OMWATSI W’ERIGHA 3
OLHWIMBO 35 “Wuminye Ebikulhu Kutsibu”
Kolha Erithwamu Erikatsemesaya Yehova
“Ery’ubaha Omwami Mukulhu [Yehova] ni nzuko y’amenge; n’eriminya ly’Oyubuyirire ni bwowika.”—EMI. 9:10.
EKIGHENDERERWA
Ngoku wangakolesya eriminya, erikenga ndeke, n’obuyitheghererya erikolha erithwamu eryuwene.
1. Ni kindu kyahi ekikalire ekyo ithwe bosi thuli b’erikolha?
OBULI KIRO thukabya b’erikolha erithwamu. Okwa bundi buthuku, erikolha erithwamu kyangan’olhoba, ng’eky’erileberyako omughulhu wukathwamu nga wulye eky’engyakya kutse ng’awughotsere saha singahi. Kikalire kutsibu erithwamu okwa yindi myatsi. Ebya thukathwamu byangana hamba okwa maghalha wethu, etseme yethu, abanzwa bethu, kutse okw’iramya lyethu. Thwanzire ebyo thukathwamu ibyathughasira haghuma n’ab’omwa famile yethu. Ekikulhu kutsibu, thwanzire erithwamu lyethu iryatsemesya Yehova.—Abar. 12:1, 2.
2. Ni biika byahi ebikendi kuwathikya erikolha erithwamu eryuwene?
2 Iwukendi thwamu ndeke (1) wamaminya bingyi okwa mwatsi, (2) wamaminya amalengekania wa Yehova okwa mwatsi oyo, na (3) wamalengekania buuli nga wuthwemu kyahi. Omwatsi ono akendi kania okwa biika ebyo, kandi akendi thuwathikya erilhangira ngoku thwanga thendeka amaaka wethu w’obuyitheghererya.—Emi. 2:11.
MINYA BINGYI OKWA MWATSI
3. Iha eky’erileberyako ekikakanganaya ngoku wutholere iwaminya bingyi okwa mwatsi wuthe wathwamu.
3 Ekiika ky’erimbere ekyanga kuwathikya erikolha erithwamu eryuwene ly’eriminya bingyi okwa mwatsi. Busana naki eki ni kikulhu? Thalengekania okwa mulhwere oyukayabanangana na dokita ahabw’eribya inialhwere obulhwere obukalire. Mbwino omudokita anganathwamu erimuha obubalya bulebe athali amupima ndeke kutse erimubulya ebibulyo birebe? Ekyo sikyangabya. Nawu kuthya wukendi kolha erithwamu eryuwene wamatsuka eriminya bingyi ebihambire okwa mwatsi oyo. Ekyo wangakikolha wuthi?
4. Ngoku kiri omwa Emisyo 18:13, wangathoka wuthi eriminya omwatsi wa ndeke? (Lebaya n’ekisasani.)
4 Mughulhu mungyi wanganaminya bingyi okwa mwatsi omw’ibulya ebibulyo. Thuthabugha thuthi wamakokibwa okw’iyitsemesya lirebe. Mbwino wunatholere iwayayo? Wamabya isiwasi ndeke oyukatheghekanaya eriyitsemesya eryo kutse emitheghekere eyiriho, wutholere iwamubulya ebibulyo nga bino: “Eriyitsemesya eri likendibya hayi kandi mughulhu wahi? Ni bangahi abakendi byaho? Nindi oyukend’imanira eriyitsemesya eryo? Ni bahi abakendi byayo? Ni byahi ebikendi kolebwayo? Mbwino yikendibya obwabu?” Eby’erisubirya okwa bibulyo ebi bikendi kuwathikya erithwamu ndeke.—Soma Emisyo 18:13.
Minya bingyi okwa mwatsi omw’ibulya ebibulyo (Lebaya enungu 4) b
5. Wutholere iwakolhaki wabiriminya bingyi okwa mwatsi?
5 Wukendibya wabiriminya bingyi okwa mwatsi oyo, lengekanaya ndeke okwa byosi ebihambire kugho. Ng’eky’erileberyako, wamaminya ngoku abakendibyayo sibali sikaya emisingyi ye Biblia kutse wamaminya ngoku obwabu bukendi kwamakyaghabwa ahathe erikakiribwa? Mbwino wukalhangira ikyolhobire eriyitsemesya eri eribyamo ethamiro n’ebyuwungu? (1 Pet. 4:3) Kandi ibbwa kyamabya indi eriyitsemesya eri likendibya okwa buthuku bughumerere n’obw’emihindano kutse obw’erithulira? Wamaminya ndeke omwatsi owosi, ikikendi kw’olhobera erikolha erithwamu eryuwene. Aliwe hane ekindi kiika ekya wutholere iwathwa. Wamabiriminya bingyi ebihambire okwa omwatsi; aliwe Yehova awithe kugho kw’amalengekaniaki?—Emi. 2:6.
MINYA AMALENGEKANIA WA YEHOVA
6. Ngoku kiri omu Yakobo 1:5, busana naki thutholere ithwasaba Yehova y’obuwathikya?
6 Saba Yehova akuwathikaye erikenga amalengekania wiwe. Yehova akalhaghanisaya erithuha amenge aw’eriminya ebya thukayathwamu nga binemwendi mutsemesya. Akaha ndeke amenge awalingayo “okw’abandu bosi butsira buhemu.”—Soma Yakobo 1:5.
7. Wanga minya wuthi amalengekania wa Yehova? Iha eky’erileberyako.
7 Wukendibya wabirisaba Yehova y’obusondoli, lebaya ndeke emibere eyo akendi kusubiryamo. Ng’eky’erileberyako: Thuthabugha thuthi wunawithe eyo wukaghenda neryo iwathalha, iwangana saba obuwathikya bw’omundu oyuwikere omwa bulhambu obo. Mbwino wangana kwama kyaghenda omundu oyo athali akusubirya? Isiwangakolha ekyo. Iwukendi hulikirira ndeke akakukangirira. Kuthya, wabirisaba Yehova y’amenge, lengaho eriyitheghererya eky’erisubirya kiwe omw’isondekania ebihano bye Biblia n’emisingyi eyihambire okwa mibere eya wulimo. Ng’eky’erileberyako, wukathwamu nga wughende okw’iyitsemesya eriryakanibawako ahanyuma, wangana lengekania okwa ekyo Biblia yikabugha okwa magheni awali mw’ethamiro n’ebyuwungu, amanywani mabi, n’ekiyithawa eky’erihira emyatsi y’Obwami y’embere okwa ebya wanzire.—Mt. 6:33; Abar. 13:13; 1 Kor. 15:33.
8. Wangakolhaki wamayithagha obuwathikya obw’eribana omwatsi ogho wukasondaya? (Lebaya n’ekisasani.)
8 Nomwabine, okwa bundi buthuku, wangana yithagha obuwathikya obw’eribana omwatsi ogho wukasondaya. Mughalha wethu kutse mwali wethu oyuwasi bingyi angana kuha amenge. Aliwe, nawu iwangana ghasirwa wamayikolera erisekulya. Omwa bitabu ebyo thukakolesaya thukasekulya, nga Obusondoli obw’Erisekulya Omwa Bitabu eby’Abema ba Yehova na Scriptures for Christian Living mune emyatsi mingyi. Wibuka ekilhubirirwa kyawu: erikolha erithwamu erikatsemesaya Yehova.
Minya amalengekania wa Yehova (Lebaya enungu 8) c
9. Thwanga kakasya thuthi ngoku erithwamu lyethu likendi tsemesya Yehova? (Abanya Efeso 5:17)
9 Thwanga kakasya thuthi ngoku erithwamu lyethu likendi tsemesya Yehova? Eky’erimbere, thutholere ithwatsuka erimuminya ndeke. E Biblia yikabugha yithi: “Eriminya ly’Oyubuyirire ni bwowika.” (Emi. 9:10) Omo kwenene, erikenga ery’okwenene likasa busana n’eriminya emibere ya Yehova, ekighendererwa kiwe, n’eby’anzire kutse ebyo aponire. Yibulhaye, ‘Erikwamana n’ebyo ngasi oku Yehova, ni thwamu lyahi eryo nangakolha eryanga mutsemesya?’—Soma Abanya Efeso 5:17.
10. Busana naki emisingyi ye Biblia yilengire kutsibu emirwa y’omwa famile kutse eby’ekalikya eby’ewethu?
10 Erithoka eritsemesya Yehova, ikyangana thuyithaghisya okwa bundi buthuku eriponesya ab’okw’ithwe. Ng’eky’erileberyako, abandi babuthi abathe n’ekighendererwa kibi ibangana hathikana omwana wabu w’obukali oyukulire bathi atholere iniathahibwa n’omulhume omugaga—kutse oyukendi baha omuthahyo munene—nomwakine indi syali ndeke bunyakirimu. Omo kwenene, banzire mwali wabu iniatsomanwa kinyamubiri, aliwe nindi oyukendi muwathikya erikulha-kulhana erihika okw’ibya mundu w’obunyakirimu? Yehova akalhangira athi omwatsi oyu? Thukabana eky’erisubirya omu Matayo 6:33. Aho, Abakristayo bakahiribawamo omuhwa ‘ow’eritsuka erisondekania Obwami.’ Nomwakine indi thukaha ababuthi bethu b’ekitsumbi n’erisikya abandu b’omwa bulhambu bwethu, ekikulhu kutsibu okw’ithwe ly’eritsemesya Yehova.
LENGEKANAYA BUULI NGA WUTHWEMU KYAHI
11. Ni mubere wahi owakanibweko omwa Abanya Filipi 1:9, 10 owakendi kuwathikya erilebya nga wuthwemu kyahi?
11 Wukendibya wabirilengekania okwa misingyi ye Biblia eyo wukendi kolesya omw’ithwamu lyawu, wutholere iwalengekania nga wukendi thwamu kyahi. (Soma Abanya Filipi 1:9, 10 a) Omubere w’obuyitheghererya akendi kuwathikya eriminya ebyanga lhwiririra omwa bul’ithwamu. Okwa bundi buthuku kyangan’olhoba erithwamu. Aliwe sibul’ithwamu indi likabya iryolhobire. Obuyitheghererya bukendi kuwathikya erikolha erithwamu nibya n’omwa mighulhu eyikalire.
12-13. Obuyitheghererya bukendi kuwathikya buthi erikolha erithwamu eryuwene erihambire okwa mibiiri ya buli kiro?
12 Thalengekania iwune omwa mibere eno. Wune murondya omubiiri erithoka erisighika eka yawu. Hali emibiiri ibiri. Iwalengekania ndeke okwa bihambire okwa mwatsi oyo, ng’eriminya nga ni mubiiriki, endegheka y’okwa mubiiri, obuthuku obwa wanga ghunza omwa nzira wukayayo, n’ebindi-n’ebindi. Emibiiri yosi ibiri eyi, yikalighirawa omwa Masako. Obundi wanzire omughuma w’okwa mibiiri eyo kundi wukatsemera ebyo wukendi kolhayo kutse kundi omusara ni munene okwa w’owundi mubiiri. Nomwabine, hane ebindi eby’erilengekaniako wuthe wathwamu.
13 Ng’eky’erileberyako, mbwino okwa mibiiri eyi kune owang’ingirira obuthuku bwawu bw’emihindano? Mbwino okwa mibiiri eyi sikuli owangakehya obuthuku obwa wukayithagha eritsomana eriyowa ly’ab’efamile yawu n’obunyakirimu bwabu? Eriyibulya ebibulyo ng’ebi kikendi kuwathikya erihira “ebikulhu kutsibu”—eriramya lyawu n’ebiyithawa ebya b’omwa famile yawu—embere sy’ebindu by’ekinyamubiri. Neryo iwukendihika okw’ithwamu eryo Yehova akendi tsumulha.
14. Erikolesya obuyitheghererya n’erikangania olhwanzo byanga thuwathikya bithi eriyihighulha okw’ithwikalya abandi?
14 Kandi obuyitheghererya bukaleka ithwalengekania erithwamu lyethu nga lyanga hamba lithi okwa bandi, nuku thuyihighule ‘okw’ithwikalya abandi.’ (Fil. 1:10) Eki ni kikulhu thukayithwiramu bikahika okwa myambalire n’emiyipambire. Ng’eky’erileberyako, thwanganabya ithwanzire omulembe mulebe ow’esyongyimba kutse emiyipambire. Aliwe ibbwa kyamabya indi hane abandi omwa kithunga kutse eyihya wakyo abaponire omulembe oyo? Obuyitheghererya bukendi thuwathikya erisikya eriyowa lyabu. Olhwanzo lhukendi thuhira mw’omuhwa ow’erisondekania ebyo balikyethu banzire n’eribya ithunayikehirye. (1 Kor. 10:23, 24, 32; 1 Tim. 2:9, 10) Neryo ithukendi kolha erithwamu erikakanganaya olhwanzo n’erisikya ebya thuwithire abandi.
15. Ni theghekania lyahi erikayithaghisibawa wuthe wahira erithwamu likulhu kutsibu ly’omwa mikolere?
15 Wamabya iwunawithe erithwamu likulhu kutsibu ery’erikolha, lengekanaya nga ni byahi ebikayithaghisibawa erithoka eririhira omwa mikolere. Yesu mwabugha athi ithwatsuka ‘eribaririra.’ (Lk. 14:28) Neryo lengekanaya okwa buthuku obwa wukayithagha, eby’erikolesya, n’akaghalha ako wukayithagha erithoka erihira erithwamu eryo ly’omwa mikolere. Ihanganayira ikyakuyithaghisya erikania n’ab’omwa famile yawu eriminya ekyo obuli mughuma atholere iniakolha erisighika erithwamu eryo. Busana naki eritheghekania ng’eri ni ly’omughaso? Ikyangana kangania ngoku erithwamu lyawu likayithagha erikolhwako esyombinduka ndebe kutse ikyakangania ngoku wutholere iwakolha erind’ithwamu eryuwene. Kandi omughulhu wukalighira ab’efamile yawu erisangira omw’ithwamu n’erihulikirira amalengekania wabu, ibakendianza erikolha haghuma nawu erihira erithwamu eryo ly’omwa mikolere.—Emi. 15:22.
KOLHA ERITHWAMU ERIKENDI LHWIRIRIRAMO EBIBUYA
16. Ni biika byahi ebyanga kuwathikya erikolha erithwamu erikendi lhwiririramo ebibuya? (Lebaya n’akasanduko “ Ngoku Thwangakolha Erithwamu Eryuwene.”)
16 Wamabya iwabirikwama-kwamania ebiika ebikanibweko ahighulhu, iwukendibya iwamabiriyithegheka erikolha erithwamu eryuwene. Wabiriminya bingyi okwa mwatsi kandi wabirilebya emisingyi eyikendi kuwathikya erikolha erithwamu erikatsemesaya Yehova. Neryo iwangana saba Yehova akuwathikaye eriberererya erithwamu lyawu.
17. Ni kindu kikulhu kyahi ekyanga kuwathikya erithwamu ndeke?
17 Nomwakine indi wabiribya iwune mukolha erithwamu erikalhwiririramo ebibuya, wibuke ngoku ekindu kikulhu ekyanga kuwathikya erithwamu ndeke ly’eriyikethera amenge wa Yehova, butsira amenge wethu kutse ebyo thwasi. Iyo musa yuwanga kuha eriminya, erikenga, n’obuyitheghererya obw’okwenene—ebindu bikulhu ebyangaleka iwabya n’amenge. (Emi. 2:1-5) Yehova angana kuwathikya erikolha erithwamu erikamutsemesaya.—Esy. 23:2, 3.
OLHWIMBO 28 Eribya Munywani wa Yehova
a Omwa E Biblia ey’Embindulha y’Ekihugho Kihya-kihya Abanya Filipi 1:10 hakabugha hathi: “Nuku mwanga minya ndeke ebikulhu kutsibu, nuku simubyeko kahinira n’erithendibya mukathwikalya abandi erihika okwa kiro kya Kristo.”
