OMWATSI W’ERIGHA 4
OLHWIMBO 18 Erisima Embanulho
Endongolya Yikathweghesayaki?
“Olhwanzo lhwa Nyamuhanga lhwabiriminyikalha okw’ithwe omo mwatsi ono.”—1 YN. 4:9.
EKIGHENDERERWA
Ebya endongolya yikabisulha ebihambire okwa mibere mibuya ya Yehova Nyamuhanga na Yesu Kristo.
1. Thukaghasirawa thuthi thwamahindana okwa mukonga ow’obuli mwaka ow’Eryibuka olhuholho lhwa Kristo?
NI KWENENE wukaligha ngoku endongolya ni kihembo eky’obughuli bunene! (2 Kor. 9:15) Kundi Yesu mwahayo engebe yiwe, wanganabya munywani wa Yehova Nyamuhanga. Kandi wangana thunga amaha w’eribya n’engebe y’erikotha. Kwesi, ka thuli b’erisima Yehova busana n’erithuha endongolya ahabw’eribya iniathwanzire! (Abar. 5:8) Erithuwathikya erisighalha ithune bandu abakasima n’erithendi lhangira endongolya ng’ekindu ekithawithe mughaso, Yesu mwatsukisya omukonga w’obuli mwaka ow’Eryibuka olhuholho lhwiwe.—Lk. 22:19, 20.
2. Thukendi kania okuki omo mwatsi ono?
2 Omwaka ono, Eryibuka likendibya Kyamukagha Okwakani 12, 2025. Ahathe erithika-thika, ithwe bosi thune muthegheka erisyabyaho. Omwa buthuku bw’Eryibuka buno, ithukendi ghasirwa kutsibu thwamaghanirya a okwa ekya Yehova na Mughalha wiwe babirithukolera. Omo mwatsi ono, thukendi lebya ekyo endongolya yikathweghesaya oku Yehova na Mughalha wiwe. Omo mwatsi ow’akakwamako, thukendi syawathikibwa eriyitheghererya ngoku thwanga ghasirwa omwa ndongolya eyo kandi ngoku thwanga kangania ku thukasimayo.
EKYO ENDONGOLYA YIKATHWEGHESAYA OKU YEHOVA
3. Olhuholho lhw’omundu mughuma lhwanga lekire lhuthi esyomiliyoni sy’abandu ibalhamibwa? (Lebaya n’ekisasani.)
3 Endongolya yikathweghesaya okwa bulingirirania bwa Yehova. (Ebi. 32:4) Yithi? Thalengekania oku kino: Muthwasighalya ekibi erilhua oku Adamu oyuwaghana eribya mwowa, ekikalhwiririramo olhuholho. (Abar. 5:12) Erithoka erithulhamya okwa kibi n’olhuholho, Yehova mwahiraho emitheghekere eya Yesu eribya ndongolya. Aliwe ekihongo ky’omundu mughuma oyuhikene kyanga lhamirye kithi esyomiliyoni sy’abandu? Omukwenda Paulo akasoborera athi: “Kusangwa busana n’erithendiowa ly’omundu mughuma [Adamu], abandu bangyi mubayirwamo bakolha-nabi, neryo lithya busana n’eriowa ly’omundu mughuma [Yesu], abandu banene basyayirwamo bathunganene embere sya Nyamuhanga.” (Abar. 5:19; 1 Tim. 2:6) Ni bugha ambu, erithendiowa ly’omundu mughuma oyuhikene mulyaleka ithwabya bakobe b’ekibi n’olhuholho. Busana n’ekyo, mukyayithaghisya omundu mughuma oyuhikene erithuboholha.
Omundu mughuma mwaleka ithwabya bakobe b’ekibi n’olhuholho. Omwa nzira iyaneyo, omundu mughuma mwathuboholha (Lebaya enungu 3)
4. Busana naki Yehova mwathakwama kyaleka abaana ba Adamu abowa bakabyaho kera na kera?
4 Mbwino bwabya buthekwa-buthekwa indi Yesu abya atholere iniaholha erithoka erithulhamya? Mbwino Yehova syangakwamire kyaleka abaana ba Adamu abowa bakabyaho kera na kera? Okwa bandu abathahikene, ekyo kyanga lhangirikire nga ky’ekindu eky’olhukeri kandi ekitholere. Aliwe eki sikihambene n’omubere wa Yehova ow’obulingirirania. Kundi Yehova ni w’obulingirirania, syanga thwiremu erigheghena obuthowa bwa Adamu obulhangirikire.
5. Busana naki ithwakakasya ngoku Yehova akendi syalholha embere erikolha ekihikire?
5 Aliwe ibbwa, Yehova kwathahayo endongolya, neryo akahira obulingirirania bwa lhuhandi, omw’ilighira abaana ba Adamu abathahikene eribyaho kera na kera? Abandu banga lengekanirye bathi Nyamuhanga anganahira obulingirirania bwa lhuhandi n’omwa yindi myatsi. Ng’eky’erileberyako, mbwino iniangana lemwa eriberererya emighuma y’okwa emilhaghe yiwe? Sithutholere thukakwa obuba thuthi eki kyanganabya. Eribya Yehova imwakangania obulingirirania nomukyanabya isikyolho okw’iyo—erihayo Mughalha wiwe mwanzwa—kikathukakasaya ngoku akendi syalholha embere erikolha ekihikire.
6. Ni nzira yahi nguma eyo endongolya yikabisuliramo olhwanzo lhwa Yehova? (1 Yoane 4:9, 10)
6 Nomwakine indi endongolya yikathuwathikaya eriyitheghererya obulingirirania bwa Yehova, kutsibu-tsibu yikathuwathikaya eriyitheghererya olhwanzo lhwiwe nga ni lhungahi. (Yn. 3:16; soma 1 Yoane 4:9, 10.) Engangirirya y’endongolya yikathubisulira ngoku Yehova anzire ithwabyaho kera na kera kandi ithwabya b’okw’ihiika liwe. Thalengekania oku kino: Omughulhu Adamu ahalhaya, Yehova mwamuthibithako omw’ihiika ly’abaramya biwe. Ekyalhwiririramu, ithwe bosi muthwabuthwa isithuli b’omw’ihiika lya Nyamuhanga. Aliwe busana n’endongolya, Yehova akathughanyira ebibi byethu kandi erighunzerera akendi letha abandu bosi abakakanganaya er’ikirirya kandi abowa omw’ihiika liwe. Nibya namunabwire thwanganabya n’obughuma obuwene na Yehova haghuma n’abaramya balikyethu. Omo kwenene, thukaghasirawa omo lhwanzo lhwa Yehova!—Abar. 5:10, 11.
7. Eriaghalhwa lya Yesu likathuwathikaya lithi eriminya Yehova ng’athwanzire bungahi?
7 Thwangana yitheghererya ndeke olhwanzo olho Yehova athuwithire thwamalengekania nga mwalhaba omwa bulhumi bungahi akahayo endongolya. Sitani akabugha athi sihali n’omughombe wa Nyamuhanga n’omughuma oyuwanga sighalha muthaleghulha oku Nyamuhanga omughulhu kikalire erikolha ekyo. Nuku Yehova akanganaye ngoku Sitani ni mubehi, mwalighira Yesu eriaghalhwa athali aholha. (Yobu 2:1-5; 1 Pet. 2:21) Yehova inianasamalire, Yesu mwasekereribwa n’abanya madini abahakani, amaswiribwa n’abasirikali, kandi amahanikwa okwa muthi. Neryo Yehova mwasamalira Mughalha wiwe mwanzwa akaghalhwa n’eriholha olhuholho olhw’obulhumi. (Mt. 27:28-31, 39) Yehova abya inianawithe amaaka aw’erikakirya ebi eribya. Ng’eky’erileberyako, omughulhu abahakani babugha bathi: “Leka Nyamuhanga amulhamaye amabya inianamwanzire,” Yehova angakolire ikyan’ekyo. (Mt. 27:42, 43) Aliwe Nyamuhanga kwakolha ekyo, endongolya siyanga hebirweyo kandi thwanga sighere isithuwithe maha. Neryo Yehova mwalighira Mughalha wiwe erighumira eriaghalhwa erihika aho athwira omuka wiwe w’erighunzerera.
8. Mbwino Yehova mwanabya omwa bulhumi akalhangira Mughalha wiwe akaghalhwa? Soborera. (Lebaya n’ekisasani.)
8 Sithutholere thukalengekania thuthi Nyamuhanga syawithe eriyowa ahabw’eribya ini muthoki w’ebyosi! Thukolirwe omwa kisosekanio kiwe, thuhangikirwe n’amaaka w’eriyowa, eki kikamanyisaya kithi Yehova awithe eriyowa. E Biblia yikamukanayako ng’oyukanakwa “obulighe” kandi ‘oyukanahithana.’ (Esy. 78:40, 41) Thalengekania n’okwa ky’erileberyako kya Abrahamu na Isaka. W’ibuke ngoku Yehova mwabwira Abrahamu athi aheyo mughalha wiwe mughuma musa ng’ekihongo. (Enz. 22:9-12; Ebr. 11:17-19) Ithwangana lengekania okwa bulhumi obo Abrahamu abyamo akayitheghekera erikera Isaka omwa muhamba. Ka kyangabya imuk’itha Yehova y’obulighe bunene akalhangira abandu babi bakaghalya Mughalha wiwe erihika okw’iholha!—Lebaya okwa jw.org kw’evidiyo Imitate Their Faith—Abraham, Ekitsweka 2.
Yehova mwayowa nabi akalhangira Mughalha wiwe akaghalhwa (Lebaya enungu 8)
9. Abanya Roma 8:32, 38, 39 hakakuwathikaya hathi eriminya Yehova ng’akwanzire bungahi haghuma n’abaramya balikyenyu?
9 Endongolya yikathweghesaya ngoku sihali mundu oyuthwanzire kutsibu kwilhaba Yehova—nomwangabya ini muhughu oyuthwanzire kutsibu kutse omunywani w’okwa ndungu. (Soma Abanya Roma 8:32, 38,39.) Ahathe erithika-thika, Yehova athwanzire kw’ilhaba ngoku thuyanzire. Mbwino wunanzire iwabyaho kera na kera? Yehova anzire ekyo kw’ikulhaba. Mbwino wunanzire ebibi byawu ibyaghanyirwa? Yehova anzire ekyo kw’ikulhaba. Ekyo akathuyithaghako kisa ly’eriligha ekihembo kiwe ky’olhukogho omw’ikangania erikirirya n’eribya bowa. Omo kwenene, endongolya ni kindu ekikakanganaya olhwanzo lhunene lhwa Nyamuhanga. Kandi omwa kihugho kihya, thukendi sy’igha bingyi ebihambire okwa lhwanzo lhwa Yehova.—Omu. 3:11.
EKYO ENDONGOLYA YIKATHWEGHESAYA OKU YESU
10. (a) Ni kyahi ekyaleka Yesu iniabya omwa bulighe bunene ak’ithibwa? (b) Yesu mwahamya erina lya Yehova omwa nzira syahi? (Lebaya n’akasanduko “ Obuthaleghulha bwa Yesu Mubwahamya Erina lya Yehova.”)
10 Yesu atsomene kutsibu amalengekania agho abandu bawithe oku Thatha wiwe. (Yn. 14:31) Yesu mwabya omwa bulighe kundi iyo eritswerwa ng’omutsumi kandi omughobya kyanga tsandirye erina lya Thatha wiwe. Ky’ekyaleka iniasaba athi: “Thatha waghe, kyamathokekana, leka ekikopo eki kinyilhabeko.” (Mt. 26:39) Omw’isighalha muthaleghulha oku Yehova erihika okwa lhuholho, Yesu mwahamirya ighuma erina lya Thatha wiwe.
11. Yesu mwakangania athi ngoku anzire abandu ba kutsibu? (Yohana 13:1)
11 Kandi endongolya yikathweghesaya ngoku Yesu atsomene kutsibu abandu, kutsibu-tsibu abigha biwe. (Emi. 8:31; soma Yohana 13:1.) Ng’eky’erileberyako, Yesu mwaminya ngoku ebighuma by’okwa bindu ebyo angakolire omw’ithulira liwe okwa kihugho sibyangabere byolho, kutsibu-tsibu, eriholha olhuholho lhw’obulhumi. Aliwe Yesu abere anemukolha omubiiri wiwe okwa kihugho, syabya okw’iberererya mukoro. Omwakanya k’ekyo, Yesu mwahira omuthima wiwe w’okw’ithulira, erikangirirya n’eriwathikya abandi. Nibya n’ekiro aholha, Yesu mwabana endambi y’erinabya ebisando by’abakwenda biwe, amabahumulikania n’eribaha obusondoli. (Yn. 13:12-15) Neryo abere ane okwa muthi, Yesu mwabana akathuku kake k’eriha omukolha-nabi oyukayaholha y’amaha n’erihiraho emitheghekere y’eritsomana mama wiwe. (Lk. 23:42, 43; Yn. 19:26, 27) Busana n’ekyo, Yesu mwathasubulira okw’ikangania olhwanzo erilhabira omwa lhuholho lhwiwe lhusa aliwe kandi mwalhukangania omwa byosi ebyo akolha okwa kihugho.
12. Yesu anemulholha athi embere erithukolera?
12 Nomwakine indi Kristo mwaholha “ngendo nguma nyisa,” akinawithe bingyi ebyo akathukolera. (Abar. 6:10) Athi? Akinalholha embere erikolesya obuthuku n’akaghalha erilhangira athi endongolya yikathughasira. Thalengekania okwa ebyo anemukolha. Anemukolha ng’Omwami wethu, Omuhereri Mukulhu, kandi ng’omuthwe w’ekithunga. (1 Kor. 15:25; Efe. 5:23; Ebr. 2:17) Awithe olhukwamirwa olhw’erihindania abahakabibwa n’endeko nene, olhukwamirwa olhukendi syahwa obulighe bunene buthe bwahwa. b (Mt. 25:32; Mk. 13:27) Kandi akalhangira athi abaghombe biwe abathaleghulha bakalisibawa ndeke bunyakirimu omwa biro by’enyuma-nyuma bino. (Mt. 24:45) Kandi omwa buthabali bwiwe bw’Emyaka Rukumi, akendi syalholha embere erithukolera. Omo kwenene, Yehova ahayo mughalha wiwe busana nethu!
LHOLHA EMBERE ERIGHA
13. Wangana lholha wuthi embere erigha ebihambire oko lhwanzo olho Nyamuhanga na Kristo bathuwithire?
13 Wangana lholha embere erigha ebihambire okwa lhwanzo olho Yehova Nyamuhanga na Kristo Yesu bathuwithire omw’ilholha embere erilhughaniryako. Obundi omwa buthuku bw’Eryibuka ly’omwaka ono, iwangana soma ndeke ekighuma ky’okwa bitabu by’Enjiri kutse bingyi kwaho. Isiwalengaho erisoma esyosura nyingyi okwa buthuku bughumerera. Omwakanya k’ekyo, imana hake n’erisondekania esindi nzumwa esyangaleka ithwabya ithutholere erianza Yehova na Yesu. Lengaho eribwira abandi oko ebya wuk’igha.
14. Ngoku kiri omwa Esyonyimbo 119:97, erisekulya lyanga thuwathikya lithi erilholha embere erigha okwa ndongolya n’esindi ngangirirya? (Lebaya n’ekisasani.)
14 Wamabya iwamabirighunza myaka mingyi omwa kwenene, iwangana yibulya nga kikinathokekene erithasyaminya ebihyaka ebihambire oko myatsi eyinasibwe ng’obulingirirania bwa Nyamuhanga, olhwanzo lhwiwe, n’endongolya. Ekwenene yiri yithi thukendi syabya ithunemw’igha ebihyaka ebihambire okwa myatsi eyi n’eyindi. Neryo, wangakolhaki? Ghasirawa omwa myatsi mingyi eyiri omwa bitabu byethu. Wamabana omwatsi ogho wuthethayitheghererya ndeke, sekulhaya. Neryo ekiro kyosi, ghaniraya oko ebyo wam’igha kandi nga bikakweghesayaki oku Yehova, oku Mughalha wiwe, n’olhwanzo olho bakuwithire.—Soma Esyonyimbo 119:97.
Nomuthwangabya ithwamabirighunza emyaka mingyi omwa kwenene, thwangan’ongera erisima lyethu busana n’endongolya (Lebaya enungu 14)
15. Busana naki thutholere ithwalholha embere erisondekania ebihyaka omwa Biblia?
15 Obuli sekulya kutse erisoma, isiwahwa amani wamathendi bana ekindu kihyaka kutse ekikatsemesaya. Wuli ng’omundu oyukasondekanaya ehoro. Omw’ighumisirizya, abakasondekanaya ehoro bakaghunza esyosaha n’ebiro bingyi erisalha babana n’ehoro nyike. Aliwe, bakaghumisirizaya kundi obuli katotorera ak’ehoro ni k’obughuli okw’ibo. Kwesi ebihyaka ebya wuk’igha ebihambire okwa kwenene ye Biblia ka ni by’obughuli bunene! (Esy. 119:127; Emi. 8:10) Neryo ghumisirizaya kandi lholha embere n’endegheka yawu y’obusomi bwe Biblia.—Esy. 1:2.
16. Thwanga gherererya thuthi Yehova na Yesu?
16 Wunemw’igha, sondekanaya esyonzira mbyaka esyo wanga koleseryamo ebyo wune mw’igha. Ng’eky’erileberyako, gherereraya obulingirirania bwa Yehova omw’ithendisolholha abandi. Gherereraya olhwanzo olho Yesu awithire Thatha wiwe n’abandi omw’ibya iwunayitheghekire eriaghalhwa busana n’erina lya Yehova n’eriyihayo busana n’Abakristayo balikyenyu. Kandi, gherereraya Yesu omw’iha abandi b’obwema nuku n’abo babane akaghisa ak’eriligha ekihembo kya Yehova eky’obughuli.
17. Thukendi syakania okuki omo mwatsi owakakwamako?
17 Thukabya thuk’ongera eriyitheghererya ebihambire okwa ndongolya n’erisimayo, kwathukan’ongera thuthya erianza Yehova na Mughalha wiwe. Kuthya, nabu bakendyongera erithwanza. (Yn 14:21; Yak. 4:8) Neryo kwesi thukolesaye ebya Yehova abirithuha erilholha embere eriminya ebihambire okwa ndongolya. Omwatsi owakakwamako akendi syakania okwa syonzira ndebe esya thukaghasiramo omwa ndongolya kandi ngoku thwanga kangania ku thukasima olhwanzo lhwa Yehova.
OLHWIMBO 107 Nyamuhanga Ni ky’Erileberyako ky’Olhwanzo
a ERISOBORERA EKINYWE: “Erighanirya” ni hwerya amalengekania w’okwa mwatsi n’erilengekania kugho kwa buuli.
b Erihindania “ebiri omwa lhubulha” eryo Paulo akakanayako, ngoku kiri omwa Abanya Efeso 1:10, sirisosene n’erihindania “abasombolhwa” abo Yesu akakanayako, eriri omu Matayo 24:31 na Mariko 13:27. Paulo akakanaya okwa mughulhu Yehova akasombolha baghalha biwe ab’ekirimu omw’ibahakabya omwa omulimu abuyirire. Yesu akanaya okwa buthuku omughulhu emisighalira ey’abahakabibwa abakine okwa kihugho bakendi syahindanibwa elhubulha omwa buthuku bw’obulighe bunene.
