1. Ni kyahi ekyo abangyi munabwire bakahweraya kw’amalengekania?

 WUNE walhangira ngoku abandu bangyi munabwire bayitsomene? Ng’eky’erileberyako, abandi bakalhabiriranaya omw’iyikangania n’erikangania ebya banemukolha okwa mithahulha y’enganirania. Nomwabine, munabwire ni bake abakaha Yehova Nyamuhanga y’olhukengerwa. Omo mwatsi ono, thukendi lebya nga kikamanyisayaki eriha Yehova y’olhukengerwa kandi nga ni kyahi ekitholere ikyathuhira mw’omuhwa w’erikolha ekyo. Kandi thukend’igha ngoku thwangaha Nyamuhanga y’olhukengerwa olhumutholere kandi ngoku iyuwene-wene akendi syaha erina liwe ly’olhukengerwa omwa buthuku obukasa.

KIKAMANYISAYAKI ERIHA YEHOVA Y’OLHUKENGERWA?

 2. Yehova mwakangania athi olhukengerwa lhwiwe okwa Kithwe Sinai? (Lebaya ekisasani ky’okwa .)

² Olhukengerwa niki? Omwa Biblia ekinywa “olhukengerwa” kyangana manyisya ekindu kyosi-kyosi ekyangana leka omundu iniahebwa ekitsumbi. Yehova abere anabirilhamya ekihanda kye Israeli erilhua omwa bukobe mw’Emisiri, mwabakangania ngoku ni w’olhukengerwa lhunene. Thathera akasasani: Esyomiliyoni sy’Abaisraeli ibanahindene haghuma omwa ndina sy’Ekithwe kye Sinai erisyahulikirira Nyamuhanga wabu. Ekithu ekikinirene ikyaswika ekithwe. Kitsumbukirania, ihalhaba omusiki munene—owakasuka-sukanaya ekithaka aho b’imene—ekithwe ikyahuta mw’omuliro, ihalhaba ehirabyo, emilhumo, n’omulenge munene kutsibu w’engubi iniane mwowika. (Eri. 19:16-18; 24:17; Esy. 68:8) Thalengekania Abaisraeli nga mubasweka bungahi Yehova akakangania olhukengerwa lhwiwe omwa nzira y’amaaka eyi.

 3. Kikamanyisayaki eriha Yehova y’olhukengerwa?

³ Kandi ibbwa abandu? Mbwino thwanganaleka Yehova iniahebwa  olhukengerwa? Ee, thwangana kikolha. Enzira nguma eyo thukaheramu Yehova y’olhukengerwa ly’eribwira abandi okwa maaka wiwe aw’akaswekaya n’emibere yiwe mibuyanga. Kandi thukaha Nyamuhanga y’olhukengerwa omw’ikangania ngoku yulyathuthokesaya ebyo thulyathoka erikolha. (Isa. 26:12) Omwami Dawudi ni ky’erileberyako ekyuwene eky’oyuwaha Yehova y’olhukengerwa. Omwa musabe wiwe iniane embere sy’Abaisraeli abahindene haghuma, Dawudi mwabwira Nyamuhanga athi: “Obukulhu, n’obuthoki, n’olhukengerwa, n’erikinda, n’erikengwa, ni byawu, iwe Mwami Mukulhu [Yehova]; kusangwa ebyosi ebiri omwa lhubulha, n’ebiri omwa kihugho ni byawu.” Dawudi abere aghunza erisaba, “Endeko yosi muyapipa Omwami Mukulhu [Yehova].”—1 Emy. 29:11, 20.

 4. Yesu mwaha athi Yehova y’olhukengerwa?

⁴ Omughulhu Yesu abya okwa kihugho, mwaha Thatha wiwe y’olhukengerwa, omw’ikangania ngoku yukamuha obuthoki obw’erikolha ebithiko-thiko. (Mk. 5:18-20) Kandi Yesu mwaleka Yehova iniahebwa olhukengerwa omwa mibere amukanayako n’omwa mibere athwaliramo abandi. Buthuku bughuma, Yesu abya iniane mukangirirya omwa sinagogi. Omwa bahulikiriri mwabya imune omukali oyuwabya iniabiribya kw’embinga habw’emyaka 18. Embinga yabya iyabirimukondomya kutsibu isyangathoka eriyisingika nahake. Ekyo ka kyabya kik’itha obulighe! Busana n’olhukeri, Yesu mwahika okwa mukali oyo n’erimubwira omwa bwolho-bwolho athi: “Mukali, wamalhamibwa kw’obutseke bwawu.” Neryo mwamuhira kw’ebyalha, aho n’aho amayisingika “n’eritsuka eriha Nyamuhanga y’olhukengerwa,” amathasyabya na maghalha awuwene n’ekitsumbi! (Lk. 13:10-13) Omukali oyo aby’awithe enzumwa mbuya eyangaleka iniaha Yehova y’olhukengerwa, nethu thutholere ithwakolha ekyo.

NI KYAHI EKIKATHUHIRA MW’OMUHWA OW’ERIHA YEHOVA Y’OLHUKENGERWA?

 5. Ni nzumwa syahi esyangaleka ithwasikya Yehova?

⁵ Thukaha Yehova y’olhukengerwa kundi thumusikirye kutsibu. Thuwithe esyonzumwa nyingyi esyangaleka ithwamusikya. Yehova ni muthoki w’ebyosi; amaaka wiwe syawithe busubuliro. (Esy. 96:4-7) Amenge wiwe mangyi akalhangirika ndeke-ndeke omwa ebyo abirihangika. N’iyo Nzuko y’engebe yethu kandi Yukatheghayayo. (Erib. 4:11) Ni muthaleghulha. (Erib. 15:4) Ebyosi eby’akakolha bikathokekana, kandi akaberereraya emilhaghe yiwe. (Yos. 23:14) Ky’ekyaleka n’omuminyereri Yeremia iniabugha oku Yehova athi: “Omo kathi-kathi k’abandu b’amenge bosi b’ebihanda, kandi omwa mami wosi wabu sihali oyuli ng’iwe”! (Yer. 10:6, 7) Ahathe erithika-thika, thuwithe esyonzumwa mbuya esyangaleka ithwasikya Thatha wethu w’elhubulha. Sithuli subulira okw’isikya Yehova lisa—aliwe kandi thumwanzire.

 6. Busana naki thwanzire Yehova?

⁶ Thukaha Yehova y’olhukengerwa kundi thumwanzire kutsibu. Thalengekania okwa mibere ya Yehova mingyi eyikaleka ithwamwanza. Ni w’obughanyiri kandi akakwira abandi b’obulighe. (Esy. 103:13; Isa. 49:15) Akathulhumirirawa; thwamayowa nabi, nayu akayowa nabi. (Zek. 2:8) Akaleka ikyathwolhobera eriyithunda okw’iyo ng’omunywani. (Esy. 25:14; Emib. 17:27) Kandi ayikehirye; “akunama, erilhangira olhubulha n’ekihugho. Akasumba abera okwa lhuthuthu.” (Esy. 113:6, 7) Obo kwenene, owosi-wosi inianaghana eriha Nyamuhanga wethu w’amaaka y’olhukengerwa?—Esy. 86:12.

 7. Ni kaghisa kahi k’embaghane ako thuwithe?

⁷ Thukaha Yehova y’olhukengerwa kundi thwanzire abandi ibamuminya. Abangyi sibasi ekwenene eyihambire oku Yehova. Busana naki? Kundi Sitani abirilibania amalengekania  wabu omw’ilhalhania amabehi awakalire oku Yehova. (2 Kor. 4:4) Sitani abirileka abandu ibaligha bathi Yehova akathuhulhaya, syalitsomana, kandi akaleka ihabya eriaghalhwa lingyi omwa kihugho. Aliwe thunasi ekwenene eyihambire oku Nyamuhanga wethu. Thuwithe akaghisa ak’eryerya erina liwe n’erileka abandi ibamuha olhukengerwa. (Isa. 43:10) Esyonyimbo 96 hakahira omuwathu okw’iha Yehova y’olhukengerwa. Thukakania okwa bighuma by’okwa binywe ebyasondolibawa n’omulimu ebiri omwa lhwimbo olhu, lengekanaya okwa syonzira esyo wangaheramu Yehova olhukengerwa olhumutholere.

THWANGAHA THUTHI YEHOVA Y’OLHUKENGERWA OLHUMUTHOLERE?

 8. Ni nzira yahi nguma eyo thwangaheramo Yehova y’olhukengerwa? (Esyonyimbo 96:1-3)

⁸ Soma Esyonyimbo 96:1-3. Thukaha Yehova y’olhukengerwa omwa ebyo thukamubughako. Omwa milhondo eyi, abandu ba Yehova bakakokibawa ‘eryimbira Omwami Mukulhu [Yehova],’ ‘eripipa erina liwe,’ ‘erithulha engulhu yuwene ngoku abirithulhamya,’ ‘n’erithulha omwatsi w’olhukengerwa lhwiwe okwa bihanda.’ Esyosi esi ni nzira esyo thwangaheramu Thatha wethu w’elhubulha y’olhukengerwa. Abayuda abathaleghulha n’Abakristayo ab’omwa kighana ky’erimbere mubathasaghirira eribwira abandi okwa bibuya ebyosi ebyo Yehova abya iniabiri bakolera n’eryuwania erina liwe. (Dan. 3:16-18; Emib. 4:29) Thwanga kolha ekiri ng’ekyo kya thuthi?

9-10. Ekyalholirweko kya Angelena kikakweghesayaki? (Lebaya n’ekisasani.)

⁹ Thalengekania okwa kyalholirweko kya mwali wethu Angelena, a oyuw’ikere omwa United States. Omwa buthubaha mwakania oku Yehova eyo akakolera. Ng’omukoli muhyaka, Angelena mwakokibwa omwa ndeko omo obuli mukoli muhyaka ahebawa akaghisa k’eribwira abakoli balikyabo ebimuhambireko. Angelena mwasombolha ebisasani birebe ebyakanganaya etseme eyawithe ng’omughuma w’okw’Abema ba Yehova. Aliwe endambi yiwe y’erikania yithe yahika, omughuma w’okw’ababya akakolha nabo mwayikaniako ng’oyukulibirwe n’ababuthi abali Bema ba Yehova. Mwatsuka erikania nabi okwa ebyo thw’ikirirye. Angelena akabugha athi: “Omuthima waghe mwatsuka eripuka-puka. Neryo munayibulya indi: ‘Mbwino ngendi lighira omundu eribugha amabehi oku Yehova? Kutse ngendilhwira oku Yehova?’”

¹⁰ Oyo bakakolha nayu abere abirighunza erikania, Angelena mwasaba omusabe mukuhi kikuthu-kuthu. Mwakania n’oyo bakakolha  nayu inianamusikirye, omw’ibugha athi: “Naghe ngakulibirwe ng’iwe. Naghe ngakulibirwe n’ababuthi abali Bema ba Yehova kandi erihika na lino ngakine mughuma w’okw’ibo.” Nomwakine indi emibere eyabyaho yabya yik’itha obuba, Angelena mwasighalha inianathekene akakangania abo akakolha nabo ebisasani ebyuwene inianemukolera Yehova kandi akalhwira okwa by’ikirirye omwa menge. (1 Pet. 3:15) Ni byahi ebya lhwiririramu? Aho Angelena aghunzira eriyikaniako, amalengekania w’omulhume oyo abya iniamabirihinduka. Nibya omulhume oyo mwakania okwa bibuya ebyabya omughulhu akulibawa n’ababuthi abali Bema ba Yehova. Angelena akabugha athi: “Thutholere ithwalhwira oku Yehova. Ni kitsumbi erilhwira okwa rina liwe.” Nethu kuthya thuwithe ekitsumbi eky’eripipa Yehova n’erimuha olhukengerwa abandi nomubangabya isibathakolha ekyo.

11. Erilhua kera, abaramya b’okwenene babiribya ibane mughendera bathi okwa musingyi owali omwa Esyonyimbo 96:8?

¹¹ Soma Esyonyimbo 96:8. Thukaha Yehova y’olhukengerwa omwa bindu byethu by’obughuli. Abaramya b’okwenene babiribya ibanemuha Yehova y’ekitsumbi omwa nzira eyo. (Emi. 3:9) Ng’eky’erileberyako, Abaisraeli mubahayo ebindu byabu by’obughuli okw’ihimba n’erisugha ehekalu. (2 Bam. 12:4, 5; 1 Emy. 29:3-9) Abigha ba Kristo abatsomene mubamuwathikya haghuma n’abakwenda biwe “omwa bindu byabu.” (Lk. 8:1-3) Kuthya n’Abakristayo b’omwa kighana ky’erimbere mubaha balikyabo ab’obunyakirimu b’obuwathikya. (Emib. 11:27-29) Nethu munabwire thwanganaha Yehova y’olhukengerwa omwa ebyo thukahayo ahathe erikakwa.

12. Ebyo thukahayo byanga leka bithi Yehova iniahebwa olhukengerwa? (Lebaya n’ekisasani.)

¹² Thalengekania okwa kyalholirweko kighuma ekikakanganaya ngoku ebyo thukahayo bikaha Yehova y’olhukengerwa. Eripoti eya 2020 muyakania okwa ebyalhwiririra omwa kyanda ekyaghunza buthuku buuli e Zimbabwe. Esyomiliyoni sy’abandu babya ibakisiya ibaholha busana n’enzalha nene, imwamune na mwali wethu oyukahulhawa mwa Prisca. Nomuhanabya ekyanda, Prisca mwalholha embere n’endegheka yiwe ey’erithulira obuli Kyakasathu na Kyakathano, nibya n’omwa buthuku bw’ekirimo. Abataka biwe ibakamusinungulira busana n’erighenda omw’ithulira omwakanya k’erighenda omwirima, omw’ibugha bathi, “Enzalha yikendi kw’itha.” Prisca iniakasubiraya inianasikire omw’ibugha athi, “Yehova syali athasighania abaghombe biwe.” Habere hathe halhaba buthuku buuli, mwaghasirwa  omwa buwathikya obwa ekithunga kyethu kyahayo. Obuwathikya obo mubwabanika busana n’ebyo thukahayo. Ekyo mukyatsemesya abataka ba Prisca, kandi mubamubwira bathi, “Nyamuhanga syali athakusighania, thukanza eriminya bingyi ebimuhambireko.” Omusanju w’okwa bataka biwe mubatsuka erihindana okwa mihindano y’ekithunga.

13. Emibere yethu yanga leka yithi Yehova iniahebwa olhukengerwa? (Esyonyimbo 96:9)

¹³ Soma Esyonyimbo 96:9. Emibere yethu yangana leka Yehova iniahebwa olhukengerwa. Abahereri ababya bakakolera okwa hekalu ya Yehova babya batholere eribya ibanahenirye kinyamubiri. (Eri. 40:30-32) Aliwe, ekilengire erihenia kinyamubiri ly’erihenia omwa mibere yethu. (Esy. 24:3, 4; 1 Pet. 1:15, 16) Thutholere ithwakolha kutsibu erilhusya “omundu wakera”—amalengekania mabi n’emitse mibi—n’eriambalha “omundu muhya-muhya”—emikolere n’amalengekania ebikakanganaya emibere ya Yehova ey’olhukengerwa. (Kol. 3:9, 10) Omwa buwathikya bwa Yehova, nibya n’abandu abali omwa ngebe y’obutswatswa, kandi abatsurumire kutsibu bangana hinduka n’eriambalha omundu muhya-muhya.

14. Ni kyahi ekyo wuk’ighira okwa kyalholirweko kya Jack? (Lebaya n’ekisasani.)

¹⁴ Thalengekania okwa kyalholirweko kya Jack, oyuwabya mutsurumi kandi oyuwahebawa erina ly’akatsotsomereryo erya Embinga. Busana n’ebindu bibi ebyo akolha, Jack mwatswera olhw’erikwa. Aliwe, abere analindirire er’ithibwa, mwaligha eryeghesibwa Biblia na mughalha wethu oyuwabya akabungira engomo eyo Jack abya aboherwemo. Nomwakine indi Jack abya iniabirikolha ebindu bibi kutsibu, mwalhusya omundu wiwe owa kera kandi endambi muyahika amatholera eribatizibwa. Jack mwahinduka kutsibu indi okwa kiro eky’erimw’itha, omwa meso w’abaghuma b’okw’abatheya b’engomo mumwasa ebiyiri-yiri bakamulhagha. Omusirikali oyuwabya akakolera okwa ngomo mwabugha athi: “Kera, Jack abya mughuma w’okw’abanya ngomo abakalire kutsibu omo mwanya ono. Lino ni mughuma w’okw’abanya ngomo abuwene kutsibu.” Ewiki eyakwamako Jack al’ithibirwe, baghalha bethu abasa okwa ngomo bakasya sondolha omuhindano w’obuli wiki, mubeyayo omunya-ngomo oyuwasa okwa muhindano omurundi wiwe w’erimbere. Ni kyahi ekyaleka iniathwamu erihindana? Mwahambwako kutsibu busana n’esyombinduka esya Jack akolha omwa ngebe yiwe neryo amanza eriminya ekyo atholere iniakolha erithoka eriramya Yehova. Omo kwenene, emibere yethu yangana leka Thatha wethu  w’elhubulha iniahebwa olhukengerwa!—1 Pet. 2:12.

YEHOVA AKENDI KANGANIA ATHI NGOKU ERINA LIWE LITHOLERE IRYAHEBWA OLHUKENGERWA OMWA BUTHUKU OBUKASA?

15. Yehova akendi kangania athi omwa buswire ngoku erina liwe litholere iryahebwa olhukengerwa omwa buthuku obukasa? (Esyonyimbo 96:10-13)

¹⁵ Soma Esyonyimbo 96:10-13. Emilhondo y’erighunzerera eyiri omwa Esyonyimbo 96 yikakanaya oku Yehova ng’Omutsweri kandi ng’Omwami w’erithunganene. Yehova akendi kangania athi ngoku erina liwe litholere erihebwa olhukengerwa omwa buthuku obukasa? Erilhabira omw’itswera liwe. Akisiya iniathoghothya Babeli Mukulhu busana n’erihira okwa rina liwe eribuyirire kw’ebitsumi. (Erib. 17:5, 16; 19:1, 2) Abandi abakendi syalhangira Babeli Mukulhu akathoghothibwa, bangana syathuyiyungako omw’iramya ly’okwenene. Erighunzerera, okwa Harmagedoni, Yehova akendi syathoghotherya ighuma omughulhu mubi wa Sitani, erighunziraho ighuma abosi abakamuhakanisaya n’eritsuma erina liwe aliwe inialhamya abamwanzire kandi abakamwowa n’abakayisyetha busana n’erimuha olhukengerwa. (Mk. 8:38; 2 Tes. 1:6-10) Enyuma w’erilengesibwa ery’erighunzerera erikendi syakwama Erithabalha lya Kristo ery’Emyaka Rukumi, Yehova akendisyabya iniabiryererya ighuma erina liwe. (Erib. 20:7-10) Okwa mughulhu oyo, “ekihugho kyasyusulha n’eriminya ly’olhukengerwa lhw’Omwami Mukulhu, ngoku amaghetse ak’usulha omwa ngetse n’eriswikayo.”—Hab. 2:14.

16. Wamathwamu erikolhaki? (Lebaya n’ekisasani.)

¹⁶ Ka kikendi syatsemesya kutsibu abosi abaliho okwa buthuku obo bakaha Yehova y’olhukengerwa olhutholere erina liwe! Aliwe ekiro ekyo kithe kyahika, ithwangana kolha owethu omw’iha Nyamuhanga y’olhukengerwa thukabana akaghisa kosi-kosi. Erihira omuwathu w’okwa nzumwa ngulhu eyi, Akathunga Akakasondolha kabirisombolha Esyonyimbo 96:8, NWT ng’erisako lyethu ly’omwaka owa 2025: “Muhe Yehova y’olhukengerwa olhutholere erina liwe.”