THULI omwa kihugho ekiri mw’emilyambo, neryo kyangana kalha eribana obuholho. Nibya n’omughulhu thwangabya ithuwithe obuholho bulebe, ky’olhobire eribuherya. Ni kyahi ekya Biblia yikabugha ekyanga thuwathikya eribana obuholho bw’okwenene kandi obuthe bwangahwa? Kandi thwanga wathikya thuthi abandi erikolha ekyo?

Erithoka eribana obuholho bw’okwenene, thutholere ithwayowa ithune ndeke kandi ithuna theghibirwe. Thukayithagha eribya n’abanywani babuya, kandi ekikulhu kutsibu, thutholere ithwayithunda hakuhi na Nyamuhanga. Ekyo thwangakikolha thuthi?

Ebihano bya Yehova n’emisingyi yiwe bikathughasira. Thukabya thukabikenga, thukakanganaya ngoku thumuyikethere kandi ku thwanzire eribya n’engolongana y’obuholho nayu. (Yeremia 17:7, 8; Yakobo 2:22, 23) Neryo Yehova iniakendi yithunda hakuhi nethu n’erithuha obulengekania obuthekene. Isaya 32:17 hakabugha hathi: “Omubiiri w’erithunganene asyabya buholho n’omubiiri w’erithunganene asyabya eriyibombeka n’eriyikethera ebiro byosi.” Thwanganabana obuholho bw’okwenene thwamakenga Yehova ahathe erikakwa.—Isaya 48:18, 19.

Yehova abirithuha ekihembo ky’obughuli erithuwathikya erithunga obuholho bwa kera na kera. Ekihembo eki w’omulimu wiwe abuyirire.—Emibiri 9:31.

Omukwenda Paulo mwabugha athi obuholho ni mubere w’okwa “mikolere eyikalhua oko mulimu.” (Abanya Galatia 5:22, 23) Kundi obuholho bukalhua okwa mulimu wa Nyamuhanga, thutholere ithwalighira omulimu abuyirire erithusondolha thwamabya thwanzire obuholho. Eki thwangakikolha thuthi?

Eky’erimbere, thutholere ithwasoma Ekinywe  kya Nyamuhanga mughulhu wosi. (Esyonyimbo 1:2, 3) Wukendibya wunemulengekania kutsibu okwa bya wukasoma, omulimu abuyirire akendi kuwathikya eriyitheghererya amalengekania wa Yehova okwa myatsi muthina-muthina. Ng’eky’erileberyako, thukaminya ngoku akatheghaya obuholho bwiwe kandi n’ekikaleka obuholho ibwabya ini bw’omughaso embere siwe. Thwamaghendera okwa bya thukigha omwa Biblia, obuholho bwethu ibukendyongera.—Emisyo 3:1, 2.

Ekyakabiri, thutholere ithwasaba omulimu abuyirire wa Nyamuhanga. (Luka 11:13) Yehova akalhagha abakamusaba obuwathikya athi: “Obuholho bwa nyamuhanga, obulhabire amenge wosi, bwasyatheya emithima yenyu n’amaghaniryo wenyu omw’isi wa Kristo Yesu.” (Abanya Filipi 4:6, 7) Thwamayithunda hakuhi na Yehova n’eriyikethera omulimu wiwe, iniakendi thuha erithekana omwa malengekania.—Abanya Roma 15:13.

E Biblia yabiriwathikya abandu bangyi erikolha esyombinduka omwa ngebe, na lino bakatsemera obuholho bwa Yehova, erithekana omwa malengekania, n’eribya buholho n’abandi. Mubakolha bathi esyombinduka esi?

Abandi balikyethu bathe basa omwa kwenene, babya batsibu kandi batsurumi. Aliwe mubalengaho erihindulha emibere yabu, kandi lino ni b’olhukeri kutsibu, bakaghumisirizaya, kandi bali buholho n’abandi. * (Lebaya omwatsi ahikwa.) (Emisyo 29:22) Lebaya ngoku mughalha wethu oyukahulhawa mwa David na mwali wethu Rachel bakolha esyombinduka esi omwa ngebe syabu.

David athali asa omwa kwenene, iniakabera eritsweba-tsweba abandi n’erikania n’ab’eka yabu omwa butsurumi. Aliwe neryo mwalhangira kw’atholere iniahindulha emibere yiwe. Mwabana athi obuholho? David akabugha athi, “Munatsuka erikolesya emisingyi ye Biblia omwa ngebe yaghe, neryo erisikya ahakathi-kathi kaghe n’ab’eka yethu muly’ongera.”

Rachel mwahambwako n’emibere eyo akuliramo.  Akabugha athi, “Nibya na lino, ngakinarwanisaya omubere w’erihithana kundi nakulira omw’eka eyiri mw’abatsururu.” Ni kyahi ekya wathikaya Rachel eribana obuholho? Akabugha athi, “Eriyikethera Yehova omwa musabe.”

David na Rachel ni by’erileberyako bibiri okwa bingyi eby’abandu abawithe lino obuholho busana n’erikolesya emisingyi ye Biblia n’eriyikethera omulimu abuyirire. Nomwakine indi thuli omwa kihugho ekiri mw’obutsururu, thwangana thekana omwa menge. Eki ikikendi leka ikyolhoba erikolongana n’ab’eka yethu n’abalikyethu omwa kithunga. Aliwe Yehova akathubwira athi ‘thubye buholho n’abandu bosi.’ (Abanya Roma 12:18) Ekyo kwenene kinathokekene? Kandi busana naki thutholere ithwalengaho eribya buholho n’abandi?

Omw’ithulira lyethu, thukathulha omwatsi w’obuholho owahambire oko Bwami bwa Nyamuhanga. (Isaya 9:6, 7; Matayo 24:14) Abangyi bakatsemeragho n’erilighagho. Eki kikaleka ibabya isibakiyowa nga sibawithe kiwathikya busana n’ebikabya omwa kihugho. Lino bawithe amaha w’okwenene busana n’obuthuku obukasa, kandi eki kikaleka ibanza ‘erisonda-sondya obuholho.’—Esyonyimbo 34:14.

Nomwabine, sibugha indi obuli mundu akatsemera omwatsi wethu thukanamubana. (Yoane 3:19) Mbulha abandu bamangirira bathi omwatsi wethu, Nyamuhanga akathuha omulimu wiwe. Kikathuwathikaya eribya buholho n’erisikya abandi thukathulira. Omw’eki, thukaghendera okw’ihabulha lya Yesu lino: “Omughulhu mukahika okwa muyi kutse okwa kayi, mwingire, mubulhaye nga hane mundu oyuwanga bakokya, neryo imwikalha omw’iwe erihika aho mwasyalhuiraho. Kandi omughulhu muk’ingira omwa nyumba eyo, mukerayebo. Neryo abandu b’enyumba eyo bamabakokya, obuholho bwenyu bubye kubo; nikwa bamathendi bakokya, obuholho bwenyu ibwabasubako.” (Matayo 10:11-13) Thwamabya n’amalengekania aya, ithukendi sighalha ithune n’obuholho abandi nomubanga bugha kutse erikolha kyahi. Kandi thukabya ithun’ibukire ngoku omwa buthuku bw’embere thwangana syabana akaghisa k’eriwathikya abandu abo.

Kandi thukahiraho obuholho omw’ikangania erisikya thukakania n’abanya gavumente, nomubangabya ibakahakanisaya omubiiri wethu. Ng’eky’erileberyako, omwa kihugho kighuma omwa Afirika, egavumente muyabya isiyanga thulighira erihimba Ebisenge by’Obwami. Balikyethu mubaminya ngoku batholere ibaghunzaho ekitsibu eki omwa buholho. Mubathuma mughalha wethu oyuwanabya mumisani omwa kihugho ekyo eriyakania na ambasada e London, England, n’erimubwira okwa mubiiri w’obuholho owa Abema ba Yehova bakakolha.

Mughalha wethu mwabugha athi: “Nabere ingahika okwa meza y’erihikirako, nabere nalhangira emyambalire y’oyuwikereko, munaminya ku ni w’ekihanda ekikabugha omubughe owa nabya inabir’igha. Neryo munamuramukya omwa mubughe wiwe. Mwasweka neryo mwambulya athi, ‘Wukasenda eno yaki?’ Omwa bwolho-bwolho munamubwira indi nganza erilholha oku ambasada. Omusika oyo mwatherera ambasada, nayu mwasa n’erinyiramukya omwa mubughe oyo. Enyuma waho mwanyihulikirira ndeke ingamusoborera emibiiri y’obuholho eya Bema ba Yehova bakakolha.”

Ambasada abere abirihulikirira mughalha wethu, mwayitheghererya ndeke omubiiri wethu n’eribya isyakithuwitheko amalengekania awathatholere nga kera. Habere halhaba akathuku egavumente eyo muyahindulha erithwamu lyayo n’erilighira Abema ba Yehova erihimba Ebisenge by’Obwami. Balikyethu mubatsema kutsibu! Ahathe erithika-thika, thwamasikya abandi, thukaleka ihabya obuholho.

Munabwire, abandu ba Yehova bali omwa paradiso y’obunyakirimu, bakamuramirya omwa mibere y’obuholho. Obuli mughuma w’okw’ithwe angan’ongera obuholho obu omw’ihiraho akaghalha eribya n’obuholho omwa ngebe yiwe. Neryo ithwangana yikethera ngoku Yehova akathutsemera. Kandi n’omwa kihugho kiwe kihya-kihya, akendi syathuha obuholho obukendi syabyaho kera na kera.—2 Petero 3:13, 14.