1. N’ikunga lyahi erya mukwenda Paulo ahandikira Abakristayo abahakabibwa?

OMUKWENDA Paulo mwakunga athi “simusosekanibawe.” Erisosekanibwa naki? “Simusosekanibawe n’emyatsi y’ekihugho kino.” (Abar. 12:2) Ebinywe ebyo Paulo abibwira Abakristayo ab’omwa kighonye ky’erimbere. Busana naki mwaha erikunga erikalire eryo okwa balhume n’abakali ababya bayihereyo oku Nyamuhanga kandi abahakabibwa?​—Abar. 1:7.

2-3. Sitani akalengesaya athi erithulhusya oku Yehova, aliwe emyatsi ‘eyikongothere’ thwanga lhusyayo thuthi omo malengekania wethu?

² Paulo ahandika kundi abandi Bakristayo babya ibali mutsuka erighendera okwa malengekania n’amenge awathatholere aw’ekihugho kya Sitani. (Efe. 4:17-19) Eki kyanganabya oko wosi-wosi okw’ithwe. Sitani nyamuhanga w’ekihugho kibi kino akabya akanza erithulhusya oku Yehova akakolesaya ebithegho muthina-muthina. Ekighuma ky’okw’ibyo ly’erikolesya amalengekania agho thwangabya ithuwithe okw’anza eriyikolera erina kutse erianza ebitsumbi. Angana kolesya emibere mirebe eya thwakuliramu, ekalikya yethu, kutse ekisomo ky’ekihugho ekya thuwithe erileka thulengekanaye ng’iyo.

³ Mbwino kinathokekene erilhusya omwa malengekania wethu mw’emyatsi ‘eyikongothere’? (2 Kor. 10:4) Lebaya erisubirya lya Paulo: “Thukaheraya obuhaka bw’amabehi, n’obuli mwatsi w’eriyiheka owakapona eriminya lya Nyamuhanga. Kandi  thukahamba obuli bulengekania erihirabo eriowa Kristo.” (2 Kor. 10:5) Busana n’obuwathikya bwa Yehova thwangana yilhusyamo amalengekania awathatholere. Ngoku omubatsi angana rwanisya ebyanga lhwiririra omw’irya esumu, Ekinywe kya Nyamuhanga kyangana rwanisya ebyanga lhwiririra omwa sumu y’ekihugho kya Sitani.

4. Ni mbinduka syahi esya bangyi omw’ithwe bakolha bakaminya ekwenene?

⁴ Thalengekania okwa syombinduka esyo wayithagha erikolha wukatsuka erigha ekwenene eyiri omwa Kinywe kya Nyamuhanga n’erithwamu erikolera Yehova. Abangyi omw’ithwe, eki mukyayithagha erileka erikolha ebithuwene. (1 Kor. 6:9-11) Ka thukasima Yehova erithuwathikya erileka emitse mibi eyi!

5. Ni bindu byahi bibiri eby’erikolha ebiri omu Abanya Roma 12:2?

⁵ Aliwe, thutholere ithwalholha embere erikolha esyombinduka. Nomuthwangabya ithwabirileka erikolha malholho awakalire thuthe thwabatizibwa, thutholere ithwalholha embere eriyitheya okw’ikolha ekyosi-kyosi ekyangaleka ithwasubira amalholho ayo. Ekyo thwanga kikolha thuthi? Paulo akasubiraya athi: “Simusosekanibawe n’emyatsi y’ekihugho kino, nikwa muleke Nyamuhanga eribabindulha n’eribaha obulengekania buhya-buhya.” (Abar. 12:2) Kwesi thutholere ithwakolha bindu bibiri. Eky’erimbere, thutholere ithwaleka ‘erisosekanibwa,’ kutse erighendera, okwa by’ekihugho kino. Ekyakabiri, thutholere ‘eribindulhwa’ omw’ithunga obulengekania buhya-buhya.

6. Ebinywe bya Yesu ebiri omu Matayo 12:43-45 bikathweghesayaki?

⁶ Embinduka eya Paulo akanayako siyirisubulira okwa misosere yethu. Yikahamba okwa mibere yosi y’engebe. (Lebaya akasanduko “ Erihinduka Kutse Eriyisosekania?”)  Thutholere ithwabya n’obulengekania buhya-buhya​—amalengekania wethu, eriyowa lyethu, n’esyongumbu syethu esy’omwakathi. Neryo ithwe bosi thutholere ithwayibulya, ‘Mbwino esyombinduka esyo ngakolha erigherererya Kristo ni sy’eyighulhu-ghulhu okwa mubiri, kutse kwenene nganemuhinduka omwa muthima n’omwa malengekania?’ Embaghane yitholere iyalhangirika. Omwa binywe biwe ebiri omu Matayo 12:43-45, Yesu mwakangania ekitholere ikyakolhwa. (Soma.) Ebinywe ebyo bikeghesaya erisomo likulhu: Sikirighunza eriyilhusyamo amalengekania awathuwene; thutholere ithwasubya omwa mwanya wagho mw’amalengekania wa Nyamuhanga.

7. Thwanga hindulha thuthi amalengekania wethu?

⁷ Mbwino kinathokekene erihindulha amalengekania wethu? Ekinywe kya Nyamuhanga kikasubiraya kithi: “Mubye bahya-bahya omwa mithima yenyu n’omwa malengekania wenyu. Mubye bandu bahya-bahya abahangikawa omwa kisosekanio kya Nyamuhanga, omwa bithunganene n’omwa bibuyirire by’ekwenene.” (Efe. 4:23, 24) Kwesi, kithokekene erihindulha amalengekania wethu, aliwe sikyolho. Sithutholere thukasubulira okw’irwanisya esyongumbu nyibi n’erileka erikolha ebithuwene. Thutholere ithwahindulha ‘amalengekania wethu.’ Mwamuli erihindulha esyongumbu syethu, emibere yethu, n’ebilhubirirwa byethu. Eki kikayithagha erilholha embere erihiraho akaghalha.

8-9. Eky’erileberyako kya mughalha wethu mughuma kikakanganaya kithi ekiyithawa ky’erihindulha obulengekania bwethu?

⁸ Thulebaye eky’erileberyako kya mughalha wethu oyuwabya mutsurumi kera. Abere abirileka obwabu n’amalhwa, mwatholera eribatizibwa, kyamaha obwema omwa bulhambu bwiwe. Aliwe erigholho lighuma, isihali halhaba buthuku alibatizibirwe, mwalengwako omwa nzira eyo athayitsulirye. Omuthamiri mwahika aho wiwe n’erianza erimutsukako amalhwa. Erimbere mughalha wethu mwayikakirya. Aliwe omulhume abere akatsuma erina lya Yehova, mughalha wethu mwahithana kutsibu amabya isyangathasyayikakirya. Mwahulhuka amayaswirya omulhume oyo. Ni kyahi ekyaleka iniakolha athya? Nomwakine indi erigha e Biblia mulyamuwathikya erikakirya obutsurumi bwiwe, abya isyali athoka eribindulha obulengekania bwiwe. Ni bugha ambu, abya isyali abinduka ndeke omw’isi siwe.

⁹ Aliwe, mughalha wethu mwathalhuhirira. (Emi. 24:16) Busana n’obuwathikya bw’abasyakulhu, mwalholha embere erikolha esyombinduka mbuya. Erighunzerera mwatholera eribya musyakulhu. Neryo erigholho lighuma, okwa Kisenge ky’Obwami, kandi mwabana ekiri ng’ekyamubyako. Omuthamiri abya iniakanza eriswirya omughuma w’okwa basyakulhu. Mughalha wethu mwakolhaki? Inianathekene, kandi omwa bwolho-bwolho, mwakania n’omuthamiri, n’erimuthekania, kandi amawathikya omulhume oyo erihika ewiwe. Ni kyahi ekyaleka mughalha wethu iniakolha athya? Mughalha wethu abya iniabirihindulha obulengekania bwiwe. Abya iniabiribya mundu w’obuholho, omwolho​—emibere eyikaha Yehova y’olhukengerwa!

10. Thutholere ithwakolhaki erikolha esyombinduka?

¹⁰ Esyombinduka esi sisiryasira kiro kighuma; kutse eriyiletha. Thwangana yithagha ‘eriyitsinga’ habw’emyaka mingyi. (2 Pet. 1:5) Eribya “omwa kwenene” habw’obuthuku bulebe sikirighunza. Thutholere ithwalengaho kutsibu eribindulha amalengekania wethu. Ebindu  birebe bikendi thuwathikya erikolha embinduka eyi. Thulebaye ebighuma by’okw’ibyo.

11. Erisaba likathuwathikaya lithi eribya n’obulengekania buhya-buhya?

¹¹ Erisaba kye kindu kikulhu eky’erimbere. Thutholere ithwasaba ng’omuhandiki w’esyonyimbo kw’akolha: “Iwe Nyamuhanga, wuhangike omuthima owene omw’isi waghe. Kandi wuhire ekirimu kithunganene omw’isi waghe.” (Esy. 51:10) Thutholere ithwaminya ngoku thukayithagha eribya n’obulengekania buhya-buhya n’erisaba Yehova y’obuwathikya. Thwanga kakasya thuthi ngoku Yehova akendi thuwathikya erihinduka? Ekya Yehova alhagha Abaisraeli ab’omuthima akalire ab’omwa buthuku bwa Ezekieli kyangana thughumya: “Naghe nasyahabo omuthima mughuma, nasyahira ekirimu kihya-kihya omw’isi wabo . . . nasyahabo omuthima w’omubiri,” ni bugha ambu, owakakwama obusondoli bwa Nyamuhanga. (Eze. 11:19) Yehova abya inianayitheghekire eriwathikya Abaisraeli abo erikolha embinduka, nethu anayitheghekire erithuwathikya.

12-13. (a) Erikwamana na Esyonyimbo 119:59, ni byahi ebya thukayithagha erighaniryako? (b) Ni bibulyo byahi ebya wutholere eriyibulya?

¹² Erighanirya kye kindu kikulhu ekyakabiri. Thukasoma Ekinywe kya Nyamuhanga buli kiro, thutholere ithwaghanirya, kutse erilengekania buuli, okwa mbinduka eyathutholere ithwakolha omwa bulengekania n’omw’iyowa. (Soma Esyonyimbo 119:59; Ebr. 4:12; Yak. 1:25) Thutholere ithwayirebya mw’emibere yosi-yosi eya thwangabya ithuwithe eyikakanganaya amalengekania w’ekihugho. Thutholere ithwaligha erilemererwa lyethu kandi ithwakolha kutsibu eriyilhusya lyomo.

¹³ Ng’eky’erileberyako, yibulhaye: ‘Ngane mw’eriri ng’ihale kutse obuha omwa muthima waghe?’ (1 Pet. 2:1) ‘Mbwino ngane mw’eyiri nga miyiheko busana n’aho ngakulira, ekisomo ky’ekihugho, kutse esyosente?’ (Emi. 16:5) ‘Nganaghaya abathawithe ebiri ng’ebyangawithe kutse ab’ekindi kihanda?’ (Yak. 2:2-4) ‘Ngananza ebiri omwa kihugho kya Sitani?’ (1 Yn. 2:15-17) ‘Nganatsemera eby’eriyitsemesya ebiri mw’eby’obutswatswa n’eby’obwithi?’ (Esy. 97:10; 101:3; Amo. 5:15) Eby’erisubirya okwa bibulyo ebi bikendi kuwathikya eriminya aho wutholere eryuwania. Omw’ihindulha ‘emyatsi eyikongothere’ omwa mithima yethu, ithukendi tsemesya Thatha wethu w’elhubulha.​—Esy. 19:14.

14. Busana naki ni kikulhu erisombolha abanywani abuwene?

¹⁴ Erisombolha abanywani abuwene kye kindu ekikulhu ekyakasathu. Thwanzire sithwanzire, banywani bethu bakathuhambako kutsibu. (Emi. 13:20) Okwa mubiiri kutse okwa sukuru, thukabya mughulhu mungyi n’abathe banga thuwathikya erithunga amalengekania wa Nyamuhanga. Aliwe, thwanganabana abandu abuwene ab’erinywana okwa mihindano y’Ekikristayo. Eyo ya thwanga hirirwamo amani, kutse eryibukibwa, “okwa lhwanzo n’emibiiri yuwene.”​—Ebr. 10:24, 25.

15-16. Sitani akalengesaya athi erihindulha amalengekania wethu?

¹⁵ Wibuke, ngoku Sitani anzire kutsibu erihindulha amalengekania wethu. Akakolesaya obuli mulingo w’engangirirya erikakirya Ekinywe kya Nyamuhanga erihamba okwa bulengekania bwethu.

¹⁶ Sitani akalholha embere eribulya ekibulyo ekiri ng’ekyo abulhaya Eva omw’irima lye Edeni: ‘Ko [kwenene] Nyamuhanga abiribugha athi . . . ?’ (Enz. 3:1) Omwa kihugho ekiri omwa buthoki bwa Sitani, thukabya  ithunemwowa ebibulyo ebikathulengako nga bino: ‘Nyamuhanga kwenene syalirighira omundu erithahya bakali bangyi? Kwenene Nyamuhanga syalianza muk’ibuka e Krisimasi kutse ebiro by’amabuthwa? Nyamuhanga wenyu kwenene akabugha athi isimwayako omusasi? Nyamuhanga w’olhwanzo kwenene akabugha athi isimwakolongana n’ab’okwinywe abahighithirwe?’

17. Thutholere ithwakolhaki thwamabulibwa ebyanga leka ithwathika-thikira ebya thwikirirye, kandi Abanya Kolosai 2:6, 7 hathi imukendi lhwiririraki?

¹⁷ Thutholere ithwayikethera ebya thwikirirye. Thwamathendi bana eby’erisubirya okwa bibulyo ebihambire okw’ikirirya lyethu, ikyangana thulethera erithika-thika. Erithika-thika eryo iryanganatsandya obulengekania bwethu n’erikirirya lyethu. Neryo kwesi, thutholere ithwakolhaki? Ekinywe kya Nyamuhanga kikathubwira kithi thubindule obulengekania, nuku thuthoke eriminya “erisonda lya Nyamuhanga” eribuya, erikatsemesaya kandi erihikene. (Abar. 12:2) Omw’iyeghesya buthumbya, ithukendi kakasya ngoku ebya thwabirigha omwa Biblia bihikire. Kandi ithukendi kakasya ngoku ebihano bya Yehova bihikire. Neryo, ng’omuthi, owawithe emirihi eyihandire, ithukendi handa ndeke emirihi, ithwasika omw’ikirirya.​—Soma Abanya Kolosai 2:6, 7.

18. Ni kyahi ekikendi thuwathikya eriyitheya okwa sumu y’ekihugho kya Sitani?

¹⁸ Owundi syanga kukamathirya erikirirya lyawu. Neryo lholha embere eribya muhya-muhya omwa bulengekania bwawu. Saba buthumbya kandi saba obuwathikya bw’omulimu abuyirire wa Yehova. Ghaniraya kutsibu kandi lholha embere erilebya amalengekania n’ebilhubirirwa byawu. Sondaya abanywani abuwene abakendi kuwathikya eribindulha obulengekania bwawu. Erikolha eki likendi kuwathikya erirwanisya n’eriyitheya okwa sumu y’ekihugho kya Sitani n’erithoka eriherya “obuhaka bw’amabehi, n’obuli mwatsi w’eriyiheka owakapona eriminya lya Nyamuhanga.”​—2 Kor. 10:5.