1. Ngoku kiri omu 1 Petero 5:2, ni lhusunzo lhwahi olho abasyakulhu bawithe?

 ABASYAKULHU Abakristayo babirihebwa omubiiri w’eritsomana esyombuli sya Yehova esy’obughuli. Abalhume abayihereyo aba bakalhangira olhusunzo lhwabu lhw’erikolera balikyabo mwa lhw’obughuli, kandi bakalengaho eribya ‘balisya, abakendi syalisyabo.’ (Yer. 23:4; soma 1 Petero 5:2.) Ka thukasima kutsibu eribya n’abalhume ng’aba omwa bithunga byethu!

2. Ni bitsibu byahi ebyo abandi basyakulhu bangabana?

² Abasyakulhu bakabya bakaberererya esyongwamirwa syabo, bakabana bitsibu bingyi. Ng’eky’erileberyako, eritsomana ekithunga likayithagha erikolha kutsibu. Tony, omusyakulhu e United States, mwabya w’eriminya aho amaaka wiwe akasubulira bikahika okwa mibiiri eyo akaligha erikolha. Akasoborera athi: “Ekihunzo ky’ekorona (COVID-19) kyabere kikatsuka, munalengaho erikolha kutsibu eritheghekania emihindano n’omubiiri w’erithulira. Aliwe nomunanakolha ebyosi ebi, mughulhu mungyi ihakabya ihane bingyi eby’erikolha. Erighunzerera, munatsuka eribulha endambi y’erisoma Biblia, eriyeghesya, n’erisaba.” Ilir, omusyakulhu we Kosovo, mwabana ekitsibu ekiri mbaghane. Omughulhu abya omwa kitsweka ekirimo olhuhi, mukyamukalira erighondera obusondoli bw’ekiteokrasi. Akabugha athi: “Obuthubaha bwaghe mubwalengwako omughulhu ekyaghanda ky’omuthahulha kyanyiha omubiiri w’eriwathikya balikyethu ababya omwa mwanya owakalire kutsibu. Munubaha, kandi obusondoli mubwabya nga sibutholere.” Tim, omumisyonare e Asia, mukyamukalira erighenda-ghendania n’endegheka yiwe ey’obuli kiro. Akabugha athi: “Ihakanayira ingayowa ingabirilhuha omwa bwongo n’omw’iyowa.” Ni byahi ebyanga wathikya abasyakulhu abawithe ebitsibu ng’ebyo?

3. Ithwe bosi thwanga ghasirwa thuthi omw’ilengekania okwa ky’erileberyako ky’Omutsweri Gideoni?

 ³ Abasyakulhu bangan’ighira okwa ky’erileberyako ky’Omutsweri Gideoni. (Ebr. 6:12; 11:32) Mwakolha ng’omutheya kandi ng’omulisya w’abandu ba Nyamuhanga. (Abat. 2:16; 1 Emy. 17:6) Nga Gideoni, abasyakulhu babirisombolhwa eritsomana abandu ba Nyamuhanga omwa buthuku obukalire kutsibu. (Emib. 20:28; 2 Tim. 3:1) Thwangan’ighira okwa mubere wa Gideoni ow’eriminya aho amaaka wiwe akasubulira, eriyikehya, n’obwowa. Eriyiyinia liwe mulyalengwako anemukolha esyongwamirwa siwe. Mbulha thuli basyakulhu b’ekithunga kutse eyihi, thwangan’ongera erisima abasyakulhu bethu. Thwangana sighika abalhume b’obunyakirimu aba abakakolha kutsibu.—Ebr. 13:17.

4. Gideoni mwakangania athi kw’anasi aho amaaka wiwe akasubulira kandi kw’ayikehirye?

⁴ Gideoni abya mulhume oyuwasi aho amaaka wiwe akasubulira kandi oyuyikehirye. b Omumalaika wa Yehova abere akabwira Gideoni athi abirisombolhwa erilhamya Abaisraeli okwa Abamidiani ab’amaaka, omulhume oyuyikehirye oyo mwasubirya athi: “Ekithunga kyaghe ni kisama kwilhaba omo Bamanase, naghe indi mulere kwilhaba omo kithunga kya thatha.” (Abat. 6:15) Mwayowa nga syatholere olhukwamirwa olho, aliwe Yehova abya inianasi ndeke ngoku akendi thoka. Omwa buwathikya bwa Yehova, Gideoni mwaghunza ndeke olhukwamirwa lhwiwe.

5. Omubere w’omusyakulhu ow’eriminya aho amaaka wiwe akasubulira n’ow’eriyikehya yanga lengwako yithi?

⁵ Abasyakulhu bakalengaho kutsibu erikangania ku banasi aho amaaka wabo akasubulira n’eriyikehya omwa buli kindu. (Mika 6:8; Emib. 20:18, 19) Sibaliyiheka busana n’amaaka wabo kutse ebya bakathoka; kutse sibali yitsweba busana n’ebisobyo byabu kutse erilemererwa lyabu. Nomwabine, omusyakulhu anganabana ebitsibu. Ng’eky’erileberyako, angana ligha esyongwamirwa nyingyi neryo ikyamukalira eriberererya esyosi. Kutse iniangana tswebwa busana n’emibere alyakoleramo olhukwamirwa lhulebe kutse iniapipwa busana n’emibere alyakoleramo olhundi. Abasyakulhu bang’ighaki oku Gideoni ekikendi bawathikya omwa mibere ng’eyo?

6. Ni kyahi ekyo abasyakulhu bang’ighira okwa mubere wa Gideoni ow’eriminya aho amaaka wiwe akasubulira? (Lebaya n’ekisasani.)

 ⁶ Saba obuwathikya. Oyuwasi aho amaaka wiwe akasubulira akabya inianasi erilemererwa liwe. Gideoni mwakangania ngoku asi aho amaaka wiwe akasubulira omw’ibya inianayitheghekire erisaba abandi b’obuwathikya. (Abat. 6:27, 35; 7:24) Abasyakulhu b’amenge bakakolha ekiri ng’ekyo. Tony, oyukanibweko okw’itsuka, akasoborera athi: “Busana n’emibere eyo nakuliramo, iningaligha emibiiri minene kwilhaba eyo nanga thoka. Neryo munathwamu erihira omwatsi w’eriminya aho amaaka wethu akasubulira omw’iramya lyethu ly’eka kandi namabwira mukali waghe indi anyibwire nga nganemukolha indi okw’ekyo. Munalebya n’okwa jw.org evidiyo Thendeka Abandi, Yiketherebo, Kandi Bahe Obuthoki, Ngoku Yesu Akolha.” Tony mwatsuka erisaba abandi b’obuwathikya. Mumwalhwiririraki? Tony akabugha athi: “Emibiiri y’ekithunga yinemukolhwa, kandi ngawithe obuthuku bunene bw’eriyihimba bunyakirimu.”

7. Abasyakulhu banga gherererya bathi Gideoni bamatswebwa? (Yakobo 3:13)

⁷ Subiraya omwa bwolho wamatswebwa. Abasyakulhu bakabana erindi lengwako bamatswebwa. Kandi eky’erileberyako kya Gideoni kyangana wathikya. Ahathe erithika-thika, eribya iniabya inianasi ebisobyo biwe, mwasubirya omwa bwolho Abaefuraimu bakamutsweba. (Abat. 8:1-3) Gideoni mwathasubirya omwa kinigha. Mwakangania eriyikehya omw’ihulikirira eriyowa lyabu, kandi omw’amenge mwaghunzaho emibere eyikalire eyo. Abasyakulhu b’amenge bakagherereraya Gideoni omw’ihulikirira ndeke n’erisubirya omwa bwolho bamatswebwa. (Soma Yakobo 3:13.) Busana n’ekyo, bakaleka omwa kithunga imwabya obuholho.

8. Abalhume abasombwerwe batholere ibakolhaki bamapipwa? Iha eky’erileberyako.

⁸ Leka Yehova yupipawe. Gideoni abere akapipwa busana n’erikinda Abamidiani, mwalhangira athi eripipwa likaghendera Yehova. (Abat. 8:22, 23) Abalhume abasombwerwe banga gherererya bathi Gideoni? Banganapipa Yehova busana n’ebyo bakathoka. (1 Kor. 4:6, 7) Ng’eky’erileberyako, omusyakulhu amasimwa busana n’amaaka wiwe w’erikangirirya, iniangana bugha athi alyathoka ekyo busana n’enzuko y’obusondoli, Ekinywe kya Nyamuhanga, kutse erithendeka erya thukabana omwa kithunga kya Yehova. Okwa bundi buthuku abasyakulhu banganabya ibanemulebya erikangirirya lyabu nga likaleka ibo ibapipwa omwakanya ka Yehova. Thalengekania okwa kyalholirweko ky’omusyakulhu ya Timothy. Imwanamasombolhwa, Timothy inianzire erilhabya emikania ey’abandu bosi. Akabugha athi: “Iningatsuka omukania waghe omwa binywe binene kandi ebikatha-kathenie n’eby’erileberyako bingyi. Mughulhu mungyi ebi ibikaleka abandi ibanyipipa. Eky’obulighe, iningahirawa kw’amalengekania omwakanya ke Biblia kutse Yehova.” Endambi muyahika, Timothy amalhangira iniatholere erihindulha emikangirirye yiwe nuku sibamuhwerayeko amalengekania. (Emi. 27:21) Mumwalhwiririraki? Akasoborera athi: “Balikyethu muthina-muthina bakambwira ngoku omukania waghe abiribawathikya erighumira ekitsibu, eriyiyiniryakyo, kutse eriyithunda hakuhi na Yehova. Ng’ongera eritsema busana n’ebikabughawa ebyo kwilhaba ngoku nabya ingapipwa emyaka y’ahanyuma.”

9. Obwowa n’obuthubaha bya Gideoni mubyalengwako bithi? (Lebaya ekisasani ky’okwa kidipa.)

⁹ Gideoni abere abirisombolhwa ng’omutsweri, obwowa n’obuthubaha bwiwe mubyalengwako. Mwahebwa omubiiri owakalire ow’erihimbulha ekiherero kya thatha wiwe ekya Baali. (Abat. 6:25, 26) Enyuma waho, Gideoni abere abirihindania amahe, ngendo ibiri mwabwirwa indi  akehayegho. (Abat. 7:2-7) Erighunzerera, mwabwirwa indi ayabambire ekilhaliriro eky’esyonzighu omwakathi k’ekiro.—Abat. 7:9-11.

10. Obwowa bw’omusyakulhu bwanga lengwako buthi?

¹⁰ Abasyakulhu batholere ibabya ‘abakowa lhuba.’ (Yak. 3:17) Omusyakulhu omwowa akabya inianayitheghekire erighendera okwa eby’Amasako akabugha n’obusondoli bw’ekithunga kya Nyamuhanga. Busana n’ekyo, akahiriraho abandi eky’erileberyako ekyuwene. Nomwabine, obwowa bwiwe bwangana lengwako. Ng’eky’erileberyako, ikyangana mukalira erighenda-ghendania n’obusondoli obo akahebawa. Okwa bundi buthuku, angana bulha obusondoli bulebe nga bunatholere kutse nga nina bw’amenge. Kutse anganasabwa erikolha omubiiri owakendihira obwiranda bwiwe bw’omw’akabi. Abasyakulhu banga gherererya bathi obwowa bwa Gideoni omwa mibere ng’eyo?

11. Ni kyahi ekyanga wathikya abasyakulhu eribya bowa?

¹¹ Hulikirira ndeke obusondoli n’eribughenderako. Nyamuhanga mwabwira Gideoni ngoku angahimbulha ekiherero kya thatha wiwe, ah’akendi himbira Yehova ekiherero kihyaka, kandi nga ni kisoro kyahi eky’erihonga. Gideoni mwathathika-thikira obusondoli obo—mwakwama kyabughenderako. Munabwire, abasyakulhu bakabana obusondoli erilhua omwa kithunga kya Yehova erilhabira omwa syobaruha, ebirango, n’ebindi eby’erighenderako ebikathutheghaya bunyakirimu na kinyamubiri. Thwanzire abasyakulhu bethu kundi bakaghendera buthaleghulha okwa busondoli bw’ekiteokrasi. Ekithunga kyosi kikaghasirawa.—Esy. 119:112.

12. Abasyakulhu banga ghendera bathi okwa busondoli obuli omwa Abaebrania 13:17 hamabya embinduka omwa busondoli bw’ekiteokrasi?

¹² Ibya iwunayitheghekire erikolha esyombinduka. Wibuke ngoku Yehova mwabwira Gideoni athi akehaye amahe wiwe wa kutsibu. (Abat. 7:8) Gideoni angabya imwayibulya athi: ‘Embinduka eyi kwenene yinayithaghisibirwe? Yinemwendi wathikya?’ Nomubyanabya bithya, Gideoni mwabya mwowa. Munabwire abasyakulhu bakagherereraya Gideoni omw’ilhangira bathi esyombinduka esyabirihamibwako omwa busondoli bw’ekiteokrasi sikaghenderawako. (Soma Abaebrania 13:17.) Ngahathya, omwa 2014 Akathunga Akakasondolha mukahindulha endegheka ey’erihayo erisighika eby’obuhimbe eby’Ekisenge ky’Obwami n’Ekyumba ky’Olhuhindano. (2 Kor. 8:12-14) Ebithunga mubyabya isi byanga thasyathuha eloni. Omwakanya k’ekyo, ebithunga erithimba omwa kihugho kyosi mubyabya by’erihayo nuku amanyumba w’ekiteokrasi abye iniangana himbwa ehosi-hosi eyo akayithaghisibawa, nomukyangabya indi ekithunga sikyanga thoka eriyihimbira. José abere aminya okwa mbinduka eyo, mwathika-thikirayo, erilengekania athi: ‘Sihali n’Ekisenge ky’Obwami n’ekighuma ekikendi syahimbwa. Ebindu kwabithe kolhawa bithya bikahika okwa by’obuhimbe.’ Ni kyahi ekyawathikaya José erighenda-ghendania n’obusondoli? Akabugha athi: “Ebinywe ebiri omwa Emisyo 3:5, 6 mubyanyibukya eriyikethera Yehova. Kandi  mwabirilhwiririra ebibuyanga! Sithwathasubulira okw’ihimba Ebisenge by’Obwami bingyi lisa aliwe kandi emibere mihyaka eyo ebya thukahayo bikakolesibirawamo yikaleka ihabya erilingirirania.”

13. (a) Gideoni aby’alighireki? (b) Abasyakulhu banga gherererya bathi Gideoni? (Lebaya n’ekisasani.)

¹³ Omwa buthubaha kolha erisonda lya Yehova. Gideoni mwowa Yehova nomwanabya awithe eryubaha n’eribya w’eritsama engebe yiwe. (Abat. 9:17) Abere abiribana erikakasibwa erilhua oku Yehova, Gideoni mwaligha ndeke-ndeke ngoku Nyamuhanga angamuwathikirye eritheya abandu Biwe. Abasyakulhu abikere omwa myanya eyo omubiiri wethu iman’ibirwe bakagherereraya Gideoni. Omwa buthubaha bakasondolha emihindano n’omubiiri w’erithulira nomuhane emihayo y’eribaboha, eribabulirirya, eriherya emibiiri kutse erikolhwa nabi. c Omwa bulighe bunene, abasyakulhu bakendi syayithagha obuthubaha bw’erighendera okwa busondoli obo bakendi syahebwa—mbulha mukendi syalhwiririra bitsibuki. Obusondoli obo mwanganasyabya erithulha omwatsi owali ng’amathwa kandi ngoku thwanga lhama okw’ibambira lya Gogi owe Magogi.—Eze. 38:18; Erib. 16:21.

14. Eriyiyinia lya Gideoni mulyalengwako lithi?

¹⁴ Olhukwamirwa lhwa Gideoni ng’omutsweri lhwabya lhukamuyithaghisya erikolha kutsibu kinyamubiri. Abamidiani babere bakathibitha ibane omwa malhwa omwa kiro, Gideoni mwabathibithako erilhaba omwa musya we Yezreeli eriyahika okwa Lhusi Yorodani, obundi olhwabya lhuthimbirweko emisithu. (Abat. 7:22) Mbwino Gideoni mwanasubulira okwa Yorodani? Eyihi! Nomubanabya balhuhire, iyo n’abalhume biwe 300 mubasoka n’erikwamirirabo. Erighunzerera, mubahamba Abamidiani n’eribakinda.—Abat. 8:4-12.

15. Eriyiyinia ly’omusyakulhu lyanga lengwako mughulhu wahi?

¹⁵ Okwa bundi buthuku omusyakulhu anganayowa iniabirilhuha kinyamubiri, omwa bulengekania, kutse omw’iyowa busana n’eritsomana  ekithunga n’efamile yiwe. Omwa mibere ng’eyo, abasyakulhu banga gherererya bathi Gideoni?

16-17. Ni kyahi ekyawathikaya Gideoni eriyiyinia, kandi ni yikethera lyahi eryo abasyakulhu bangabya nalyo? (Isaya 40:28-31) (Lebaya n’ekisasani.)

¹⁶ Yikethere ngoku Yehova akendi kuha akaghalha. Gideoni mwayikethera ngoku Yehova angamuhere akaghalha, kandi mwathamulhabirya ahisi. (Abat. 6:14, 34) Buthuku bughuma, Gideoni n’abalhume biwe babya ibanemukwamirira abami babiri Abamidiani omwa bisandu, aliwe abami abo bangabya ibabya ibane okwa syongamiya. (Abat. 8:12, 21) Aliwe, omwa buwathikya bwa Yehova, Abaisraeli b’omuhwa abo mubahamba abami abo. Kuthya abasyakulhu bangana yikethera Yehova, ‘oyuthekwa bulhundu, kutse erilhuha.’ Akendi baha akaghalha bakakayithagha.—Soma Isaya 40:28-31.

¹⁷ Thulebaye ekyalholirweko kya Matthew, ow’okwa Kathunga Akakakolongana n’Amathambiriro. Ni kyahi ekikamuwathikaya eriyiyinia? Matthew athi: “Nabiriyilhangirira ekwenene eyiri omwa Abanya Filipi 4:13, NWT. Ngendo nyingyi omughulhu ngalhuhire n’erihwa amani, ngasaba kutsibu, erilemba-lemba Nyamuhanga indi ambe akaghalha kinyamubiri n’omwa bulengekania ako ngayithagha erisighika balikyethu. Omwa mighulhu ng’eyo, nabiriyilhangirira omulimu wa Yehova akanyiha akaghalha, erinyiwathikya eriyiyinia.” Nga Gideoni, abasyakulhu bethu abayihereyo bangana bana ebikabalemesaya banemulisya ekihangulho ahathe eriyikukumirira. Omo kwenene, batholere ibaminya aho akaghalha n’eriyowa lyabu bikasubulira kandi ibakolha erikwamana n’akaghalha ako. Nomwabine, bangana yikethera ngoku Yehova akendiowa erisaba lyabu ly’obuwathikya n’eribaha akaghalha k’eriyiyinia.—Esy. 116:1; Fil. 2:13.

18. Thwamathayibukya, abasyakulhu banga gherererya bathi Gideoni?

¹⁸ Abasyakulhu bangan’igha bingyi oku Gideoni. Abasyakulhu batholere ibaminya aho amaaka wabu akasubulira kandi ibayikehya bikahika okwa mibiiri eyo batholere ibaligha erikolha n’okwa ekya banga kolha bakatswebwa kutse bakapipwa. Batholere ibakangania obwowa n’obuthubaha, kwilhabirirya enduli y’omughulhu mubi ono yinemuseghera hakuhi. Kandi batholere ibayikethera ngoku nomubangabana ebikabalemesaya, Nyamuhanga angana baha akaghalha. Ahathe erithika-thika, thukasima abalisya ng’abo abakakolha kutsibu kandi ‘thukasikaya abandu abali ng’abo.’—Fil. 2:29.