Abandi bakulira omwa syokalikya eyo abalhume bangyi bakalhangira abakali ng’ab’ahisi. Ng’eky’erileberyako, Hans, omulebererya w’omuthimbo e Bolivia, akabugha athi: “Abandi balhume bakulira omwa syokalikya eyo abalhume bakayowa nga n’ibo balengire abakali, neryo mughulhu mungyi bakabaghaya.” Shengxian, omusyakulhu e Taiwan, akabugha athi: “Eyo ng’ikere, abalhume bangyi bakayowa bathi abakali sibatholere bakayingirya omo myatsi yabu. Omulhume amahulha ekirengekanio ky’omukali ekihambire okwa kindu kirebe, abandi ibangana mughaya.” Abandi balhume bakasolholha abakali omwa sindi nzira. Ng’eky’erileberyako, omwa masatha-satha, abandi ibangana bugha ebinywe by’akaghayo ebihambire okwa bakali.

Eky’obutseme, sihali mulhume oyuboherwe omwa kalikya eyo akuliramu. Angana rwanisya eky’eribugha indi abalhume balengire abakali. (Efe. 4:22-24) Eki kyangana kolhwa omw’igherererya eky’erileberyako kya Yehova. Omo mwatsi ono, thukendi minya Yehova ng’akalhangira athi abakali, ngoku baghalha bethu bang’igha erilhangira abakali ngoku Yehova akabalhangira, kandi ngoku abasyakulhu bangabya ky’erileberyako eky’erisikya bali bethu.

YEHOVA AKALHANGIRA ATHI ABAKALI?

Yehova akahiraho eky’erileberyako ekihikene abakali nga batholere ibalhangirwa bathi. Nga Thatha oyukakwira abaana biwe b’obulighe, anzire erihiika liwe, abandu. (Yn. 3:16) Kandi bali bethu abathaleghulha bali nga bali biwe banzwa. Thalengekania okwa syonzira hino esyo Yehova akakanganirayamo kw’asikirye abakali.

Syali basolholha. Yehova mwahangika abalhume n’abakali omwa kisosekanio kiwe. (Enz. 1:27)  Mwathaha abalhume b’amenge manene kutse amaaka awalengire aw’abakali; kutse syanzire abalhume kwilhaba abakali. (2 Emy. 19:7) Mwahangika abalhume n’abakali ibanawithe amaaka maghumerera aw’erikengeramo ekwenene ye Biblia n’erilengekania okwa mibere yiwe mibuyanga. Kandi Yehova akalhangira erikirirya ery’abalhume n’abakali iryingene—mbulha bawithe amaha w’erisyikalha okwa kihugho paradiso kera na kera kutse aw’erisyakolha ng’abami n’abahereri omwa lhubulha. (2 Pet. 1:1) Ahathe erithika-thika, Yehova syalisolholha abakali.

Akabahulikirira. Yehova akatsomana eriyowa n’emilyambo y’abakali. Ng’eky’erileberyako, mwahulikirira n’erisubirya emisabe ya Rakeli na Hana. (Enz. 30:22; 1 Sam. 1:10, 11, 19, 20) Kandi Yehova mwasondolha abahandiki be Biblia erihiramo eby’erileberyako by’abalhume abahulikirira abakali. Ng’ekyerileberyako, Abrahamu mwaghendera okwa busondoli bwa Yehova obw’erihulikirira mukali wiwe, Sara. (Enz. 21:12-14) Omwami Dawudi mwahulikirira Abigaeli. Erithwalira haghuma, mwayowa Yehova iyulyamuthuma erisyakania nayu. (1 Sam. 25:32-35) Yesu, oyukakanganaya ndeke-ndeke emibere ya Thatha wiwe, mwahulikirira mama wiwe, Maria. (Yn. 2:3-10) Eby’erileberyako ebi bikakanganaya ngoku enzira nguma eyo Yehova akakanganirayamo kw’asikirye abakali ly’eribahulikirira.

Akabayikethera. Ng’ekyerileberyako, Yehova mwayikethera ngoku Eva akendi wathikya okw’itsomana ekihugho kyosi. (Enz. 1:28) Omw’ikolha ekyo, mwakangania kw’akamulhangira ng’omukali oyutholere mwira wiwe, Adamu, butsira ng’omundu w’ahisi. Kandi Yehova mwayikethera abaminyereri b’obukali ya Debora na Hulda erihabulha abandu biwe, imwamune omutsweri n’omwami. (Abat. 4:4-9; 2 Bam. 22:14-20) Munabwire, Yehova akaha abakali Abakristayo b’olhusunzo lhw’erikolha omubiiri wiwe. Bali bethu abathaleghulha aba bakakolha ng’abathuliri, abatemburi, n’abamisyonare. Bakawathikaya okw’iwania, erihimba, n’erisugha Ebisenge by’Obwami n’ebyaghanda by’omuthahulha. Abandi b’okw’ibo bakakolera okwa Beteli; n’abandi bakakolera okwa sy’Ofisi sy’erihinduliramu. Bali bethu aba bali ng’amahe manene agho Yehova akakolesaya eriberererya erisonda liwe. (Esy. 68:11) Ahathe erithika-thika, Yehova syalilhangira abakali ng’abatseke kutse abathe bangathoka.

BAGHALHA BETHU BANG’IGHA BATHI ERILHANGIRA ABAKALI NGOKU YEHOVA AKABALHANGIRA?

Baghalha bethu, erithoka eriminya nga thunemulhangira bali bethu Abakristayo ngoku Yehova akabalhangira, thutholere ithwayibera b’okwenene thukalebya amalengekania n’emikolere yethu. Erithoka erikolha ekyo, thukayithagha obuwathikya. Ngoku e X-ray yikanaminyerera obulhwere obuli okwa muthima w’omundu, omunywani mubuya n’Ekinywe kya Nyamuhanga byangana thuwathikya eriminyerera eriyowa erithuwene eryangabya irinathulimo erihambire okwa bakali. Thwanga kolhaki eribana obuwathikya obo?

Bulhaya omunywani mubuya. (Emi. 18:17) Thukakolha ndeke thwamahika okwa munywani omuyiketherwa oyuwasibwe ng’ow’olhukeri n’oyuwithe obuyitheghererya n’erimubulya ebibulyo nga bino: “Wukalengekanaya nga lhangira indi bali wethu? Ibanabugha bathi nganabasikirye? Hane aho nang’uwania omw’ikanirania lyaghe nabu?” Munywani wawu amakubwira ah’eryuwania, yihighule okw’iyilhwirako. Omwakanya k’ekyo, ibya iwunayitheghekire erikolha esyombinduka esikayithaghisibawa.

Igha Ekinywe kya Nyamuhanga. Enzira eyuwene eyathwanga minyiramu nga thunemukolongana ndeke n’abali bethu ly’erilebya amalengekania n’emikolere yethu omw’ikolesya Ekinywe kya Nyamuhanga. (Ebr. 4:12) Thukabya thuk’igha e Biblia, thuk’igha okw’abalhume abakolongana ndeke n’abakali n’abathakolha ekyo. Neryo ithwangana linganisya emikolere yabu n’eyethu. Eryongera okw’ekyo, erilinganisya amasako lyangana thutheya okw’ikolesya nabi amasako omwa buthaminya thukanza erisighika amalengekania awathahikire agho thuwithe okwa bakali. Ng’eky’erileberyako, ngoku kiri omwa 1 Petero 3:7, abakali bathahibwa batholere ibasikibwa kundi bali ng’ebindu ‘byolho.’ b Mbwino eki kikamanyisaya  kithi omukali ni w’ahisi—oyuthawithe amenge—okwa mulhume? Eyihi nahake! Linganisaya ebinywe bya Petero n’ebiri omwa Abanya Galatia 3:26-29 ebikakanganaya ngoku Yehova abirisombolha abakali kuthya n’abalhume erithabalha haghuma na Yesu omwa lhubulha. Thwamasoma Ekinywe kya Nyamuhanga n’eribulya omunywani mubuya ngathukalhangira thuthi abakali, ithukend’igha erikangania bali bethu b’erisikya eritholere.

ABASYAKULHU BAKAKANGANAYA BATHI KU BASIKIRYE BALI BETHU?

Baghalha bethu omwa kithunga bangan’igha erisikya abakali omw’ikwama eky’erileberyako ky’abasyakulhu ab’olhwanzo. Abasyakulhu bakabya bathi ky’erileberyako bikahika okw’isikya bali bethu? Lebaya esyonzira ndebe hino.

Bakasima bali bethu. Omukwenda Paulo mwahiraho eky’erileberyako ekyuwene ekyo abasyakulhu banga gherererya. Ahathe eribisirira, mwasima bali bethu bangyi omwa baruha yiwe ey’ahandikira ekithunga kye Roma. (Abar. 16:12) Thalengekania okwa tseme eyo bali bethu abo bathunga ebaruha ya Paulo yikasomerwa omwa kithunga? Kuthya, ahathe eriyikukumirira, abasyakulhu bakasima bali bethu busana n’emibere yabu mibuya n’omubiiri ogho bakakolera Yehova. Eki kikaleka bali bethu ibaminya ku basikibirwe kandi ku bakasimawa. Ebinywe ebikahimba eby’omusyakulhu byanganabya iby’ebyonyine-nyine ebyo bali bethu bakayithagha erithoka erilholha embere erikolera Yehova buthaleghulha.—Emi. 15:23.

Abasyakulhu bakabya bakasima bali bethu, bakakolha ekyo erilhua okwa muthima kandi ibabugha ekyonyine-nyine. Busana naki? Mwali wethu Jessica akabugha athi: “Kikatsemesaya, baghalha bethu bakabugha bathi ‘wasingya omubiiri.’ Aliwe thukasima kutsibu baghalha bethu bakathusima habw’erikolha ekindu kirebe, ng’erikangirirya abaana bethu eribya bukuthu okwa mihindano kutse ng’eriyenda omwigha eryasa okwa mihindano.” Abasyakulhu  bakabya bakasima bali bethu busana n’ekindu kirebe, bakaleka bali bethu ibayowa ibakayithaghisibawa kandi ini b’obughuli omwa kithunga.

Bakahulikirira bali bethu. Abasyakulhu abayikehirye bakaminya ngoku s’ibo basa abangaha amenge awuwene. Abasyakulhu ng’abo bakasaba bali bethu b’amalengekania wabu, kandi bakahulikirira ndeke bali bethu bakakania. Omw’ikolha ekyo, abasyakulhu bakahira omu bali bethu mw’omuhwa kandi ibayighasira. Bathi? Omusyakulhu ya Gerardo, oyukakolera okwa Beteli, akabugha athi: “Nabirilhangira ngoku erisaba bali bethu b’amalengekania wabo kikangwathikaya eryongera erikolha omubiiri waghe wa ndeke. Mughulhu mungyi, ibo babirikolha omubiiri habw’omughulhu muuli kwilhaba baghalha bethu abangyi.” Omwa kithunga, bali bethu bangyi bakakolha ng’abatemburi, neryo basi bingyi ebihambire okw’abandu ab’omwa bulhambo. Omusyakulhu ya Bryan akabugha athi: “Bali bethu bawithe bingyi ebya bakakolha omwa kithunga. Neryo ghasirawa omwa ebyo basi!”

Abasyakulhu b’amenge sibalilhuaho bakagheghena amalengekania w’abali bethu. Busana naki? Omusyakulhu ya Edward akabugha athi: “Amalengekania wa mwali wethu n’eby’asi byanganawathikya mughalha wethu eriminya omwatsi wosi kandi kyanganaleka iniabya n’omubere w’erilhumirirwa abandi.” (Emi. 1:5) Omusyakulhu nomwangabya isyendighendera okwa malengekania wa mwali wethu, paka atholere iniamusima busana n’amenge n’obuyitheghererya bwiwe.

Bakathendeka bali bethu. Abasyakulhu b’obuyitheghererya bakasondekanaya ehighisa hy’erithendekeramu bali bethu. Ng’eky’erileberyako, bangana kangirirya bali bethu ngoku banga sondolha omuhindano w’eriyathulira omughulhu sihali mughalha wethu oyubatizibirwe. Bangana bathendeka erigha erikolesya ebyuma kutse esyomashini ndebe nuku bawathikaye okw’isugha n’okwa buhimbe bw’ekiteokrasi. Okwa Beteli, abalebererya babirithendeka bali bethu erikolha esyongwamirwa muthina-muthina, imwamuli erisugha, erighulha, eby’embaririra, erikolesya esyokompyuta, n’ebindi-n’ebindi. Abasyakulhu bakabya bakathendeka bali bethu, bakakanganaya ku bakabalhangira nga banganathoka kandi ku ni bayiketherwa.

Bali bethu bangyi bakakolesaya erithendeka eryo bahebawa erilhua okwa basyakulhu erighasira abandi. Ng’eky’erileberyako, abandi bali bethu bakakolesaya erithendekwa erya bathunga omwa by’obuhimbe eriwathikya abandi erithasyahimba amanyumba wabo hakawa ekitsinduli. Abandi bali bethu bakakolesaya amenge agho bathunga bakathulira ahali abandu bangyi eriwathikya bali bethu bangyi erisangira omwa mulingo w’erithulira oyu. Bali bethu bakayowa bathi busana n’abasyakulhu ababathendeka? Mwali wethu Jennifer akabugha athi: “Nabere ingakolha okwa buhimbe bw’Ekisenge kighuma ky’Obwami, omulebererya mwahiraho obuthuku bw’erinyithendeka. Mwalhangira omubiiri ogho nakolha kandi mwanyisima busana nagho. Munasima erikolha haghuma nayu kundi munayowa ingali w’obughuli kandi muyiketherwa.”

GHASIRAWA OMW’ILHANGIRA BALI BETHU NGA B’OMW’IHIIKA LYETHU

Thwanzire bali bethu abathaleghulha nga Yehova kw’abanzire! Neryo thukabalhangira ng’ab’omw’ihiika lyethu. (1 Tim. 5:1, 2) Thukalhangira ini kitsumbi erikolha haghuma nabo kandi thukabayisyethera. Kandi thukatsema bakayilhangirira ku thubanzire kandi ku thukabawathikaya. Mwali wethu Vanessa akabugha athi: “Ngasima Yehova ya kutsibu busana n’eribya omwa kithunga kiwe, ekirimo baghalha bethu abakaleka ingayowa buholho.” Mwali wethu e Taiwan akabugha athi: “Ngasima Yehova ya kutsibu n’ekithunga kiwe busana n’erihira omuwatho okwa ky’eribya abakali ini b’obughuli n’eritsomana eriyowa lyethu. Eki kikaghumaya erikirirya lyaghe n’erileka ing’ongera erisima olhusunzo lhw’eribya omwa kithunga kya Yehova.”

Yehova atholere eribya iniakayisyetha kutsibu akalhangira abalhume Abakristayo abathaleghulha bakalengaho erilhangira abakali n’erikolongana nabo ngoku akakolha! (Emi. 27:11) Omusyakulhu e Scotland ya Benjamin akabugha athi: “Ekihugho kikalhangira abakali mw’ab’ahisi. Neryo abakali bakabya bakasa okwa Kisenge ky’Obwami, thwanzire ibalhangira embaghane.” Kwesi thukole ngoku thwangathoka erigherererya Yehova omw’ikangania bali bethu banzwa b’olhwanzo n’erisikya ebibatholere.—Abar. 12:10.