OMWATSI W’ERIGHA 4
OLHWIMBO 30 Thatha Waghe, Nyamuhanga, Kandi Munywani
Yehova Akwanzire Kutsibu
“Thatha abanzire.”—YN. 16:27.
EKIGHENDERERWA
Ngoku olhwanzo lhwa Yehova lhukendi thuthunda hakuhi nayu n’erileka ithwayowa ithuli omwa butheya, ithunatsomenwe kandi ithunathekene.
1. Wukabya wukalengekania oku Yehova ni kyahi ekikasa omwa bulengekania bwawu?
WUNE wathalengekania Yehova ngawithe mibereki? Wukabya wukakania nayu omwa musabe, ni kyahi ekikasa omwa bulengekania bwawu? Nomwakine indi Yehova syali lhangirawa, e Biblia yikamukanayako omwa nzira muthina-muthina. Yehova akahulhawamo “lyuba kandi ngabo” kandi “muliro owakathoghothaya.” (Esy. 84:11, NWT; Ebr. 12:29) Eribyaho liwe likakanibawako ng’ekindu ekisosire eribwe lye safiro, ekyuma ekikaka, n’ekima ekikakangabasanaya. (Eze. 1:26-28) Ebighuma by’okwa bikakanibawako oku Yehova ebi byangana thuswekya kutse nibya ibyathubahisya.
2. Ni byahi ebyanga lemesya abandi eriyithunda hakuhi na Yehova?
2 Kundi sithuli lhangira Yehova, kyangana thukalira eriligha ngoku athwanzire. Abandi bakalengekanaya bathi Yehova syangabanza busana n’ebyo balhabiremo kera. Obundi sibabya bawithe thatha oyubanzire. Yehova akayitheghereraya eriyowa ng’eryo kandi nga likathuhambako lithi. Erithuwathikya, akabisulha emibere yiwe mibuyanga omwa Kinywe kiwe.
3. Busana naki thuthole ithwayithendya okwa bihambire oko lhwanzo lhwa Yehova?
3 Ekinywe kighuma ekikasoborera ndeke Yehova lhw’olhwanzo. (1 Yn. 4:8) Olhwanzo lhukamuminyikalhaya. Lhukaleka iniakolha ebyosi ebyo akakolha. Olhwanzo lhwa Nyamuhanga ni lhunene kutsibu kandi lhuwithe amaaka manene erihika okw’ibya iniakalhukanganaya n’abathamwanzire. (Mt. 5:44, 45) Omo mwatsi ono, thukendi yithendya okwa bihambire oku Yehova n’olhwanzo lhwiwe. Thukabya thukongera erigha oku Nyamuhanga, kwa thukan’ongera thuthya erimwanza.
YEHOVA ATHWANZIRE KUTSIBU
4. Ohwanzo lhwa Yehova lhukaleka iwayowa wuthi? (Lebaya n’ekisasani.)
4 “Thatha abanzire.” (Yn. 16:27) Omwa Biblia, Yehova akayilinganisaya na mama oyuwithe olhwanzo lhunene. (Isa. 66:12, 13) Thalengekania oku mama oyukatsomana omwana wiwe omo lhwanzo. Akamulembera n’erimusathisirya okwa bihinga n’erikania nayu omwa mulenge owahehere, owakahumulikanaya. Amalira kutse eribya omwa bulhumi, akalhangira athi akamuha ekyo akayithagha. Omughulhu thuli omwa bulhumi, thwangana yikethera ngoku Yehova athwanzire. Omuhandiki w’esyonyimbo mwahandika athi: “Omughulhu ngahandabuka n’erikwa engitsi, wukanyisibikaya, [erinyihumulikania] n’erinyitsemesya.”—Esy. 94:19.
“Ng’oyukalembesani- bawa na nyinya wiwe, ko nasyabalemesania nyithya” (Lebaya enungu 4)
5. Olhwanzo lhwa Yehova olhuthyusa lhukakughasira lhuthi?
5 Yehova syali leghulha. (Esy. 103:8) Syali thulhuhirirako thwamakolha ekibi. Ekihanda kye Israeli mukyaponesya Yehova ngendo nyingyi; aliwe, mwakangania abandu biwe abayisubamo abo b’olhwanzo olhuthelemawa omw’ibugha ebinywe bino: “Wuli w’obughuli bunene omo meso waghe, kusangwa wabirisikibwa, kandi nabirikwanza.” (Isa. 43:4, 5) Olhwanzo lhwa Nyamuhanga silhuli lhwathahinduka. Mughulhu wosi thutholere ithwamuyikethera. Nomuthwangabya ithwabirikolha ebisobyo ebikalire, Yehova syali thusighanaya. Thwamayisubamo n’erisuba oku Yehova, ithukendi lhangira ngoku Yehova akinathwanzire. Akayilhagha ‘erithubughira ndeke.’ (Isa. 55:7) E Biblia yikakanaya okw’ighanyira eri ng’erikathulethera “emighulhu y’eriyisyandira . . . yikalhua embere sy’Omukama.”—Emib. 3:19, 20.
6. Ebiri omu Zekaria 2:8 bikathweghesayaki oku Yehova?
6 Soma Zekaria 2:8. Kundi Yehova athwanzire, akalhangira lhuba eriyowa lyethu kandi anzire kutsibu erithutheya. Akayowa nabi thwamayowa nabi. Busana n’ekyo, thuhikire thwamasaba thuthi: ‘Wunyilembere [ng’akalhangira, NWT] k’ameso wawu.’ (Esy. 17:8) Eriso ni kitsuko ekikayithagha eritheghibwa ndeke kandi ni kitsuko ky’obughuli. Neryo Yehova akabya akathulinganisya n’akalhangira k’eriso liwe, akabya ng’oyukabugha athi, ‘Owosi-wosi oyukabakolha nabi, inywe bandu baghe, akabya iniamakolha ekindu kyaghe ky’obughuli kya nabi.’
7. Busana naki thutholere ithwaghumya eriyikethera lyethu omo lhwanzo lhwa Yehova?
7 Yehova anzire ithwaligha ngoku anzire obuli mundu ahabwiwe. Aliwe anasi ngoku busana n’ebyo thwalhabiriremo, thwangana bulha nga anathwanzire. Kutse thwanganabya lino ithunemulhaba omwa mibere eyikalenga okw’iyikethera lyethu omwa lhwanzo lhwa Yehova. Ni kyahi ekikendi ghumya eriyikethera lyethu? Ly’erigha okwa mibere Yehova akakanganirayamu Yesu, abahakabibwa, nethu ithwe bosi olhwanzo.
NGOKU YEHOVA AKAKANGANAYA OLHWANZO LHWIWE
8. Ni kyahi ekyaleka Yesu inialigha ngoku Thatha wiwe amwanzire?
8 Ahabw’emyaka mingyi, Yehova na Mughalha wiwe mwanzwa mubathungirana olhwanzo olhukamathire kandi olhughumire. Obughuma bwabu bw’obwamathaghunza mughulhu muuli omwa buhangwa bwosi. Yehova mwakangania ndeke-ndeke kw’anzire Yesu, ngoku kiri omu Matayo 17:5. Yehova anganakwamire kyabugha athi, ‘Oyu yo nabiritsemera.’ Aliwe aby’anzire ithwaminya ng’anzire Yesu ya bungahi, neryo mwamwahulhamo “Mughalha waghe, mwanze.” Yehova iniakayisyethera ekyo Yesu ali kandi n’ekyo abya iniakayakolha. (Efe. 1:7) Na Yesu nayu mwathathika-thikira eriyowa erya Thatha wiwe aby’amuwithire. Yesu mwayilhangirira ndeke-ndeke olhwanzo lhwa Yehova amuwithire erihika okw’ibya imwayowa lhwomo. Ngendo nyingyi inianasikire mwabugha athi Thatha wiwe amwanzire.—Yn. 3:35; 10:17; 17:24.
9. Ni kinywe kyahi ekikasoborera olhwanzo olho Yehova awithire abahakabibwa? Soborera. (Abanya Roma 5:5)
9 Yehova akakanganaya kw’anzire n’abahakabibwa. (Soma Abanya Roma 5:5.) Thalengekania okwa kinywe “abiryuthulira.” Ekitabu kighuma kikalhukanayako “ng’olhukathusenderako ng’olhusi.” Eki ka ni kinywe ky’amaaka ekikakanganaya olhwanzo lhunene olho Yehova awithire abahakabibwa! Abahakabibwa banasi ku ‘banzibirwe na Nyamuhanga.’ (Yuda 1) Omukwenda Yoane mwakangania eriyowa lyabu akahandika athi: “Mulhangire ngoku Thatha abirithwanza kutsibu, kusangwa thukahulhawamo baana ba Nyamuhanga.” (1 Yn. 3:1) Mbwino Yehova anzire abahakabibwa basa? Eyihi, Yehova abirikangania kw’anzire ithwe bosi.
10. Ni kindu kyahi kikulhu kutsibu ekikakanganaya olhwanzo olho Yehova akuwithire?
10 Ni kindu kyahi kikulhu kutsibu ekikakanganaya olhwanzo lhwa Yehova? Endongolya—ekindu ekilengireyo kutsibu ekikakanganaya olhwanzo omwa buhangwa bwosi! (Yn. 3:16; Abar. 5:8) Yehova mwahayo Mughalha wiwe w’obughuli, amaligha aholere abandu nuku ebibi byethu bighanyirawe kandi thwanganabya banywani Biwe. (1 Yn. 4:10) Thukabya thuk’ongera erighanirya okwa ndihi eyo Yehova na Yesu baliha, thuk’ongera eriyitheghererya nga banzire bungahi obuli mughuma w’okw’ithwe. (Gal. 2:20) Endongolya siyathuhawa erithaberererya mukoro. Ni kihembo ky’olhwanzo. Yehova abirikangania kw’athwanzire omw’ihayo ekindu ky’obughuli embere siwe—Yesu. Yehova mwalighira Mughalha wiwe eriaghalhwa n’eriholha busana nethu.
11. Ebiri omu Yeremia 31:3 bikathweghesayaki?
11 Ngoku thwamabirilhangira, Yehova syalibisirira eriyowa liwe, aliwe akathubwira ngoku athwanzire. (Soma Yeremia 31:3.) Yehova abirithuletha okw’iyo kundi athwanzire. (Thasyalebaya na Eryibuka Ebihano 7:7, 8.) Sihali ekindu kutse omundu oyuwanga thughabulha okwa lhwanzo olho. (Abar. 8:38, 39) Olhwanzo olho lhukaleka iwayowa wuthi? Soma Esyonyimbo 23, wanalhangira olhwanzo lhwa Yehova n’eritsomana liwe nga mubyahamba bithi oku Dawudi kandi nga bikahamba bithi okw’ithwe bosi.
OLHWANZO LHWA YEHOVA LHUKALEKA IWAYOWA WUTHI?
12. Omwa bikuhi, wanga soborera wuthi Esyonyimbo 23?
12 Soma Esyonyimbo 23:1-6. Esyonyimbo 23 ni lhwimbo olhukakanganaya eriyikethera omwa lhwanzo lhwa Yehova n’eritsomana liwe linene. Dawudi, omuhandiki w’olhwimbo olhu, akasoborera obughuma obughumire obwabya ahakathi-kathi kiwe n’Omulisya wiwe, Yehova. Dawudi mwayowa iniane omwa butheya habw’erilighira Yehova erimusondolha, kandi mwamuyikethera ighuma. Dawudi abya inianasi ngoku Yehova akendibya inianamwanzire omwa ngebe yiwe yosi. Ni kyahi ekyaleka iniabya n’eriyikethera eryo?
13. Ni kyahi ekyaleka Dawudi iniakakasya ngoku Yehova amutsomene?
13 ‘Sinendi syabulha kindu.’ Dawudi mwayowa inianatsomenwe ndeke kundi abya inianemubana mughulhu wosi ebyo Yehova akaha. Dawudi mwabya munywani wa Yehova kundi Yehova mwamusima. Ky’ekyaleka iniayikethera ngoku obuthuku bw’embere nomubwangabere buthi, Yehova angalholire embere erimuha ebiyithawa biwe. Eriyikethera lya Dawudi omwa lhwanzo lhunene lhwa Yehova lyabya liwithe amaaka manene kwilhaba eriyilhalikirira lyosi-lyosi kandi mulyaleka iniatsema kutsibu n’eritsemera ebyo awithe.—Esy. 16:11.
14. Yehova angathutsomana athi omo lhwanzo?
14 Yehova akathutsomana omwa lhwanzo, kutsibu-tsibu omughulhu ebindu bibi bikathuhikako. Claire, a oyuwamabirikolera okwa Beteli ahabw’emyaka eyilhabire oku 20, mwayowa isyawithe kiwathikya omughulhu eka yabu yathunga ebitsibu ebikalire ekindi omwa kindi. Thatha wiwe mwasanyarara, omughuma w’okwa bali babu amahighithwa, n’efamile yabu yamaherya akabizinesi kabu kake n’okuwabu. Yehova mwakangania athi kw’abatsomene? Claire akabugha athi: “Yehova mwalhangira athi eka yethu yikabya iyinemubana ebya yikayithagha obuli kiro. Ngendo nyingyi ebyo Yehova aby’akathuha ini binene kwilhaba ebyo nabya ingalengekania! Ngabya inganemulengekania okwa mighulhu nayilhangirira olhwanzo Yehova, kandi ngalhangira ekyo mwa ky’obughuli. Eryibuka ebyo kyabirileka ingabya inganemughenderaho omwa mughulhu w’ebitsibu.”
15. Ni kyahi ekyaleka Dawudi iniahumulikana? (Lebaya n’ekisasani.)
15 ‘Akasubaya omuthima waghe.’ Ihakanayira Dawudi iniatuntura busana n’ebitsibu ebyosi n’erilengwako eryo aby’akabana. (Esy. 18:4-6) Nomwabine, olhwanzo lhwa Yehova n’eritsomana ibikamuhumulikanaya. Yehova mwasondolha munywani wiwe oyuwabirihwa amani eriya omwa “lhulisiryo lhw’ebithi bibisi” kandi ‘olhw’amaghetse awathekire.’ Busana n’ekyo, Dawudi mwathasyathunga akaghalha n’erithoka erilholha embere.—Esy. 18:28-32.
Nibya n’omughulhu Dawudi abya omwa bulighe bunene, olhwanzo lhwa Yehova n’eritsomana liwe mubyamuhumulikania (Lebaya enungu 15)
16. Olhwanzo lhwa Yehova lhwabirikuhumulikania lhuthi?
16 Kuthya namunabwire, ‘ebibuya [olhwanzo olhuthyusa] by’Omwami Mukulhu by’ebikaleka ithuthaheribwa’ thukalengwako n’eribana ebitsibu. (Eki. 3:22; Kol. 1:11) Thulebaye eky’erileberyako kya Rachel. Mwayiponera kutsibu mwira wiwe akamusighania n’erisighania Yehova omwa buthuku bw’ekihunzo ky’ekorona (COVID-19). Yehova mwamuwathikya athi? Akabugha athi: “Yehova mwalhangira athi ngabye inganasi ku ngananzibirwe. Mwanyithimbyako abanywani ababya bakasiba naghe, ibanyirethera eky’erirya, ibanyithumira esyomeseji n’amasako aw’akahumulikanaya, ibatsanga naghe, n’eribya ibanemunyibukya ngoku Yehova anyitsomene. Ngabya inganemusima Yehova busana n’erimba erihiika linene eriwithe olhwanzo.”
17. Ni kyahi ekyaleka Dawudi iniaghana ‘eryubaha ebibi’?
17 ‘Sinendi syubaha ebibi, kusangwa wuli haghuma naghe.’ Engebe ya Dawudi iyikabya iyine omwa kabi, kandi iniawithe esyonzighu nyingyi sy’amaaka. Aliwe, olhwanzo lhwa Yehova ilhukaleka iniayowa iniane buholho kandi iniane omwa butheya. Omwa mibere yosi, Dawudi mwayowa Yehova iniane nayu, kandi eki mukyaleka iniasika. Ky’ekyaleka in’imba athi: “[Yehova] mwanyilhamya oko buba bwaghe bwosi.” (Esy. 34:4) Obuba bwa Dawudi bwabya obwonyine-nyine, aliwe olhwanzo lhwa Yehova lhwabya lhuwithe amaaka kwilhaba obuba bwiwe.
18. Eriminya ngoku Yehova akw’anzire kyanga kughumya kithi omughulhu wabiryubaha?
18 Eriminya ngoku Yehova athwanzire kikathughumaya kithi thukabya omwa mibere eyik’ubahisaya? Omutemburi ya Susi akasoberera ngoku iyo na mwira wiwe bayowa omwana wabo w’obulhume akasighania Yehova: “Ekitsibu ekikasa kitsumbukirania kik’itha obulighe n’erileka omundu iniayowa isyali omwa butheya kandi isyawithe kiwathikya. Aliwe olhwanzo lhwa Yehova lhwabirileka ithwayowa buholho kandi ithunatheghibirwe.” Rachel, oyukanibweko okw’itsuka, ak’ibuka bino: “Omw’ithumbi lighuma omughulhu omuthima waghe asimba kutsibu kandi ingabiriyibulha-bulha n’eryubaha munasaba Yehova omwa mulenge ow’akowika. Aho n’aho munayowa iniamanyibuya-buya n’erinyihumulikania ngoku mama akanakolha ekyo oku mwana wiwe, neryo munaghotsera. Sinendi sy’ibirirwa ekiro ekyo.” Omusyakulhu w’ekithunga ya Tasos mwaghunza omwa ngomo mw’emyaka ini busana n’erighana eringira omwa mahe. Mwayilhangirira athi olhwanzo n’eritsomana lya Yehova? Akabugha athi: “Yehova mwamba ebiyithawa byaghe byosi n’ebindi bingyi. Eki mukyaghumya erikakasya lyaghe ngoku nangana muyikethera ighuma. Kandi erilhabira omwa mulimu wiwe, Yehova mwanyiha etseme nomunanabya omwa mibere eyik’itha obulighe. Eki mukyanyikakasya ngoku, ngendibya nganemw’ongera erikolha haghuma nayu, kwa nganemwendyongera indya erighasirwa omwa bubuya bwiwe. Neryo munatsuka erimukolera ng’omutemburi w’omughulhu wosi ingane omwa ngomo.”
YITHUNDE HAKUHI NA NYAMUHANGA WAWU W’OLHWANZO
19. (a) Eriminya ngoku Nyamuhanga athwanzire kyanga hamba kithi okwa ebya thukahira omwa musabe? (b) Ni soborera lyahi erihambire okwa lhwanzo lhwa Yehova erikakuhambako iwe ng’iwe? (Lebaya akasanduku “ Ebinywe Ebikaleka Ithwayilhangirira Olhwanzo Lhunene Lhwa Yehova.”)
19 Ebyalholirweko ebyo thwamabirikaniako ebyosi bikakanganaya ngoku Yehova, “Nyamuhanga w’olhwanzo,” ane haghuma nethu! (2 Kor. 13:11) Athutsomene obuli mundu ahabwiwe. Thuyikethere ngoku ‘obubuya bw’olhwanzo [olhuthyusa] bwasyathuthimbako.’ (Esy. 32:10) Thukabya thuk’ongera erighanirya okwa mibere abirithukanganiryamo olhwanzo lhwiwe, kwa thukan’ongera thuthya erilhangira kw’athutsomene n’eriyowa ithuli hakuhi nayu. Thwangana muhikira omwa musabe ahathe eriyikukumirira n’erimubwira nga thukayithagha olhwanzo lhwiwe lhwa bungahi. Thwangana mubwira ebyosi ebikathulyambaya, ithunayikethere ngoku akathuyitheghereraya kandi kw’anzire kutsibu erithuwathikya.—Esy. 145:18, 19.
20. Olhwanzo lhwa Yehova lhukathuthunda lhuthi okw’iyo?
20 Ngoku thukanayithunda hakuhi n’omuliro omughulhu yiri embeho, kwa thukanayithunda thuthya oko lhwanzo lhwa Yehova. Nomwakine indi olhwanzo lhwa Yehova lhuwithe amaaka, aliwe kandi lhukathubuya-buya. Neryo omwa ngebe yawu, angirira olhwanzo lhwa Yehova olhw’eribuya-buya. Kwesi ithwe bosi ka thulighe olhwanzo lhwiwe omw’ibugha thuthi: “Nyanzire Omwami Mukulhu”!—Esy. 116:1.
WANGA SUBIRYA WUTHIKI?
-
Wanga soborera wuthi olhwanzo lhwa Yehova?
-
Busana naki iwayikethera ngoku Yehova akw’anzire kutsibu?
-
Olhwanzo lhwa Yehova lhukaleka iwayowa wuthi?
OLHWIMBO 108 Olhwanzo Lhwa Nyamuhanga Olhuthyusa
a Awandi mena abirihindulhwa.