1. Yehova abirikolhaki okwa buli mughuma w’okw’ithwe?

YEHOVA abiriletha obuli mughuma w’okw’ithwe okw’iyo. (Yn. 6:44) Thalengekanaya ekyo nga kikamanyisayaki. Yehova abere akalhabya ameso omwa syobbiliyoni sy’abandu abali omwa kihugho kino, mwakulhangiramo ekindu ky’obughuli​—omuthima owali mw’okwenene ow’angana mwanza. (1 Emy. 28:9) Yehova anakwasi, akakuyitheghereraya, kandi akwanzire. Ekyo ka kikahumulikanaya!

2. Yesu mwakangania athi eritsomana eryo Yehova awithire obuli mbuli Yiwe?

² Yehova akutsomene kutsibu, kandi atsomene Abakristayo balikyenyu abosi. Erithuwathikya eriyitheghererya eki, Yesu mwalinganisya Yehova n’omulisya. Okwa syombuli 100 omwa kihangulho, omulisya iniakendi kolhaki 1 yamathalha? Iniakendi ‘sighania esyombuli 99 oko bithwe, n’eriyasonda-sonda embuli eyiryathalha.’ Omulisya iniakendibya akabanayo, isyenditsurumirayo. Iniakenditsema. Enzumwa ni yahi? Obuli mbuli ni y’obughuli embere sya Yehova. Yesu mwabugha athi: ‘Thatha waghe oyuli elhubulha syanzire omughuma w’okwa baana balere aba akahera.’​—Mt. 18:12-14.

3. Omo mwatsi ono thukendikania okuki?

³ Omo kwenene sithwanganza nahake eribya ndwikale y’abalikyethu. Thwanga yihighulha thuthi okw’ithwikalya abandi? Kandi thwanga kolhaki omundu amathuhithania? Thukendisubirya okwa bibulyo ebyo omo mwatsi ono. Aliwe thuthatsuka eriminya bingyi okwa “baana balere aba” abakanibweko omu Matayo sura 18.

4. ‘Abaana balere aba’ ba bahi?

⁴ ‘Abaana balere aba’ ba bigha ba Yesu ab’emyaka yosi. Mbulha ni b’emyaka mingahi, bali “ng’abaana balere” kundi bakabya ibanayitheghekire erikangiriribwa na Yesu. (Mt. 18:3) Nomubangabya ibalhuire omwa mibere muthina-muthina n’ekalikya n’amalengekania n’emibere ebithasosene, abosi bikirirye omu Kristo. Nayu, abanzire kutsibu.​—Mt. 18:6; Yn. 1:12.

5. Yehova akayowa athi omundu amathwikalya kutse erikolha nabi omughuma w’okwa bandu Biwe?

⁵ ‘Abaana balere aba’ abosi ni b’obughuli embere sya Yehova. Eriminya ng’akayowa athi busana nabu, thulebaye nga thukayowa thuthi bikahika okwa baana. Ni b’obughuli embere syethu. Thwanzire eribatheya kundi sibawithe maaka, basi bike, kandi sibawithe amenge awali ng’awa bakulhu. Kandi ngoku sithulyanza erilhangira owosi-wosi akakolhwa nabi, kutsibu-tsibu thukapona​—nibya ithwahithana​—omundu amakolha omwana ya nabi. Kuthya, Yehova anzire erithutheya. Akapona​—nibya iniahithana​—omundu amathwikalya kutse erikolha nabi omughuma w’okwa bandu Biwe!​—Isa. 63:9; Mk. 9:42.

6. Ngoku kiri omwa 1 Abanya Korinto 1:26-29, ekihugho kikalhangira kithi abigha ba Yesu?

⁶ Abigha ba Yesu bali ‘ng’abaana balere’ omwa yindi nzira yahi? Ibbwa omwa kihugho, ni bahi abakalhangirawa mwa b’omughaso? Abagaga, abasibwe, n’abawithe obuthoki. Mbaghane n’ekyo, abigha ba Yesu ibo bakabya ‘ng’abaana balere’ abathawithe mughaso. (Soma 1 Abanya Korinto 1:26-29.) Aliwe Yehova syali balhangira athya.

7. Yehova anzire ithwalhangira thuthi balikyethu?

⁷ Yehova anzire abaghombe biwe abosi, mbulha babirimukolera habw’emyaka mingyi kutse mubamatsuka erimukolera. Balikyethu abosi ni b’omughaso embere sya Yehova, neryo batholere ibabya b’omughaso n’embere syethu. Thutholere ithwanza abalikyethu abosi, butsira balebe basa. (1 Pet. 2:17) Thutholere ithwabya ithunayitheghekire erikolha ekyosi-kyosi ekyo thwanga thoka eribatheya n’eribatsomana. Thwamaminya ku thwabiriponesya kutse erihithania omundu, sithutholere thukakigheghena, erighunzerera thuthi omundu oyo akahithana lhuba-lhuba thuthi syatholere akabilhandako. Ni kyahi ekyangaleka abandi ibahithana? Obundi busana n’eyo bakulira, abandi balikyethu bakayowa mw’abandu bahisi. Abandi ni bahyaka omo kwenene; sibali baminya ndeke ekyo bangakolha abandu bamabasoberya. Mbulha ky’ekyahi okw’ebi, thutholere ithwayira ekyo thukakolha erilhungulha emyatsi. Aliwe n’ekindi, omundu oyukahithana lhuba-lhuba atholere iniaminya ngoku oyu ni mubere owathatholere ogho akayithagha erikolhako. Atholere iniakolha ekyo nuku athekane omwa bulengekania n’eribya bughuma n’abandi.

8. Ni malengekania wahi aw’aby’akanyirire awahamba okwa bigha ba Yesu?

⁸ Ni kyahi ekyaleka Yesu iniakania okwa “baana balere aba”? Abigha biwe babya ibabirimubulya bathi: “Nindi y’omukulhu oko bosi omo Bwami bw’elhubulha kwehi?” (Mt. 18:1) Okwa buthuku obo, Abayuda bangyi ibakalhangira ebitsumbi mwa kindu kikulhu kutsibu. Omusomi mughuma akabugha athi: “Abalhume bakahika okw’iholha ibanemusondya ebitsumbi, erina libuya, obuminywa, eriliwa, n’erisikibwa.”

9. Abigha ba Yesu babya b’erikolhaki?

⁹ Yesu mwaminya ngoku abigha biwe bangakolire kutsibu eriyilhusyamo omuthima w’amalingwatha owabya iniabirikaghathira  omwa kalikya ye Kiyuda. Mwababwira athi: “Omukulhu omo kathi-kathi kenyu abye ng’omulere, n’omusondoli abye ng’omughombe.” (Lk. 22:26) Thukabya ‘ng’abalere’ omughulhu ‘thukaghanza obuli mundu mo mubuya kwilhaba’ ithwe. (Fil. 2:3) Thwam’ongera eribya n’omubere oyo, ithwangana thwikalya abandi ikwa n’oko.

10. Ni habulha lyahi erya Paulo eryo thutholere ithwaghenderako?

¹⁰ Balikyethu abosi banawithe kubathulengire omwa nzira ndebe. Kyolhobire erilhangira eki thwamahira amalengekania w’okwa mibere yabu mibuya. Thutholere ithwaghendera okw’ihabulha ery’omukwenda Paulo aha Abanya Korinto lino: “Nindi wakuhira mo mukulhu oko bandi kwehi? Ebyosi wuwithe, Nyamuhanga mwathakuhabyo kwehi? Neryo byamabya ini lhusunzo, busana naki wukayihalhamba nga siwuli thahebwalho kwehi?” (1 Kor. 4:7) Thutholere ithwayitheya okwa kyosi-kyosi ekyangaleka ithwayilengekaniako kutsibu kutse eriyowa nga thulengire abandi. Mughalha wethu amabya iniakalhabaya ndeke emikania kutse mwali wethu amabya iniawithe ekihembo ky’eritsukisya abigha be Biblia, abosi batholere ibanguhirwa eriha Yehova y’olhukengerwa.

11. Eky’erileberyako kya Yesu eky’omwami n’omughombe wiwe kikathweghesayaki?

¹¹ Yesu imwanamabirikunga abigha biwe okw’ithwikalya abandi, mwaha eky’erileberyako ky’omwami n’omughombe wiwe. Omwami mwaghanyira omughombe wiwe y’eribanza linene eryo athe angathokire erithuha. Enyuma waho, omughombe iyan’oyo mwaghana erighanyira owundi mughombe mulikyabo oyuwabya mw’eribanza liwe like kutsibu. Erighunzerera, omwami mwahira omughombe oyuthe mw’obughanyiri oyo y’omwa ngomo. Erisomo? Yesu mwabugha athi: “Thatha waghe oyuli omo lhubulha asyabakolha athya mwamathendi buyira obuli mundu mulikyabo omo mithima yenyu.”​—Mt. 18:21-35.

12. Thwamathendi ghanyira, thukaleka thuthi abandi ibayowa nabi?

¹² Ekya omughombe akolha mukithamuhambako iyo musa, mukyahamba n’okwa bandi. Eky’erimbere, mwakolha omughombe mulikyabu ya nabi ‘omw’imughusa omo nyumba y’omuliki erihika aho asyathuhira omw’inda.’ Ekyakabiri, mwaponesya abandi baghombe abalhangira ekyo amakolha. “Abaghombe balikyabu babere balhangira omwatsi oyo, mubabya n’obulighe bunene.” Kuthya, ebyathukakolha bikahamba okwa bandi. Ni kyahi ekyangabya omundu amathukolha nabi kandi thukaghana erimughanyira? Eky’erimbere, thukaleka iniayowa nabi thukaghana erimughanyira, thukamugheghena, n’erithendi mukangania olhwanzo. Ekyakabiri, thukaleka abandi omwa kithunga ibayibulha-bulha bakaminya ngoku sithuli bughuma n’omundu oyo.  

13. Ekyalholirweko ky’omutemburi mughuma kyamakweghesyaki?

¹³ Thwamaghanyira balikyethu thukayighasira, n’abandi kuthya. Ekyo ky’ekyabya oko mutemburi mughuma oyo thukendyahulhamo Crystal. Mwali wethu omwa kithunga mwamuhithania. Crystal akabugha athi: “Ihakanayira eby’akabugha ebithe mw’olhukeri ibyanyisaranga ng’omuhamba. Isindyanza erighenda nayu omw’ithulira. Omuhwa waghe n’etseme mubyatsuka erihwa.” Crystal iniakayowa ngasingene erihithana. Aliwe mwathahithana olhughumerere kutse eriyilengekaniako iyuwene. Mwayikehya amaghendera okw’ihabulha eriseghemere okwa Masako eriri omo mwatsi owa “Ghanyira Erilhua Okwa Muthima” omwa Watchtower ey’Okwerikumi 15, 1999. Crystal  mwaghanyira mwali wethu. Crystal akabugha athi: “Lino nabiriminya ngoku ithwe bosi thukalengaho eryambalha omundu muhya-muhya kandi ngoku Yehova akathughanyira ndeke kandi buli kiro. Ngayowa inabirilhusibwako omusiko owalithohire. Nabirithasyabana etseme.”

14. (a) Ngoku kiri omu Matayo 18:21, 22, omukwenda Petero angabya iniabya withe kitsibuki? (b) Ni kyahi ekyanga thuwathikya thwamayisanga omwa mibere ng’eyo?

¹⁴ Thunasi ku thutholere ithwaghanyira; ekyo ky’ekitholere erikolhwa. Aliwe kyangana thukalira erikolha ekyo. Obundi ihakanayira omukwenda Petero iniayowa athya. (Soma Matayo 18:21, 22.) Ni kyahi ekyanga wathikya? Eky’erimbere, lengekanaya Yehova ng’abirithakughanyira bungahi. (Mt. 18:32, 33) Erighanyira liwe sirithutholere, aliwe akathughanyira ndeke. (Esy. 103:8-10) Thukabwirawa indi “nethu litholere ithwanzana.” Neryo erighanyira si kindu ky’erikolha wamanza. Ni lhukwamirwa lhwethu erighanyira balikyethu. (1 Yn. 4:11) Ekyakabiri, lengekanaya okwa kikabya thukaghanyira. Ithwangana wathikya oyulyathusoberaya, ithwahira omwa kithunga mw’obughuma, ithwatheya obunywani bwethu na Yehova, n’eriyilhusya kw’omusiko. (2 Kor. 2:7; Kol. 3:14) Erighunzerera, saba Oyukabugha athi thughanyire. Isiwalighira Sitani akatsandya obuholho obo wuwithe n’abaramya balikyethu. (Efe. 4:26, 27) Thukayithagha obuwathikya bwa Yehova thwamabya b’eriyihighulha okw’iwa omwa kithegho kya Sitani.

15. Ngoku kiri omwa Abanya Kolosai 3:13, thwanga kolhaki mulikyethu amakolha ebikathuhithanaya?

¹⁵ Kandi ibbwa omuramya mulikyenyu amakolha ekindu ekikakuponesaya? Wutholere iwakolhaki? Kolha ekyosi-kyosi erilhangira wuthi hakabya ihane obuholho. Saba Yehova erilhua okwa muthima. Musabe atsumule omundu oyulyakuhithanaya kandi musabe  akuwathikaye erilhangira emibere mibuya y’omundu oyo​—emibere eyo Yehova anzire omo mundu oyo. (Lk. 6:28) Wamabya isiwanga gheghena ebya mulikyenyu abirikolha, lebaya nga wangamuhikako wuthi. Ni kibuya erilengekania mughulhu wosi wuthi mulikyenyu syanga kuhithania omw’ikighenderera. (Mt. 5:23, 24; 1 Kor. 13:7) Wukakania nayu, ibya iwunemulengekania wuthi anganabya isyalyakighenderera. Kandi ibbwa amabya isyanzire erihiraho obuholho? Lholha embere ‘erimughanyira.’ Isiwabikyako. (Soma Abanya Kolosai 3:13.) Ekikulhu kutsibu isiwabika ekinigha, kundi ekyo kyangana tsandya obughuma bwawu na Yehova. Isiwalighira ekindu kyosi-kyosi kikakuthwikalya. Erikolha ekyo, wukakanganaya ku wanzire Yehova ya kutsibu kwilhaba ekindi kindu kyosi-kyosi.​—Esy. 119:165.

16. Ni lhukwamirwa lhwahi olho obuli mughuma w’okw’ithwe awithe?

¹⁶ Thukalhangira olhusunzo lhw’erikolera Yehova omwa bughuma ‘ng’ekihangulho kighuma’ ahisi ‘sy’omulisya mughuma’ mwa lhw’obughuli! (Yn. 10:16) Ekitabu Organized to Do Jehovah’s Will, olhupapura 165, hakabugha hathi: “Erighasirwa omwa bughuma obo, wuwithe olhukwamirwa lhw’erilhangira wuthi bukabya ibuneho.” Neryo, thutholere “ithwayithendeka erilhangira balikyethu ngoku Yehova akabalhangira.” Embere sya Yehova, ithwe bosi thuli “baana balere” ab’obughuli. Kwa wukana lhangira wuthya balikyethu? Yehova akalhangira kandi akasima obuli kindu ekyo wukakolha eribawathikya n’eribatsomana.​—Mt. 10:42.

17. Thwamathwamu erikolhaki?

¹⁷ Thwanzire abaramya balikyethu. Neryo sithwanzire ‘thukahiraho ekindu ekyanga thwikalya mulikyethu, kutse erileka akawa omo bibi.’ (Abar. 14:13) Thukalhangira balikyethu ibathulengire, kandi thwanzire eribaghanyira erilhua okwa muthima. Ambi isithwalighira abandi bakathuthwikalya. Aliwe, thuthwemu erikwama “emyatsi eyikaletha obuholho n’ebikathuhanganaya.”​—Abar. 14:19.