1. Ni nzumwa yahi ey’embaghane eyikaleka ithwatsema?

THUTSEMIRE kutsibu eriowa abaghombe ba Nyamuhanga ngoku banemuleka ekyakakalha kyabu kikoleraye! Omwaka owahwa, abandu ba Yehova mubakanasondolha abigha be Biblia abalhabire omu 10,000,000. Kandi n’esyomiliyoni sy’abanzisibirwe mubasa okw’Ibuka n’erigha okwa kihembo kya Yehova eky’embanulho.​—1 Yoane 4:9.

2, 3. (a) Ni kyahi ekithe thukakiraya erikolerya “ng’esyotara”? (b) Thukendikania okuki omo mwatsi ono?

² Erithimba omwa kihugho kyosi, Abema ba Yehova bakakanaya emibughe muthina-muthina. Aliwe eki sikirithukakiraya eripipa Yehova ng’erihiika lighuma. (Eribisulirwa 7:9) Mbulha thukabugha mubugheki kutse mbulha thw’ikere hayi, thukakoleraya “ng’esyotara omo kihugho.”​—Abanya Filipi 2:15.

³ Omubiiri wethu w’erithulira, obughuma bwethu bw’Ekikristayo, n’omubere wethu w’eribya ithunatheghirye, ebyosi bikaha Yehova y’olhukengerwa. Thwangaleka thuthi ekyakakalha  kyethu kikoleraye omwa mibere isathu eyi?​—Soma Matayo 5:14-16.

4, 5. (a) Eryongera okw’ithulira, thwangaleka thuthi ekyakakalha kyethu kikoleraye? (b) Ni bibuya byahi ebikalhwiririra omw’ibya b’olhukeri? (Lebaya ekisasani ekiri okw’itsuka.)

⁴ Erithulira n’eriyira abigha ni nzira ngulhu y’erileka ekyakakalha kyethu kikoleraye. (Matayo 28:19, 20) Omwa 1925, omwatsi ow’abya akabugha athi “Ekyakakalha Omwa Mwirimya” mwakangania ngoku omwa biro by’enyuma-nyuma, sihali mundu oyuwanga sighere muthaleghulha okwa Mukama amathendi kolesya “akaghisa k’erileka ekyakakalha kiwe kikoleraye.” Neryo omwatsi oyo mwabugha athi: “Atholere iniakolha eki omw’ibwira abandu omwa kihugho engulhu yuwene, n’erihambania engebe yiwe n’enzira y’ekyakakalha.” (E Watch Tower, ey’Okwomukagha 1, 1925) Eryongera okw’ithulira, emibere yethu yikaha Yehova y’olhukengerwa. Abandu banene bakathulhangira thukathulira. Thukabya thukabahikako n’eribaramukya ithunatsangire, kikaleka ibathuthunga kw’amalengekania awuwene na Nyamuhanga wethu oyo thukaramaya.

⁵ Yesu mwabwira abigha biwe athi: “Omughulhu mukingira omo nyumba eyo, mukerayebo.” (Matayo 10:12) Omwa bulhambu obwa Yesu athuliramu, abya mubere w’abandu erikokya ab’ehandi omwa manyumba wabu. Munabwire, omwa myanya mingyi kwa bithakiri bithya. Abandu bakasagha kutse eripona bakalhangira ow’ehandi akahika oku wabu. Aliwe thwamabya ithunatsangire kandi ithune b’olhukeri, ibanganayowa buholho. Wukabya wukathulira ahakabya bandu bangyi omw’ikolesya akaggali, wune wathalhangira ngoku wamasenyenya n’eriramukya abandu iwunatsangire, bakayowa buholho eryasa n’erimya ekitabu? Nibya bangananza n’eritsukisya omukania!

6. Ni kyahi ekikawathikaya mughalha wethu na mukali wiwe abakulire omo myaka eribya ibanawithe omuhwa omw’ithulira?

⁶ Mughalha wethu na mukali wiwe abakulire omo myaka e England sibanga thasyathoka erithulira nyumba okwa nyumba ngoku babya bakakolha kundi amaghalha wabu syuwene. Neryo bakahira emeza eyiri kw’ebitabu eyihya w’enyumba yabu. Bikere hakuhi n’esukuru, neryo bakahira ebitabu ebyanga tsemesya ababuthi abakasyenda abaana babu by’okwa meza. Abandi babuthi babirimya ebitabu ebi imwamuli n’ekitabu Questions Young People Ask​—Answers That Work, e Volyumu 1 na 2. Mwali wethu omutemburi mughulhu mungyi akabya inianemuyiyunga okw’eka eyi. Ababuthi bakalhangira ngoku atsangire kandi ngoku eka eyi yanzire eriwathikya abandi. Nibya omubuthi mughuma abiritsuka erigha e Biblia.

7. Wanga wathikya wuthi abathibithi abali omwa bulhambu bwenyu?

⁷ Omo myaka ya lino-lino, abangyi babirithibitha erilhua omwa bihugho byabu neryo lino ni bathibithi omwa bindi bihugho. Wangakolhaki eriwathikya abathibithi abali omwa bulhambu bwenyu erigha oku Yehova? Eky’erimbere, iwangan’igha eriramukya omwa mubughe wabu. Eryongera okw’ekyo,  omw’ikolesya e JW Language app, wangan’igha ebinywe ebyangana leka ib’imana n’erikania nawu. Neryo iwangana bakangania evidiyo n’ebitabu ebiri omwa mubughe wabu ebiri okwa jw.org.​—Eryibuka Ebihano 10:19.

8, 9. (a) Emihindano yethu ey’ahakathi-kathi k’eyenga yikathuwathikaya yithi? (b) Ababuthi banga wathikya bathi abaana babu eryuwania erisubirya lyabu okwa mihindano?

⁸ Yehova akathuha ebya thukayithagha ebyonyine-nyine erithoka erithulira ndeke. Ng’eky’erileberyako, ebya thuk’igha okwa muhindano owa Engebe Yethu n’Omubiiri Wethu bikaleka ithwasika bikahika okw’isuba okwa bakanzisibawa n’eritsukisya abigha be Biblia.

⁹ Abagheni bakabya bakasa okwa mihindano yethu, bakatsema abaana bethu bakasubirya. Wangan’eghesya abaana bawu erisubirya omwa binywe byabu. Abandi bandu babiryasa omwa kwenene busana n’eriowa abaana bakakania okw’ikirirya lyabu omwa nzira nyolho kandi erilhua okwa muthima.​—1 Abanya Korinto 14:25.

10. Eriramya ly’eka lyanga wathikya lithi amaka wethu eryongera eribya bughuma?

¹⁰ Thukabya thukalengaho eriwathikya eka yethu erikolha haghuma omwa bughuma n’obuholho, thukaha Yehova y’olhukengerwa. Ng’eky’erileberyako, wamabya iwuli mubuthi, hira h’endegheka y’erikolha Eriramya ly’Eka mughulhu wosi. Amaka mangyi  akalebaya e JW tivi haghuma, n’enyuma waho ibakania ngoku bangakolesya ebya bam’igha. W’ibuke ngoku obusondoli obwa mwana mulere akayithagha buli mbaghane okwa bw’omulengwa akayithagha. Kolha ekyosi-kyosi ekya wangathoka eriwathikya obuli mughuma omw’eka erighasirwa omw’iramya ly’eka.​—Esyonyimbo 148:12, 13.

11-13. Thwanga wathikya thuthi ekithunga kyethu eryongera eribya bughuma?

¹¹ Nomuwangabya iwuli mulere, wangana wathikya omw’ileka obuli mundu omwa kithunga iniayowa ini w’omughaso. Enzira y’erikolera mw’ekyo ly’erinywana balikyethu abakulire. Babulhaye ekya biribawathikya erikolera Yehova habw’emyaka mingyi. Iwangana bighirako bingyi. Eki ikikendi bahimba nawu ikyakuhimba! Ithwe bosi mbulha thukulire kutse thuli balere, thwangana leka abagheni abakasa okwa Kisenge ky’Obwami ibayowa buholho. Wanganabaramukya, iwabasenyenyerya, iwabawathikya eribana ah’erikalha, n’eribakangania abandi. Leka bayowe buholho.

¹² Wamahebwa omubiiri w’erisondolha emihindano y’erithulira, wangana wathikya abakulire omo myaka erileka ekyakakalha kyabu kibye ikinemukolerya ndeke. Lhangira wuthi bakathunga obulhambu obubatholere. Hiraho endegheka ey’abalere erikolha nabu. Balikyethu abakulire n’abatsekire omwa maghalha mughulhu mungyi bakabya ibanemuyowa nabi eribya isibanga thasyathulira ngoku babya bakathulira kera. Aliwe ibakendi yowa ndeke bakaminya ku wubatsomene kandi ku wukayitheghereraya emibere eya balimu. Mbulha bakulire bungahi kutse babirighunza omwa kwenene mw’emyaka mingahi, olhukeri lhwawu lhwangana leka ibathasyalholha embere erithulira n’omuhwa.​—Abalawi 19:32.

¹³ Abaisraeli mubatsemera eriramya Yehova haghuma. Omuhandiki w’esyonyimbo mwahandika athi: “Ni ky’eriswekya kandi ni kibuya abandu ba Nyamuhanga bam’ikalha haghuma ng’abaana abasubeneko!” (Soma Esyonyimbo 133:1, 2.) Mwasosekania obughuma obu n’amaghutha w’obuhakabibwa, aw’akaheheraya omubiiri n’eribeha ndeke. Kuthya nethu, thwangana heherya balikyethu omw’ibya bandu batsangire n’ab’olhukeri. Eki kikaleka ekithunga ikyongera eribya bughuma. Mbwino wangana thwamu eriminya ndeke balikyenyu omwa kithunga?​—2 Abanya Korinto 6:11-13.

14. Wangaleka wuthi ekyakakalha kyawu erikolerya aho w’ikere?

¹⁴ Ekyakakalha kyawu kyangana kolerya nomuwangabya iw’ikere hayi. Olhukeri lhwawu lhwangana leka abataka bawu ibanza erigha oku Yehova. Yibulhaye: ‘Abataka baghe banyiwithe kw’amalengekaniaki? Omuyi waghe ane omwa buyithondeke kandi anahenirye? Akanaleka omwanya owa w’ikeremu iniabya inianalhangirikire ndeke? Omwa butaka bwaghe nganasibwe ng’oyukawathikaya abandi?’ Bulhaya abandi Bema ba Yehova olhukeri lhwabu n’eky’erileberyako kyabu kibuya nga byabirihamba bithi okwa bahughu babu, abataka, ababakakolha nabu, kutse abo bakasoma nabu.​—Abanya Efeso 5:9.

15. Busana naki thutholere ithwabya ithunatheghirye?

¹⁵ Thwamabya thwanzire ekyakakalha kyethu kibye ikinemukolerya ndeke, thutholere ithwabya ithunasi obuthuku obwa thulimu. Mirundi mingyi, Yesu mwabwira abigha biwe athi: “Mutheghaye.” (Matayo 24:42; 25:13; 26:41) Thwamayowa “obulighe bunene” nga bukine haali kutsibu, isithwendibya ithunayitheghekire eriwathikya abandi erigha oku Yehova thukabana akaghisa. (Matayo 24:21) Omwakanya k’erikolerya, ekyakakalha kyethu ikikendiasa kikalima lyolho-lyolho obundi nibya ikyabulirana.

16, 17. Wangakolhaki eribya iwunatheghirye?

¹⁶ Lino thutholere ithwongera eribya ithunatheghirye. Emibere y’ekihugho yinemwongera eritsanda. Aliwe thunasi ngoku enduli yikendyasa okwa buthuku bwenyine-nyine obwa Yehova abirihiraho. (Matayo 24:42-44) Thunalindirire ekyo, thutholere ithwaghumisirizya n’erihwerya amalengekania okwa buthuku bwethu bw’embere. Soma e Biblia buli kiro, kandi isiwaleka erisaba Yehova. (1 Petero 4:7) Ighira oku balikyethu abamabirikolera  Yehova habw’emyaka mingyi. Kandi thwangana sekulya omwa bitabu byethu oko myatsi eyihambire okwa Bakristayo balikyethu.

¹⁷ Yihweraye omwa mubiiri wa Yehova. Kolera abandi ebikakanganaya olhukeri, n’erighunza buthuku buuli n’abalikyethu. Neryo iwukendi tsema, n’obuthuku ibukendibya nga bwamanguha. (Abanya Efeso 5:16) Abaghombe ba Yehova babiriberererya bingyi omwa myaka kikumi eyihwere. Kandi munabwire, thuwithe bingyi by’erikolha kwilhaba kera. Omubiiri wa Yehova abirikulha-kulhana kwilhaba ngoku thwabya thukalengekania. Ekyakakalha kyethu kinemukolerya kutsibu!

18, 19. Abasyakulhu banga thuwathikya bathi erikolera Yehova n’omuhwa? Iha eky’erileberyako.

¹⁸ Nomwakine indi thukasobaya kutsibu, Yehova akathulighira erimukolera. Erithuwathikya, akathuha “abandu b’olhusunzo,” abasyakulhu b’ekithunga. (Soma Abanya Efeso 4:8, 11, 12.) Neryo abasyakulhu bamakubungira, lhangira wuthi wukaghasirawa omwa buthuku obwa wukaghunza nabu, ighira okwa menge wabu n’erihabulha lyabu.

¹⁹ Ng’eky’erileberyako, mughalha wethu na mukali wiwe e England mubabana ebitsibu omwa butheke bwabu, neryo mubasaba obuwathikya erilhua okwa basyakulhu babiri. Mukali wiwe iniakayowa mwira wiwe nga syaliberereraya olhukwamirwa lhwiwe lhw’eribasondolha erikolera Yehova. Mwira wiwe iniakayowa nga syasi erikangirirya kandi mwaligha athi mughulhu wosi syalihiraho endegheka y’eriramya ly’eka. Abasyakulhu mubawathikya eka eyo erilengekania okwa ky’erileberyako kya Yesu. Mubahira omwa mulhume mw’omuhwa w’erigherererya emibere Yesu atsomaniramu abigha biwe. Mubahira omwa mukali mw’omuhwa w’erighumisirizya mwira wiwe. Kandi mubabaha n’amenge malebe ngoku bangakolha eriramya ly’eka n’abaana babu babiri. (Abanya Efeso 5:21-29) Omulhume mwalengaho kutsibu eribya muthwe w’eka oyuwene. Abasyakulhu mubamuhira mw’omuhwa ow’erithendi bikyako n’erilholha embere eriyikethera omulimu wa Yehova. Olhwanzo n’olhukeri olhwa basyakulhu bakanganaya mubyawathikya ndeke eka eyo!

20. Ni byahi ebyanga lhwiririra omw’ileka ekyakakalha kyethu kikoleraye?

²⁰ “Obutseme buli n’abo abakubaha Omwami Mukulhu, abakakwama ebihano biwe.” (Esyonyimbo 128:1) Iwukendi tsema wamaleka ekyakakalha kyawu kikoleraye. Neryo kangiriraya abandi oku Nyamuhanga, kolha ekyosi-kyosi eriwathikya eka yawu n’ekithunga eribya bughuma, kandi wubye iwunatheghirye. Abandi ibakendi lhangira eky’erileberyako kyawu kibuya neryo nabu ibanza eripipa Thatha wethu, Yehova.​—Matayo 5:16.