1. Ni mibere yahi eyikalire eyo Dawudi ayisangamu?

DAWUDI abya inianemuthibitha eribalya engebe yiwe. Saulo, omwami w’amaaka owe Israeli, aby’akanza erimwitha. Dawudi abere akayithagha eky’erirya, mwimana omwa muyi we Nobu, eyo omwa bwolho-bwolho asaba emiggati ithanu. (1 Sam. 21:1, 3) Enyuma waho, iyo n’abalhume biwe mubabisama omo mwangalhu. (1 Sam. 22:1) Dawudi ayisanga athi omwa mibere eyi?

2. Saulo mwayilethera athi ebitsibu? (1 Samweli 23:16, 17)

² Saulo abya iniabirikwa Dawudi y’erihali linene busana na Dawudi eriminywa n’erisingura amalhwa mangyi. Kandi Saulo mwaminya ngoku obuthowa bwiwe bwabirileka Yehova iniamughana ng’omwami we Israeli kandi ngoku Yehova abirisombolha Dawudi eribya mwami. (Soma 1 Samweli 23:16, 17.) Aliwe iyo ng’omwami we Israeli, Saulo aby’awithe amahe mangyi n’abakamusighika bangyi, neryo Dawudi abya w’eriyibatsira okughulhu eribalya engebe yiwe. Mbwino Saulo kwenene nayu mwalengekania athi angana thoka erikakirya Nyamuhanga okw’iyira Dawudi mw’omwami? (Isa. 55:11) E Biblia siyiribugha okw’ekyo, aliwe thwangana kakasya kindu kighuma: Saulo abya iniali okw’iyilethera ebitsibu. Mughulhu wosi abakalhwa na Nyamuhanga bakakindawa!

3. Dawudi mwayowa athi nomwanabya omwa mibere ey’abyamo?

³ Dawudi abya mulhume oyuyikehirye. Mwathayithwiramu eribya mwami we Israeli. Yehova yuwamuha olhukwamirwa  olho. (1 Sam. 16:1, 12, 13) Saulo iniaponire Dawudi ya kutsibu. Aliwe Dawudi mwathatsweba Yehova busana n’akabi ako abyamu; kutse eriyineghenia busana n’eribya n’othwalya thuke na busana n’erikalha omo mwangalhu. Omwakanya k’ekyo, obundi omughulhu abya omo mwangalhu mw’omughulhu ahandika olhwimbo olhuwene olhw’eripipa olhuli mw’ebinywe ebiri omwa lisako erihirikirire omwatsi wethu bino: ‘Abakasonda-sonda Yehova sibebulha kindu kibuya.’​—Esy. 34:10.

4. Ni bibulyo byahi ebya thukendi kaniako, kandi busana naki ni bikulhu?

⁴ Munabwire abangyi b’okwa baghombe ba Yehova sibawithe ebyalya ebikaghunza n’ebindi biyithawa by’engebe. * Eki kyabirilhangirika ndeke kutsibu-tsibu omwa buthuku bw’ekihunzo. Kandi “obulighe bunene” bukendibya bunemuseghera hakuhi, engebe yikendiongera erikalha. (Mt. 24:21) Thun’ibukire ebyo, thusubiraye ebibulyo bbini bino: Ni mwa nziraki Dawudi ‘mwathabulha kindu kibuya’? Busana naki thutholere ithw’igha eritsemera ebya thuwithe? Busana naki ithwayikethera ngoku Yehova akendi thutsomana? Kandi thwanga yitheghekera thuthi lino obuthuku obukasa?

5-6. Ebiri omwa Esyonyimbo 23:1-6 bikathuwathikaya bithi eriyitheghererya ekya Dawudi amanyisaya akabugha athi abaghombe ba Nyamuhanga “sibebulha kindu kibuya”?

⁵ Dawudi amanyisayaki akabugha athi abaghombe ba Yehova “sibebulha kindu kibuya”? Thwangana minya eky’amanyisaya omw’ilebya ebinywe ebiri ng’ebyo ebiri omwa Lhwimbo 23. (Soma Esyonyimbo 23:1-6.) Dawudi akatsuka olhwimbo olho n’ebinywe bino: ‘Yehova ni Mulisya waghe. Sindiendisyabulha kindu.’ Omo lhwimbo olho, Dawudi akathasyahulha ebindi bindu eby’omughaso munene​—emighisa mingyi ey’obunyakirimu eyo akabana busana n’eriligha Yehova ng’Omulisya wiwe. Yehova akamusondolha “omo nzira y’erithunganene,” kandi buthaleghulha akawathikaya Dawudi omo mighulhu eyuwene n’eyikalire. Dawudi akaligha ngoku akendibya  inianemubana ebitsibu omo ‘lhulisiryo lhwa Yehova olhw’ebithi bibisi.’ Okwa bundi buthuku, anganahwa amani iniabya ng’oyukalhaba “omo musya w’omwirimya owakalire,” kandi iniabya inianawithe esyonzighu. Aliwe kundi Yehova ni Mulisya wiwe, Dawudi syendi “syubaha ebibi” kutse akabi.

⁶ Neryo hano thwamabiribana eky’erisubirya okwa kibulyo kyethu kino: Ni mwa nziraki Dawudi ‘mwathabulha kindu kibuya’? Bunyakirimu, abya inianawithe obuli kindu ekyo akayithagha. Etseme yiwe siyabya yiseghemere okwa by’ekinyamubiri. Dawudi mwatsemera ebya Yehova amuha. Okw’iyo, ekikulhu yabya iy’emighisa n’obutheya bwa Nyamuhanga wiwe.

7. Ngoku kiri omu Luka 21:20-24, ni mibere yahi eyikalire eyo Abakristayo ab’omwa kighana ky’erimbere e Yudea babana?

⁷ Ebinywe bya Dawudi bikaleka ithwalhangira ngoku ni kikulhu ithwe eribya n’amalengekania awatholere okwa by’ekinyamubiri. Ni kwenene thwangana tsemera ebindu by’ekinyamubiri ebya thuwithe, aliwe sithutholere thukabihira embere omwa ngebe yethu. Eyo yabya kwenene ngulhu eyo Abakristayo b’omwa kighana ky’erimbere e Yudea babya batholere ibaminya. (Soma Luka 21:20-24.) Yesu abya iniabiribaghusa kw’akasali athi obuthuku bwangahikire omuyi we Yerusalemu ‘iniathimbwako n’emilhondo y’amalhwa.’ Ekyo kyabere kyabya, mubayithagha ‘erisaghira okwa bithwe.’ Erithibitha lyabu lyangalekire ibalhamibwa, aliwe ibabya b’erisighania ebindu bingyi. Myaka mirebe enyuma, Akaleberyo mukakibughako kathi: “Mubasighania amalima n’amanyumba wabu, nibya mubathaheka n’ekindu. Ibanayikethere obutheya n’obuwathikya bwa Yehova, mubahira eriramya liwe ly’embere okwa buli kindu ekyangabya nga ni ky’omughaso.”

8. N’isomo lyahi likulhu eryo thwang’ighira okwa kyabya okwa Bakristayo ab’omwa kighana ky’erimbere e Yudea? 

⁸ N’isomo lyahi likulhu eryo thwang’ighira okwa kyabya okwa Bakristayo ab’omwa kighana ky’erimbere abe Yudea? Akaleberyo akalyahulhawa mukabugha kathi: “Obuthuku obukasa, thwangana syabana ebikalenga okwa malengekania agho thuwithe okwa bindu by’ekinyamubiri; mbwino ebindu ebyo bya bikulhu kutsibu, kutse ly’erilhama ly’abosi abali okwa lhuhandi lhwa Nyamuhanga? Enduli yikendibya yikasa, thwanganabya b’erighumira ebitsibu n’eriyithalya okwa bindi. Thukendi syabya b’erikolha ekyosi-kyosi ekikayithaghisibawa, ngoku Abakristayo ab’omwa kighana ky’erimbere bakolha bakalhua e Yudea.” *

9. Erihabulha erya mukwenda Paulo aha Abaebrania lyamakuhumulikania lithi?

⁹ Thathera akasasani ngamukyakalira bungahi Abakristayo abo erisighania hakuhi obuli kindu n’eriyatsuka eyindi ngebe! Mubayithagha erikirirya ibo erithoka eriyikethera Yehova eribaha ebiyithawa byabu. Aliwe babya ibanawithe obuwathikya. Myaka ithanu Abanya Roma bathali babambira e Yerusalemu, omukwenda Paulo mwaha Abaebrania b’erihabulha lino: ‘Simukwamirire erianza esyofranka, nikwa mutsemere ebyo muwithe. Kusangwa Nyamuhanga abiribugha athi, Sindiendi syakuleka na kera, kandi, sindiendi syakusighania n’ahake. Kikaleka ithwabugha butsira eriubaha thuthi, Omwami Mukulhu ni muwathikya waghe, sindiendi syubaha! Ko abandu banganyikolhaki kwehi?’ (Ebr. 13:5, 6) Ahathe erithika-thika, abaghendera okw’ihabulha lya Paulo Abanya Roma bathe bababambira, mukyabolhobera eritsemera ebike ebyo babya bawithe eyo bathibitha. Babya bayikethera ngoku Yehova akendi baha ebiyithawa byabu. Ebya Paulo  abugha bikakanganaya ngoku nethu thwanganabya n’eriyikethera ng’eryo.

10. ‘N’ikumbo’ lyahi erya Paulo akathubwira?

¹⁰ Paulo mwaha Timoteo y’erihabulha eriri ng’eryo, nethu likathuhambako. Mwahandika athi: “Neryo thwamabya n’akalyo n’eky’eriyiswika, thutsemere ebyo.” (1 Tim. 6:8) Mbwino eki kikamanyisaya kithi sithwangabya ithunemulya ebyalya ebyuwene, erikalha ahuwene, kutse erighulha olhukimba lhuhyaka? Ekyo sikya Paulo akamanyisaya. Paulo akabugha athi thutholere ithwatsemera eby’ekinyamubiri ebyo thwangabya ithuwithe. (Fil. 4:12) Eryo ly’eryabya ‘rikumbo’ lya Paulo. Eky’obughuli bunene ekya thuwithe bw’obughuma bwethu na Nyamuhanga wethu, butsira ekindu kyosi-kyosi ky’ekinyamubiri ekya thuwithe.​—Hab. 3:17, 18.

11. N’isomo lyahi erihambire okw’itsemera ebya thuwithe erya thuk’igha okwa bya Musa abwira Abaisraeli?

¹¹ Amalengekania awathuwithe okwa bya thukayithagha anganabya mbaghane oko wa Yehova. Thalengekania okwa ebya Musa abwira Abaisraeli balighunzire myaka 40 omwa mbwarara: ‘Yehova Nyamuhanga wenyu abiribatsumulha omo byosi mwabirikolha. Abiriminya olhughendo lhwenyu omo mbwarara nene eyi. Emyaka 40 eyi Yehova Nyamuhanga wenyu mwabya nenyu; simuli thabulha kindu.’ (Ebi. 2:7) Omwa myaka 40 eyo, Yehova mwaha Abaisraeli b’emana. Esyongyimba syabu​—esyongyimba esyo banalhua nasyo e Misiri ibanambere​—musithakulha. (Ebi. 8:3, 4) Nomwakine indi abandi bangabya imubalhangira  ebindu ebi nga sibirighunza, Musa mw’ibukya Abaisraeli ngoku babya ibanawithe obuli kindu ekyo bakayithagha. Yehova iniakendi tsema thwam’igha eritsemera ebya thuwitheko​—thwamasima nibya n’ebike ebyo akathuha, eribilhangira ng’omughisa n’eriha ewasingya busana nabyo.

12. Ni kyahi ekikakanganaya ngoku Dawudi aby’ayikethere Yehova, butsira amaaka wiwe?

¹² Dawudi abya inianasi ngoku Yehova syali leghulha kandi kw’akatsomana kutsibu abamwanzire. Nomwakine indi engebe ya Dawudi yabya omwa kabi akahandika Olhwimbo lhwa 34, omwa meso w’obwikirirya mwalhangira “omumalaika w’Omwami Mukulhu” akamutheya. (Esy. 34:7) Obundi Dawudi abya iniakalinganisaya omumalaika wa Yehova n’omusirikali oyulhambire akatheya, mughulhu wosi erilebya ahangasira enzighu. Nomwakine indi abya mulhwi mbangyi kandi Yehova abya iniabirimulhaghanisya eribya mwami, Dawudi mwathayikethera amaaka wiwe w’erighusa amabwe omwa munzeledi kutse aw’erikolesya omuyali eritha enzighu. (1 Sam. 16:13; 24:12) Dawudi mwayikethera Nyamuhanga, inianasikire ngoku omumalaika wa Yehova ‘akalhamaya abakamubaha.’ Ni kwenene sithwanga lengekania thuthi munabwire ithwabana obutheya omwa nzira y’ekithiko-thiko. Aliwe thunasi ngoku abosi abakayikethera Yehova bakendi syabana engebe y’erikotha nomubanga holha.

13. Gogi owe Magogi akendi syabya akathubambira, busana naki thukendi syalhangirika ng’abathawithe kiwathikya, aliwe ni kyahi ekikendi syaleka ithwasika? (Lebaya ekisasani ky’okwa kidipa.)

¹³ Omwa buthuku obuthe bwahali, eriyikethera lyethu omo maaka wa Yehova aw’erithutheya likendi lengwako. Gogi owe Magogi​—ebihanda ebiyiyungire haghuma​—akendisyabya akabambira abandu ba Nyamuhanga, engebe yethu yikendisyabya nga yiri omwa kabi. Thukendi syayithagha eriyikethera ngoku Yehova akendi thulhamya. Embere sy’ebihanda, thukendi syalhangirika ng’esyombuli esithawithe kiwathikya, esithawithe oyukatheghayasyo. (Eze. 38:10-12) Sithwendi syabya n’eby’amalhwa, isithweghesibirwe eby’amalhwa. Ebihanda bikendi syalhangira nga kyolhobire erithubambira. Sibyendi syalhangira ebya thukalhangira omwa meso w’obwikirirya​—abamalaika ibanalhambire eritheya abandu ba Nyamuhanga, ibanayitheghekire erithulhwirako. Ibbwa nawu n’ebihanda ibyanabalhangira? Sib’ikirirye omu Nyamuhanga. Ka bikendi syasweka bikalhangira abamalaika b’elhubulha bakasyathulhwirako!​—Erib. 19:11, 14, 15.

14. Ni byahi ebya thwangakolha lino eriyitheghekera obuthuku obukasa?

¹⁴ Thwanga kolhaki lino eriyitheghekera obuthuku obukasa? Ekikulhu, thutholere ithwabya n’amalengekania awatholere okwa bindu by’ekinyamubiri, ithunasi ngoku kiro kighuma thukendi syabisighania. N’ekindi thutholere ithwatsemera ebike ebya thuwithe n’eribana etseme nene omwa bughuma bwethu na Yehova. Thukendibya thuk’ongera eriminya Nyamuhanga wethu ya ndeke, thukendiongera eriyikethera amaaka wiwe w’erithutheya, Gogi owe Magogi akathubambira.

15. Ni byahi ebyabya oku Dawudi iniakine mulere ebya mw’eghesaya ngoku Yehova syangamulhabirya ahisi?

¹⁵ Thulebaye ekindi ekya wathikaya Dawudi nethu ekyanga thuwathikya eriyitheghekera ebitsibu. Dawudi mwabugha athi: “Wulenge, wulebaye Omwami Mukulhu kwali mubuya! Obutseme buli okwa mundu oyukamusaghirako.” (Esy. 34:8) Ebinywe ebyo bikasoborera ekyaleka Dawudi iniaminya ekyanga leka iniayikethera  obuwathikya bwa Yehova. Mughulhu wosi Dawudi mwayikethera Yehova, kandi Nyamuhanga wiwe mwathamulhabirya ahisi. Iniakine mulere, Dawudi mwalhwa n’Omufilisitini embangyi ya Goliata kandi mwabwira omulhwi mbangyi oyo athi: “Munabwire Omwami Mukulhu akendi kuhira omo byalha byaghe.” (1 Sam. 17:46) Enyuma waho, Dawudi mwakolera omwami Saulo, oyuwalengesaya ngendo nyingyi erimwitha. Aliwe “Omwami Mukulhu abya haghuma” na Dawudi. (1 Sam. 18:12) Kundi Dawudi abya iniabiriyilhangirira obuwathikya bwa Yehova kera, Dawudi mwaminya ngoku kandi akendi muwathikya omwa bitsibu biwe.

16. Ni mwa nzira syahi thwanga ‘lengesya n’erilebya obubuya’ bwa Yehova?

¹⁶ Thukendibya thunemw’ongera eriyikethera Yehova erithuha obusondoli lino, thukendiongera eriyikethera amaaka wiwe w’erisyathulhamya omwa buthuku obukasa. Kikayithagha erikirirya n’eriyikethera Yehova erisaba abathuhere omubiiri bathulighire eryusa kugho nuku thuhindane okwa mihindano minene-minene kutse eribasaba erikolha esyombinduka omwa ndegheka y’omubiiri nuku thuhindane okwa mihindano eyosi n’erikolha bingyi omw’ithulira. Thubughe thuthi oyuthuhere omubiiri iniaghana erithulighira neryo ithwaherya omubiiri. Mbwino thunayikethere ngoku Yehova syanga thulekerania kutse erithusighania kandi ngoku mughulhu wosi akendi thuha ebiyithawa byethu? (Ebr. 13:5) Abangyi abali omwa mubiiri w’omughulhu wosi banganaha ebyalholirweko ebikakanganaya ngoku Yehova mwabawathikya bakamuyithagha kutsibu. Yehova syali leghulha.

17. Erisako ly’omwaka owa 2022 ly’eryahi, kandi busana naki litholere?

¹⁷ Yehova anali okwa lhuhandi lhwethu, sihali ekyanga leka thukasagha ebiro ebikasa. Nyamuhanga wethu syendi syathusighania thwamabya ithunahirire erisonda liwe ly’embere omwa ngebe yethu. Erithwibukya ekiyithawa ky’eriyitheghekera lino ebiro ebikalire ebikasa n’eriyikethera ngoku Yehova syendi syathusighania, Akathunga Akakasondolha kabirisombolha Esyonyimbo 34:10 eribya risako lyethu ly’omwaka owa 2022: ‘Abakasonda-sonda Yehova sibebulha kindu kibuya.’