Ababuthi baghe mubahuma e Estonia omwa buthuku bw’Olhuhi lhw’Ekihugho Kyosi Olhwakabiri bamasuba e Germany, eyo nabuthirawa. Nabere nabiributhwa mubayitheghekera erisuba e Canada. Enyumba yethu y’erimbere eyabya hakuhi ne Ottawa, e Canada, yabya nyike kandi ithukabyamo n’esyongoko. Thwabya banakwa kutsibu, aliwe hakiri ithukabya ithunawithe amaya aw’erirya ng’eky’engyakya.

Kiro kighuma, Abema ba Yehova mubasomera mama waghe Eribisulirwa 21:3, 4. Ebyo igha mubyamuhambako neryo mwatsuka eririra. Embutho y’ekwenene muyalhasa, kandi mama waghe na thatha waghe mubalhuaho ibakulha-kulhana erihika okw’ibatizibwa.

Ababuthi baghe sibabya basi ndeke Olhusungu, aliwe ibakalhangira ekwenene mwa kindu kikulhu. Hakuhi obuli Kyamukagha, nibya n’enyuma w’erikolha kutsibu omw’ithumbi eryosi omwa fakitore eyo eby’obughuli ebikathakulhawa omwa kithaka (nickel) bikalhabibawa omwa muliro e Sudbury, Ontario, thatha waghe iniakathuthwalha omw’ithulira ingye na mwali wethu omulere ya Sylvia. Kandi obuli wiki ithuk’igha Akaleberyo ng’efamile. Mama na Thatha mubanyikangirirya erianza Nyamuhanga. Ekyo mukyaleka ingayihayo oku Yehova 1956 ingane w’emyaka ikumi. Olhwanzo lhunene olhwa bawithire Yehova lhwabirinyighumya omwa ngebe yaghe yosi.

Nabere nabirighunza esiniya, munanalengemeribwa hake. Munalengekania indi namabya mutemburi isinendi thoka erikolha esente esikaghunza nuku ngaberereraye ekilhotho kyaghe ky’erighenda omwa ndegge erirambura ekihugho. Munabana omubiiri w’erikolha nga DJ okwa redio, omubiiri ogho nanza. Aliwe iningakolha obuli erigholho; neryo mughulhu wosi iningabulha okwa mihindano kandi iningakolongana n’abandu abathanzire Nyamuhanga. Erighunzerera, obunyamuthima-thima bwaghe obukangiriribwe ne Biblia mubwaleka ingakolha esyombinduka.

Munahumira e Oshawa, Ontario. Muneyayo Ray Norman, mwali wabu ya Lesli, n’abandi batemburi. Abosi mubanyitsomana. Erilhangira ngoku batsemire mukyaleka ingathasyalebya ndeke ebilhubirirwa bwaghe. Mubanyihira mw’omuhwa w’erikolha obutemburi, obo natsuka Okwomwenda 1966. Munatsema, kandi engebe muyabya nga yuwene. Aliwe ebindu ebikaswekaya ebyahindulha engebe yaghe byabya ibikayabya.

Ingakine omwa siniya, munasulirirya efomu y’erighenda okwa Beteli e Toronto, Canada. Enyuma waho ingane mukolha obutemburi, munakokibwa eriyakolera  okwa Beteli habw’emyaka ini. Aliwe omo kwenene ngabya nganzire Lesli, kandi munasagha indi namaligha erikokibwa eri, isinendi syaswamulholhako. Enyuma w’erisaba kutsibu, erighunzerera munaligha erighenda okwa Beteli n’erilhagha Lesli omwa bulighe.

Okwa Beteli munakolera omwa by’eryoya esyongyimba n’enyuma waho ng’omuhandiki. Ebyo bine aho, Lesli mwabya mutemburi w’embaghane e Gatineau, Quebec. Mughulhu mungyi iningabya inganemubulha ngali yathi kandi ngamunanathwamu ndeke. Neryo ekighuma ky’okwa bindu ebikaswekaya kandi ebikatsemesaya ebyabya omwa ngebe yaghe mukyabya. Ray, mughalha wabu Lesli mwakokibwa okwa Beteli. Muthwabya omwa kisenge kighuma! Ekyo mukyaleka obunywani bwaghe na Lesli ibwathasyasuba. Munamuherukya okwa kiro ky’erighunzerera eky’olhusunzo lhwaghe lhw’emyaka ini—Okwakabiri 27, 1971.

Ingye na Lesli muthwathumwa omwa kithunga kye French e Quebec. Enyuma w’emyaka mike, munasweka ingakokibwa erikolha ng’omulebererya w’omuthimbo ingane w’emyaka 28. Munayowa ingali mulere kandi isingasi bingyi, aliwe ebinywe ebiri omu Yeremia 1:7, 8 mubyanyighumya. Aliwe, Lesli abya iniabiribana esyo aksidenti nga sy’esyo kandi ikikamukalira eribana othulho. Neryo thwangathokire thuthi omubiiri w’eribalhama? Nomwabine, Lesli mwabugha athi, “Yehova amabugha athi thukole kindu kirebe, busana naki ithuthakilengesya?” Muthwaligha olhusunzo kandi thwamatsemera omubiiri w’eribalhama habw’emyaka 17.

Omubiiri w’obulebererya iniakaleka ingabya bbize, neryo mughulhu wosi isingalibanira Lesli y’obuthuku obukaghunza. Munabya w’erigha erind’isomo. Kyabbalaza kighuma omwa ngyakya-ngyakya omundu mwawatha akada k’okwa lhukyo. Sikwabya mundu, aliwe kwabya akabbaketi k’erighenda nako okw’iyitsemesya imune ekitambara ky’okwa meza, ekighuma, e cheese, omuggati, etsupa y’evini, esyoglasi, n’akabaruha kake akahandikireko kathi, “Thwalha mukali wawu y’okw’iyitsemesya.” Kyabya kiro ekyuwene, iyine omwisi. Aliwe munasoborera Lesli ngoku ngawithe emikania y’erithegheka neryo sithwendi thoka erighenda. Mwanyiyitheghererya aliwe mwathatsema. Nabere ngan’ikere okwa meza yaghe, obunyamuthima-thima bwaghe mubwatsuka erinyihandikirira. Munalengekania okwa Abanya Efeso 5:25, 28. Mbwino ebinywe ebikalhua oku Yehova ebyo sibirinyihira mw’omuhwa w’erilengekania okw’iyowa lya mukali waghe? Nabere nabirisaba, munabwira Lesli indi, “Thughende,” ekyo mukyaleka iniatsema. Muthwafugha thwamaghenda okwa musike w’olhusi ahuwene, muthwasesa ekitambara ky’emeza, neryo thwamathunga ekighuma ky’okwa biro ebikatsemesaya kutsibu ebya thwaberamo haghuma. Nibya kandi munathegheka emikania yaghe.

Omubiiri wethu w’obulebererya iniakatsemesaya kandi imuli ebithunga bingyi eby’eribungira, erilhua e British Columbia erihika Newfoundland. Eriyisunza lyaghe ly’erighenda omwa bindi bihugho lyabya iririkubererera. Munanalengekania okwa sukuru ye  Gilead aliwe nabya isingawithe eriyisunza ly’erighenda omwa bindi bihugho ng’omumisyonare. Iningalhangira abamisyonare nga ni bandu b’embaghane, kandi iningayowa nga singatholere. N’ekindi, mun’ubaha indi bangana thuthuma omwa kihugho ky’omwa Afrika eyiri amalhwere n’esyonyuhi. Nabya inganatsemere eyo nabya.

Omwa 1992 omughulhu omubiiri wethu alighirawa kandi omwa bihugho ebyabya omwa Soviet, muthwabulibwa ngathwangananza erighenda e Estonia erikolha ng’abamisyonare. Muthwasweka, aliwe muthwakihira omwa misabe. Kandi muthwalengekania, ‘Yehova amabugha athi thukole kindu kirebe, busana naki ithuthakilengesya?’ Muthwaligha, kandi munayibwira indi, ‘Hakiri sithwendi ghenda omwa Afrika.’

Muthwatsukiraho erigha Olhuestonia. Enyuma w’amezi malebe ithune omwa kihugho ekyo, muthwasabwa erikolha omubiiri w’obulebererya. Muthwabya b’eribungira ebithunga nga 46 n’esyogurupu omwa bihugho bisathu bye Baltic kuthya n’omwa Kaliningrad, e Russia. Ekyo mukyamanyisya kithi thulengesaye erigha Olhulatvia, Olhulithuania, n’Olhurussia. Sikyabya kyolho. Nomwabine, balikyethu mubatsema kutsibu thukahiraho akaghalha, kandi mubathuwathikya. Omwa 1999, omwa Estonia mumwabya ekyaghanda ky’omuthahulha, kandi munasombolhwa erikolera okwa komiti y’eyo haghuma na Toomas Edur, Lembit Reile, na Tommi Kauko.

Muthwaminya Abema bangyi abo egavumente yabya iyabirisubya e Siberia kera. Nomubanakolhawa nabi omwa ngomo n’erighabulhwa okwa syofamile syabu, mubathahithana. Mubasighalha ibanatsemire kandi ibanawithe omuhwa omw’ithulira. Eki mukyaleka ithwalhangira ngoku thwangana yiyinia kandi ithwabya ithunatsemire omwa mibere eyikalire.

Emyaka yabere yinemulhaba n’ebiro by’erilhuhuka ini bike kutsibu, Lesli mwatsuka eriyowa inialimulhuha kutsibu. Muthuthalhuaho thukaminya ngoku erilhuha liwe likalethawa n’obulhwere obukahulhawamo fibromyalgia. Neryo muthwalengekania okw’iyisubira e Canada. Thwabere thukakokibwa okwa sukuru y’abali okwa komiti y’ebyaghanda by’omuthahulha n’abakali babu e Patterson, New York, U.S.A., munathika-thikira eky’erighenda kuyo. Aliwe, enyuma w’erisaba kutsibu muthwaligha. Yehova mwatsumulha erithwamu lyethu. Ithune okwa sukuru eyo, erighunzerera Lesli mwabana erithambirwa eryo aby’akayithagha. Busana n’ekyo, muthwathoka erithasyakolha emibiiri yethu eya buli kiro.

Erigholho-gholho lighuma omwa 2008, ithukine e Estonia, ab’okwa kyaghanda kikulhu mubanyitherera erinyibulya nga thwangana ligha erikolera e Congo. Munathika, kutsibu-tsibu kundi munayithagha erisubirya ekiro ekyakwamako. Okw’itsuka, munathakibwirako Lesli kundi munaminya ngoku isyendi ghotsera omwa kiro omo. Omwakanya k’ekyo, n’ingye nakuba othulho, ingasaba busana n’ebyabya bikanyiyilhalikirirya ebihambire okwa Afrika.

Ekiro ekyakwamako nabere ingabwira Lesli, muthwabugha thuthi: “Yehova yukathukokaya athi thughende omwa Afrika. Thukaminya thuthi ngoku sithwanga kithoka n’erikitsemera thwamathendi kilengesya?” Neryo enyuma w’emyaka 16 omwa Estonia,  muthwaya e Kinshasa, Congo omwa ndegge. Ekyaghanda ky’omuthahulha eky’eyo kyabya kw’ehirima ehyuwene kandi ihathekene. Ekighuma ky’okwa ebindu by’erimbere-mbere ekya Lesli ahira omwa kisenge kyethu yabya iy’ekadi eyo abya iniabiribika aho thukathalhuira e Canada. Yabya kw’ebinywe bino; “Tsemera aho wuli.” Thwabere thukabanangana n’abalikyethu, erisondolha abigha be Biblia, n’eriyilhangirira etseme y’eribya bamisyonare, etseme yethu y’erikolera Yehova muyongera. Endambi muyahika, thwamabana olhusunzo lhw’eribungira ebindi byaghanda by’omuthahulha nga 13 omwa bindi bihugho by’omwa Afrika. Ekyo mukyaleka ithwalhangira abandu bangyi n’obubuya bwabu. Eryubaha lyaghe ly’erimbere mulyahwa, kandi muthwasima Yehova busana n’erithuthuma omwa Afrika.

Omwa Congo, ithukahebawa ebyalya bihyaka, ng’ebihuka, ebyo nabya ingalengekania indi sithwangalya. Aliwe thwabere thukalhangira balikyethu ibanemubitsemera, muthwabilengesya kandi muthwabyanza.

Muthwathoka eriwathikya balikyethu bunyakirimu na kinyamubiri abali ebulhua lyuba bw’ekihugho ekyo eyo esyogurupu sy’abarebbo syabya sikathahirira ebyalu n’erikolha nabi abakali n’abaana. Balikyethu bangyi babya bawithe bike kutsibu kinyamubiri. Nomwabine, amaha wabu awaghumire omw’ilhubuka, olhwanzo olhwa bawithire Yehova, n’obuthaleghulha bwabu okwa kithunga kiwe mubyathuhimba kutsibu. Mukyaleka ithwathasyayilebya n’erighumya erikirirya lyethu. Abaghuma b’okwa balikyethu babya ibabiryaghalhwa busana n’eriherya amanyumba wabu n’ebirimwa byabu. Eki mukyanyibukya ngoku ky’olhobire eriherya ebindu by’ekinyamubiri kandi ngoku obughuma bwethu na Yehova kya kindu kikulhu kutsibu. Nomuyanabya ebitsibu ebikalire, balikyethu mubathayineghenia na hake. Amalengekania wabu mwathuhiramo omuhwa w’erighumira buthubaha ebitsibu byethu kuthya n’ebya maghalha.

Muhabya ekindi ekya thuswekaya. Muthwasabwa erihumira okwa kyaghanda kye Hong Kong. Thwabya isithuli thwathalengekania thuthi thwangan’ikalha omwa Asia! Aliwe enyuma w’eriyilhangirira ebyalha bya Yehova eby’olhwanzo omwa sindi nzunzo syethu syosi, muthwaligha erikokya eryo. Omwa 2013, ithunemuthoghongya emisoni, muthwasighania banywani  bethu banzwa n’ebibuyanga bye Afrika, isithwasi ebiri embere.

Yabya mbinduka nene erihumira e Hong Kong kundi abya muyi ow’alimu abandu banene kandi abakalhua omwa bihugho bingyi. Olhukantonizi ilhukalire. Aliwe, balikyethu mubathuthangirira ndeke, kandi omo kwenene muthwatsemera ebyalya byayu. Omubiiri abya inianemuyongera kutsibu okwa kyaghanda ky’omuthahulha, aliwe ebbeyi y’ebithaka n’amanyumba yabya nayu iyinemuyongera kutsibu. Neryo Akathunga Akakasondolha mukathwamu ndeke erighulya ebingyi by’okwa bithaka by’ekyaghanda. Enyuma w’obuthuku buke, omwa 2015, muthwahumira e South Korea, eyo thwalholera embere n’emibiiri yethu. Eno muthwasangayo owundi mubughe owakalire, aliwe muthwaminya ngoku nomuthunawithe bingyi by’erikolha, balikyethu mubalhangira ku thunemukulha-kulhana bikahika okw’ilengaho erikania Olhukorea.

Si kyolho mughulhu wosi, erithunga abanywani bahyaka, aliwe muthwaminya ngoku eribya b’erimbere erikokya abandi kyangana leka ithwabaminya lhuba. Thwabiriyilhangirira ngoku balikyethu bawithe bingyi ebya basosenemu kwilhaba ebya bathasosenemu kandi ngoku Yehova mwathuhangika omwa nzira eyikaswekaya ey’eribya ithwangana thoka erikangania ebiri omwa mithima yethu n’erianza abanywani bangyi.—2 Kor. 6:11.

Thwabiriyilhangirira ekiyithawa ky’erithwalha abandu ngoku Yehova akabathwalha n’erisondekania ebikakanganaya ngoku Yehova athwanzire kandi kw’akathusondolha omwa ngebe. Ithukabya thwamahwa amani kutse eribulha abandi nga bakinathwanzire, ithukathasyasoma esyokadi kutse esyobbaruha esikahumulikanaya esyo abanywani bethu bathuthumira. Ahathe erithika-thika thwabiriyilhangirira ngoku Yehova akasubiraya emisabe yethu, erithukakasya n’erithuha akaghalha.

Ahabw’emyaka mingyi, ingye na Lesli thwabiriyilhangirira omughaso w’erithungirana obuthuku, nomuthwangabya ithuli bbize bungahi. Kandi thwabiriminya ngoku thukayithagha erisekererana, kutsibu-tsibu thukalengaho erigha owundi mubughe. Kandi obuli omwa kiro, thukalengaho erisondya ekindu ekyuwene ekyanga leka ithwasima Yehova.

Erithabugha okwenene, iningayowa nga sinangabya mumisyonare kutse erikalha omwa bindi bihugho. Nomwabine, nabiriyilhangirira etseme y’eriminya ngoku ebindu byosi bithokekene busana n’obuwathikya bwa Yehova. Ng’ibuka ebinywe by’omuminyereri Yeremia bino: “Iwe Mwami Mukulhu, wabirinyitheba.” (Yer. 20:7) Omo kwenene, abirithuha ebindu bingyi ebyuwene ebikaswekaya n’emighisa mingyi eyo thwabya isithuyitsulirye, nibya n’eriberererya eriyisunza lyaghe ly’erighenda omwa ndegge. Thwabirighenda omwa myanya mingyi kwilhaba n’eya nangalengekenieko ingakine kojo, eribungira ebyaghanda by’omuthahulha omwa syokontinenti ithano. Omwa syongwamirwa syethu syosi esi, nabiribya inganemusima kutsibu Lesli busana n’omuthima wiwe w’eribya inianayitheghekire erinyisighika.

Thwabiribya ithunemuyibukya nga nindi oyo thukakolera ebi n’ekikaleka. Emighisa eya thukatsemera munabwire ni rozya buyira engebe eya kera na kera omughulhu Yehova ‘akendi syughuthya obwagha bw’abosi.’—Esy. 145:16.