OMWATSI W’ERIGHA 2
OLHWIMBO 132 Lino Thuli Mundu Mughuma
Abiba, Obuli Mughuma Ahe Mukali Wiwe y’Ekitsumbi
“Nenyu abiba . . . musikayebo [muhebo ekitsumbi].”—1 PET. 3:7.
EKIGHENDERERWA
Ngoku iba angaha mukali wiwe y’ekitsumbi omwa binywe n’omwa mikolere.
1. Ni nzumwa yahi nguma eyaleka Yehova iniatsukisya endegheka y’obutheke?
YEHOVA ni “Nyamuhanga oyutsemire,” kandi anzire nethu ithwatsema. (1 Tim. 1:11) Abirithuha ebihembo bingyi ebikaleka ithwatsemera engebe. (Yak. 1:17) Ekighuma ky’okwa bihembo ebyo bw’obutheke. Omughulhu omulhume n’omukali bak’ingira omwa butheke, bakayilhagha erianzana, erisikania, n’obuli mughuma erilhangira owundi mo w’omughaso. Bamalholha embere eribya n’obughuma obukamathire ikyangana balethera etseme y’okwenene.—Emi. 5:18.
2. Amatheke mangyi ali omwa mibereki munabwire?
2 Eky’obulighe, abathahenie bangyi munabwire omwa kihugho bak’ibirirawa ebya bayilhagha okwa kiro kyabu ky’obulunga. Ekyo kikaleka ibathatsema. Ekithongole kye World Health Organization kikakanganaya ngoku abiba bangyi bakakolha-kolha bakali babu ba nabi kinyamubiri, omwa binywe kutse omw’iyowa. Iba oyukakolha eki anganasikya mukali wiwe embere sy’abandu aliwe iniamunubya ibane eka. Kandi omwa matheke mangyi mukabulha etseme omughulhu omulhume akalebaya eponografe.
3. Ni bindu nga byahi ebyangaleka omulhume iniakolha-kolha mukali wiwe ya nabi?
3 Ni kyahi ekyangaleka abandi balhume ibakolha-kolha bakali babu ba nabi? Banganabya imubakulibwa n’abathatha abatsurumire, neryo ibalengekania bathi erikolha-kolha bakali babu ba nabi ni kya buli kiro. N’abandi bangana hambwako n’ekalikya ey’ewabu, eyikakulha-kulhanaya amalengekania mabi awakabugha athi “omulhume w’okwenene” atholere iniakalha oku mukali wiwe erithoka erimukangania omukulhu nga nindi. Abandi balhume mubathakangiriribwa erikakirya eriyowa lyabu, imwamune n’ekinigha. Abandi balhume babirithunga amalengekania awathatholere okwa bakali n’emyatsi y’engyingo busana n’eribya bakalebya eponografe mughulhu wosi. Eryongera okw’ekyo, abasomire bingyi bakakanganaya ngoku ekihunzo kye Korona mukyalekire ebitsibu ebi iby’ongera. Omo kwenene, okwa syonzumwa syosi esi sihali eya omulhume angayihambulyamo erikolha-kolha mukali wiwe ya nabi.
4. Ni kyahi ekyo abiba Abakristayo batholere ibayihighulhako, kandi busana naki?
4 Abiba Abakristayo batholere ibayitheya okw’asamo amalengekania awathatholere okwa bakali. a Busana naki? Enzumwa nguma yiri yithi kutsibu-tsibu eby’omundu akakolha bikatsuka omwa malengekania. Omukwenda Paulo mwakunga Abakristayo abahakabibwa abe Roma erithendi lighira “emyatsi y’ekihugho kino yikabahindulha.” (Abar. 12:1, 2, NWT) Omughulhu Paulo ahandikira abanya Roma, ekithunga kyangabya ikyabya ikyamabirighunza buthuku kyalitsukire. Aliwe, ebinywe bya Paulo bikakanganaya ngoku abandi omwa kithunga babya ibakinasondolhawa n’amalengekania n’emirwa y’ekihugho. Ky’ekyaleka iniabahabulha athi bahindule amalengekania n’emibere yabu. Erihabulha eri likahamba n’okwa biba Abakristayo aba munabwire. Eky’obulighe, abandi omw’ibo babirihambwako n’amalengekania w’ekihugho kandi nibya babirihika n’okwa kiika ky’erikolha-kolha bakali babu ba nabi. b Yehova anzire abalhume ibathwalha bakali babu bo bathi? Thukabana eky’erisubirya omwa lisako erihirikirire omwatsi ono.
5. Ngoku kiri omwa 1 Petero 3:7, omulhume atholere iniathwalha athi mukali wiwe?
5 Soma 1 Petero 3:7. Yehova akalhaghira abiba athi bahe bakali babu b’ekitsumbi. Eriha omundu y’ekitsumbi kikamanyisaya emibere thukathwaliramo omundu oyo thusikirye. Omulhume oyukaha mukali wiwe y’ekitsumbi akamuthwalha omwa mibere y’olhukeri n’ey’olhwanzo. Omo mwatsi ono, thukendi lebya ngoku omulhume angaha mukali wiwe y’ekitsumbi. Eritsuka, leka thukanaye okwa mibere eyikakanganaya ngoku omulhume syahere mukali wiwe y’ekitsumbi.
GHANA EMIBERE EYIKAGHUNZA OMU MUKALI WAWU MW’EKITSUMBI
6. Yehova akayowa athi okwa balhume abakaswiraya bakali babu? (Abanya Kolosai 3:19)
6 Erimuswirya. Yehova aponire owosi-wosi oyuwanzire amalhwa. (Esy. 11:5) Nibya akakikanganaya kwa ponire abalhume abakakolha-kolha bakali babu ba nabi. (Mal. 2:16; soma Abanya Kolosai 3:19.) Erikwamana n’erisako erihirikirire omwatsi ono, 1 Petero 3:7, omulhume amakolha-kolha mukali wiwe ya nabi, obughuma bwiwe na Nyamuhanga bukahambawako. Nibya Yehova anganaghana n’erihulikirira emisabe yiwe.
7. Ngoku kiri omwa Abanya Efeso 4:31, 32, ni mibughire yahi eyo omulhume atholere iniayihighulhako? (Lebaya na “Erisoborera Ekinywe.”)
7 Erimutsurumira. Abandi balhume bakakolha-kolha bakali babu ba nabi omw’ibakaramira n’eribabwira ebinywe ebikahithanaya. Aliwe Yehova aponire ‘erikaliha [erihithana], eryaghalirwa, olhukanda, n’ebitsumi.’ c (Soma Abanya Efeso 4:31, 32.) Akabya inianowire ebyosi. Yehova akabya inianasamalire emibere omulhume akasubirayamo mukali wiwe, nibya ibane eka ibobene. Iba oyukatsurumira mukali wiwe syali subulira okw’itsandya obutheke bwiwe aliwe kandi akatsandaya n’obunywani bwiwe na Yehova.—Yak. 1:26.
8. Yehova akalhangira athi eponografe, kandi busana naki?
8 Erilebya eponografe. Yehova akalhangira athi eponografe? Aponireyo. Neryo omulhume oyukalebaya ebisasani by’obutswatswa akatsandaya obughuma bwiwe na Yehova kandi akabya isyathaha mukali wiwe y’ekitsumbi. d Yehova anzire omulhume iniasighalha muthaleghulha oku mukali wiwe butsira omwa ebyakakolha bisa aliwe n’omwa bulengekania. Yesu mwabugha athi omulhume oyukathungerera omukali akamuyighomba akabya iniamabirisingira nayu “omwa muthima” wiwe. e—Mt. 5:28, 29.
9. Busana naki Yehova akapona omughulhu iba akakolesaya mukali wiwe eby’emyatsi y’engyingo ebya akayowa ibikamuhemulha?
9 Erikolesya mukali wawu y’eby’emyatsi y’engingo ebyo akayowa ibakamuhemulha. Abandi balhume bakakaka bakali babu eby’emyatsi y’engyingo ebikabahemulha kandi ebyangana hamba nabi okwa bunyamuthima-thima bwabu kutse ibayowa isibanzibirwe. Yehova aponire emitse mibi ng’eyo eyirimo eriyitsomana. Anzire omulhume inianza n’eritsemera mukali wiwe kuthya n’erisikya eriyowa liwe. (Efe. 5:28, 29) Kandi ibbwa kyamabya indi iba Omukristayo anemukolha ebikahemulha mukali wiwe kutse erikolha-kolha mukali wiwe ya nabi kutse erilebya eponografe? Angahindulha athi amalengekania wiwe n’eby’akakolha?
NGOKU WANGASINGURA EMITSE EYITHEHA EKITSUMBI
10. Abalhume bangaghasirwa bathi omwa ky’erileberyako kya Yesu?
10 Ni kyahi ekyanga wathikya omulhume erisingura omutse w’erikolha-kolha mukali wiwe ya nabi n’erimuhemulikania? Anganalengaho erigherererya Yesu. Nomwakine indi Yesu mwathathahya, emibere abya akathwaliramo abigha biwe ni ky’erileberyako ngoku omulhume angathwalha mukali wiwe. (Efe. 5:25) Ng’eky’erileberyako, thalebya ekyo ababi bang’ighira okwa mibere Yesu abya akathwaliramo abakwenda biwe n’okwa mibere abya akakanirania nabu.
11. Yesu iniakathwalha athi abakwenda biwe?
11 Yesu iniakathwalha abigha biwe omwa nzira y’olhukeri n’ey’ekitsumbi. Isyali batsurumira kutse eribabendekerya. Nomwakine indi abya Mukama wabu, Yesu mwathayowa iniatholere erikangania obukulhu bwiwe omw’ikolha ebikendi leka ibamusagha. Omwakanya k’ekyo, omw’iyikehya iniakabakolera. (Yn. 13:12-17) Mwabwira abigha biwe athi: “Munyighireko, kundi ngali w’omuthima mwolho n’oyuhehere, neryo mukendi syabana erilhuhuka.” (Mt. 11:28-30) Wibuke ngoku Yesu abya w’omuthima mwolho. Sikirimanyisaya indi omundu mwolho syawithe maaka. Aliwe, awithe amaaka aw’eriyikakirya. Amahithanibwa, akasighalha inianathekene kandi iniakakirya eriyowa liwe.
12. Yesu iniakakanaya athi n’abandi?
12 Erilhabira omwa binywe biwe, Yesu mwahumulikania abandi n’eribalhuhukya. Isyali tsurumira abigha biwe. (Lk. 8:47, 48) Nibya n’omughulhu abahakani babya bakamutsuma n’erianza erimukolya-kolya, “mwathatsumabo.” (1 Pet. 2:21-23) Nibya n’okwa bundi buthuku, Yesu iniakathwamu eriyihunira omwakanya k’erisubirya omw’ihithana. (Mt. 27:12-14) Ekyo ka ni ky’erileberyako ekyuwene kutsibu okwa biba Abakristayo!
13. Ngoku kiri omu Matayo 19:4-6, omulhume ‘akamathana na mukali wiwe’ athi? (Lebaya n’ekisasani.)
13 Yesu mwalhaghira abiba athi babye bathaleghulha oku bakali babu. Mwasuba omwa ebya Thatha wiwe abugha, athi omulhume atholere ‘iniamathana na mukali wiwe.’ (Soma Matayo 19:4-6.) Ekinywe ky’Ekigiriki ekyakolesibawa omwa mulhondo oyu ekya “erimathana” erikithwalha ngoku kine kikamanyisaya “erihambania omwa gamu.” Busana n’ekyo, obughuma obuli ahakathi-kathi k’omulhume na mukali wiwe butholere ibwabya ibughumire kutsibu eribya ng’abamathanibwe haghuma omwa gamu. Obughuma bwabu bwamathwika abosi ibakendi hambwako. Iba oyuwithe obughuma obuli ng’obu na mukali wiwe iniakendi ghanira ighuma obuli mulingo wosi w’eponografe. Aho naho akalhusaya “ameso okwa bithawithe mughaso.” (Esy. 119:37) Aho, akabya iniamakolha endaghane na meso wiwe ey’erithendi samalira owundi mukali oyuthe mukali wiwe omwa meso w’olhukumbu-kumbu.—Yobu 31:1.
Iba omuthaleghulha anemughana erilebya eponografe (Lebaya enungu 13) g
14. Ni biika byahi ebyo omulhume oyukakolha-kolha mukali wiwe ya nabi atholere iniathwa erisuba-subania obughuma bwiwe na Yehova na mukali wiwe?
14 Omulhume oyukaswiraya mukali wiwe kutse erimutsurumira atholere iniathwa ebiika birebe erisuba-subania obughuma bwiwe na Yehova haghuma na mukali wiwe. Ebiika ebi by’ebyahi? Eky’erimbere, akaminya kwawithe ekitsibu ekikalire. Sihali ekibisamire embere sya Yehova. (Esy. 44:21; Omu. 12:14; Ebr. 4:13) Ekyakabiri, akalekeraho erikolha-kolha mukali wiwe ya nabi n’erihindulha emibere yiwe. (Emi. 28:13) Ekyakasathu, akasaba mukali wiwe na Yehova b’ekighanyiro n’erikangania kwenene kw’anzire ibamughanyira. (Emib. 3:19) Kandi atholere iniasaba Yehova amuhe eriyisunza ly’erikolha esyombinduka n’erimuwathikya erikakirya amalengekania, emibughire, n’emikolere yiwe. (Esy. 51:10-12; 2 Kor. 10:5; Fil. 2:13) Ekyakani, akakolha erikwamana n’emisabe yiwe omw’igha eripona obuli mulingo wosi w’amalhwa n’eritsuma. (Esy. 97:10) Ekyakathano, aho n’aho akasondekanaya obuwathikya erilhua okwa balisya b’olhwanzo abali omwa kithunga. (Yak. 5:14-16) Eky’omukagha, akayihiriraho endegheka eyikendi muwathikya erithendisubira emibere ng’eyo omwa buthuku obukasa. Iba oyukalebaya eponografe atholere iniathwa ebiika ibya n’ebyo. Yehova akendi tsumulha akaghalha ako akahiraho eribindulha emibere yiwe. (Esy. 37:5) Aliwe sikirighunza omulhume oyuthahirye erithaghana buyira emitse eyithaha ekitsumbi. Kandi atholere in’igha eriha mukali wiwe y’ekitsumbi. Ekyo anga kikolha athi?
NGOKU WANGAHA MUKALI WAWU Y’EKITSUMBI
15. Omulhume angakangania athi kw’anzire mukali wiwe?
15 Mukanganaye ku wumwanzire. Abandi baghalha bethu abali omwa matheke omuli etseme bakalhangira bathi bakayira eky’erikolha obuli kiro erikangania bakali babu nga b’abanzire bungahi. (1 Yn. 3:18) Omulhume anganakangania kw’anzire mukali wiwe omw’ikolha ehindu hike-hike, ng’erimuhamba omwa byalha kutse erimuwa omwa kikuba. Anganathumira mukali wiwe akameseji okwa simu n’erimubwira athi: “Ngakukwire olhukando” kutse iniamubulya athi “Wuneyo wuthi?” Okwa bundi buthuku anganakangania kw’anzire mukali wiwe omw’imuhandikira akabaruha akalimu ebinywe ebisombwerwe ebyuwene. Omulhume oyuthahirye amakolha ebindu ebi, akabya iniamaha mukali wiwe y’ekitsumbi kandi akaghumaya obutheke bwabo.
16. Busana naki omulhume atholere iniapipa mukali wiwe?
16 Kanganaya erisima. Omulhume oyukaha mukali wiwe y’ekitsumbi ak’amuhimba n’erimuhira mw’omuhwa. Enzira nguma eyo akakoleramo ekyo ly’eryibuka erimukangania erisima omwa byosi ebyo akakolha erimusighika. (Kol. 3:15) Omulhume amapipa mukali wiwe erilhua okwa muthima, kikatsemesaya mukali wiwe. Akayowa iniali omwa butheya, inianzibirwe, kandi iniahebirwe ekitsumbi.—Emi. 31:28.
17. Omulhume atholere iniakangania athi kw’asikirye mukali wiwe?
17 Ibya w’olhukeri kandi oyukasikaya. Omulhume oyuwanzire mukali wiwe akamuyisyethera n’erimulhangira mo w’obughuli. Akamulhangira ng’ekihembo ky’obughuli bunene erilhua oku Yehova. (Emi. 18:22; 31:10) Busana n’ekyo, akakolongana nayu omwa mibere y’olhukeri n’erisikya, nibya n’omughulhu bali omwa by’olhwanzo eby’ekathi. Syalikaka mukali wiwe erisangira omwa by’emyatsi y’engyingo ebyangaleka iniayowa isyali buholho, ebikamuhemulha, kutse ebikaleka obunyamuthima-thima bwiwe ibwamulyambya. f Kuthya n’omulhume atholere iniasighalha inianawithe obunyamuthima-thima obuhenirye embere sya Yehova.—Emib. 24:16.
18. Abiba batholere ibathwamu erikolhaki? (Lebaya n’akasanduko “ Esyonzira Ini Esya Omulhume Angakanganiryamo Erisikya.”)
18 Abiba, mubye imunasi ngoku Yehova akalhangira kandi akasima akaghalha ako mukahiraho eriha bakali benyu b’ekitsumbi omwa ngebe yenyu yosi. Muthwemu eriha bakali benyu b’ekitsumbi omw’iyihighulha okwa mibere eyitheha ekitsumbi, omw’ibakangania olhukeri, erisikya, n’olhwanzo. Omw’ikolha ekyo, mukakanganaya ku mwanzire bakali benyu kandi ku mukabayisyethera. Iha mukali wawu y’ekitsumbi, neryo wukendi theya obughuma bwawu obulengireyo—obunywani bwawu na Yehova.—Esy. 25:14.
OLHWIMBO 131 ‘Abo Nyamuhanga Abirimathania Haghuma’
a Abiba bakendi ghasirwa omw’isoma omwatsi “Wukana Lhangira Abakali Ngoku Yehova Akabalhangira?” omwa Akaleberyo ak’Okwokubanza 2024.
b Ababirikolhwa nabi n’ab’omw’eka yabu bangana ghasirwa omw’isoma omwatsi “Obuwathikya Okwa Babirikolhwa Nabi n’ab’Omw’eka yabu” owali ahisi sy’emyatsi eyikasira omwa “Eyindi Myatsi” okwa jw.org na JW Library®.
c ERISOBORERA EKINYWE: “Ebitsumi” mwamune eriha owundi y’erina lya katsotsomereryo n’akakuthyo. Emibughire eyosi eyirimu eritsandya okwa wundi kw’erina, erimuhemulikania kutse erimulhumya eyosi ni bitsumi.
d Lebaya okwa jw.org n’okwa JW Library kw’omwatsi “Eponografe Yangana Tsandya Obutheke Bwawu.”
e Omukali oyuwithe omulhume oyukalebaya eponografe anganaghasirwa omw’ilebya omwatsi “Omughulhu Oyo Wuli Nayu Omwa Butheke Akalebaya Eponografe” omwa Akaleberyo ak’Okwomunani 2023.
f E Biblia siyirikanaya buuli okwa by’emyatsi y’engyingo ebitholere kutse ebithatholere ebyo omulhume n’omukali abathahenie bangakolha. Abakristayo abathahenie batholere ibakolha erithwamu erikakanganaya ku banzire eriha Yehova y’ekitsumbi, eritsemesania, n’erisighalha n’obunyamuthima-thima obuhenirye. Erithwalira haghuma, abathahenie sibatholere bakabwira abandi ebihambire okwa lhwanzo lhwabu lhw’ekathi omwa butheke bwabu.
g ERISOBORERA EKISASANI: Abakakolha na mughalha wethu abathe Bema bane mulengaho erimukangania akatabu kabu akalimo eby’eponografe.
