OMWA mubughe w’erimbere, ekinywe “eggali” ekiri omwa New World Translation kyangana manyisya ekighuma ky’okwa biggali bingyi muthina-muthina. (Emib. 8:28, 29, 38) Aliwe, obundi Omuetiopia angabya iniabya omwa kiggali ekinene okwa kiggali ky’amalhwa kutse eky’amalingwatha. Thulebaye esyonzumwa ndebe esyangaleka ithwaghunzerera thuthya.

Omuetiopia abya mukulhu oyuwabya iniabirighenda lhughendo lhuuli. “Abya mundu mukulhu oyukabika ebindu byosi by’Omwami-kali ye Kandake we Etiopia.” (Emib. 8:27) E Etiopia eyakera mwamuli e Sudan eyamunabwire n’ekitsweka eky’eyikwa ekye Misiri eyamunabwire. Nomwakine indi obundi omulhume oyo mwathaghenda omwa kiggali ekighumerere omwa lhughendo olho, atholere eribya iniabya inianawithe ebyo ahekire ebikendi muwathikya omwa lhughendo lhuuli olho. Ebighuma by’okwa biggali ebyabya bikakolesibwa omwa kighana ky’erimbere E.K. eriheka abandu byabya iby’ebiggali ebikaheka eby’ebiringo bbini. Erikwamana n’ekitabu Acts—An Exegetical Commentary, “Ekiggali ng’ekyo ikikabya ikyanganaheka bindu bingyi, ikyaleka olhughendo ilhuwana, kandi obundi ikyaleka abandu ibaghenda lhughendo lhuuli.”

Omuetiopia abya inianemusoma Filipo akamuhikako. Omwatsi akabugha athi, “Neryo Filipo mwathibitha eyo ali, nikwa mwowa [oyubunire] akasoma ekitabu ky’omuminyereri Isaya.” (Emib. 8:30) Ebiggali ebikaheka ibikolirwe omwa nzira ey’eribya isibyanganguha. Esipidi nyike eyi yangalekire omulhume oyubunire oyo iniathoka erisoma n’erileka Filipo iniamuhikako omwa bisandu.

Omuetiopia mwabwira ‘Filipo athi asambire oko ggali n’er’ikalha nayo.’ (Emib. 8:31) Bikahika okwa biggali by’amalingwatha, abakabighendaya ibakabya iban’imene. Aliwe omwa kiggali ky’olhughendo, mwangabya imwabya imune ekithumbi ekyo omulhume oyubunire na Filipo bikalhako.

Erikwamana n’ebihandikire ebyasondolibawa ebiri omwa Emibiri sura 8 n’obwema obwakera obuliho, lino-lino ebitabu byethu mubyakanganirye Omuetiopia oyubunire oyo iniane omwa kiggali ekinene okwa kiggali ky’amalhwa kutse eky’amalingwatha.