OMWATSI W’ERIGHA 5
OLHWIMBO 108 Olhwanzo Lhwa Nyamuhanga Olhuthyusa
Ngoku Thukaghasirawa Omwa Lhwanzo Lhwa Yehova
“Kristo Yesu mwasa omwa Kihugho busana n’erilhamya abakolha-nabi.”—1 TIM. 1:15.
EKIGHENDERERWA
Ngoku thukaghasirawa omwa ndongolya kandi ngoku thwanga kangania Yehova y’erisima lyethu.
1. Ni kyahi ekyo thwanga kolha erithoka eritsemesya Yehova?
THATHERA akasasani wukaha omundu oyo wanzire y’ekihembo ky’embaghane, ekyuwene kandi eky’akayithagha. Ikikendi kuponesya bungahi omundu oyo amakwama kyabika ekihembo ekyo n’erithendi kitsomana! Okwa lhundi lhuhandi, iwukendi tsema amakolesya ndeke ekihembo ekyo n’erikangania ngoku amakisima. Enzumwa y’eyahi? Yehova abirihayo Mughalha wiwe busana nethu. Yehova ka atholere eribya iniakatsema thukakangania ku thukasima ekihembo ky’obughuli n’olhwanzo lhwiwe olhwa musukuma erihayo endongolya!—Yn. 3:16; Abar. 5:7, 8.
2. Omo mwatsi ono thukendi kania okuki?
2 Nomwabine, obuthuku bukabya bunemulhaba, ithwangana tsuka erighalha-ghandya ekihembo ky’endongolya. Aliwe thwamabya isithukitsemera endongolya, ithukendibya ng’abamabika ekihembo ekyuwene ekyo Nyamuhanga abirithuha omwa mwanya ogho thuthe thwanga kilhangira kutse erikilengekaniako. Erithoka eriyitheya okw’ekyo, thutholere ithwabya thukalengekania mughulhu wosi okwa ekya Nyamuhanga na Kristo babirithukolera. Omwatsi ono akendi thuwathikya erikolha ekyo. Thukendi kania nga thukaghasirawa thuthi lino omwa ndongolya kandi ngoku thwanga ghasirwa muyo omwa buthuku obukasa. Kandi thukendi minya nga thutholere ithwakolhaki erithoka erikangania ku thukasima olhwanzo lhwa Yehova, kutsibu-tsibu omwa buthuku buno bw’Eryibuka.
NGOKU THUKAGHASIRAWA LINO
3. Munabwire ni nzira yahi nguma eyathukaghasirawamu omwa ndongolya?
3 Nibya namunabwire, thunemughasirwa omwa kihongwa kye ndongolya ya Kristo. Ng’eky’erileberyako, erilhabira omwa ndongolya, Yehova akaghanyira ebibi byethu. Si buthekwa-buthekwa indi atholere iniathughanyira. Aliwe anzire iniakolha ekyo. Omuhandiki w’esyonyimbo mwakangania erisima liwe omw’imba athi: “Iwe Mukama [Yehova], wuli mubuya, kandi wukabuyira.”—Esy. 86:5; 103:3, 10-13.
4. Yehova ahayo endongolya busana na bahi? (Luka 5:32; 1 Timoteo 1:15)
4 Abandi bangana yowa nga sibatholere erighanyira lya Yehova. Erithwalira haghuma, ithwe bosi sirithutholere. Omukwenda Paulo mwaminya ngoku ‘syatholere eryahulhwamo mukwenda.’ Nibya mwathasyabugha athi: “Nyiri ngoku nyine busana n’olhukogho lhwa Nyamuhanga.” (1 Kor. 15:9, 10) Thwamayisubamu, Yehova akathughanyira ebibi byethu. Busana naki? Sibugha indi thutholere ithwaghanyirwa, aliwe kundi athwanzire. Wamabya iwukalyambibawa busana n’eriyowa nga siwutholere erighanyirwa, wibuke ngoku Yehova syahayo endongolya okwa bandu abathawithe kibi aliwe busana n’abakolha-nabi abakayisubamo.—Soma Luka 5:32; 1 Timoteo 1:15.
5. Hane owosi-wosi w’okw’ithwe oyutholere erilengekania athi atholere iniabana obughanyiri bwa Yehova? Soborera.
5 Sihali n’omughuma w’okw’ithwe oyutholere erilengekania athi thutholere ithwabana obughanyiri bwa Yehova ahabw’eribya ithwamabirighunza myaka mingyi omwa mubiri wa Yehova. Omo kwenene, Yehova akasima obuthaleghulha bwethu okw’iyo. (Ebr. 6:10) Mwathuha ekihembo kya Mughalha wiwe, isibugha indi akathuthuha busana n’ekindu kirebe ekya thwamukolera. Thwamabugha thuthi Yehova atholere iniathughanyira kutse erithulhangiramo bandu b’embaghane ahabw’eribya ithwabirimukolera bingyi, ithukendibya nga thwamabugha thuthi Kristo syabya tholere erithuholera.—Thasyalebaya na Abanya Galatia 2:21.
6. Busana naki Paulo mwakolha kutsibu omwa mubiiri wa Yehova?
6 Paulo mwaminya ngoku sibuthekwa-buthekwa indi Nyamuhanga atholere iniamusima. Neryo kwesi, ni kyahi ekyaleka iniakolha kutsibu omwa mubiiri wa Yehova? Isi busana n’eriyikangania indi atholere, aliwe ly’erikangania erisima liwe busana n’olhukogho lhwa Yehova. (Efe. 3:7) Nga Paulo, thukalholha embere erikolha n’omuhwa, butsira indi thwanzire thukanganibawe obughanyiri bwa Yehova, aliwe thukakanganaya erisima lyethu.
7. Ni yindi nzira yahi eyathukaghasirawamo lino omwa ndongolya? (Abanya Roma 5:1; Yakobo 2:23)
7 Eyindi nzira eyathukaghasirawamo lino omwa ndongolya ly’eribya ithwangana thunga obughuma obughumire na Yehova. a Ngoku kiri omo mwatsi w’ahanyuma, muthwabuthwa isithuwithe engolongana na Nyamuhanga. Aliwe busana n’endongolya, thwanganabya ‘buholho na Nyamuhanga’ kandi busana n’ekyo ithwayithunda hakuhi nayu.—Soma Abanya Roma 5:1; Yakobo 2:23.
8. Busana naki thutholere ithwasima Yehova busana n’olhusunzo lhw’omusabe?
8 Thalengekania okwa kindu kighuma ekya thukatsemera busana n’eribya bughuma na Yehova—olhusunzo lhw’omusabe. Yehova syalisubulira okw’ihulikirira emisabe y’abandu biwe omughulhu bahindene haghuma lisa, aliwe kandi akahulikirira emisabe y’obuli mughuma ahabwiwe. Omusabe syali subulira okw’ileka thukayowa ndeke lisa, aliwe akaleka ithwathekana omwa muthima n’omwa bulengekania. Akaghumaya obunywani bwethu na Nyamuhanga. (Esy. 65:2; Yak. 4:8; 1 Yn. 5:14) Yesu iniane okwa kihugho, iniakasaba mughulhu wosi kundi abya inianasi ngoku Yehova anamuhulikirire kandi ngoku omusabe akendi leka obughuma bwiwe na Yehova ibwalholha embere ibunaghumire. (Lk. 5:16) Ka thukasima eribya ithwanganabya banywani ba Yehova, nibya n’erikania nayu omwa musabe busana n’ekihongo kya Yesu!
NGOKU ENDONGOLYA YANGA THUGHASIRA OMWA BUTHUKU OBUKASA
9. Endongolya yikendi syaghasira yithi abaramya abathaleghulha omwa buthuku obukasa?
9 Abaramya ba Yehova abathaleghulha bakendi syaghasirwa bathi omwa ndongolya omwa buthuku obukasa? Bakendi syahebwa engebe y’erikotha. Abandu bangyi bakalengekanaya bathi eki sikyanga thokekana kundi abandu babiribya ibanemuholha ahabw’esyongumi sy’emyaka. Aliwe ekighendererwa kya Yehova eritsuka kera kiri kithi abandu babyeho kera na kera. Adamu kwathahalya sihali n’omughuma oyuwanga lengekenie athi eribyaho kera na kera ni kindu ekithe kyanga thokekana. Nomwakine indi omwa mughulhu ono eribya n’engebe y’erikotha kikabya nga sikyanga thokekana, thun’ikirirye ngoku kikendi syathokekana, kundi thunasi ngoku Yehova mwaliha ekindu ky’obughuli bunene, engebe ya Mughalha wiwe-wiwe nuku eki kithokekane.—Abar. 8:32.
10. Ni kyahi ekyo abahakabibwa n’ab’esindi mbuli balindirire?
10 Nomwakine indi erihebwa engebe y’erikotha ni ghasirwa ery’obuthuku obukasa, Yehova anzire ithwalengekania kuyo lino. Abahakabibwa balindirire engebe eyiwithe ekighendererwa omwa lhubulha omughulhu bakendi syathabalha okwa kihugho haghuma na Kristo. (Erib. 20:6) Ab’esindi mbuli balindirire eribyaho okwa kihugho paradiso ekithemo obulhumi n’obulighe. (Erib. 21:3, 4) Mbwino wuli mughuma w’okwa sindi mbuli abalindirire engebe y’erikotha okwa kihugho? Ekihembo ekyo si kihembo eky’erithathuhumulikania buyira! Thwahangikawa ithuli b’eribyaho kera na kera. Engebe okwa kihugho yikendi syaleka ithwatsemera ighuma.
11-12. Ni mighisa nga yahi eya thwanga lindirira omwa Paradiso? (Lebaya n’ebisasani.)
11 Thalengekania nga wukendisyabya omwa ngebe eyiri yithi okwa kihugho Paradiso. Siwendi syayilhalikirira obulhwere kutse olhuholho. (Isa. 25:8; 33:24) Yehova akendi syalhangira athi akughuthaya obuli yisunza lyawu erinatholere. Mbwino ni byahi ebyo wanganza erighako? Eby’esayansi? Ebisoro? Omuziki? Erithera ebisasani? Ahathe erithika-thika, thukendi syayithagha abakathera esyopulani sy’esyonyumba, abahimbi n’abalimi. Omo kwenene, hakendi syabya obuyithawa obwa bandu abakakolha emibiiri y’eriwathikya n’erisugha, ng’eritheghekania ebyalya, erikokothya ebyuma by’erikolesya, n’erilhangira bathi ekihugho kikabya ikinuwene. (Isa. 35:1; 65:21) Iwune w’eribyaho kera na kera, wukendisyabya n’obuthuku obw’eriminya bingyi okwa mubiiri wosi-wosi ogho wanga lengekaniako.
12 Ka kikendi syatsemesya eryangirira ababirilhubuka! (Emib. 24:15) Thathera akasasani, nga wukendi syatsema bungahi wuk’igha bingyi oku Yehova omw’igha okwa bihangikwa biwe bingyi. (Esy. 104:24; Isa. 11:9) Ekikulhu kutsibu, ka kikendi syatsemesya kutsibu eriramya Yehova isithuwithe eriyowa ery’eribya ithunawithe ekibi kyosi-kyosi! Mbwino iwunemwendi hingisya emighisa eyikasa ey’omwa buthuku obukasa obu ‘n’eriyitsemesya ery’akathambi kake omwa bitsange by’ebibi’? (Ebr. 11:25) Eyihi nahake! Emighisa eyi yilengire ebya thwanga yithalyako lino. Wibuke, ekihugho Paradiso sikyendi syasighalha ini maha buyira. Obuthuku bukendi syahika ikyabererera. Ebyosi ebi sibyanga thokekene Yehova kwabya isyathwanzire erihika okwa kiika ky’erithuha Mughalha wiwe ng’ekihembo!
Ni mighisa yahi ey’omwa Paradiso eyo wulindirire kutsibu? (Lebaya enungu 11-12)
KANGANAYA KU WUKASIMA OLHWANZO LHWA YEHOVA
13. Thwanga kolhaki erikangania ku thukasima olhwanzo lhwa Yehova? (2 Abanya Korinto 6:1)
13 Thwanga kolhaki erikangania ku thukasima Yehova busana n’erihayo endongolya? Omw’ihira omubiiri wiwe w’embere omwa ngebe yethu. (Mt. 6:33) Kundi nibya, Yesu mwaholha nuku “abakabyaho sibabyeho busana nabo ibobene, nikwa babyeho busana n’oyuwaholerabo, kandi mwalhubukibwa busana nabo.” (2 Kor. 5:15) Ahathe erithika-thika, sithwanzire thukathalha okwa kighendererwa ky’olhukogho lhwa Yehova.—Soma 2 Abanya Korinto 6:1.
14. Thwanga kangania thuthi ku thuyikethere obusondoli bwa Yehova?
14 Kandi thwangana kangania ku thukasima olhwanzo lhwa Yehova omw’iyikethera obusondoli bwiwe n’eribughenderako. Thuthi? Thwamabya b’erithwamu bikahika okw’isoma kali-kali kutse omubiiri ogho thutholere ithwaligha erikolha thutholere ithwalengekania okwa ebya Yehova anzire ithwakolha. (1 Kor. 10:31; 2 Kor. 5:7) Thwamakangania erikirirya omwa mikolere, ekindu ekyuwene kikabya—erikirirya lyethu omu Yehova likongera n’obughuma bwethu nayu ibwaghuma. Amaha wethu akaghuma.—Abar. 5:3-5; Yak. 2:21, 22.
15. Thwanga kangania thuthi erisima lyethu omwa buthuku bw’Eryibuka?
15 Hane eyindi nzira eya thwanga kanganiryamo ku thukasima olhwanzo lhwa Yehova. Ly’erikolesya obuthuku buno obw’Eryibuka erikangania Yehova nga thukasima bungahi endongolya . Ery’ongera okw’iyitheghekera eribyaho okw’Ibuka, thutholere ithwakokya n’abandi eribyaho. (1 Tim. 2:4) Soborera abo wukakokaya ebikendi syabya okw’Ibuka. Ikikendi wathikya wamabakangania evidiyo Busana naki Yesu mwaholha? na Ibuka Olhuholho Lhwa Yesu esiri okwa jw.org. Abasyakulhu batholere ibalhangira bathi bakakokaya ababirisebebera. Thalengekania okwa tseme eyikabya omwa lhubulha n’okwa kihugho abaghuma b’okwa syombuli sya Yehova esithere bamahambwako n’erisuba omwa kihangulho kiwe! (Lk. 15:4-7) Okw’Ibuka, isithwasubulira okw’iramukya abo thwasi basa, aliwe kutsibu-tsibu thutholere ithwaramukya abahyaka n’ababirighunza buthuku buuli isibali hindana. Thwanzire ibayowa buholho!—Abar. 12:13.
16. Busana naki thutholere ithwakanyirirya omubiiri wethu w’erithulira omwa buthuku bw’Eryibuka ?
16 Mbwino siwanga thwamu erikolha bingyi omwa mubiiri wa Yehova omwa buthuku bw’Eryibuka? Erikolha ekyo ni nzira eyuwene eya thukakanganirayamo ku thukasima Nyamuhanga na Kristo busana n’ebyosi ebyo babirithukolera. Thukabya thukongera erisangira omwa mubiiri wa Yehova, kwathukan’ongera thuthya eriyilhangirira obuwathikya bwiwe, neryo ikyaleka ithw’ongera erimuyikethera. (1 Kor. 3:9) Kandi, lhangira wuthi wukakwama-kwamanaya obusomi bwe Biblia obuhambene n’Eryibuka obuli omwa katabu Erilebya Amasako Buli Kiro kutse omwa chati eyiri omwa akatabu k’omuhindano ow’omwa kathi-kathi k’eyenga. Kandi wangana kolesya amasako ayo wukayeghesya.
17. Ni kyahi ekikatsemesaya Yehova? (Lebaya n’akasanduko “ Esyonzira Esyo Thwanga Kanganiryamo ku Thukasima Olhwanzo Lhwa Yehova.”)
17 Ni kwenene, emibere eyawulimo yangana ghana erikulighira erikolesya amenge wosi awahebirwe omwa mwatsi ono. Aliwe, wibuke ngoku Yehova syali linganisaya obunene bw’ebyo thukahayo n’ebya bandi bakahayo; ekyo akalhangira, by’ebiri omwa muthima wawu. Akatsema akalhangira erisima lyawu erikalhua okwa muthima busana n’ekihembo eky’obughuli eky’endongolya.—1 Sam. 16:7; Mk. 12:41-44.
18. Busana naki thukasima Yehova Nyamuhanga na Yesu Kristo?
18 Endongolya yikaleka ithwaghanyirwa ebibi byethu, ithwabya banywani ba Yehova, kandi ithwabya n’amaha w’engebe y’erikotha. Kwesi thulhole embere erikangania ku thukasima olhwanzo lhwa Yehova olhwaleka inialhangira athi thukabana emighisa eyi! (1 Yn. 4:19) Kandi thulhole embere erikangania ku thukasima Yesu oyuwathwanza kutsibu n’erihika okw’ihayo engebe yiwe busana nethu!—Yn. 15:13.
OLHWIMBO 154 Olhwanzo Olhuthelemawa
a Yehova mwaghanyira abaramya biwe ababyaho Ekikristayo kithe kyatsuka nibya Kristo isyali ahayo endongolya. Yehova angabya imwakolha eki kundi abya inianayikethere ngoku Mughalha wiwe akendi syasighalha muthaleghulha erihika okwa lhuholho. Busana n’ekyo, embere sya Nyamuhanga endongolya muyabya ngayabirilihwa.—Abar. 3:25.
