1. Ni kindu kyahi ekikaleka ithwabya ithulengire ebisoro?

YEHOVA NYAMUHANGA mwaha abandu ekindu ky’embaghane. Bw’obunyamuthima-thima bwethu. Eki ky’ekindu ekikaleka ithwabya ithulengire ebisoro. Thukaminya thuthi ngoku Adamu na Eva banabya bawithe obunyamuthima-thima? Babere babisoberya Nyamuhanga, mubabisama. Obunyamuthima-thima bwabu mubwabahandikirira.

2. Obunyamuthima-thima bwawu buli buthi ng’ekampasi? (Lebaya ekisasani ekiri okw’itsuka.)

² Obunyamuthima-thima bwethu ly’eriminya ery’ekibuya n’ekibi eriri omw’isi wethu erikathusondolha omwa ngebe. Omundu oyuwithe obunyamuthima-thima obuthakangiriribwe ndeke ali ng’emeri eyiwithe ekampasi, kutse akuma akali ng’esaha akakasondolha oyukeghendayayo akatsandire. Omuyagha n’ebisunda by’engetse ibyangana lholerya emeri eyo yitheya. Aliwe ekampasi eyikakolha ndeke iyikendi wathikya oyukaghendaya emeri erisubyayo omwa nzira eyitholere. Kuthya, thwamakangirirya  ndeke obunyamuthima-thima bwethu, ibukendi thusondolha ndeke.

3. Hangabyaki thwamathendi kangirirya ndeke obunyamuthima-thima bwethu?

³ Obunyamuthima-thima bwethu bwamabya isibukangiriribwe ndeke, isibwendi thukunga okw’ikolha ekithuwene. (1 Timoteo 4:1, 2) Ibwangana leka ithwaligha “ebibi mwa bibuya.” (Isaya 5:20) Yesu mwabwira abigha biwe athi: “Omughulhu asyasa, neryo oyukabitha asyaghanirya ng’akakolha omubiiri wa Nyamuhanga.” (Yoane 16:2) Ab’itha omwigha iya Setefano ekyo kya babya balengekenie. (Emibiri 6:8, 12; 7:54-60) Eritsuka kera, abandu bangyi b’amadini babirikolha ebithuwene, ng’eritha, n’eribugha bathi bakabikolha busana na Nyamuhanga. Aliwe omo kwenene, ebya babirikolha bikathwa ebihano bya Nyamuhanga. (Eriluayo 20:13) Obunyamuthima-thima bwabu bukabya isibuthabasondolha ndeke!

4. Ni kyahi ekya thwangakolha erilhangira thuthi obunyamuthima-thima bwethu bukakolha ndeke?

⁴ Neryo thwangakolhaki erilhangira thuthi obunyamuthima-thima bwethu bukakolha ndeke? Ebihano n’emisingyi eyiri omwa Biblia biri “n’endundi busana n’erikangirirya omwatsi w’ekwenene, kandi busana n’erikunga erihaba, kandi busana n’erihabulha, n’erikangirirya abandu erikwama ekithunganene.” (2 Timoteo 3:16) Thutholere ithw’igha e Biblia mughulhu wosi, ithwaghanirya okwa byayikabugha, n’erikolesyabyo. Omwa nzira eyi, ithukend’igha eryongera eribya n’amalengekania wa Yehova. Neryo ithwanganayikethera ngoku obunyamuthima-thima bwethu bukendi thusondolha ndeke. Leka thulebaye ngoku thwangakolesya ebihano bya Yehova n’emisingyi yiwe erithendeka obunyamuthima-thima bwethu.

5, 6. Ebihano bya Nyamuhanga byanga thuwathikya bithi?

⁵ Thwamabya thwanzire ebihano bya Nyamuhanga bithuwathikaye, sithutholere thukasubulira okw’ibisoma kutse erithabiminya lisa. Thutholere ithwabyanza n’erisikyabyo. E Biblia yikathubwira yithi: “Mwaghalirawe oko bibi, mwanze ebibuya.” (Amosi 5:15) Aliwe ekyo thwanga kikolha thuthi? Thutholere ithwalhangira ebindu ngoku Yehova akabilhangira. Kilengekanayeko omwa nzira eno. Thubughe thuthi siwukighotsera ndeke, neryo dokita iniakukangirira ebyalya birebe, erikolha ebisasayizi, n’erikolha esindi mbinduka omwa ngebe. Iwaghendera okw’ihabulha liwe, kandi ikyakolha! Iwukendi yowa wuthi okwa menge wa dokita ayo?

⁶ Kuthya, Omuhangiki wethu abirithuha ebihano ebikathutheghaya okwa bitsibu ebikalhwiririra omwa kibi kandi ebik’uwania engebe yethu. Ng’eky’erileberyako, e Biblia yikathukunga okw’ibugha amabehi, eriba, erisingira, omuthima w’obwithi, kutse erikolongana n’esyombinga omwa mibere yosi-yosi. (Soma Emisyo 6:16-19; Eribisulirwa 21:8) Thukabya thukabana ebibuya ebikalhua omwowa Yehova, olhwanzo olhwa thumuwithire n’ebihano biwe lhukongera.

7. Emyatsi eyiri omwa Biblia yikathuwathikaya yithi?

⁷ Sithutholere thukatsuka eribana ebikalhwiririra omw’ithwa ebihano bya Nyamuhanga imuthwaminya ekihikire n’ekithahikire. Thwangan’ighira okwa bisobyo ebya bandi bakolha kera. Eby’erileberyako ebi bine omwa Biblia. Emisyo 1:5 hakabugha hathi: “Omundu w’amenge owe, n’erikanyirira omw’igha.” Erihabulha eri likalhua oku Nyamuhanga kandi n’ihabulha eritholere! Ng’eky’erileberyako,  lengekanaya okw’ighalhwa erya Dawudi abana busana n’erithendiowa Yehova neryo amasingira na Batiseba. (2 Samweli 12:7-14) Wukasoma omwatsi oyo, yibulhaye: ‘Dawudi angayitheghirye athi okwa bitsibu ebi? Nangakolireki omwa mibere ng’eyo? Namalengwako omwa by’obusingiri, mbwino iningendibya nga Dawudi kutse nga Yozefu?’ (Enzuko 39:11-15) Thwamalengekania ndeke okwa bibi ebikalire ebikalhwiririra omwa kibi, ithukendi ‘ghalirwa oko bibi.’

8, 9. (a) Obunyamuthima-thima bwethu bukathuwathikaya erikolhaki? (b) Obunyamuthima-thima bwethu bukakolongana buthi n’emisingyi ya Yehova?

⁸ Thukalhangira thuthi thukabya haali okwa bindu ebya Nyamuhanga aponire. Aliwe thutholere ithwakolhaki thwamayisanga omwa mibere eyithawithe kilhaghiro ekihandikire omwa Biblia? Thwanga minya thuthi ebya Nyamuhanga anzire ithwakolha? Thwamabya ithwabirilighira e Biblia erikangirirya obunyamuthima-thima bwethu, ithukendi thwamu ndeke.

⁹ Kundi Yehova athwanzire, abirithuha emisingyi eyanga sondolha obunyamuthima-thima bwethu. Akabugha athi: “Ingye indi Mwami Mukulhu Nyamuhanga wawu, oyukakukangiriraya wubane endundi, oyukakusondolha omo nzira eyo wangalenderamo.” (Isaya 48:17, 18) Thwamalengekania kutsibu okwa misingyi ye Biblia n’erilighirayo erihika okwa mithima yethu, ithwangana hengulha  n’erihindulha obunyamuthima-thima bwethu. Eki kikathuwathikaya erithwamu ndeke.

10. Omusingyi niki, kandi Yesu mwakolesya athi emisingyi omw’ikangirirya liwe?

¹⁰ Omusingyi y’ekwenene eyikasondolha amalengekania wethu, erithuwathikya erithwamu ndeke. Eriminya emisingyi ya Yehova kikathuwathikaya eriminya amalengekania wiwe n’ekikaleka iniathuha ebihano birebe. Yesu mwakolesya emisingyi eryeghesya abigha biwe ngoku hane ebikalhwiririra omwa malengekania n’emikolere mirebe. Ng’eky’erileberyako, mwakangirirya ngoku ekinigha kyanganalhua mw’obwithi, n’amalengekania w’eby’obutswatswa inialhua mw’obusingiri. (Matayo 5:21, 22, 27, 28) Thwamalighira emisingyi ya Yehova erithusondolha, obunyamuthima-thima bwethu ibukendi thendekwa ndeke, n’erithwamu lyethu irikendiha Nyamuhanga y’olhukengerwa.​—1 Abanya Korinto 10:31.

11. Obunyamuthima-thima bw’owundi bangana ghana erisosana buthi n’obw’owundi?

¹¹ Nibya n’omughulhu Abakristayo bakakolesaya e Biblia erithendeka obunyamuthima-thima bwabu, sikirimanyisaya kithi bakendi thwamu ebisosene okwa myatsi mirebe. Eky’erileberyako ekikakanganaya eki ly’erithwamu nga wunanywe oko bwabu. E Biblia siyiribugha yithi erinywa obwabu ni kibi, aliwe yikathukunga okw’inywa obwabu bunene kutse erithamira. (Emisyo 20:1; 1 Timoteo 3:8) Mbwino eki kikamanyisaya kithi Omukristayo amabya isyalinywa bunene, sihali ebindi ebya atholere erilengekaniako akathwamu? Eyihi. Obunyamuthima-thima bwiwe nomubwanga mulighira erinywa obwabu, akabya iniakinayithagha erilengekania okwa bunyamuthima-thima bw’abandi.

12. Ebinywe ebiri omu Abanya Roma 14:21 byanga thuwathikya bithi erisikya obunyamuthima-thima bw’abandi?

¹² Paulo mwakangania ngoku thutholere ithwasikya obunyamuthima-thima bw’abandi akahandika athi: “Siryowene erirya esiswi kutse eripulya ebinyu, kutse erikolha ekinduki ekikaleka mulikyenyu iniakolha ebibi” kutse erimuthwikalya. (Abanya Roma 14:21) Neryo nomuthwangabya ithuwithe obughabe bw’erinywa obwabu, thutholere ithwabya ithunayitheghekire eriyiferezya obughabe obo thwamabya ithunasi ngoku erinywa lyangana tsandya obunyamuthima-thima bw’owundi Mukristayo. Obundi mughalha wethu abya abeghere obwabu athali aminya ekwenene kandi abirithwamu erithendi thasyanywa. Sithwanganza thukakolha ekindu kyosi-kyosi ekyangaleka iniasubira omutse wiwe wa kera. (1 Abanya Korinto 6:9, 10) Mughalha wethu oyo amabya imwakathubungira, mbwino thukendyanza erimukaka obwabu, nibya iniabirighana? Eyihi nahake!

13. Timoteo mwasikya athi obunyamuthima-thima bw’abandi nuku abawathikaye eriligha engulhu yuwene?

¹³ Timoteo mwaligha eribanibwa iniamabirikulha, nomwakine indi kyangalethire obulhumi. Abya inianasi ngoku okwa Bayuda abo akayathulira, eribanibwa ni mwatsi mukulhu. Nga Paulo, Timoteo syabya anzire erithwikalya omundu wosi-wosi. (Emibiri 16:3; 1 Abanya  Korinto 9:19-23) Nawu, wunayitheghekire eriyiferezya ebindi nuku wangawathikya abandi?

14, 15. (a) Thukakulha thuthi bunyakirimu? (b) Abakristayo abakulire bakathwalha bathi abandi?

¹⁴ Sithutholere thukasubulira okwa myatsi y’omusingyi eyathwatsuka erigha misa, thutholere ‘ithwaghenda embere omwa myatsi eyihikene.’ (Abaebrania 6:1) Sithulibya Bakristayo abakulire busana n’erithabya ithwamaghunza omwa kwenene mw’emyaka minene. Kikayithagha akaghalha erikulha bunyakirimu. Thutholere ithwalholha embere erikulha omwa menge n’omw’iyitheghererya. Neryo thutholere ithwasoma e Biblia buli kiro. (Esyonyimbo 1:1-3) Wukendibya wunemusoma e Biblia buli kiro, wukendyongera eriyitheghererya ndeke ebihano bya Yehova n’emisingyi yiwe.

¹⁵ Ekihano kikulhu okwa Bakristayo ky’ekyahi? Ky’ekihano ky’olhwanzo. Yesu mwabwira abigha biwe athi: “Mwamabya n’olhwanzo omughuma busana n’owundi, abandu bosi basyaminya ku muli bigha baghe.” (Yoane 13:35) Olhwanzo lhukahulhawa mwa “mughambo w’obwami” kandi “lhukaberereraya emighambo.” (Yakobo 2:8; Abanya Roma 13:10) Sithulisweka olhwanzo eribya ini lhukulhu, kusangwa e Biblia yikabugha yithi “Nyamuhanga ni lhwanzo.” (1 Yoane 4:8) Oku Nyamuhanga, olhwanzo si yowa buyira. Akalhukanganaya omwa by’akakolha. Yoane mwahandika athi: “Olhwanzo lhwa Nyamuhanga lhwabiriminyikalha okw’ithwe omo mwatsi ono, athi, Nyamuhanga mwathuma Mughalha mubuthwa mughuma wiwe omwa kihugho, ithwathoka eribana engebe busana nayu.” (1 Yoane 4:9) Thwamanza Yehova, Yesu, balikyethu, n’abandi, thukakanganaya ku thuli Bakristayo abakulire.​—Matayo 22:37-39.

16. Thukabya thunemukulha bunyakirimu, busana naki thukongera erianza kutsibu emisingyi ye Biblia?

 ¹⁶ Thukabya thukakulha bunyakirimu, thukongera eryanza kutsibu emisingyi ye Biblia. Ebihano bikakolha okwa mibere milebe, aliwe emisingyi yikakolha omwa mibere mingyi muthina-muthina. Ng’eky’erileberyako, omwana mulere syaliminya ku ni ky’akabi erinywana abandu babi, neryo ababuthi biwe bakayithagha erimuhirira h’ebilhaghiro ebyanga mutheya. (1 Abanya Korinto 15:33) Aliwe omwana oyo akabya akakulha, ak’igha ngoku angaghanirya okwa misingyi ye Biblia. Emisingyi eyi iyikendi muwathikya erisombolha abanywani abuwene. (Soma 1 Abanya Korinto 13:11; 14:20.) Thwam’ongera erilengekania okwa misingyi ye Biblia, ithukendyongera eriyikethera obunyamuthima-thima bwethu. Thukongera eriyitheghererya ekya Nyamuhanga anzire ithwakolha omwa mibere yosi-yosi eya thwangabyamu.

17. Busana naki ithwangana bugha thuthi thunawithe obuli kindu ekya thukayithagha erithwamu ndeke?

¹⁷ Thunawithe obuli kindu ekya thukayithagha erithwamu omwa nzira eyikatsemesaya Yehova. Omwa Biblia thukabana mw’ebihano n’emisingyi ebikathuwathikaya ‘erihikana, n’erithuthokesya erikolha obuli mubiiri owuwene.’ (2 Timoteo 3:16, 17) Emisingyi ye Biblia yikathuwathikaya eriminya amalengekania wa Yehova. Aliwe kikayithagha akaghalha eriminyayo. (Abanya Efeso 5:17) Erithuwathikya, thunawithe e Watch Tower Publications Index, Obusondoli obw’Erisekulya Omwa Bitabu eby’Abema ba Yehova, E Watchtower Library, ERIBIKIRO LY’EBITABU OKWA MUTHAHULHA, na JW Library app. Thwamakolesya ebindu ebi, thukaghasirawa omw’iyeghesya lyethu n’omwigha lyethu ly’eka.

18. Bikabya bithi thwamaghendera okwa bihano bya Yehova n’emisingyi yiwe omwa ngebe syethu?

¹⁸ Engebe yethu yikongera eryuwana kutsibu thukaghendera okwa bihano bya Yehova n’emisingyi yiwe! Esyonyimbo 119:97-100 hakabugha hathi: “Ka nyanzire emighambo yawu! Ngaghanirayayo omo musibo wosi. Ekihano kyawu kiri haghuma naghe emighulhu yosi, kikaleka inalengya esyonzighu syaghe syosi amenge. Ngaminya kwilhaba abakangirirya baghe bosi, kusangwa ngaghaniraya omo bihano byawu. Ngwithe amenge kwilhaba abasyakulhu, kusangwa ngakenga ebihano byawu.” Thwamasondya obuthuku bw’erilengekania kutsibu okwa bihano bya Nyamuhanga n’emisingyi yiwe, ithukendi kolha ndeke omwa menge n’obuyitheghererya. Kandi thwamakolesya ebihano n’emisingyi erithendeka obunyamuthima-thima bwethu, ithukendi hika okwa “lhulengo lhw’erihikana lya Kristo.”​—Abanya Efeso 4:13.