1, 2. (a) Ni kyahi ekya Yesu asaba omwa musabe wiwe w’erighunzerera n’abakwenda biwe? (b) Ni kyahi ekyangabya iky’ekyaleka Yesu inialengekania kutsibu okwa bughuma?

YESU abya akalengekania kutsibu okwa bughuma akalya ekihulho ky’erighunzerera n’abakwenda biwe. Iniane musaba haghuma nabu, mwabugha athi anzire abigha biwe ibabya mughuma, kutse bughuma, ngoku iyo na Thatha wiwe bali bughuma. (Soma Yoane 17:20, 21.) Abigha ba Yesu eribya bughuma, kyanga kangenie ngoku Yehova yuwathuma Yesu okwa kihugho. Abandu bangathokire eriminyerera abigha ba Yesu ab’okwenene busana n’olhwanzo olhwa bawithirene, kandi olhwanzo olhu lhwangalekire ibabya omwa bughuma.​—Yoane 13:34, 35.

² Thwangana yitheghererya ekyaleka Yesu iniakania kutsibu okwa bughuma omw’igholho-gholho eryo. Abya iniabirilhangira abakwenda biwe isibali bughuma ndeke. Ng’eky’erileberyako, abakwenda mubakuba obuhaka “nga nindi yo wasyahulhwa mwa mukulhu,” ekindu ekya babya ibanakolire. (Luka 22:24-27; Mariko 9:33, 34) Obundi buthuku, Yakobo  na Yoane mubanasaba Yesu bathi asyabaha emyanya y’ekitsumbi kinene omo Bwami bw’elhubulha, ibikalha hakuhi nayu.​—Mariko 10:35-40.

3. Ni kyahi ekyanga kakirye abigha ba Kristo eribya omwa bughuma, kandi ni bibulyo byahi ebya thukendi kaniako?

³ Eryanza eribya n’obuthoki n’ehamuli nene sibyo bisa ebyanga lekire abigha ba Kristo ibathabya omwa bughuma. Abandu omwa buthuku bwa Yesu ibaghabene busana n’eriponangana n’akasolholho. Abigha ba Yesu bangayithaghire eriyilhusya mw’amalengekania awathatholere ayo. Omo mwatsi ono, thukendikania okwa bibulyo bino: Yesu mwayitheya athi okwa kasolholho? Yesu mwawathikya athi abamukwamire erigha erithendi solholha abandi, kutse eribakolha ndeke, n’eribya bughuma? Kandi eky’erileberyako kya Yesu n’ebya akangiriraya bikathuwathikaya bithi eribya omwa bughuma?

4. Thaha eby’erileberyako ebikakanganaya akasolholho aka Yesu abana.

⁴ Na Yesu nayu mwabana akasolholho. Omughulhu Filipo abwira Natanaeli athi abiribana Masiya, Natanaeli mwabugha athi: “Kw’ekindu kyowene kyanganalhua e Nazareti kwehi?” (Yoane 1:46) Obundi Natanaeli abya inianasi ngoku Masiya angabuthirwe e Betelehemu, ngoku kine omwa buminyereri obuli omo Mika 5:2. Angabya imwalengekania athi e Nazareti siyiwithe kitsumbi kinene eribya iyanganabya ewabu Masiya. Kandi habya ihane Abanya Yudea ababya baghayire Yesu busana n’eribya ini we Galilaya. (Yoane 7:52) Abanya Yudea bangyi babya bakalengekania bathi abandu be Galilaya ni b’ahisi. Abandi Bayuda mubalengesya eritsuma Yesu omw’imwahulha mwa Munya Samaria. (Yoane 8:48) Abasamaria babya b’ekindi kihanda, kandi n’edini yabu yabya mbaghane okwa y’Abayuda. Abanya Yudea n’Abanya Galilaya sibabya basikirye Abasamaria kandi isibali bendana.​—Yoane 4:9.

5. Ni kasolholho kahi aka bigha ba Yesu babana?

⁵ Kandi n’abasondoli b’edini y’Abayuda nabu isibasikirye abigha ba Yesu. Abafarisayo ibakabahulha mwa “bathakirwa.” (Yoane 7:47-49) Abafarisayo ibakalhangira omundu wosi-wosi oyuthasomera okwa masukuru w’edini y’Ekiyuda kandi oyutheghendera okwa mibere yabu ng’oyuthawithe mughaso kandi ng’omundu wa buli kiro. (Emibiri 4:13) Yesu n’abigha biwe mubasolholhwa kundi abandu b’okwa buthuku obo ibakayiheka busana n’edini yabu, ebitsumbi byabu, n’ekihanda kyabu. Kandi akasolholho aka mukahamba okwa bigha biwe n’amalengekania wabu okw’abandi. Eribya ibane bughuma, ibatholere erihindulha amalengekania wabu.

6. Kolesaya eby’erileberyako ebikakanganaya ngoku akasolholho kangana thuhambako.

⁶ Na munabwire ekihugho kyoswire mw’akasolholho. Abandu bangana thukangania akasolholho, kutse nethu ithwabya nga thwamakangania abandi b’akasolholho.  Mwali wethu lino oyuli mutemburi e Australia akabugha athi: “Ingye eripona ab’engoba nyeru mukyongera ingahwerya amalengekania okwa buthe bulingirirania obwabya okwa batsuka omwa Australia​—kera na munabwire.” Kandi omubere w’eripona oyo mwongera busana n’abandi erimukolha nabi. Mughalha wethu e Canada akabugha ngoku abya akayowa athi: “Munalengekania indi abandu abakabugha Olhufaranza balengire abandi.” Akabugha athi ekyo, mukyaleka iniapona abakabugha Olhusungu.

7. Ni kyahi ekya Yesu akolera akasolholho?

⁷ Ngoku kyanabya omwa buthuku bwa Yesu, amalengekania w’akasolholho mughulhu mungyi awithe akaghalha kandi akalire erihindulha. Ni kyahi ekyo Yesu akolera eriyowa ng’eryo? Eky’erimbere, iyo mwathabya mw’akasolholho. Inianzire buli mundu. Mwathulira abawithe oko bindu n’abanakwa, Abafarisayo n’Abasamaria, nibya n’abasolesya n’abakolha nabi. Ekyakabiri, Yesu mweghesya abigha biwe n’eribahiriraho eky’erileberyako ngoku sibatholere bakayilhalikirira abandi kutse eribasolholha.

8. Ni musingyi wahi mukulhu owakaleka ithwabya bughuma? Soborera.

⁸ Yesu mwakangirirya omusingyi mukulhu owakaleka ithwabya bughuma. Mwabwira abigha athi: “Inywe bosi muli balikyethu.” (Soma Matayo 23:8, 9.) Ni bugha ambu, ithwe bosi thuli balikyethu kundi ithwe bosi thuli baana ba Adamu. (Emibiri 17:26) Yesu mwasoborera ngoku abigha biwe owundi ni mughalha kutse mwali w’obu wundi kundi abosi bakathwalha Yehova mwa Thatha wabu w’elhubulha. (Matayo 12:50) Kandi abosi babya ibabiribya omw’ihiika lya Nyamuhanga kandi ibali bughuma omo lhwanzo n’erikirirya. Ky’ekyaleka abakwenda omwa syobaruha esyo babya bakahandikira ebithunga ibabya bak’ahulha abandi Bakristayo mwa balikyabo.​—Abanya Roma 1:13; 1 Petero 2:17; 1 Yoane 3:13.

9, 10. (a) Busana naki Abayuda sibabya bawithe ekyangaleka ibayiheka busana n’ekihanda kyabu? (b) Yesu mwakangania athi ngoku sikitholere erighaya abandu b’ekindi kihanda? (Lebaya ekisasani ekiri okw’itsuka ekya 1.)

⁹ Yesu abere abiribwira abigha biwe ngoku batholere ibayilhangira owundi ini mulikyabu wundi, mwakangania ku batholere ibayikehya. (Soma Matayo 23:11, 12.) Ngoku thwanabirilhangira, ihakanayira emiyiheko iyaghabulha abakwenda. Kandi omwa buthuku bwa Yesu, abandu ibakayiheka busana n’ekihanda kyabu. Abayuda ibikirirye bathi balengire abandi busana n’eribya baana ba Abrahamu. Aliwe Yoane mubatizya mwababwira athi: “Nyamuhanga anganathoka erihangania amabwe aya mo baana busana na Abrahamu.”​—Luka 3:8.

¹⁰ Yesu mwakangirirya athi ni kibi abandu eriyiheka busana n’ekihanda kyabu. Eki mwakikangania ndeke-ndeke omukangirirya w’Emighambo akamubulya athi: “Mulikyethu nindi kwehi?” Erisubirya ekibulyo ekyo, Yesu mwaya olhughano. Abibi mubaswirya Omuyuda n’erimusigha okwa nzira. Nomwakine indi abandi Bayuda mubalhabaho, mubathamuwathikya. Aliwe Omusamaria mwakwira Omuyuda y’obulighe neryo amamuwathikya. Yesu mwaghunzerera olhughano lhwiwe omw’ibwira omukangirirya oyo athi nayu atholere iniabya ng’Omusamaria oyo. (Luka 10:25-37) Yesu mwakangania ngoku Omusamaria angan’eghesya  Abayuda ekya kikamanyisaya erianza abataka babu.

11. Ni kyahi ekyaleka abigha ba Yesu ibayithagha erithendibya n’akasolholho, kandi mwabawathikya athi eriyitheghererya ekyo?

¹¹ Yesu athali aghenda elhubulha, mwabwira abigha biwe athi bathulire “omo Yudea yosi, ne Samaria, n’erihika oko nduli-nduli sy’ekihugho.” (Emibiri 1:8) Erithoka eki, abigha ba Yesu ibatholere ibayihamu emiyiheko n’akasolholho. Yesu abya iniabirikania ngendo-ngendo okwa mibere eyuwene eyiri omwa b’ebindi bihanda, kandi eki mukyathegheka abigha biwe erithulira okwa bandu b’ebihanda byosi. Ng’eky’erileberyako, mwasima omukulhu w’abasirikali ow’ekindi kihanda oyuwabya awithe erikirirya linene. (Matayo 8:5-10) Omwa tawuni y’ewabu eye Nazareti, Yesu mwasoborera ngoku Yehova awathikaya ab’ebindi bihanda, ng’omukali Omufoiniki owe Zarepata n’omuhagha Omusuria ye Namani. (Luka 4:25-27) Kandi Yesu mwathulira n’omukali Omusamaria nibya amaghunza omwa tawuni ye Samaria mw’ebiro bibiri kundi abandu mubatsemera omwatsi wiwe.​—Yoane 4:21-24, 40.

12, 13. (a) Abakwenda mubabya bathi Yesu akathulira omukali Omusamaria? (Lebaya ekisasani ekiri okw’itsuka ekya 2.) (b) Ni kyahi ekikakanganaya ngoku Yakobo na Yoane mubathayitheghererya ndeke ekya Yesu abya akanza eribakangirirya?

¹² Sikyabya kyolho abakwenda eribya butsira kasolholho. Mubasweka bakalhangira Yesu akabya inianzire erithulira omukali Musamaria. (Yoane 4:9, 27) Busana naki? Obundi kundi abakulhu b’edini y’Ekiyuda babya isibangakania n’omukali ahali abandu, kandi kutsibu-tsibu omukali Musamaria oyuwithe erina libi. Abakwenda mubabwira Yesu bathi alye, aliwe Yesu abya iniabiritsema erikania n’omukali kyamaleka iniabya isyakitsomene n’erirya. Nyamuhanga abya anzire Yesu athulire, kandi erikolha ekya Thatha wiwe anzire, nibya n’erithulira omukali Omusamaria, lyabya ng’ebyalya okw’iyo.​—Yoane 4:31-34.

¹³ Yakobo na Yoane mubathayitheghererya erisomo likulhu eryo. Abigha ibane haghuma na Yesu e Samaria, mubasondya omwanya w’erikesyamo omo kayi ke Samaria. Aliwe Abasamaria mubaghana. Yakobo na Yoane mubahithana erihika okw’ibwira Yesu bathi ngababirikire omuliro erilhua elhubulha aheraye ekyalu kyosi ekyo. Yesu mwabakunga erikalire. (Luka 9:51-56) Obundi Yakobo na Yoane sibanga hithene bathya eki ku kyabya ikiryabya ewabu e Galilaya. Bahithana obundi busana n’eribya mw’akasolholho. Enyuma w’aho, omughulhu Yoane athulira Abasamaria neryo abangyi bamamuhulikirira, angabya imwahemuka busana n’amalengekania agho abya nagho enyuma.​—Emibiri 8:14, 25.

14. Ekitsibu ekya eky’akasolholho mukyahwa kithi?

¹⁴ Buthuku buke enyuma we Pentekote omwaka wa 33, omwa kithunga mumwabya ekitsibu ky’akasolholho. Balikyethu babere bakaghabira abakwakali abali omwa buyithawa b’ebyalya, mubasolholha abakwakali abakabugha Ekigiriki. (Emibiri 6:1) Eki kyangabya ikyabya busana n’akasolholho k’omubughe. Abakwenda mubaghunzaho ekitsibu ekyo omwa byalhuba. Mubasombolha abalhume musanju abatholere, erighaba ebyalya omwa bulingirirania. Abosi babya bawithe amena w’Ekigiriki, ekyangabya imukyahumulikania abakwakali ababya bahithene.

15. Petero mwigha athi erithendi solholha mundu wosi-wosi? (Lebaya ekisasani ekiri okw’itsuka ekya 3.)

 ¹⁵ Omwaka wa 36, abigha ba Yesu mubatsuka erithulira abandu b’ebihanda byosi. Ekyo kithe kyabya, mughulhu mungyi Petero iniakabya n’Abayuda basa. Neryo Nyamuhanga mwakikangania ndeke-ndeke ngoku Abakristayo sibatholere bakabya n’akasolholho, neryo Petero mwathulira Kornelio, omusirikali Omuroma. (Soma Emibiri 10:28, 34, 35.) Enyuma w’aho, Petero mwabya akasiba n’erirya n’Abakristayo abathe Bayuda. Aliwe ihamabirilhaba emyaka, iniane omwa tawuni ye Antiokia, mwaleka erirya n’Abakristayo abathe Bayuda. (Abanya Galatia 2:11-14) Paulo mwahabulha Petero, na Petero mwaligha erihabulha eryo. Thukaminya thuthi? Omughulhu Petero ahandikira Abakristayo Abayuda n’abathe Bayuda omwa Asia Enyike, mwakania ngoku ni kikulhu erianza balikyethu abosi.​—1 Petero 1:1; 2:17.

16. Abakristayo b’erimbere mubaminywa okuki?

¹⁶ Kilhangirikire, ngoku busana n’eky’erileberyako kya Yesu, abigha mubigha erianza “abandu bosi.” (Yoane 12:32; 1 Timoteo 4:10) Nomwakine indi mukyathwalha buthuku, mubahindulha amalengekania agho babya bawithe okwa bandu. Nibya Abakristayo b’erimbere mubaminywa ng’abanzene. Omo mwaka ng’owa 200, omuhandiki iya Tertullian mwahandika ebya bandu babya bakabugha okwa Bakristayo athi: “Banzene,” kandi “Bayitheghekire owundi eriholera owundi.” Kundi Abakristayo abo mubambalha “omundu muhya-muhya,” mubigha erilhangira abandu bosi ib’ingene, ngoku Nyamuhanga akanabalhangira.​—Abanya Kolosai 3:10, 11.

17. Thwanga yilhusyamo thuthi amalengekania wosi-wosi w’akasolholho? Iha eby’erileberyako.

¹⁷ Na munabwire, kyangana thuthwalira obuthuku eriyilhusya mw’amalengekania w’akasolholho. Mwali wethu e France akasoborera ngoku eki kyabirimukalira.  Akabugha athi: “Yehova abirinyeghesya olhwanzo nga niki, erianza emisindo yosi y’abandu nga kikamanyisayaki. Aliwe ngakin’igha erirwanisya omubere w’erisolholha abandi, kandi mughulhu wosi sikyolho. Ky’ekikaleka ingalholha embere erihirakyo omwa misabe.” Mwali wethu omwa Spain akabugha athi hakanayira iniayithagha erirwanisya erithunga amalengekania awathatholere okwa bandu balebe. Akabugha athi: “Mughulhu mungyi ngathoka. Aliwe nganasi ku ngatholere inalholha embere erihira h’akaghalha. Yehova asingya, ngatsemire eribya omw’ihiika eriri bughuma.” Ithwe bosi thutholere ithwalengekania kutsibu okwa malengekania agho thuwithe. Mbwino nethu thunawithe amalengekania wosi-wosi w’akasolholho agho thutholere ithwayilhusyamo?

18, 19. (a) Ni nzumwa syahi esikaleka ithwangirira obuli mundu? (b) Eki thwanga kikolha thuthi?

¹⁸ Ni kibuya eryibuka ngoku ithwe bosi thwanabya haali oku Nyamuhanga. (Abanya Efeso 2:12) Aliwe Yehova mwathuletha eyo ali omo lhwanzo. (Hosea 11:4; Yoane 6:44) Na Kristo mwathwangirira. Mwalhangira athi thukabya b’okw’ihiika lya Nyamuhanga. (Soma Abanya Roma 15:7.) Nomo thuthahikene, omwa lhukeri Yesu abirithuligha, neryo sithutholere thukalengekania okw’isolholha mundu wosi-wosi!

¹⁹ Thunemuseghera okw’ihwererera ly’omughulhu mubi ono, abandu bakendyongera erighabana, eribya n’akasolholho, n’eripona abandi. (Abanya Galatia 5:19-21; 2 Timoteo 3:13) Aliwe ithwe ng’abandu ba Yehova, thukasondekanaya “amenge awakalhua endatha” awakathuwathikaya erithendibya n’akasolholho n’erikulha-kulhania obuholho. (Yakobo 3:17, 18) Thukatsema erinywana abandu b’ebindi bihugho, eriligha emibere bakakoleramu ebindi bindu, obundi nibya n’erigha omubughe wabu. Thwamakolha eki, thukabana obuholho “ng’olhusi” n’obulingirirania “ng’ebisunda by’omwa ngetse.”​—Isaya 48:17, 18.

20. Bikabya bithi olhwanzo lhwamahindulha amalengekania n’eriyowa lyethu?

²⁰ Mwali wethu erilhua Australia omughulhu igha e Biblia, akasolholho n’eripona abandi ebyabya bimwoswiremo mubyaghenda bikabulirana. Olhwanzo mulhwahindulha amalengekania n’eriyowa liwe. Mughalha wethu we Kanada oyukabugha Ekifaranza akabugha athi hathya abirilhangira ngoku ekikaleka mughulhu mungyi abandu ibapona abandi ly’eribya isibabasi. Mwigha ngoku “emibere y’abandu siyirisighikira okwa mwanya ogho babuthirwemo.” Nibya mwathahya omukali oyukabugha Olhusungu! Eby’erileberyako ebi bikakanganaya ngoku olhwanzo lhukakinda akasolholho. Olhwanzo lhukathuboha haghuma omwa kibohi ekithe kyangathwika.​—Abanya Kolosai 3:14.