1. Busana naki thutholere ithwahulikirira erikunga lya Yesu?

OMWA buminyereri obuhambire okwa biro by’enyuma-nyuma, Yesu mwabugha athi: “Muyitheghaye, emithima yenyu siyirithoherawe . . . n’amalengekania w’engebe.” (Lk. 21:34) Thutholere ithwahulikirira erikunga eryo. Busana naki? Na lino, thunemubana ebitsibu ebinemuhika n’okwa bandi.

2. Ni bitsibu byahi ebya balikyethu bakabana?

² Hakanayira ithwabana ebitsibu bingyi okwa buthuku bughumerera. Eby’erileberyako bya bino. Omwema oyukahulhawamo John, * oyulhwalire oko bwongo, mwabbunika omwa muthima mukali wiwe akamusighania ibamabirighunza myaka 19 omwa butheke. Na bali biwe babiri mubaleka erikolera Yehova. Bob na mukali wiwe Linda mubabana ebitsibu ebiri mbaghane okwa bya John. Abosi mubaherya emibiiri yabu, n’eribya isibangathasyathoka eribya omwa nyumba eyo babyamo. Eryongera okwa bitsibu ebyo, Linda mwabanika mw’obukoni bw’omuthima obukalire, n’obundi bulhwere bwamatsuka eritsandya amaaka w’omubiri aw’erirwanisya amalhwere.

3. Erikwamana na Abanya Filipi 4:6, 7, thwangana kakasya kyahi?

³ Thwangana kakasya ngoku Omuhangiki wethu kandi Thatha w’olhwanzo, Yehova, akayitheghereraya eriyowa lyethu omughulhu thuli omwa maghaniryo. Kandi anzire erithuwathikya erighumira ebitsibu ebyo thukabana. (Soma Abanya Filipi 4:6, 7.) Ekinywe kya Nyamuhanga kiri mw’eby’erileberyako bingyi ebikakanganaya ebitsibu ebya baghombe biwe  babana. Kandi kikakanganaya emibere Yehova abawathikirayamu erighumira amaghaniryo ayo. Thulebaye eby’erileberyako bike.

4. Ni bitsibu byahi ebya Eliya abana, kandi mwathunga malengekaniaki oku Yehova?

⁴ Eliya mwakolera Yehova omwa mighulhu eyikalire kandi mwabana ebitsibu ebikalire. Omwami Ahabu, omughuma w’okwa bami babi be Israeli, mwathahya Yezebeli, omuramya mubi wa Baali. Abosi babiri mubusulya ekihugho mw’eriramya lya Baali n’er’itha abangyi b’okwa baminyereri ba Yehova. Eliya mwathoka eriyibalira. Kandi mwalhama okwa nzalha nene omw’iyikethera Yehova. (1 Bam. 17:2-4, 14-16) Eryongera okw’ekyo, Eliya mwayikethera Yehova omughulhu abaminyereri n’abaramya ba Baali bamuhakanisaya. Mwahira omwa Baisraeli mw’omuhwa w’erikolera Yehova. (1 Bam. 18:21-24, 36-38) Eliya abya iniabiriyilhangirira bingyi ebikakanganaya ngoku Yehova anemumusighika omwa mighulhu eyikalire eyo.

5-6. Erikwamana na 1 Abami 19:1-4, Eliya mwayowa athi, kandi Yehova mwakangania athi kw’anzire Eliya?

⁵ Soma 1 Abami 19:1-4. Aliwe Eliya mwasagha omughulhu Omwami-kali Yezebeli am’ubahisaya athi akendi mw’itha. Neryo mwathibitha e Beri-seba. Mwahwa amani indi ‘mwasaba athi ahole.’ Ni kyahi ekyaleka iniayowa athya? Eliya abya mundu oyuthahikene, “abya mundu nga thwe.” (Yak. 5:17) Angabya imwayowa amaghaniryo iniabirimubundamirya n’erimulhuhya. Kikalhangirika Eliya nga  mwayowa akaghalha kiwe k’erisighika eriramya ly’okwenene nga sikathaghanduka, nga sihali mbinduka yosi-yosi omwa Israeli, kandi nga n’iyo musa oyukinakolera Yehova. (1 Bam. 18:3, 4, 13; 19:10, 14) Ithwangana sweka omuminyereri muthaleghulha oyu eriyowa athya. Aliwe Yehova mwayitheghererya eriyowa lya Eliya.

⁶ Yehova mwathatsumanga Eliya busana n’eriyowa liwe. Omwakanya k’ekyo, mwawathikya Eliya erithasyathunga akaghalha. (1 Bam. 19:5-7) Enyuma waho, omwa bwolho-bwolho, Yehova mwahengulha amalengekania wa Eliya omw’imukangania obuthoki Bwiwe bunene. Yehova neryo mwamukangania ku akinawithe abandi bandu 7,000 omwa Israeli abaghana eriramya Baali. (1 Bam. 19:11-18) Omwa nzira eyi, Yehova mwakangania Eliya ngoku amwanzire.

7. Ni humulikania lyahi eryathukabana okwa mibere Yehova awathikirayamu Eliya?

⁷ Wune omwa mibere eyikaletha amaghaniryo? Kikahumulikanaya eriminya ngoku Yehova mwayitheghererya eriyowa lya Eliya! Kikathukakasaya ngoku nethu akayitheghereraya ebitsibu byethu. Anasi erilemererwa lyethu, kandi nibya anasi amalengekania n’eriyowa lyethu. (Esy. 103:14; 139:3, 4) Thwamagherererya Eliya omw’iyikethera Yehova, iniakendi thuwathikya erighumira ebitsibu ebikathulethera amaghaniryo.​—Esy. 55:22.

8. Yehova akendi kuwathikya athi erighumira amaghaniryo?

⁸ Amaghaniryo anganaleka iwalengekania nabi, iwahwa amani. Ekyo kyamabya, ambi iwibuka ngoku Yehova akendi kuwathikya erighumira amaghaniryo. Akendi kuwathikya athi? Akabugha athi iwamubwira ebikakulyambaya. Akendi subirya erilhaka lyawu. (Esy. 5:3; 1 Pet. 5:7) Neryo mughulhu wosi saba Yehova, erimubwira ebitsibu byawu. Syendi kania nawu ngoku akanaya na Eliya, aliwe akendi kania nawu erilhabira omwa Kinywe kiwe, e Biblia, n’omwa kithunga kiwe. Emyatsi eya wukasoma omwa Biblia yangana kuhumulikania n’erikuha amaha. Kandi, n’abalikyenyu bangana kuhumulikania.​—Abar. 15:4; Ebr. 10:24, 25.

9. Omunywani omuyiketherwa angathuwathikya athi?

⁹ Omughulhu Yehova abwira Eliya athi ahe Elisa y’olhukwamirwa, mwabya iniamaha Eliya y’omunywani oyukayithaghisibawa kutsibu, oyuwangabya imwamuwathikya erighumira amaghaniryo wiwe. Kuthya, thwamabwira omunywani omuyiketherwa eriyowa lyethu, iniangana thuwathikya erighumira amaghaniryo wethu. (2 Bam. 2:2; Emi. 17:17) Wamayowa isiwuwithe omunywani oyo wangabwira eriyowa lyawu, saba Yehova akuwathikaye wubane Omukristayo oyukulire bunyakirimu oyuwanga kuhumulikania.

10. Eky’erileberyako kya Eliya kikathuha kithi amaha, kandi omulhaghe owali omu Isaya 40:28, 29 akathuwathikaya athi?

¹⁰ Yehova mwawathikya Eliya erighumira amaghaniryo n’eribya muthaleghulha habw’emyaka mingyi. Eky’erileberyako kya Eliya kikathuha amaha. Thwangana bana amaghaniryo mangyi awanga thulhuhya kinyamubiri n’omw’iyowa. Aliwe, thwamayikethera Yehova, iniakendi thuha amaaka awathukayithagha erilholha embere erimukolera.​—Soma Isaya 40:28, 29.

11-13. Amaghaniryo mwahamba athi okwa baghombe basathu ba Nyamuhanga abakera?

¹¹ Abandi abakanibweko omwa Biblia nabu mubabana amaghaniryo mangyi. Ng’eky’erileberyako,  Hana mwaghumira obulhumi bw’eribya ngumba n’akasekereryo ka mulikyabu. (1 Sam. 1:2, 6) Amaghaniryo mangyi wa Hana mwaleka iniabya omwa bulighe bungyi erileka inialira n’ebyalya erilhua okwa mathwe.​—1 Sam. 1:7, 10.

¹² Ihakanayira, Omwami Dawudi iniabya omwa maghaniryo mangyi. Thalengekania okwa bitsibu ebyo abana. Mwayowa nabi busana n’ebisobyo bingyi ebyo akolha. (Esy. 40:12) Mughalha wiwe mwanze ya Abusaloma mwamuyisamambulhako, n’enyuma waho Abusaloma mw’ithibwa. (2 Sam. 15:13, 14; 18:33) Kandi n’omughuma w’okwa banywani kundu ba Dawudi mwamughoberya. (2 Sam. 16:23–17:2; Esy. 55:12-14) Esyonyimbo nyingyi esya Dawudi ahandika sikakanganaya eriyowa liwe ery’erihwa amani n’eriyikethera liwe omu Yehova erighumire.​—Esy. 38:5-10; 94:17-19.

¹³ Enyuma waho omuhandiki w’esyonyimbo mwatsuka eriyighomba engebe y’abandu babi. Angabya iniabya mw’itsikulhu w’Omulawi ya Asafu, kandi iniakakolera “omwa hekalu.” Omuhandiki oyu mwabana amaghaniryo, awaleka iniabulha etseme n’erithendi tsemera ebyo awithe. Mwatsuka n’erithika-thikira emighisa eyikasa busana n’erikolera Nyamuhanga.​—Esy. 73:2-5, 7, 12-14, 16, 17, 21.

14-15. Eby’erileberyako bye Biblia bisathu bikathweghesayaki okw’isaba Yehova y’obuwathikya?

¹⁴ Abaramya abosi basathu abo thwamabirikaniako mubayikethera obuwathikya bwa Yehova. Mubamubwira erihangya-hangya lyabu omwa musabe. Mubamubwira ahathe eribisirira ebikaleka ibabya n’amaghaniryo. Kandi mubalholha embere erighenda ah’eriramirya Yehova.​—1 Sam. 1:9, 10; Esy. 55:22; 73:17; 122:1.

 ¹⁵ Omwa lhukeri Yehova mwasubirya obuli mughuma w’okw’ibo. Hana mwathekana omwa bulengekania. (1 Sam. 1:18) Dawudi mwahandika athi: “Omundu oyuthunganene akaghalhawa omo malighe mangyi, nikwa Omwami Mukulhu akamulhamaya omo wosi.” (Esy. 34:19) Kandi n’enyuma waho, omuhandiki w’esyonyimbo mwayowa Yehova ‘iniakamuwatha okwa byalha [biwe],’ erimusondolha omwa lhwanzo. Mw’imba athi: “Nikwa ingye, ni kibuya eribya hakuhi na Nyamuhanga! Omo Mwami Mukulhu Nyamuhanga ngabana omutheya.” (Esy. 73:23, 24, 28) Eby’erileberyako ebi bikathweghesayaki? Thukendibya ithune mubana ebitsibu ebikaletha amaghaniryo. Aliwe thwangana bighumira omw’ighanirya okwa mibere Yehova awathikirayamu abandi, erimuyikethera omw’isaba, n’omw’imwowa omw’ikolha ebyo akabugha athi thukole.​—Esy. 143:1, 4-8.

16-17. (a) Busana naki sithutholere thukayisolholha? (b) Thwanga thoka thuthi erithasyabana akaghalha?

¹⁶ Eby’erileberyako bisathu ebi bikathweghesaya erindi lisomo likulhu​—sithutholere thukayisolholha oku Yehova n’abandu biwe. (Emi. 18:1) Nancy, oyuwabya omwa maghaniryo manene mwira wiwe akamusighania, akabugha athi: “Ebiro binene isingalianza erilhangira  kutse erikania n’omundu owosi-wosi. Aliwe, iningabya ng’ongera eriyisolholha, n’obulighe ibw’ongera.” Nancy mwayowa ndeke omughulhu asondekanaya esyonzira sy’eriwathikiryamu abandi abawithe ebitsibu. Akabugha athi: “Iningahulikirira abandi bakanyibwira ebitsibu byabu. Munalhangira ngoku iningabya ingabatsomana, obulighe bwaghe ibukakeha.”

¹⁷ Thwangana bana akaghalha omw’ihindana okwa mihindano y’ekithunga. Thwamabya okwa mihindano, thuk’ongera eriha Yehova y’ehighisa ‘hy’erithuwathikya n’erithukirania.’ (Esy. 86:17) Okwa mihindano akathughumaya erilhabira omwa mulimu wiwe abuyirire, Ekinywe kiwe, n’abandu biwe. Emihindano yikathuha akaghisa ‘k’erisikania emithima.’ (Abar. 1:11, 12) Mwali wethu oyukahulhawamo Sophia akabugha athi: “Yehova n’abalikyethu mubaleka ingaghuma. Ekyanyiwathikaya kutsibu yabya iye mihindano y’ekithunga. Nabiriminya ngoku namayihwerya omw’ithulira n’eriyihira okwa kithunga, ngathoka ndeke erighumira amaghaniryo n’erihangya-hangya.”

18. Thwamahwa amani, ni byahi ebya Yehova angathuha?

¹⁸ Thwamahwa amani, ambi ithwibuka ngoku Yehova syalithulhagha erisyaghunzaho ebitsibu byethu kera na kera lisa, aliwe kandi ngoku akathuwathikaya erighumira ebitsibu lino. Akathuha “omuthima w’erianza n’amaaka” w’erisingura eriyowa ery’erihwa amani n’erithendibya n’amaha.​—Fil. 2:13, NW.

19. Ni kakasya lyahi erya thukabana omu Abanya Roma 8:37-39?

¹⁹ Soma Abanya Roma 8:37-39. Omukwenda Paulo akathukakasaya ngoku sihali ekyanga thughabulha oko lhwanzo lhwa Nyamuhanga. Thwanga wathikya thuthi balikyethu abanemulengaho erighumira amaghaniryo? Omwatsi owakakwamako akendi kangania ngoku thwanga gherererya Yehova omw’ikwira abandi b’obulighe n’erisighika balikyethu omughulhu bawithe amaghaniryo.