1. Omwa kighana ky’erimbere, endeko nene y’abandu mubabwirwa erikolhaki?

ENDEKO nene ey’abalhume n’abakali erilhua omwa bihugho bingyi kandi ibakabugha emibughe muthina-muthina babya ibabirihindana haghuma. Ekindu ekikaswekaya mukyabya ekiro ekyo. Egurupu y’Abayuda ababuli kiro mubathoka erikania omwa mibughe y’abagheni abasa abo! Eki nomukyanaswekaya kithya, ebya Bayuda abo bababwira n’ebya mukwenda Petero abugha ebyosi mubyabya by’embaghane kutsibu. Ebi mwabya omwatsi owakakanganaya ngoku ibakendi lhamibwa omw’ikirirya omu Yesu Kristo. Omwatsi oyo mwahamba kutsibu okwa bandu abo, nibya kyamaleka ibabulya bathi: “Thuyire thuthi kwehi?” Petero mwabasubirya athi: “Obuli mundu abatizibawe.”​—Emib. 2:37, 38.

2. Omo mwatsi ono thukendi kania okuki? (Lebaya ekisasani ky’okwa kidipa.)

² Ekyakwamako sikyabya kindu kya buli kiro. Abandu nga 3,000 mubabatizibwa ekiro ekyo, eribya bigha ba Kristo. Eyi yabya nzuko y’omubiiri munene ow’eriyira abigha ogho Yesu alhaghira abakamukwama erikolha. Omubiiri oyo abirilholha embere erihika namunabwire. Munabwire, erithakania n’omundu habw’esyosaha nyike sikyanga leka akatholera eribatizibwa. Kyangana thwalha amezi kutse nibya omwaka kutse kwilhaba n’aho omwigha erisalha ahika okwa kilhubirirwa ekyo. Wamabya iwunemweghesya omwigha we Biblia lino, wunasi ngoku kikayithagha akaghalha erimuwathikya eribya mwigha wa Kristo. Omo mwatsi ono, thukendi lebya ebya wanga kolha eriwathikya omwigha wawu we Biblia eritholera eribatizibwa.

3. Ngoku kiri omu Matayo 28:19, 20, omwigha atholere iniakolhaki erikulha-kulhana erihika okw’ibatizibwa?

³ Omwigha athali abatizibwa, atholere iniaghendera okwa bya Biblia yikakangiriraya. (Soma Matayo 28:19, 20.) Omwigha amaghendera okwa by’ak’igha, iniakendibya “ng’omundu w’amenge” oyuli omwa ky’erileberyako kya Yesu oyuwathakulha omwisi mo haali erihimba enyumba yiwe y’okw’ibwe. (Mt. 7:24, 25; Lk. 6:47, 48) Thwanga wathikya thuthi omwigha erighendera okwa by’ak’igha? Thulebaye ebindu bisathu ebya thwanga kolha.

4. Thwanga wathikya thuthi omwigha erilholha embere erikolha ebyanga muhikya okw’ibatizibwa? (Lebaya akasanduko “ Wathikaya Omwigha Wawu Erihiraho Ebilhubirirwa n’Eribiberererya.”)

⁴ Wathikaya omwigha wawu erihiraho ebilhubirirwa. Busana naki wutholere iwakolha ekyo? Thalengekania okwa ky’erileberyako kino: Wamabya w’erighenda olhughendo lhuuli, iwangana thwamu erighenda wuk’imana omwa myanya eyikatsemesaya. Neryo olhughendo olho ilhukendibya nga lhukuhi, ilhuthakwitha byahaha. Kuthya, omwigha we Biblia amabiriyihiriraho ebilhubirirwa ebyo angaberererya lhuba, iniakendi lhangira ngoku kinathokekene erihika okwa kilhubirirwa ky’eribatizibwa. Kolesaya akatsweka “Ekilhubirirwa” akali omwa kitabu Tsemera Engebe Kera na Kera! eriwathikya omwigha wawu erikulha-kulhana. Obuli lisomo likahwa, mulebaye ekilhubirirwa ekyo nga kihambire kithi okwa byo mwigha akalhua okw’igha. Wamabya iwunawithire omwigha wawu y’ekindi kilhubirirwa, iwangana kihandika ahali ekinywe “Ekindi.” Mughulhu wosi kolesaya akatsweka aka iwe n’omwigha wawu erilebya ebilhubirirwa biwe ebyo angaberererya lhuba n’eby’obuthuku buuli.

5. Ngoku kiri omu Mariko 10:17-22, ni kyahi ekya Yesu abwira omulhume omugaga athi akole, kandi busana naki?

⁵ Wathikaya omwigha wawu we Biblia erikolha  esyombinduka omwa ngebe yiwe. (Soma Mariko 10:17-22.) Yesu abya inianasi ngoku kyanga kalire omulhume omugaga erighulya ebindu biwe ebyosi. (Mk. 10:23) Aliwe, Yesu mwabwira omulhume oyo athi akole embinduka enene eyi omwa ngebe yiwe. Busana naki? Kundi Yesu mwamwanza. Hanganayira ithuthanguhirwa erihira omwa mwigha mw’omuhwa w’erighendera okwa by’ak’igha kundi thukayowa thuthi syali ahika erikolha embinduka eyikayithaghisibawa. Kyangana thwalha obuthuku abandu erileka emitse yabu ya kera n’eriambalha omundu muhya-muhya. (Kol. 3:9, 10) Aliwe ahathe eribisirira, omw’ikania oko mwatsi kwa lhuba, omwigha iniangana tsuka lhuba erikolha esyombinduka. Omw’ikanirania wuthya nayu, iwukendi kangania ku wumutsomene.​—Esy. 141:5; Emi. 27:17.

6. Busana naki ni kikulhu eribulya omwigha ebikendi leka ithwaminya amalengekania wiwe?

⁶ Ni kikulhu eribulya omwigha wethu amalengekania agho awithe oko mwatsi. Eki kikendi leka iwaminya ebya mwigha wawu asi n’eby’ikirirye. Wamakolha eki mughulhu wosi, ikikendi syakwolhobera erikanirania nayu oko myatsi eyanga mukalira eriligha. Ekitabu Tsemera Engebe Kera na Kera! kiri mw’ebibulyo bingyi ebyanga kuwathikya eriminya amalengekania w’omwigha. Ng’eky’erileberyako, erisomo 04 mune ekibulyo kino: “Wukalengekanaya Yehova akayowa athi wukakolesya erina liwe?” Erisomo 09 mune kino: “Ni bindu nga byahi ebyo wanzire iwahira omwa misabe yawu?” Okw’itsuka, omwigha wawu ikyangana muthwalira akathuku erilengekania ng’asubiraye athiki okwa bibulyo ng’ebi. Iwangana muwathikya omw’imuthendeka ngoku angalhangira enzumwa eyiri omwa masako n’ebisasani.

7. Thwanga kolesya thuthi ndeke ebyanabere omwa ngebe y’abandu?

⁷ Omwigha wawu amabiriminya eby’atholere iniakolha, kolesaya ebyanabere omwa ngebe y’abandu ebyanga muhira mw’omuhwa ow’erikolha ekyo. Ng’eky’erileberyako, kyamabya ikikakalira omwigha wawu erihindana, iwangana mukangania evidiyo eya Yehova Mwanyitsomana eyiri omwa katsweka “Minya Bingyi” omw’isomo 14. Omo masomo mangyi aw’ekitabu Tsemera Engebe Kera na Kera!, wukendi banamo ebyalholirweko ng’ebyo obundi omwa katsweka “Thasyigha Bingyi” kutse “Minya Bingyi.” * Iwayitheya okw’ilinganisya omwigha wawu n’owundi omw’ibugha wuthi, “Amabya iniangana kikolha, nawu wangana kikolha.” Ambi iwaleka omwigha iyuwayibughira ekyo. Omwakanya k’ekyo, kanaya okwa syonzumwa ngulhu-ngulhu esya wathikaya omundu oyuli omo vidiyo erighendera okwa syongangirirya sye Biblia. Obundi iwangana minyikalyamo erisako lirebe kutse ekindu kirebe ekikawathikaya ekyakolhawa. Akaghisa kamayiretha, kanaya okwa mibere Yehova awathikirayamu omundu oyo.

8. Thwanga wathikya thuthi omwigha wethu erianza Yehova?

⁸ Wathikaya omwigha wawu erianza Yehova. Wuthi? Sondekanaya akaghisa ak’erimuwathikiryamu erigha bingyi okwa mibere ya Yehova. Wathikaya omwigha wawu erilhangira Yehova nga Nyamuhanga oyutsemire oyukawathikaya abamwanzire. (1 Tim. 1:11, NWT; Ebr. 11:6) Kanganaya omwigha wawu ngoku iniakendi ghasirwa amaghendera okwa by’ak’igha, kandi musoborere ngoku eki kikakanganaya Yehova kwamwanzire. (Isa. 48:17, 18) Olhwanzo olho mwigha wawu awithire Yehova lhukendibya lhunemwongera, kwanemwendyongera athya erikolha esyombinduka.​—1 Yn. 5:3.

9. Ngoku kiri omu Mariko 10:29, 30, ni kyahi ekyanga wathikya omwigha eriyithalya oko bindi nuku atholere eribatizibwa?

⁹ Omwigha erikulha-kulhana erihika okw’ibatizibwa, akayithagha eriyithalya okwa bindi. Ng’omulhume omugaga oyulyakanibawako, abandi bigha bangana yithagha eriyithalya okwa bindu by’ekinyamubiri. Omubiiri owabakakolha amabya isyali hambangana n’emisingyi ye Biblia, ibangana yithagha erisondya owundi mubiiri. Abangyi bangana yithagha erileka abanywani babu abathanzire Yehova. Abandi, abahughu babu abathanzire Abema ba Yehova bangana baghana. Yesu mwabugha athi kyangana kalira abandi eriyithalya okwa bindu ng’ebyo. Aliwe mwalhaghanisya athi abakamukwama sibendisyanubira busa. Yehova akendi syabahemba omw’ibaha erihiika ery’obunyakirimu eriri mw’olhwanzo. (Soma Mariko 10:29, 30.) Wanga wathikya wuthi omwigha wawu we Biblia erighasirwa omwa kihembo kibuyanga eki?

10. Ekyalholirweko kya Manuel kikakweghesayaki?

¹⁰ Nywana omwigha wawu. Ni kikulhu iwe erikangania omwigha wawu ku wumutsomene. Busana naki? Thalebya ebya Manuel, oyuwikere e Mexico akabugha. Akabya ak’ibuka obuthuku abya mwigha we Biblia, akabugha athi: “Obuli erigha, omukangirirya waghe iniakatsuka erinyibulya engebe nga yiri yithi. Iniakaleka ingayowa buholho kandi ikyaleka ingamubwira obuli kindu. Iningalhangira kwenene inianyitsomene.”

11. Abigha bethu banga ghasirwa bathi omw’isiba nethu?

¹¹ Bana obuthuku obw’erisiba na bigha bawu, ngoku Yesu anabya akasiba n’abigha biwe. (Yn. 3:22) Kyamathokekana, kokaya omwigha wawu oyunemukulha-kulhana okw’inywa haghuma ekyayi kutse okwa ky’erirya, kutse erilebya enguma y’okwa endegheka yethu y’etivi ey’obuli kwezi. Omwigha wawu iniangana sima erikokya ng’eryo kutsibu-tsibu lyamabya okwa buthuku bw’ebiro bikulhu omughulhu angayowa iniali omo mbwera. Kazibwe oyuwikere e Uganda,  akabugha athi: “Ngalengekanaya mun’igha bingyi oku Yehova omw’isiba n’omukangirirya waghe kuthya n’omwa buthuku bw’erigha. Munalhangira Yehova kw’atsomene abandu biwe ba kutsibu kandi ku batsemire. Ekyo kyanabya nganzire omo ngebe yaghe.”

12. Busana naki thutholere ithwaghenda n’abathuliri muthina-muthina okwa mwigha?

¹² Ghenda n’abathuliri muthina-muthina okwa mwigha wawu. Hanganayira iwayowa nga sihali butsibu erighenda okwa mwigha wawu iwuwene kutse erighenda n’omuthuliri mughumerere. Nomwakine indi ekyo ky’ekyanga thwolhobera, omwigha wethu iniakendi ghasirwa ithunalyaghenda n’abathuliri muthina-muthina thukay’igha nayu. Dmitrii oyuwikere e Moldova, akabugha athi: “Obuli muthuliri oyuwabya akasyanyeghesyako iniakasoborera emyatsi omwa nzira ey’embaghane. Ekyo mukyanyiwathikya erikolesya ebyo ng’igha omwa nzira muthina-muthina. Kandi mundakwa esisoni ingahindana omurundi waghe w’erimbere, kundi nabya inganasi balikyethu bangyi.”

13. Busana naki thutholere ithwawathikya omwigha wethu erihindana okwa mihindano?

¹³ Wathikaya omwigha wawu erihindana okwa mihindano. Busana naki? Kundi Yehova akabugha athi abaramya biwe ibahindana haghuma; ni kitsweka ky’okw’iramya lyethu. (Ebr. 10:24, 25) Eryongera okw’ekyo, balikyethu n’ihiika lyethu ery’obunyakirimu. Omughulhu thuli okwa mihindano nabu, thukabya ng’abali haghuma eka ithunemulya ebyalya ebyuwene. Wukabya wukawathikya omwigha wawu erihindana okwa mihindano, wukabya iwamamuwathikya erikolha ekighuma ky’okwa biika bikulhu ebikakolhaya okw’ibatizibwa. Aliwe ekyo kyangana mukalira erikolha. Ekitabu Tsemera Engebe Kera na Kera! kyanga wathikya kithi omwigha wawu erirwanisya ekitsibu kyosi-kyosi ekyo angabana?

14. Thwanga hira thuthi omwa mwigha wethu mw’omuhwa w’erihindana?

¹⁴ Kolesaya erisomo 10 ery’ekitabu Tsemera Engebe Kera na Kera! erihira omwa mwigha wawu mw’omuhwa w’erihindana. Abathuliri abasi bingyi abasabawa erikolesya erisomo eri eriwathikya abigha babu erihindana ekitabu eki kithe kyahulhukibwa mubabana bibuya bingyi. Aliwe, isiwalinda erihika aho wukendi syahikira okw’isomo 10 imuwakokya omwigha wawu okwa mihindano. Mukokaye lhuba kandi lholha embere erikolha ekyo. Obuli mwigha na bitsibu biwe. Neryo minya ebiyithawa by’omwigha wawu, kandi lhangira nga wangana muwathikya. Isiwahwa amani amathendi tsuka emihindano ya lhuba. Ghumisirizaya kandi hathikana.

15. Ni buba bwahi obo mwigha angabya nabu?

¹⁵ Wukan’ibuka wukasagha eribya Mwema wa Yehova? Obundi wabya wukayowa nga siwanga thoka erithulira. Kutse obundi imuwasagha wuthi abahughu kutse banywani bawu bangana kuhakanisya. Kyamabya ikwakiri kithya, iwangana yitheghererya eriyowa ly’omwigha wawu. Yesu mwabugha athi obuba ng’obo bwanganabya. Aliwe, mwabwira abakamukwama athi isibalighira obuba bukabalemesya erikolera Yehova. (Mt. 10:16, 17, 27, 28) Yesu mwawathikya athi abigha biwe erihwamo obuba? Kandi wanga mugherererya wuthi?

16. Thwanga thendeka thuthi omwigha wethu eribwira abandi okwa by’ikirirye?

¹⁶ Lyolho-lyolho thendeka omwigha wawu eribwira abandi okwa by’ikirirye. Abigha ba Yesu bangabya imubanakwa obuba akabathuma omw’ithulira. Aliwe Yesu mwabawathikya omw’ibabwira ab’eriyathulira n’omwatsi ow’erithulha. (Mt. 10:5-7) Wanga gherererya wuthi Yesu? Wathikaya omwigha wawu eriminya abo  angathulira. Ng’eky’erileberyako, mubulhaye ng’anasi omundu mulebe oyo wanga ghasirwa omw’igha mwatsi mulebe we Biblia. Neryo muwathikaye erithegheka eby’angabugha omw’imukangania enzira nyolho ey’erikaniraniamo n’abandi oko mwatsi oyo. Okwa buthuku obutholere, iwangana yibegheresya nayu omw’ikolesya akatsweka “Abandi Bakabugha Bathi” na “Omundu Angana Bulya Athi,” ehiri omwa kitabu Tsemera Engebe Kera na Kera! Wukakolha ekyo, lhangira wuthi wukathendeka omwigha wawu erikolesya e Biblia erisubirya omwa nzira nyolho kandi omwa menge.

17. Thwanga kolesya thuthi Matayo 10:19, 20, 29-31 thukawathikya omwigha eriyikethera omu Yehova?

¹⁷ Wathikaya omwigha wawu eriyikethera Yehova. Yesu mwakakasya abigha biwe ngoku Yehova akendi bawathikya kundi abanzire. (Soma Matayo 10:19, 20, 29-31.) Ibukaya omwigha wawu ngoku nayu Yehova akendi muwathikya. Iwangana muwathikya eriyikethera Yehova omw’isaba haghuma nayu busana n’ebilhubirirwa eby’awithe. Franciszek oyuwikere e Poland, akabugha athi: “Mughulhu mungyi, omukangirirya waghe iniakahulha ebilhubirirwa byaghe akasaba. Nabere ingalhangira ngoku Yehova akasubiraya emisabe y’omukangirirya waghe, neryo munalhuaho ingatsukiraho eribya ingasaba. Munayilhangirira obuwathikya bwa Yehova omughulhu nayithagha erilighirwa eribya ingusa okwa mubiiri waghe omuhyaka nuku ngabye ingaghenda okwa mihindano n’olhuhindano.”

18. Yehova akayowa athi busana n’omubiiri ogho abakangirirya Abakristayo bakakolha?

¹⁸ Yehova atsomene kutsibu abigha bethu be Biblia. Akasima kutsibu akaghalha ako abakangirirya Abakristayo bakahiraho eriwathikya abandu eriyithunda okw’iyo, kandi abanzire busana n’ekyo. (Isa. 52:7) Wamabya isiwuwithe omwigha oyo wukeghesaya lino, iwangana wathikya abigha be Biblia erikulha-kulhana erihika okw’ibatizibwa omw’ighenda n’abandi bathuliri okwa bigha babu.