Akaleberyo k’Olhuamis ikakahulhukibawa omwa nzira muthina-muthina. Ng’eky’erileberyako, ahabw’obuthuku bulebe muthwanakolesya egazeti y’Akaleberyo eyihandikire omwa Lhuchaina Mandarin n’Olhuamis. Ku habya abakabuliriraya okwa buli kandu, muthwabya ng’abali okw’ikolesya egazeti erikangirirya abandu b’Olhuchaina. Eritsuka-tsukana naho, ekithunga kya Yehova kyabirilholha embere erihulhukya ebitabu omwa mubughe w’Olhuamis, eriwathikya abandu erigha ekwenene ye Biblia.—Emib. 10:34, 35.

Omwa myaka ya 1960 na 1970, balikyethu bangyi Abaamis babya isibalighendera okwa bihano bya Nyamuhanga. Kundi babya isibathayitheghererya ndeke emisingyi ye Biblia, abandi babya basingiri, bathamiri, kutse banywi b’ethaba n’ebindi. Harvey mwabungira ebithunga bingyi, erilengaho eriwathikya balikyethu eriyitheghererya amalengekania wa Yehova okwa bindu ebi. Omwa lhughuma lhw’okwa syongendo ng’esyo, mwathwabana ekyalholirweko ekiri okw’itsuka.

Balikyethu abayikehirye mubaligha erikolha esyombinduka, aliwe eky’obulighe, abangyi mubaghana, n’omughanzo w’abathuliri e Taiwan mwakima erilhua oku 2,450 erihika okwa bathuliri nga 900 omwa buthuku bw’emyaka 20. Eki kyabya kindu ekikaghunza amani kutsibu. Aliwe, thwabya ithunasi ngoku Yehova syangatsumulha ekithunga ekikinire. (2 Kor. 7:1) Neryo erighunzerera, emitse mibi eyi muyahwa omwa kithunga, kandi busana n’eritsumulha lya Yehova, lino e Taiwan yiri abathuliri abalhabire oku 11,000.

Eritsuka emyaka ya 1980 erilholha embere, muthwalhangira emibere y’obunyakirimu ey’omwa bithunga eby’Abaamis yik’uwana, kandi Harvey iniakaghunza buthuku bunene n’Abachaina. Mwatsema eriwathikya abira babali bethu balebe eribya Bema. Ng’ibuka akanyibwira athi mwatsema omughuma w’okwa balhume aba akasaba Yehova omurundi wiwe w’erimbere. Naghe ngatsemire eribya imunawathikya ab’emithima myolho bangyi eriyithunda hakuhi na Yehova. Kandi munatsema erikolera okwa muthahulha we Taiwan haghuma na mughalha na mwali b’omughuma w’okwa babya bigha baghe be Biblia.

Aliwe lino, singakiri n’omwanze waghe. Enyuma w’emyaka nga 59 omwa butheke, omwanze waghe Harvey mwaholha 1 Okwokubanza, 2010, busana n’obulhwere bw’ekansa. Abya iniakayaghunza emyaka ngagha omwa mubiiri w’omughulhu wosi! Na lino ngakinamukandira kutsibu. Aliwe ngatsemire kutsibu eribya imunamusighika omubiiri imwanamatsukwa omwa bihugho bibiri ebi! Muthw’igha eribugha emibughe ibiri eyikalire eye Asia. Aliwe Harvey mw’igha n’erihandikayo.

Enyuma w’emyaka ng’ini, Akathunga Akakasondolha mukathwamu kathi ni kibuya ingye erisuba e Australia busana n’erikulha omo myaka. Erimbere munayibughako indi, ‘Singanzire erilhua e Taiwan.’ Aliwe Harvey abya iniabirinyikangirirya athi isiwaghana erikolha ekya ekithunga kya Yehova kikabugha kithi wukole, neryo isinanga ghana. Enyuma waho, munaminya ngoku kyabya ky’amenge ibo erithwamu bathya.

Lino, ngakolera okwa kyaghanda kye Australia omwa wiki n’okwa syowikendi ingakolha haghuma n’ekithunga. Okwa Beteli, ngatsema ingakolesya omubughe w’Olhujapan n’ow’Olhuchaina eriramburya abandi. Aliwe ngalindirire ekiro ky’erilhubuka inganasi ngoku Harvey oyuwabya iniabirigha erithendi ghana erikolha ekya Yehova akabugha athi akole, lino Yehova anamw’ibukire.—Yn. 5:28, 29.