1. Busana naki Eryibuka ni kiro ky’omughaso munene omo mwaka? (Luka 22:19, 20)

 OKWA bandu ba Yehova, Eryibuka olhuholho lhwa Kristo ni kiro ky’omughaso munene omwa mwaka. W’omukonga musa ogho Yesu alhaghira abigha biwe athi ib’ibuka. (Soma Luka 22:19, 20.) Thuwithe nzumwa nyingyi esikaleka ithwalindirira Eryibuka. Thulebaye esighuma sy’okw’isyo.

2. Ni nzumwa nga syahi esikaleka ithwalindirira Eryibuka?

² Eryibuka likaleka ithwalengekania okwa bughuli bw’endongolya. Likathw’ibukaya esyonzira esyo thwanga kanganiryamo ku thukasima ekihongo kya Yesu. (2 Kor. 5:14, 15) Kandi likathuha akaghisa ‘k’erisikania emithima’ n’abalikyethu. (Abar. 1:12) Obuli mwaka, abangyi b’okwa babirisebebera bakahindana kulyo. Abandi nibya bakahirawa mw’omuhwa w’erisuba oku Yehova busana n’erithangirirwa ndeke. Kandi abangyi abakanzisibawa bakahirawa mw’omuhwa w’eritsuka erilendera omwa nzira y’engebe busana n’ebyo bakalhangira n’eriowa. Kwesi, ky’ekikaleka Eryibuka ikyabya kindu ky’embaghane omwa mithima yethu!

3. Eryibuka likaleka lithi olhughanda lhw’abalikyethu omwa kihugho kyosi ilhwabya bughuma? (Lebaya n’ekisasani.)

³ Thasyalengekanaya n’okwa mibere Eryibuka likaleka olhughanda lhw’abalikyethu olhw’ekihugho kyosi ilhwabya bughuma. Erithimba omwa kihugho kyosi Abema ba Yehova bakahindana haghuma eryuba likaghenda likalenga. Ithwe bosi thukahulikirira omukania ow’akahira omuwatho okwa mughaso w’endongolya. Thuk’imba esyonyimbo ibiri sy’eripipa, ithwalhabya ebiminyisyo, kandi n’omuthima wosi thukabugha thuthi “amina” okwa misabe ini eyikalhabibawa. Omwa  syosaha 24, ebithunga byosi bikabya ibyamabirikolha ikyan’ekyo. Mbwino wangana lengekania okwa tseme eyo Yehova na Yesu batholere eribya ibakabya nayo bakalhangira ithwe bosi omwa bughuma thukabaha olhukengerwa omwa nzira eyi?

4. Thukendi kania okuki omo mwatsi ono?

⁴ Omo mwatsi ono, thukendi kania okwa bibulyo bino: Thwanga thegheka thuthi emithima yethu busana n’Eryibuka? Thwanga wathikya thuthi abandi erighasirwa mulyo? Kandi thwangawathikya thuthi ababirisebebera? Eby’erisubirya okwa bibulyo ebi bikendi thuwathikya eriyitheghekera omukonga ow’abuyirire oyu.

THWANGA THEGHEKA THUTHI EMITHIMA YETHU BUSANA N’ERYIBUKA?

5. (a) Busana naki thutholere ithwalengekania okwa bughuli bw’endongolya? (Esyonyimbo 49:7, 8) (b) Wam’ighaki omwa vidiyo Busana Naki Yesu Mwaholha?

⁵ Enguma y’okwa syonzira sy’omughaso munene eyo thwanga theghekeramo emithima yethu busana n’Eryibuka ly’erilengekania okwa bughuli bw’ekihongo ky’endongolya ya Yesu Kristo. Ithwe ahabwethu, sithwanga thokire eriyilhusya omwa bukobe bw’ekibi n’olhuholho. (Soma Esyonyimbo 49:7, 8; lebaya n’evidiyo Busana Naki Yesu Mwaholha?) a Neryo Yehova na Mughalha wiwe mwanzwa mubaliha ekindu eky’obughuli bunene Yehova akahiraho emitheghekere nuku Yesu aheyo engebe yiwe busana nethu. (Abar. 6:23) Thukabya thuk’ongera erighanirya okwa ekya Yehova na Yesu bahayo busana nethu, kwa thukan’ongera thuthya erisima endongolya. Thukendi kania okwa bike by’okwa ebyo Yehova na Yesu bahayo nuku endongolya yihebaweyo. Aliwe, ni byahi ebya yithaghisibawa endongolya erihebwayo?

6. Ni byahi ebya yithaghisibawa nuku endongolya yihebaweyo?

⁶ Endongolya y’endihi eyikathuhawa erisubulya ekindu kirebe. Omundu w’erimbere, Adamu, aby’ahikene akahangikwa. Abere akahalya, mwaherya engebe eya kera na kera busana nayu iyuwene-wene na busana n’abaana biwe abosi. Erithoka erisubulya ekyo Adamu aheraya, Yesu mwahayo engebe yiwe eyihikene ng’ekihongo. Omwa ngebe yiwe yosi okwa kihugho, Yesu “mwathakolha ekibi, kutse amathebo mwathabanika omo minywe yiwe.” (1 Pet. 2:22) Yesu abere akaholha, engebe yiwe eyihikene muyabya iyamaliha engebe eyo Adamu aheraya.—1 Kor. 15:45; 1 Tim. 2:6.

7. Ni lengwako nga lyahi eryo Yesu abana okwa kihugho?

⁷ Yesu mwasighalha inianemughondera ndeke Thatha wiwe w’elhubulha nomwanabana ebitsibu bingyi okwa kihugho. Iniane mulere, Yesu mwaghondera obuthoki bw’ababuthi biwe abathahikene nomwakine indi iyo mwabuthwa iniahikene. (Lk. 2:51) Iniane mulengwa, mwabya w’er’imanira akahathikano kosi-kosi ako angabya imwabana ak’erianza abye muthowa kutse athwe obuthaleghulha bwiwe. Kandi iniamabirikulha, Yesu mwabya w’er’imanira erilengwako eryalhua oku Sitani Diabolo, imwamune n’ebithegho ebilhangirikire eby’erilenga okwa buthaleghulha bwiwe oku Nyamuhanga. (Mt. 4:1-11) Sitani abya iniabirithwamu eryingirya Yesu y’omwa kibi nuku syathoke eriliha endongolya.

8. Ni rindi lengwako nga lyahi eryo Yesu ayiyiniraya?

⁸ Omw’ithulira liwe okwa kihugho, Yesu mwaghumira ebindi bitsibu. Mw’endereribwa n’erihayirwa. (Lk. 4:28, 29; 13:31) Mwabya w’erighumira ebisobyo by’abigha biwe. (Mk. 9:33, 34) Abere akathondesibwa, mwanubibwa n’erisiningulirwa. Neryo mw’ithibwa omwa nzira eyikaletha obulhumi bunene kandi eyikahemulha. (Ebr. 12:1-3) Mwabya w’eriyiyinirya  ekitsweka ky’erighunzerera ky’erithondesibwa liwe ahabwiwe, ahathe obutheya bwa Yehova. b—Mt. 27:46.

9. Thukayowa thuthi busana n’ekihongo kya Yesu? (1 Petero 1:8)

⁹ Omo kwenene, Yesu mwaghalhwa kutsibu akaliha endongolya. Mbwino erilengekania okw’iyihayo lya Yesu busana nethu ahathe erikakwa sikirileka wukamwanza kutsibu?—Soma 1 Petero 1:8.

10. Ni yihayo lyahi eryo Yehova akolha erithoka eriliha endongolya?

¹⁰ Kandi ibbwa Yehova? Ni kyahi ekyo ahayo ahathe erikakwa nuku Yesu athoke eriliha endongolya? Yehova na Yesu bawithe obughuma obukamathire kutsibu obuli ng’obwangabya ahakathi-kathi ka thatha na mughalha. (Emi. 8:30) Neryo, thalengekania Yehova nga mwahambwako bungahi akalhangira Yesu akayiyinirya erilengwako lingyi okwa kihugho. Ahathe erithika-thika, Yehova mwabya omwa bulhumi bunene akalhangira Mughalha wiwe akakolhwa nabi, erighanwa, n’erilengwako.

11. Kolesaya eky’erileberyako erikangania Yehova ng’atholere eribya imwayowa athi Yesu ak’ithibwa.

¹¹ Omubuthi wosi-wosi oyuwabiriholerwa omwana anasi ndeke obulhumi bunene obukasa busana n’eki. Thuwithe erikirirya erighumire omw’ilhubuka, aliwe ekyo sikirighunzaho obulhumi obwa thukabana thukaholerwa. Eki kikaleka ithwayitheghererya Yehova ng’atholere eribya imwayowa athi akalhangira Mughalha wiwe mwanzwa akaghalhwa n’eriholha omwa 33 E.K. c—Mt. 3:17.

12. Ni byahi ebyo thwangakolha Eryibuka irikisiya iryahika?

¹² Eritsuka lino erihika aho Eryibuka likendi bera, busana naki iwuthayeghesya okwa ndongolya iwe ahabwawu kutse omw’Iramya ly’Eka? Kolesaya Obusondoli obw’Erisekulya Omwa Bitabu eby’Abema ba Yehova kutse ebindi by’erikolesya erigha e Biblia eriminya bingyi oko mwatsi oyo. d Kandi lhangira wuthi wukakwama-kwamanaya endegheka y’obusomi bwe Biblia obw’Eryibuka eyikabya omwa Katabu k’Omuhindano ak’Engebe Yethu n’Omubiiri Wethu. Kandi okwa kiro ky’Eryibuka isiw’ibirirawa erilebya endegheka y’embaghane y’Eriramya ly’Engyakya. Thukabya thukathegheka emithima yethu busana n’Eryibuka, thukathoka eriwathikya abandi erighasirwa mulyo.—Ezr. 7:10.

 WATHIKAYA ABANDI BAGHASIRAWE

13. Ni kiika kyahi ky’erimbere ekyo thwangathwa eriwathikya abandi erithoka erighasirwa omw’Ibuka?

¹³ Thwangawathikya thuthi abandi nuku baghasirawe omw’Ibuka? Ekiika ky’erimbere, ly’eribakokya. Eryongera okw’ikania n’abathukabana omw’ithulira lyethu lya buli kiro, thwangana kolha elisti y’abo thukendi kokya. Aba mwanganabya abahughu bethu, abo thukakolha nabo, abo thukasoma nabo, n’abandi. Nomuthwangabya ithuwithe esyokopi nyike sy’esyokada esy’erikokya esipritingire, thwangana sithumira abandi omwa mulingo w’ekielekitroniki. Nindi oyuwasi nga ni bangahi abakendi syahindana!—Omu. 11:6.

14. Iha eky’erileberyako ekikakanganaya amaaka w’erikokya.

¹⁴ Isiwaghaya amaaka agho erikokya liwithe. Kiro kighuma, mwali wethu oyuli omw’eka eyighabene omwa by’edini mwasweka mwira wiwe akamubwira inianatsemire ngoku anemuyithegheka erimuyiyungako okw’Ibuka. Ni kyahi ekyaleka iniasweka? Kundi mirundi mingyi eritsuka kera abya iniakanamuhiramo omuhwa w’erihindana, aliwe isyali athahindana. Lino ni kyahi ekyaleka inianza erihindana? Abere akasoborera ngoku omusyakulhu w’ekithunga oyo abya inianasi mwamukokya, mwabugha athi; “Naghe munahebwa ekada.” Mwira wiwe mwahindana omwaka oyo n’omwa myaka mingyi eyakwamako.

15. Ni kyahi ekya thwanzire eribya ithun’ibukire thukakokya abandu okw’Ibuka?

¹⁵ Ibya iwun’ibukire ngoku abo thukakokaya banganabya n’ebibulyo—kutsibu-tsibu bamabya isibali bathahindana okwa mihindano yethu. Thukakolha ndeke thukasangwa thwalengekania okwa bibulyo ebyo bangabulya n’erithegheka eby’erisubirya. (Kol. 4:6) Ng’eky’erileberyako abandi ibangana yibulya: ‘Ni byahi ebikendibya okwa mukonga oyu?’ ‘Akendi ghunza buthuku bungahi?’ ‘Mbwino hane emyambalire mirebe eyikayithaghisibawayo?’ ‘Mbwino hane esyosente esyo nanga thuha erihindana?’ ‘Yine erilhabya akibo?’ Thukakokya omundu okw’Ibuka, ithwangana mubulya thuthi, “Wunawithe ekibulyo kyosi-kyosi?” neryo subiraya ebibulyo eby’angabya iniawithe.  Kandi ithwangana kolesya evidiyo Ibuka Olhuholho Lhwa Yesu na Okwa Kingdom Hall Kukakolhawaki? eriwathikya omundu eriminya emihindano yethu nga yikabya yithi. N’erisomo 28 ery’ekitabu Tsemera Engebe Kera na Kera! likathuha esyonzumwa ndebe esyuwene esyo thwanga babwirako.

16. Ni bindi bibulyo byahi ebyo abakahindana okw’Ibuka bangabya nabyo?

¹⁶ Enyuma w’erihindana okw’Ibuka, abahyaka abalyanzisibawa banganabya n’ebindi bibulyo. Ibangana bulha nga ni kyahi ekiryaleka abake basa (hamabya ihane) ibabalya okwa biminyisyo. Kandi ibangana bulha nga thukakolha Eryibuka mirundi mingahi. Nibya ibangananza eriminya emihindano yosi y’Abema ba Yehova nga kwa yikanakolhawa yithya. Nomwakine indi esinene sy’okwa nzumwa esi sikakanibawako omwa mukania w’Eryibuka, abahyaka ibanganayithagha erisoborerwa buuli. Omwatsi okwa jw.org owawithe omuthwe “Busana Naki Emibere Abema ba Yehova Bakibukiramo Ekihulho ky’Omukama eky’Erigholho Yiri Mbaghane Okwa y’Awandi Madini?” angana thuwathikya erisubirya ebighuma by’okwa bibulyo byabo. Thwanzire erikolha ngoku thwanga thoka—Eryibuka lithe lyabya, likabya, kandi likahwa—eriwathikya “abayisoghawa” abo erighasirwa omwa mukonga oyu.—Emib. 13:48.

WATHIKAYA ABABIRISEBEBERA

17. Abasyakulhu bangawathikya bathi ababirisebebera? (Ezekieli 34:12, 16)

¹⁷ Omwa buthuku bw’Eryibuka, abasyakulhu bangawathikya bathi ababirisebebera? Mubahulikirire omo lhwanzo. (Soma Ezekieli 34:12, 16.) Eryibuka lithe lyabya, mulhangire muthi mukahika okwa bangyi ngoku mwangathoka. Mubakakasaye ku mubanzire kandi ku mukayisunza eribawathikya omwa nzira yosi-yosi. Mubakokaye okw’Ibuka. Bamahindana, mubathangirire omo lhwanzo. Enyuma w’Eryibuka, mubye imunemuhika okwa balikyethu banzwa aba, kandi mubahe obuwathikya bw’obunyakirimu obo bakayithagha erithoka erisuba oku Yehova.—1 Pet. 2:25.

18. Ithwe bosi thwanga wathikya thuthi ababirisebebera? (Abanya Roma 12:10)

 ¹⁸ Abosi omwa kithunga bangana wathikya ababirisebebera erihindana okw’Ibuka. Bathi? Omw’ibakangania olhwanzo, olhukeri, n’erisikya. (Soma Abanya Roma 12:10.) W’ibuke ngoku balikyethu banzwa abo banganabya ibabirisagha eryasa okwa mihindano. Obundi babya bakasagha bathi bangana ghana erithangirirwa ndeke. e Neryo yihighule okw’ibabulya ebibulyo ebikendi leka ibayibulha-bulha kutse okw’ibugha ebikendi bahuthalya. (1 Tes. 5:11) Baghalha bethu na bali bethu aba ni bikirirya balikyethu. Ka thukatsema thukathasyaramya haghuma nabo!—Esy. 119:176; Emib. 20:35.

19. Ni mighaso yahi eyiri omw’ibuka olhuholho lhwa Yesu?

¹⁹ Mbwino sikiritsemesaya eribya Yesu imwahiraho endegheka y’eryibuka olhuholho lhwiwe obuli mwaka? Thwamakolha ekyo, thukayighasira kuthya n’abandi omwa nzira nyingyi. (Isa. 48:17, 18) Olhwanzo olhwa thuwithire Yehova na Yesu lhuk’ongera. Thukakanganaya nga thukasima bungahi ekyo babirithukolera. Thukaghumaya obughuma obwa thuwithe n’abalikyethu. Kandi ithwangana wathikya abandi eriminya ngoku nabo bangana ghasirwa omwa mighisa eyikathokekana busana n’endongolya. Neryo kwesi, ithwe bosi thukole ngoku thwanga thoka eriyitheghekera Eryibuka ery’omwaka ono—ekiro ky’omughaso munene omo mwaka!