1-3. Ni bitsibu byahi ebyanga leka abandu ba Yehova ibathoghongya emisonia?

NI MUGHULHU wahi walira? Hakanayira, ithwathoghongya emisonia y’etseme. Aliwe mughulhu mungyi, ithwe bosi thukanalira busana n’obulighe bunene. Ng’eky’erileberyako, thwanganalira busana n’eriholerwa. Mwali wethu Lorilei, e United States, mwahandika athi: “Ihakanayira obulhumi bw’eriholerwa mwali waghe ibwabya bunene kutsibu ihabya nga sihali ekyanga nyihumulikania. Oko buthuku obo, iningabulha omuthima waghe owabiribbunika ng’anganathekana.” *

² Thwangana thoghongya emisonia busana n’esindi nzumwa. Hiromi, omutemburi e Japani, mwabugha athi: “Hakanayira ingahwa amani busana n’erithendi hulikirira ly’abandu abangeghaya omw’ithulira. Okwa bundi buthuku inganemuthoghongya emisonia, ngasaba Yehova indi angwathikaye ngabane omundu oyukasondaya ekwenene.”

³ Wune wathayowa ng’abali bethu aba? Abangyi omw’ithwe thwabiriyowa thuthya. (1 Pet. 5:9) Thwanzire ithwakolera Yehova ithunatsemire, aliwe thwangana mukolera ithune muthoghongya emisonia busana n’obulighe, erihwa amani, kutse emibere eyikalire eyikalenga okwa buthaleghulha bwethu oku Nyamuhanga. (Esy. 6:6; 100:2) Thwanga kolhaki thwamabya omwa mibere ng’eyi?

4. Omo mwatsi ono thukendi kania okuki?

⁴ Thwangan’ighira okwa ky’erileberyako kya Yesu. Ihakanayira nayu iniabya omwa bulighe bunene ikyaleka ‘inialira.’ (Yn. 11:35; Lk. 19:41; 22:44; Ebr. 5:7) Thulebaye ebya mulethera obulighe. Thukakolha ekyo, thukendi lhangira amasomo agho thwang’igha. Kandi thukendi lebya ebya thwanga kolha erighumira ebitsibu ebikaleka ithwalira.

5. Omwatsi owali omu Yoane 11:32-36 akathweghesayaki oku Yesu?

⁵ Omo mwaka 32 E.K., omunywani mubuya wa Yesu ya Lazaro mwalhwalha n’eriholha. (Yn. 11:3, 14) Lazaro aby’awithe bali babu babiri, Maria na Marata, kandi Yesu aby’anzire kutsibu eka eyi. Abakali aba babya omwa bulighe bunene obw’eriholerwa mughalha wabu mwanzwa. Lazaro abere abiriholha, Yesu mwaghenda omwa kyalu kye Betania, eyo Maria na Marata babya bikere. Marata abere akowa ngoku Yesu anemwasa, mwanguha eriyasanga-sangana nayu. Thalengekania ng’abya omwa bulighe bungahi akabugha athi: “Mukama kumbe wabya hano, mughalha wethu ngasyalithaholha.” (Yn. 11:21) Buthuku buke enyuma waho Yesu abere alhangira Maria n’abandi ibanemulira, nayu “mwalira.”​—Soma Yoane 11:32-36.

6. Ni kyahi ekyaleka Yesu inialira okwa buthuku obo?

⁶ Ni kyahi ekyaleka Yesu inialira okwa buthuku obo? Ekitabu Insight on the Scriptures kikasubiraya kithi: “Olhuholho lhwa munywani wiwe Lazaro n’obulighe obwa bali bobu Lazaro babyamu mubyaleka Yesu iniakwa ‘obulighe bunene n’erilira.’” * Yesu angabya iniabya iniane mulengekania okwa bulhumi obwa munywani wiwe Lazaro alhabamu inianalhwere n’erilengekania ng’aby’akayowa athi akaminya ngoku akayaholha. N’ekindi Yesu atholere eribya imwalira akalhangira Maria na Marata ibabiriyowa nabi busana n’olhuholho lhwa mughalha wabu. Wamabya iwabiriholerwa omunywani kutse omuhughu, ahathe erithika-thika eriyowa ng’eryo lyabirikubyako. Lebaya amasomo asathu agho wang’ighira okwa kyabya eki.

7. Yesu erilira busana n’abanywani biwe kikathweghesayaki oku Yehova?

⁷Yehova akayitheghereraya eriyowa lyawu. Yesu ni “kiminyikalho kwenene” ekya Thatha wiwe. (Ebr. 1:3) Yesu abere akalira, mwakangania eriyowa lya Thatha wiwe. (Yn. 14:9) Wamabya iwunemughumira obulighe bw’eriholerwa, wutholere iwaminya ngoku Yehova syali subulira okw’ilhangira obulighe bwawu  lisa aliwe kandi akakukwira obulighe bunene. Anzire erikuhumulikania.​—Esy. 34:18; 147:3.

8. Busana naki ithwayikethera ngoku Yesu akendi syalhubukya abanze bethu?

⁸Yesu anzire erilhubukya abanze bawu. Buthuku buke athalyalira, Yesu mwakakasya Marata athi: “Mughalha wenyu asyalhubuka.” Marata mwikirirya Yesu. (Yn. 11:23-27) Marata ng’omuramya muthaleghulha wa Yehova, ahathe erithika-thika abya iniabiriowa okw’ilhubukya eryakolhawa n’omuminyereri Eliya n’eryakolhawa n’omuminyereri Elisa. (1 Bam. 17:17-24; 2 Bam. 4:32-37) Kandi angabya iniabya iniabiriowa n’okw’ilhubukya erya Yesu akolha. (Lk. 7:11-15; 8:41, 42, 49-56) Nawu wangana yikethera ngoku wukendi syalholha okwa banze bawu ababiriholha. Yesu erilira akahumulikania banywani biwe abali omwa bulighe bw’eriholerwa kikakanganaya ngoku anzire erilhubukya abandu!

9. Nga Yesu, wanga wathikya wuthi abali omwa bulighe bw’eriholerwa? Iha eky’erileberyako.

⁹Wangana wathikya abali omwa bulighe bw’eriholerwa. Yesu mwathasubulira okw’ilira haghuma na Marata na Maria aliwe kandi mwabahulikirira n’eribahumulikania. Thwangana kolha ekiri ng’ekyo okwa bali omwa bulighe bw’eriholerwa. Dan, omusyakulhu e Australia, akabugha athi: “Mukali waghe abere abiriholha, munayithagha erihumulikanibwa. Abathahenie bangyi mubayihayo omw’ithungyi n’omwa kiro habw’erithanyihulikirira. Ibakaleka ngakanganaye obulighe bwaghe, kandi isibali yiponera ingalira. Kandi mubanyiwathikya n’omwa sindi nzira, ng’erinyogherya ematoka yaghe, eriyanyighulira eby’erirya, n’erinyitsumbira omughulhu ngayowa isinendi thoka ebi ingyuwene. Kandi mughulhu mungyi ibakasaba haghuma naghe. Mubakangania ku ni banywani kandi balikyethu b’okwenene ‘abakabuthawa habw’omughulhu w’obulighe.’”​—Emi. 17:17, NWT.

10. Soborera ebyabya ebiri omu Luka 19:36-40.

¹⁰ Yesu mwahika e Yerusalemu okwa Nisani 9, 33 E.K. Abere akayingira omwa muyi, abandu mubayisorokya n’abandi bamasanza esyongyimba syabu omwa nzira embere siwe erikangania ku bamamuligha ng’Omwami wabu. Ahathe erithika-thika obo bwabya buthuku bw’etseme. (Soma Luka 19:36-40.) Neryo abigha biwe bangabya isibabya bayitsulirye ekyakwamako. “[Yesu] abere ahika hakuhi n’omuyi, mwalhangiragho n’eriririra kugho.” Emisonia iyine omwa meso, Yesu mwalhaghulha ebindu ebikalire ebikayahika okwa bandu be Yerusalemu.​—Lk. 19:41-44.

11. Ni kyahi ekyaleka Yesu inialira busana n’abandu be Yerusalemu?

¹¹ Yesu mwakwa obulighe kundi abya inianasi ngoku nomwakine indi bamamwangirira ndeke, Abayuda babya ibabirisangwa bakangania ngoku sibangahulikirire omwatsi w’Obwami. Busana n’ekyo, e Yerusalemu yanga thoghothibirwe kandi n’Omuyuda owosi-wosi oyuwanga lhamire okw’ithoghothya ly’omuyi oyo angaghendire omwa bunyewa. (Lk. 21:20-24) Eky’obulighe, ngoku Yesu anabya iniabiribugha, abandu bangyi mubamughana. Abangyi bakahulikirira bathi omwatsi w’Obwami eyo wikere? Abake bamabya ibabakatsemera akaghalha ako wukahiraho eribakangirirya ekwenene, Yesu erilira kyanga kweghesyaki? Thulebaye awandi masomo asathu.

12. Yesu erilira busana n’abaliranwa biwe kikathweghesayaki oku Yehova?

¹²Yehova akatsomana abandu. Yesu erilira kikathwibukaya Yehova ng’atsomene bungahi abandu. “Syanzire omundu n’omughuma akahera, nikwa anzire abandu bosi ibabindulha emithima yabu n’erileka ebibi.” (2 Pet.  3:9) Munabwire thukakanganaya ku thwanzire abaliranwa bethu omw’ilholha embere erihiraho akaghalha eribahikyako engulhu yuwene.​—Mt. 22:39. *

13-14. Yesu mwakangania athi kw’akakwira abandu b’obulighe, kandi nethu thwanga kulha-kulhania thuthi omubere oyo?

¹³Yesu mwasangira kutsibu omw’ithulira. Mwakangania kw’anzire abandu omw’ilholha embere eribakangirirya okwa ndambi yosi-yosi. (Lk. 19:47, 48) Ni kyahi ekyaleka iniakolha ekyo? Iniakakwira abandu b’obulighe. Okwa bundi buthuku, abandu bangyi ibakanza erihulikirira ebinywe bya Yesu ikyaleka iyo n’abigha biwe “ibabulha endambi y’erirya.” (Mk. 3:20) Kandi mwathulira n’omwa kiro​—endambi eyathokekana okwa mughuma w’okwa bahulikiriri biwe. (Yn. 3:1, 2) Abangyi b’okwa batsuka erihulikirira Yesu mubathabya bigha biwe. Aliwe abosi abamuhulikirira mubahebwa ndeke obwema. Munabwire thwanzire ithwaha obuli mundu y’akaghisa k’eriowa engulhu yuwene. (Emib. 10:42) Eriberererya eki, ithwangana yithagha erihindulha emibere yethu y’erithulira.

¹⁴Ibya iwunayitheghekire erikolha esyombinduka esikayithaghisibawa. Thwamathendibya ithunemuhindulikania endambi y’erithuliramo, ithwangana ghana erihika okwa banga hulikirira ndeke engulhu yuwene. Omutemburi oyukahulhawamo Matilda, akabugha athi: “Ingye na mwira waghe thukalengaho erithulira abandu okwa ndambi muthina-muthina. Omo ngyakya-ngyakya, thukathulira omo myanya y’esuburu. Omw’ithungyi omughulhu abandu bali okwa syombalhu, thukakolesaya ehiggali hy’ebitabu. Omw’igholho, thukeghaya abandu bangyi b’eka.” Omwakanya k’eribya n’endegheka ngumerere, thutholere ithwabya ithunayitheghekire erikolha esyombinduka nuku thuthulire abandu bangyi. Thwamakolha ekyo, ithwangana yikethera ngoku Yehova akendi tsema.

15. Ni kyahi ekyabya omw’ithumbi ly’erighunzerera omwa ngebe ya Yesu, ngoku kiri omu Luka 22:39-44?

¹⁵ Omw’ithumbi okwa Nisani 14, 33 E.K.,  Yesu mwaghenda omw’irima lye Getesemane. Eyo, mwasaba Yehova erilhua okwa muthima. (Soma Luka 22:39-44.) Okwa ndambi eyikalire eyo Yesu “mwasaba n’erilemba-lemba oku Nyamuhanga, omw’ilhakirira n’emisonia.” (Ebr. 5:7) Yesu mwasaba athiki omw’ithumbi ly’erighunzerera eryo athali aholha? Mwasaba akaghalha k’erisighalha muthaleghulha oku Yehova n’erikolha erisonda Liwe. Yehova mwowa omwa musabe wa Mughalha wiwe mw’obulighe neryo mwamuthumira omumalaika erisyamughumya.

16. Busana naki Yesu mwabya omwa bulighe iniane musaba omw’irima lye Getesemane?

¹⁶ Ahathe erithika-thika Yesu iniane omw’irima lye Getesemane mwasaba inianemulira habw’eribya omwa bulighe bw’erithwalhwa ng’omutsumi. Kandi abya inianasi olhukwamirwa olhulithohire olhw’awithe​—erihamya erina lya Thatha wiwe. Wamabya iwune omwa mibere eyikalenga okwa buthaleghulha bwawu oku Yehova, Yesu erilira kyanga kweghesyaki? Thulebaye awandi masomo asathu.

17. Yehova erisubirya emisabe ya Yesu eyikalhua okwa muthima kyanga thweghesyaki?

¹⁷Yehova akahulikirira emisabe yawu. Yehova mwahulikirira emisabe ya Yesu eyikalhua okwa muthima. Busana naki? Kundi ekilhubirirwa kya Yesu ekikulhu lyabya iry’erisighalha muthaleghulha oku Thatha wiwe n’erihamya erina Liwe. Ekilhubirirwa kyethu kikulhu kyamabya iry’erisighalha bathaleghulha oku Yehova n’erihamya erina liwe, iniakendi subirya emisabe yethu.​—Esy. 145:18, 19.

18. Ni mwanzira syahi Yesu ali ng’omunywani oyukathuyitheghereraya?

¹⁸Yesu akayitheghereraya eriyowa lyawu. Thwamahangya-hangya, ithukendi tsema omunywani oyukathuyitheghereraya, kwilhabirirya oyuwanabere omwa mibere eyiri ng’eyethu akathuhumulikania. Yesu y’omunywani oyo. Anasi ekya kikamanyisaya erihwa amani n’eriyithagha obuwathikya. Anasi erilemererwa lyethu, kandi akendi lhangira athi thukabana obuwathikya obwa thukayithagha okwa “mughulhu w’obwagha,” ni bugha ambu, oko ndambi eyitholere. (Ebr. 4:15, 16) Ngoku Yesu analigha obuwathikya bw’omumalaika omw’irima lye Getesemane, thutholere ithwabya ithunayitheghekire eriligha obuwathikya obwa Yehova akaha, mbulha buli omwa mulingo w’ekitabu, evidiyo, omukania, kutse eribungirwa  erikahumulikanaya ery’omusyakulhu w’ekithunga kutse omunywani oyukulire bunyakirimu.

19. Wangabana wuthi akaghalha omughulhu wuwithe ebikalenga okwa buthaleghulha bwawu oku Nyamuhanga? Iha eky’erileberyako.

¹⁹Yehova akendi kuha “obuholho bwa Nyamuhanga.” Yehova akendi thughumya athi? Thukabya thukasaba, thukabana “obuholho bwa Nyamuhanga, obulhabire amenge wosi.” (Fil. 4:6, 7) Obuholho obwa Yehova akathuha bukaleka ithwathekana kandi ithwabya n’amalengekania awatholere. Thalebya ngoku eki kyabya oku mwali wethu Luz. Akabugha athi: “Mughulhu mungyi ngayowa ingali omo mbwera. Hakanayira, eriyowa eryo iryaleka ingalengekania indi Yehova syanyanzire. Aliwe ekyo kikabya kikabya, aho n’aho ngabwira Yehova y’eriyowa lyaghe. Erisaba likaleka ingathoka erikakirya eriyowa lyaghe.” Ngoku ekyalholirweko kiwe kikakanganaya, thwangana bana obuholho erilhabira omw’isaba.

20. Ni masomo wahi agho thwam’igha okw’ilira lya Yesu?

²⁰ Erilira lya Yesu ka lyamathweghesya amasomo awuwene kandi awakahumulikanaya! Thuk’ibukibawa eriwathikya banywani bethu abali omwa bulighe bw’eriholerwa n’eriyikethera ngoku Yehova na Yesu bakendi thuwathikya thwamaholerwa. Thukahirawa mw’omuhwa w’erithulira n’erikangirirya ithune n’omubere w’erikwira abandi b’obulighe kundi Yehova Nyamuhanga na Yesu Kristo bakakanganaya omubere oyu. Kandi thukahumulikana busana n’eriminya ngoku Yehova na Mughalha wiwe mwanze bakayitheghereraya eriyowa lyethu, banasi erilemererwa lyethu, kandi banzire erithuwathikya eriyiyinia. Kwesi ka thulhole embere erighendera okwa bya thwam’igha erihika okwa kiro ekyo Yehova akendi syaberereryamo omulhaghe wiwe ow’erisyasangulha “emisonia yosi oko meso [wethu]”!​—Erib. 21:4.