1-2. (a) Kwilhabirirya, ni mughulhu wahi thuk’ibuka omwanze oyuwabiriholha? (b) Ni kyahi ekya Yesu atsukisaya omw’ithumbi athali aholha?

NOMUHANGABYA ihamabirilhaba buthuku bungahi abanze bethu baliholire, thukabya ithunabibukire. Mughulhu mungyi ekiro baholeramo kikabya kikahika, thukibuka ebibahambireko.

² Obuli mwaka, thukabya baghuma b’okwa syomiliyoni sy’abandu omwa kihugho kyosi abakahindana okw’ibuka olhuholho lhw’omundu oyo thwanzire kutsibu​—Yesu Kristo. (1 Pet. 1:8) Thukahindana haghuma eryibuka oyuwahayo engebe yiwe ng’endongolya erithulhamya okwa kibi n’olhuholho. (Mt. 20:28) Erithwalira haghuma, Yesu aby’anzire abakamukwama ibibuka olhuholho lhwiwe. Omw’ithumbi athali aholha, mwatsukisya ekihulho ky’erigholho eky’embaghane n’erilhaghira athi: “Mukole muthya erinyibuka.”​—Lk. 22:19.

3. Omo mwatsi ono thukendi kania okuki?

³ Omughanzo muke w’okwa bakahindana okw’Ibuka olhuholho lhwa Kristo bawithe amaha w’erisyaghenda elhubulha. Aliwe esyomiliyoni sy’abawithe amaha aw’erisyabya okwa kihugho nabu bakahindana. Omo mwatsi ono, thukendi lebya esyonzumwa esikaleka esyogurupu esyosi ibiri ibanza kutsibu erihindana okw’Ibuka obuli mwaka. Kandi thukendi lebya erihindana nga likathughasira lithi. Thutsuke erilebya esyonzumwa ndebe esikaleka abahakabibwa ibahindana.

4. Busana naki abahakabibwa bakalya okwa muggati n’erinywa okwa vini okw’Ibuka?

⁴ Obuli mwaka, abahakabibwa abakahindana okw’Ibuka bakalya okwa biminyisyo. Busana naki n’ibo batholere erirya okwa muggati n’erinywa okwa vini? Erisubirya ekyo, thulebaye ekyabya omw’ithumbi ly’erighunzerera ery’engebe ya Yesu okwa kihugho. Enyuma w’ekihulho ky’Erikyuruka, Yesu mwatsukisya ekyabiriminywa ng’Ekihulho ky’Omukama eky’Erigholho. Mwalhabirya abakwenda biwe 11 abathaleghulha b’omuggati n’evini n’eribabwira athi balye n’erinywa. Yesu mwababwira okwa syondaghane ibiri, kutse erilhaghana​—endaghane nyihya-nyihya n’endaghane y’Obwami. * (Lk. 22:19, 20, 28-30) Esyondaghane esyo musyakyungulira abakwenda abo n’abandi bake b’enzira y’eribya bami n’abahereri elhubulha. (Erib. 5:10; 14:1) Emisighalira y’abahakabibwa * basa abali omwa syondaghane ibiri esi, babangalya okwa muggati n’erinywa okwa vini okw’Ibuka.

5. Ni kyahi ekya bahakabibwa basi okwa maha agho babirihebwa?

⁵ Hano hane eyindi nzumwa eyikaleka abahakabibwa ibanza kutsibu erihindana okw’Ibuka: Omukonga oyu akabaha akaghisa k’erilengekania okwa maha wabu. Yehova abiribaha amaha mabuyanga​—eribya n’engebe eyitheholha kandi eyithehonda elhubulha, erikolha haghuma na Yesu Kristo oyuwabirihebwa olhukengerwa n’abandi b’okwa 144,000, kandi ekikulhu kutsibu, erithoka eriyilhangirira Yehova Nyamuhanga! (1 Kor. 15:51-53; 1 Yn. 3:2) Abahakabibwa banasi ngoku babirikokibwa eritsemera esyonzunzo ng’esyo elhubulha. Aliwe erisyaghenda elhubulha batholere ibasighalha bathaleghulha erihika okwa lhuholho. (2 Tim. 4:7, 8) Abahakabibwa bakabya bakalengekania okwa maha wabu w’elhubulha kikabalethera etseme nene. (Tito 2:13) Kandi ibbwa ‘ab’esindi mbuli’? (Yn. 10:16) Ni nzumwa nga syahi esikaleka ibahindana okw’Ibuka?

6. Busana naki ab’esindi mbuli bakahindana okw’Ibuka obuli mwaka?

⁶ Ab’esindi mbuli bakahindana okw’Ibuka ng’abakasyalebaya, butsira ng’abakasyalya. Omwa 1938, ababya bawithe amaha w’erisyabya okwa kihugho mubakokibwa omurundi w’erimbere erihindana okw’Ibuka. E Watchtower ey’Okwakasathu 1, 1938, muyabugha yithi: “Kihikire kandi kitholere [ab’esindi mbuli] eryasa okwa muhindano ng’oyo n’erilebya ebikakolhawa. . . . Nabu batholere ibatsema okwa buthuku obo.” Ngoku abakokibirwe okwa bugheni bw’eriherukya bakanatsema bakabyaho, n’ab’esindi mbuli bakatsema bakahindana okw’Ibuka ng’abakasyalebaya.

7. Busana naki ab’esindi mbuli bakalindirira omukania w’Eryibuka?

⁷ N’ab’esindi mbuli nabu bakalengekanaya okwa maha wabu. Bakalindirira kutsibu omukania w’Eryibuka, kundi akahira omuwatho okwa kya Kristo n’abandu 144,000 abo akendi syathabalha nabu bakendi syakolera abandu abathaleghulha omw’Ithabalha ly’Emyaka Rukumi. Ahisi sy’obuthabali bw’Omwami wabu Yesu Kristo, abathabali b’elhubulha aba bakendi syawathikya erihindulha ekihugho mwa paradiso n’eriwathikya abandu abowa erihikana. Ka kikatsemesaya  esyomiliyoni sy’ab’esindi mbuli abakasa okw’Ibuka erithera akasasani k’eribererera ly’amaminyereri we Biblia, ng’awali omu Isaya 35:5, 6; 65:21-23; na Eribisulirwa 21:3, 4. Erithera akasasani ibo n’abanze babu ibane omwa kihugho kihya-kihya ekyo, bakaghumaya amaha wabu aw’obuthuku obukasa n’erithwamu erithendi leka erikolera Yehova.​—Mt. 24:13; Gal. 6:9.

8. Ni yindi nzumwa yahi eyikaleka ab’esindi mbuli ibahindana okw’Ibuka?

⁸ Thulebaye eyindi nzumwa eyikaleka ab’esindi mbuli ibahindana okw’Ibuka. Banzire erikangania ku banzire abahakabibwa n’eribasighika. Ekinywe kya Nyamuhanga mukyalhaghulha kithi hangabere obughuma obughumire ahakathi-kathi k’abahakabibwa n’abawithe amaha w’erisyabya okwa kihugho. Buthi? Thukanaye okwa by’erileberyako bike.

9. Obuminyereri obuli omu Zekaria 8:23 bukakanganayaki okw’iyowa erya ab’esindi mbuli bawithe okwa bahakabibwa?

⁹ Soma Zekaria 8:23. Obuminyereri obu bukasoborera eriyowa erya ab’esindi mbuli bawithe okwa balikyabu abahakabibwa. Ebinywe “Omuyuda” na “nawu [“nenyu,” NWT]” bikamanyisaya egurupu ngumerere​—emisighalira y’abahakabibwa. (Abar. 2:28, 29) “Abandu ikumi abakalhua okwa bihanda by’obuli mubughe” bakimanira ab’esindi mbuli. “Basyahamba”​—eryamakirira buthaleghulha​—abahakabibwa, eribayiyungako omw’iramya ly’okwenene. Neryo kwesi, omw’ithumbi ly’Eryibuka, ab’esindi mbuli bakakanganaya ku bakamakirira abahakabibwa omw’ihindana haghuma nabu.

10. Yehova abirikolhaki eriberererya obuminyereri obuli omu Ezekieli 37:15-19, 24, 25?

¹⁰ Soma Ezekieli 37:15-19, 24, 25. Omw’iberererya obuminyereri obu, Yehova abirihira abahakabibwa n’ab’esindi mbuli omwa bughuma obuthethwika. Obuminyereri bukahulha emithi ibiri. Abawithe amaha w’erisyaghenda elhubulha bali ng’omuthi “busana na Yuda” (ekihanda ekyabya kikasombolhwamo abami be Israeli), n’abawithe amaha w’erisyabya okwa kihugho bali ng’omuthi “wa Efuraimu.” * Yehova angahirire esyogurupu esyosi ibiri haghuma eribya “muthi mughuma.” Eki kikamanyisaya kithi bakakolha haghuma ahisi sy’obusondoli bw’Omwami wabu mughuma, Kristo Yesu. Obuli mwaka, abahakabibwa n’ab’esindi mbuli bakahindana okw’Ibuka, butsira ng’esyogurupu ibiri esighabene, aliwe ‘ng’ekihangulho kighuma’ ahisi ‘sy’omulisya mughuma.’​—Yn. 10:16.

11. “Esyombuli” esiri omu Matayo 25:31-36, 40, kutsibu-tsibu sikakanganaya sithi ku sikasighika baghalha bobu Kristo?

¹¹ Soma Matayo 25:31-36, 40. “Esyombuli” esiri omwa musyo oyu sik’imanira abathunganene ab’omwa mughulhu w’enduli abawithe amaha w’erisyabya okwa kihugho​—ni bugha ambu, ab’esindi mbuli. Buthaleghulha bakasighika emisighalira y’abahakabibwa baghalha bobu Kristo, kutsibu-tsibu omw’ibawathikya eriberererya olhukwamirwa lhwabu lhukulhu​—omubiiri w’erithulira n’eriyira abigha omwa kihugho kyosi.​—Mt. 24:14; 28:19, 20.

12-13. Ni sindi nzira syahi esyo ab’esindi mbuli bakakanganirayamu ku bakasighika baghalha bobu Kristo?

¹² Obuli mwaka ihakisiya mayenga make Eryibuka iryabya, ab’esindi mbuli bakakanganaya ku bakasighika baghalha bobu Kristo omw’isangira ndeke omw’ithererera ery’ekihugho kyosi ery’erikokya abakanzisibawa okw’Ibuka. (Lebaya akasanduko “ Wunemusangwa Wayitheghekera Obuthuku bw’Eryibuka?”)  Kandi bakawathikaya okwa mitheghekere yosi eyikayithaghisibawa nuku obuli kithunga omwa kihugho kyosi kithunge Eryibuka, nomwakine indi okwa bakahindana omwa bithunga bingyi si muli oyukalya okwa biminyisyo. Ab’esindi mbuli bakatsema bakasighika baghalha bobu Kristo omo nzira ng’esyo. Esyombuli esi sinasi ngoku Yesu akalhangira ebya bakakolera baghalha babu abahakabibwa nga n’iyo bakabikolera.​—Mt. 25:37-40.

¹³ Ni sindi nzumwa syahi esikaleka ithwe bosi, mbulha thuwithe mahaki, ithwahindana okw’Ibuka?

14. Yehova na Yesu babirithukangania bathi olhwanzo lhunene?

¹⁴Thukasima olhwanzo olho Yehova na Yesu babirithukangania. Yehova abirikangania olhwanzo olhwa thuwithire omo nzira nyingyi, aliwe enguma y’okw’isyo yilengire esindi esyosi. Nyamuhanga wethu mwakangania olhwanzo lhunene olhwa thuwithire omw’ithuma Mughalha wiwe ow’obughuli erisyaghalhwa n’eriholha busana nethu. (Yn. 3:16) Thukaminya ngoku Yesu nayu mwakangania olhwanzo lhunene omw’iligha erihayo engebe yiwe busana nethu. (Yn. 15:13) Sithwanga thoka erithuha Yehova na Yesu busana n’olhwanzo olho babirithukangania. Aliwe thwangana kangania erisima lyethu omwa mibere thukathwaliramo engebe yethu buli kiro. (Kol. 3:15) Kandi thukahindana okw’Ibuka nuku thwibuke olhwanzo olhwa bathuwithire kuthya nethu erikangania olhwanzo olhwa thubawithire.

15. Busana naki abahakabibwa n’ab’esindi mbuli bakalhangira ekihembo ky’endongolya mwa ky’obughuli bunene?

¹⁵Thukalhangira ekihembo ky’endongolya mwa ky’obughuli bunene. (Mt. 20:28) Abahakabibwa bakalhangira endongolya mwa y’obughuli, kundi yikaleka amaha wabu mabuyanga iniathokekana. Busana n’erikirirya lyabu omwa kihongo kya Kristo, Yehova abiribahulhamo bathunganene kandi abiribayiramo baana biwe. (Abar. 5:1; 8:15-17, 23) Ab’esindi mbuli nabu bakasima endongolya. Busana n’erikirirya lyabu omwa musasi wa Kristo owuthika, bawithe emimanire eyuwene embere sya Nyamuhanga, bangana mukolera, kandi bawithe amaha w’erisyalhama okwa bulighe bunene obukayasa. (Erib. 7:13-15) Enzira nguma eyo abahakabibwa n’ab’esindi mbuli bakakanganirayamo ku bakasima endongolya ly’erihindana okw’Ibuka obuli mwaka.

16. Ni yindi nzumwa yahi eyikaleka ithwahindana okw’Ibuka?

¹⁶ Eyindi nzumwa eyikaleka ithwahindana okw’Ibuka yiri yithi thwanzire eriowa Yesu. Mbulha thuwithe mahaki aw’obuthuku obukasa, obuli mughuma w’okw’ithwe anzire iniaghendera okwa kihano ekya Yesu aha omwithumbi akatsukisya Eryibuka kino: “Mukole muthya busana n’erinyibuka.”​—1 Kor. 11:23, 24.

17. Eryibuka likathuwathikaya lithi eriyithunda hakuhi na Yehova?

¹⁷Thukayithunda hakuhi na Yehova. (Yak. 4:8) Ngoku thwabirigha, Eryibuka likathuha akaghisa k’erilengekania okw’amaha agho Yehova abirithuha n’erighanirya okwa lhwanzo lhunene olho abirithukangania. (Yer. 29:11; 1 Yn. 4:8-10) Thukabya thukalengekania okwa maha wethu w’obuthuku obukasa n’okwa lhwanzo olhuthelemawa olho Nyamuhanga athuwithire, thukongera olhwanzo  olhwa thuwithire Yehova n’erighumya obunywani bwethu nayu.​—Abar. 8:38, 39.

18. Erighanirya okwa ky’erileberyako kya Yesu kikathuhira mw’omuhwa w’erikolhaki?

¹⁸Thukahirawa mw’omuhwa w’erigherererya eky’erileberyako kya Yesu. (1 Pet. 2:21) Biro birebe Eryibuka lithe lyabya, thukahira amalengekania w’okwa myatsi ye Biblia eyihambire okwa yenga ya Yesu y’erighunzerera okwa kihugho, olhuholho lhwiwe, n’erilhubuka liwe. Neryo omw’igholho okw’Ibuka, omukania akathw’ibukaya olhwanzo olho Yesu athuwithire. (Efe. 5:2; 1 Yn. 3:16) Thukabya thukasoma okwa ky’erileberyako kya Yesu eky’eriyihayo n’erighanirya kukyo, thukahirawa mw’omuhwa ‘w’erilendera ngoku Kristo alendera.’​—1 Yn. 2:6.

19. Thwanga sighalha thuthi omo lhwanzo lhwa Nyamuhanga?

¹⁹Thukongera erithwamu erisighalha omo lhwanzo lhwa Nyamuhanga. (Yuda 20, 21) Thukasighalha omo lhwanzo lhwa Nyamuhanga omw’ikolha ekyosi-kyosi ekyo thwanga thoka erimwowa, eriyira erina liwe mwa libuyirire, n’eritsemesya omuthima wiwe. (Emi. 27:11; Mt. 6:9; 1 Yn. 5:3) Eryibuka likaleka ithwongera erithwamu eribyaho obuli kiro omwa ngebe ey’eribwira Yehova thuthi, ‘Nganzire erisighalha omo lhwanzo lhwawu kera na kera!’

20. Ni nzumwa syahi mbuya esikaleka ithwahindana okw’Ibuka?

²⁰ Mbulha thuwithe amaha w’erisyabya elhubulha kutse okwa kihugho kera na kera, thuwithe nzumwa mbuya sy’erihindana okw’Ibuka. Obuli mwaka thukabya thukahindana haghuma okwa kiro ekyo, thukibuka olhuholho lhw’omundu oyo thwanzire, Yesu Kristo. Ekikulhu kutsibu, thuk’ibuka olhwanzo lhunene​—olhwanzo olho Yehova athukanganaya omw’ihayo Mughalha wiwe ng’endongolya. Omwaka ono, Eryibuka likendibya omw’igholho-gholho lya Kyakathano biro 15 Okwakani, 2022. Thwanzire Yehova na Mughalha wiwe, neryo okwa kiro ky’eryibuka olhuholho lhwa Yesu, okw’ithwe, sihali ekyangabya ky’omughaso kwilhaba erihindana okw’Ibuka.