1-2. Ni bitsibu byahi ebyo abaghombe ba Yehova abathaleghulha bangabana?

 EBITSIBU byangana leka engebe yethu iyalhuaho iyahinduka. Ng’eky’erileberyako, mughalha wethu muthaleghulha ya Luis a mwapimwamo ekansa eyikalire. Dokita mwamubwira athi hamasaka mezi make buyira iniaholha. Monika na mwira wiwe babya ibane bbize omwa mibiiri y’obunyakirimu. Neryo kiro kighuma, Monika mwaminya ngoku mwira wiwe, omusyakulhu w’ekithunga, alhue iniamabirighunza myaka inianemukolha erilholho bubiso-biso. Olivia, mwali wethu omuhuru, mwabya w’erihuma kundi ekiyagha ekikalire kyabya ikikayasa. Abere akasuba eka, mweya ekiyagha ikyabiritherya enyumba yiwe. Omwa kathuku kake buyira, esyongebe sy’abandu aba musyahinduka kitsumbukirania. Wunewathabana ebitsibu ebiri ng’ebi? Wunewathabana ekitsibu ekyahindulha engebe yawu kitsumbukirania?

² Ithwe ng’abaghombe bathaleghulha ba Yehova, thukabana ebitsibu n’amalhwere ebikahika okwa bandu bosi. Kandi thwanganabya b’eriyiyinirya erihakanisibwa kutse eriendereribwa erikalhua okwa baponire abandu ba Nyamuhanga. Nomwakine indi Yehova syalibugha athi ebitsibu ng’ebyo sibyanga thuhikako, akayilhagha erithuwathikya. (Isa. 41:10) Omwa buwathikya bwiwe, thwangana sighalha ithunatsemire, ithwathwamu ndeke, n’erisighalha bathaleghulha okw’iyo nibya n’omwa mighulhu eyikalire kutsibu. Omo mwatsi ono, thukendi kania okwa syonzira ini esyo Yehova akathuwathikirayamo omughulhu thuli omwa bitsibu. Kandi thukendi lebya nga ni byahi ebya thutholere ithwakolha nuku thughasirawe omwa buwathikya obw’akaha.

 YEHOVA AKENDI KUTHEYA

3. Omughulhu thuli omwa kitsibu ekikalire, ni kyahi ekyangathukalira erikolha?

³ Ekitsibu. Thwamabana ekitsibu ekikalire, ikyangana thukalira erilengekania ndeke n’erithwamu. Busana naki? Thwanganabya omwa bulhumi bunene kutsibu. Amaghaniryo anganathubundamirya. Ithwangana yowa nga thukalhaba omwa kilhumbi kinene, ithunemubulha nga thulhole hayi. Lhangira bali bethu babiri abakanibweko okw’itsuka nga mubayowa bathi bakalhaba omwa bitsibu. Olivia akabugha athi: “Ekiyagha kyabere kyabiritherya enyumba yaghe, munayibulha-bulha n’erihwa amani.” Busana na mwira wiwe erimughoberya, Monika akabugha athi: “Munayiponera kutsibu. Munabya omwa bulhumi obwaleka ingabbunika muthima. Munabya isingakiwithe n’ekya nangayikolera. Ebyo ndabya ingalengekania indi ibyanyibyako mubyabya.” Yehova akayilhagha erithuwathikya athi omughulhu thuhwere amani?

4. Ngoku kiri omwa Abanya Filipi 4:6, 7, Yehova akathulhaghaki?

⁴ Ebya Yehova akakolha. Akayilhagha erithuha ekya Biblia yikahulhamo “obuholho bwa Nyamuhanga.” (Soma Abanya Filipi 4:6, 7.) Obuholho obu ly’erithekana omwa bulengekania n’omwa muthima ebikasa habw’eribya n’obughuma obuwene nayu. Obuholho obu “bulhabire amenge wosi”; buwene kutsibu kwilhaba ku thwanga lengekania. Wunewathayisanga iwamabirithekana enyuma w’erisaba Yehova erilhua oko muthima? Eriyowa eryo likasa busana ‘n’obuholho bwa Nyamuhanga.’

5. Obuholho bwa Nyamuhanga bukatheghaya buthi amalengekania n’omuthima wethu?

⁵ Erisako iryan’eryo likabugha lithi obuholho bwa Nyamuhanga “bwasyatheya, emithima yenyu n’amaghanirya wenyu.” Ekinywe ekyonyine-nyine ekya ‘eritheya’ kyabya kikakolesibwa omwa mahe kandi ikikakolesibawa erimanyisya abasirikali ababya bakatheya omuyi n’erilhangira bathi syali bambirawa. Ababya bakabya omwa muyi owatheghibirwe oyo ibakaghotsera buholho, ibanasi ngoku abasirikali bane okwa syongyo. Kuthya, obuholho bwa Nyamuhanga bukabya bukatheya omuthima n’obulengekania bwethu, thukathekana, ithunasi ngoku thune omwa butheya. (Esy. 4:8) Ngoku kyabya oku Hana, emibere eyathulimu nomuyangaghana erihinduka aho naho, thwanganathunga obuholho okwa lhulengo lhulebe. (1 Sam. 1:16-18) Kandi thwamabirithekana, mughulhu mungyi kikolhoba erilengekania ndeke n’erithwamu ndeke.

6. Thwanga kolhaki erithoka erighasirwa omo buholho bwa Nyamuhanga? (Lebaya n’ekisasani.)

⁶ Ebya thutholere erikolha. Omughulhu wuli  omwa bitsibu, bwira omutheya wethu. Wuthi? Saba erihika aho wukendi banira obuholho bwa Nyamuhanga. (Lk. 11:9; 1 Tes. 5:17) Luis, oyukanibweko okw’itsuka, akasoborera iyo na mukali wiwe, Ana, nga mubathoka bathi erisika bakaminya ngoku hamasaka mezi make iniaholha. Mwabugha athi: “Okwa buthuku obuli ng’obu, kikakalha kutsibu erithwamu bikahika okwa by’amaghalha n’oko yindi myatsi. Aliwe omusabe abiribya kindu kikulhu ekyabirileka ithwabana obuholho omwa buthuku obukalire obu.” Luis na mukali wiwe mubabugha bathi ibakasaba kutsibu kandi buthumbya, erisaba Yehova bathi abahe obuholho bw’omuthima, erithekana, n’amenge w’erithwamu ndeke. Kandi mubayilhangirira obuwathikya bwiwe. Wamabya iwuwithe ekitsibu, yitsingirire omw’isaba, neryo iwukendi yilhangirira obuholho bwa Yehova bukatheya omuthima n’obulengekania bwawu.—Abar. 12:12.

YEHOVA AKENDI LEKA IWASIKA

7. Thwanga yowa thuthi thwamabana ekitsibu ekikalire?

⁷ Ekitsibu. Omughulhu thuwithe ekitsibu, eriyowa lyethu, amalengekania, n’emibere thukayithwaliramo byangana ghana eribya ngoku bikabya omughulhu thune ndeke. Ithwangana yowa nga thukaghusawa eyi n’eyi. Ana, oyukanibweko okw’itsuka, mwabugha athi mwabana ebitsibu bingyi mwira wiwe Luis abiholha. Mwabugha athi: “Iningabya ingayowa mwa wabbule, neryo iningatsuka eriyikwira obulighe. Kandi iningahithana busana n’eriholha liwe.” Eryongera okw’ekyo, Ana iniakayowa iniali iyuwene kandi mwayiponera kundi mwabya w’erikolha erithwamu okwa myatsi eyo Luis aby’akakolha ndeke. Ihakanayira iniayowa ng’ali omwa kiyagha okwa ngetse. Yehova akathuwathikaya athi omughulhu eriyowa ng’eryo likatsuka erithubogherako?

8. Ngoku kiri omu Isaya 33:6, ni kyahi ekyo Yehova akathukakasaya?

⁸ Ebya Yehova akakolha. Akathukakasaya athi akendi leka ithwasika. (Soma Isaya 33:6.) Obwathu bwameya ekiyagha kinene, ibwangana tsuka eriyihungya-hungya kutsibu. Erithoka erisika, amathu mangyi akabya inianawithe ebikasikayagho ebiri omwisi wagho okwa buli mbandi. Ebikasikaya amathu ebi byangana leka iniathayihungya-hungya kutsibu, ikyaleka abakaghenda mugho ibayowa buholho. Aliwe ebingyi ebikasikaya amathu ebi bikakolha ndeke obwathu bwamabya ibunemughenda. Kuthya, Yehova akendi leka ithwasika thunemulholha embere erisighalha bathaleghulha omwa mighulhu eyikalire.

9. Eby’erisekuliryamo byethu byanga thuwathikya bithi erisighalha ithunasikire? (Lebaya n’ekisasani.)

⁹ Ebya thutholere ithwakolha. Omughulhu wuwithe eriyowa eriri ng’ekiyagha, kolha ngoku  wanga thoka eryamakirira endegheka yawu y’obunyakirimu. Ni kwenene, siwanga thoka erikolha bingyi nga kera, aliwe wibuke ngoku Yehova ni w’obuyitheghererya. (Thasyalebaya na Luka 21:1-4.) Ng’ekitsweka ky’okwa ndegheka y’obunyakirimu, hiraho endambi y’eriyeghesya n’erighanirya. Busana naki? Erilhabira omwa kithunga kiwe, Yehova abirithuha emyatsi eyuwene eyiseghemere okwa Masako eyikathuwathikaya erisighalha ithunasikire. Eribana ogho wukayithagha, iwangana kolesya eby’erisekuliryamo ebiri omwa mubughe wawu, nge JW Library^® app, Watch Tower Publications Index, n’Obusondoli bw’Erisekulya Omwa Bitabu by’Abema ba Yehova. Monika, oyukanibweko okw’itsuka, mwabugha athi iniakasondaya erihabulha omwa by’erisekuliryamo akaminya ngoku eriyowa eriri ng’ekiyagha linemwasa. Ng’eky’erileberyako mwasekulya okwa kinywe “erihithana.” Okwa bundi buthuku, iniakanasekulhaya okwa kinywe “erighoberya” kutse “obuthaleghulha.” Neryo iniakasoma erihika aho akendi yowira ndeke. Mwabugha athi: “Okw’itsuka, ikikabya nga kikalire aliwe endambi iyikahika ingayowa Yehova nga akanyiwako. Nabere nganemusoma munaminya ngoku Yehova akayitheghereraya eriyowa lyaghe eryosi, kandi kw’anemungwathikya.” Obuwathikya ng’obo obukalhua oku Yehova bwangana kuwathikya eribya iwunasikire erihika okw’ithekana.—Esy. 119:143, 144.

YEHOVA AKENDI KUWATHIKYA

10. Thwangayowa thuthi enyuma w’ekitsibu ekikalire?

¹⁰ Ekitsibu. Enyuma w’ekitsibu, ihanganabya ebiro omughulhu thukayowa ithuhwere amani kinyamubiri n’omw’iyowa. Ithwangana yowa ng’omuthibithi oyubirihuthalha oyuwabya akathibitha kutsibu aliwe lino akatsukuda. Ikyangana thukalira erikolha emibiiri eyanabya yikathwolhobera kera, kutse ithwayowa isithukiwithe omuhwa w’erisangira omwa mibiiri eyo thwanabya thukatsemera. Nga Eliya ithwangana yowa ikikathukalira erihangana. Ithwakwama kyayowa ithwanzire erighotsera. (1 Bam. 19:5-7) Yehova akayilhagha erikolhaki omughulhu thukayowa ithutsekire?

11. Ni yindi nzira yahi eyo Yehova akathuwathikirayamo? (Esyonyimbo 94:18)

¹¹ Ebya Yehova akakolha. Akayilhagha erithuwathikya. (Soma Esyonyimbo 94:18.) Ngoku omuthibithi oyuwabirihuthalha akanayithagha obuwathikya bw’erilholha embere, nethu thwangana yithagha obuwathikya nuku thulhole embere omwa mubiiri wa Yehova.  Okwa buthuku ng’obo, Yehova akathukakasaya athi: “Ingye indi Mwami Mukulhu, Nyamuhanga wenyu, oyukakuwathirira omo byalha byawu by’amali, oyukakubwira athi, siwubahe, ngendi kuwathikya.” (Isa. 41:13) Omwami Dawudi mwayilhangirira obuwathikya obu. Abere akabana ebitsibu n’esyonzighu erimubambira, mwabwira Yehova athi: “Ebyalha byawu by’amali bikanyihambirira.” (Esy. 18:35) Aliwe Yehova akathuwathikaya athi?

12. Ni bahi abo Yehova angakolesya erithuwathikya omughulhu thuhwere amani?

¹² Mughulhu mungyi Yehova akathuwathikaya omw’ihira omwa bandi mw’omuhwa w’erithuwathikya. Ng’eky’erileberyako, buthuku bughuma Dawudi iniabirihwa amani, munywani wiwe Yonatana mwamubungira amamughumya n’erimuhumulikania. (1 Sam. 23:16, 17) Kuthya, Yehova mwasombolha Elisa eriwathikya Eliya. (1 Bam. 19:16, 21; 2 Bam. 2:2) Namunabwire, Yehova anganakolesya ab’efamile yethu, abanywani, kutse abasyakulhu erithuwathikya. Nomwabine, thwamaponesibwa, ithwangananza eriyihighulha okwa bandi. Ithwangananza eribya ithwibene. Ekyo ni kindu kya buli kiro. Thwanga kolhaki eribana obuwathikya bwa Yehova?

13. Thutholere ithwakolhaki nuku thughasirawe omwa buwathikya bwa Yehova? (Lebaya n’ekisasani.)

¹³ Ebya thutholere ithwakolha. Yihighule okw’iyisolholha. Thwamayisolholha, sithuli thasyalengekanaya okwa bindi, kandi thwangana tsuka eriyilengekaniako ithwibene n’ebitsibu byethu. Amalengekania ng’aya anganahamba okw’ithwamu lyethu. (Emi. 18:1) Ni kwenene, ithwe bosi thukayithagha endambi y’eribya ithw’ibene, kutsibu-tsibu omughulhu thukabana ebitsibu ebikalire. Aliwe thwamayisolholha ahabw’omughulhu muuli, ithwangana kingira enzira eyo Yehova akakolesaya erithuwathikya. Neryo nomukyangathukalira bungahi omwa mighulhu eyikalire, ambi ithwaligha obuwathikya bwa b’efamile yethu, abanywani, n’abasyakulhu. Balhangire ng’enzira eyo Yehova akakolesaya erikuwathikya.—Emi. 17:17; Isa. 32:1, 2.

YEHOVA AKENDI KUHUMULIKANIA

14. Ni bitsibu byahi ebikubahisya ebyo thwangabana?

¹⁴ Ekitsibu. Thwanganabana ebikathubahisaya. Omwa Biblia, abaghombe bathaleghulha ba Nyamuhanga bakakanaya okwa buthuku omughulhu babya omwa bulighe n’eryubaha busana n’esyonzighu syabu kutse ebindi bitsibu.  (Esy. 18:4; 55:1, 5) Kuthya, nethu thwanganabana erihakanisibwa okwa sukuru, okwa mubiiri, erilhua okwa b’efamile, kutse okwa gavumente. Nibya thwanganabya b’eriholha busana n’obulhwere. Okwa buthuku ng’obo, thwangana yowa isithuwithe kiwathikya ng’omwana mulere. Yehova akathuwathikaya athi omwa buthuku obuli ng’obo?

15. Ni kakasya lyahi eryo thukabana omwa Esyonyimbo 94:19?

¹⁵ Ebya Yehova akakolha. Akathuhumulikanaya n’erithubuya-buya. (Soma Esyonyimbo 94:19.) Olhwimbo olhu lhwanganaleka ithwalengekania okwa kasika kalere akabiryubaha kandi akabirilemwa erighotsera busana n’omulhumo w’obuthuku. Ithwangana thera akasasani thatha wako akasa, iniakimya, n’eribya nako erihika aho kakendi ghotserera. Nomwakine indi omulhumo w’obuthuku syali aleka, kakayowa buholho thatha wako akakahumulikania. Omughulhu thukabana ebitsibu ebikubahisaya, ithwangana yithagha Thatha wethu w’elhubulha eribya ng’oyukathuhambako erihika aho thukendi thekanira. Thwanga bana thuthi erihumulikania ng’eryo erikalhua oku Yehova?

16. Thwanga kolhaki erithoka erighasirwa omw’ihumulikania lya Yehova? (Lebaya n’ekisasani.)

¹⁶ Ebya thutholere erikolha. Siba na Yehova mughulhu wosi omw’imusaba n’erisoma Ekinywe kiwe. (Esy. 77:1, 12-14) Neryo omughulhu wuli omwa bitunturo, eky’erimbere ekyo wanga lengekaniako ikyanganabya iry’erisaba Thatha wawu w’elhubulha. Bwira Yehova y’ebikakubahisaya n’ebikakulyambaya. Leka akanaye nawu n’erikuhumulikania erilhabira omwa Masako. (Esy. 119:28) Wangana minya ngoku emyatsi mirebe omwa Biblia yangana kuhumulikania omughulhu wukwire obuba. Ng’eky’erileberyako, wangana bana erihumulikana erilhabira omwa kitabu kya Yobu, Esyonyimbo, n’Emisyo kuthya n’erilhabira omwa binywe bya Yesu ebiri omu Matayo sura 6. Wukendibya wunemusaba Yehova n’erisoma Ekinywe kiwe, wukendi lhangira ngoku akakuhumulikanaya.

17. Ni yikethera lyahi eryo thwangabya nalyo?

¹⁷ Thwangana yikethera ngoku Yehova akendibya iniane haghuma nethu omwa mighulhu eyikalire. Sihali ekiro thukendi syabya ithw’ibene. (Esy. 23:4; 94:14) Yehova akayilhagha erithutheya, erileka ithwasika, erithuwathikya, n’erithuhumulikania. Akakania oku Yehova, Isaya 26:3 hakabugha hathi: “Wasyatheya omo buholho buhikene ekihanda ky’eriyisunza lisikire, kusangwa kikayiketherawe.” Neryo yikethere Yehova, kandi ghasirawa omwa nzira eyo akakolesaya erikuwathikya. Wamakolha ekyo, iwukendi thasyabana akaghalha nibya n’omwa mighulhu eyikalire.