1-2. Nga Loti, ni kitsibuki ekyo Abakristayo bakabana munabwire?

 THUKAYOWA ng’omuthunganene Loti, bikahika okwa by’esyongeso ebikakulha-kulhanibawa omwa kihugho kino. “Aby’akaghalhwa busana n’emikolere eyithisirire y’abandu b’omwagha,” kundi aby’asi ngoku Thatha wethu w’elhubulha akapona emitse mibi. (2 Pet. 2:7, 8) Eryubaha Nyamuhanga n’erimwanza mubyaleka Loti iniaghana eby’esyongeso ebithuwene eby’abandu ababya bamuthimbireko. Nethu kuthya thuthimbirweko n’abandu abathesikaya ebihano bya Yehova eby’esyongeso. Nomwabine, thwangana sighalha ithunahenirye omwa by’esyongeso thwamalholha embere erianza Nyamuhanga n’erimubaha omwa nzira eyitholere.—Emi. 14:2.

² Omw’eki, omwa lhwanzo Yehova akathuhimba n’erithuhiramo omuhwa erilhabira omwa kitabu ky’Emisyo. Abakristayo abosi, abalhume n’abakali, abalere n’abakulhu, bangana ghasirwa ndeke omw’ilebya erihabulha ery’amenge eririmo.

3. Ngoku kiri omwa Emisyo 17:3, ni nzumwa yahi nguma eyikaleka ithwabya b’eritheya omuthima wethu? (Lebaya n’ekisasani.)

³ Enzumwa ngulhu eyikaleka ithwatheya omuthima wethu w’omusyo yiri yithi Yehova akalenga emithima yethu. Eki kikamanyisaya kithi akakyurukaya ameso eby’abandi bakathulhangirako n’erilhangira ekya thuli omwakathi. (Soma Emisyo 17:3.) Iniakendi thwanza thwamusulya omwa bulengekania bwethu mw’amenge wiwe awakaha engebe. (Yn. 4:14) Neryo sithwend’iha obutwa bw’eby’esyongeso n’obw’eby’obunyakirimu ebikalhua oku Sitani n’ekihugho kiwe bya kanya.  (1 Yn. 5:18, 19) Thukendibya thunemuyithunda hakuhi na Yehova, olhwanzo n’erisikya ebyathumuwithire kwa binemwendyongera bithya. Kundi sithwanzire eriponesya Thatha wethu, nibya ithukendi pona n’amalengekania aw’erikolha ekibi. Thwamalengwako erikolha ekiwire, ithukendi yibulya, ‘Nanga thoka indi eriponesya omundu omw’ikighenderera oyuwabirinyikangania olhwanzo lhunene?’—1 Yn. 4:9, 10.

4. Eryubaha Yehova mulyatheya lithi mwali wethu okw’irengwako?

⁴ Marta, mwali wethu e Croatia oyuwalengawako erikolha obusingiri, mwahandika athi: “Mukyanyikalira erilengekania ndeke n’erikakirya omuthima w’erianza eritsemera ekibi habw’akathambi kake. Aliwe eryubaha Yehova mulyanyitheya.” b Eryubaha Nyamuhanga mulyakolha ekyo kya lithi? Marta mwabugha athi mwaghanirya okwa byanga lhwiririra omw’ithwamu libi. Nethu thwangana kolha ekiri ng’ekyo. Eky’akabi ekyanga lhwiririramo kiri kithi ithukendi ponesya Yehova kandi ithwabya isithwanga thasyamuramya kera na kera.—Enz. 6:5, 6.

5. Ekyalholirweko kya Leo kyanga kweghesyaki?

⁵ Thukabya thukubaha Yehova, thukayihighulha okw’iyihambulya busana n’emitse yethu mibi. Leo, oyuwikere e Congo, mw’igha erisomo eryo. Myaka ini alibatizibirwe, mwanywana abanywani babi. Mwalengekania athi amabya isyathayingirya omwa mitse mibi, iniakendibya isyathahalya oku Yehova. Aliwe buthuku buke-buke, banywani biwe babi mubamukolya okw’ikolesya nabi obwabu n’okw’isingira. Neryo mwatsuka erilengekania okwa ebyo ababuthi biwe Abakristayo babya ibabirimukangirirya n’okwa tseme eyo abya iniabiriherya. Mumwalhwiririraki?  Mwabuka kw’obulengekania. Busana n’obuwathikya bw’abasyakulhu, mwasuba oku Yehova. Lino inianatsemire anemukolha ng’omusyakulhu kandi ng’omutemburi w’embaghane.

6. Ni bakali bahi babiri ab’omusyo abo thukayakanayako?

⁶ Thulebaye Emisyo sura 9, aho thukasoma okwa menge n’obukiru, ebikanibweko ng’abakali babiri. (Thasyalebaya na Abanya Roma 5:14; Abanya Galatia 4:24.) Thukakolha ekyo, wibuke ngoku ekihugho kya Sitani kyoswiremo eby’obusingiri n’eponografe. (Efe. 4:19) Neryo ni kikulhu eribya ithunemukulha-kulhania omubere w’eryubaha Nyamuhanga n’eriyihighulha okwa kibi. (Emi. 16:6) Neryo kwesi, ithwe bosi, mbulha wuli mulhume kutse mukali, wangana ghasirwa omwa biri omwa sura eyi. Obuli mukali akakanibawako ng’oyukakokaya abathasiki—‘abathe n’obwowika.’ Obuli mughuma akabya ng’oyukabugha athi, ‘Asa omwaghe wulye okwa bundu bwaghe.’ (Emi. 9:1, 5, 6, 13, 16, 17) Aliwe hali embaghane nene okwa bikalhwiririramo.

7. Ngoku kiri omwa Emisyo 9:13-18, ni kyahi ekikahika okwa bakaligha erikokya ly’omukali mukiru? (Lebaya n’ekisasani.)

⁷ Thalengekania okw’ikokya ‘ly’omukali mukiru.’ (Soma Emisyo 9:13-18.) Omwa buthubaha akabirikira abathawithe amenge athi, ‘Kitha muno’ wuthunge erirya inene. Mukalhwiririraki? ‘Abagheni biwe bali omo mirindi y’ekulimu.’ Wangan’ibuka ebinywe by’omusyo ebiri ng’ebyo ebiri omwa Emisyo mw’ahanyuma. Thukakungawa okwa “mukali oyuthasibwe” ‘n’omulhua haali oyukathendereraya ebinywe biwe.’ Thukabwirawa thuthi: “Enyumba yiwe yeghemere oko lhuholho.” (Emi. 2:11-19) Emisyo 5:3-10 muli erikunga erihambire okwa wundi “mukali w’ehandi” oyo “ebisandu biwe bikandaghalira oko lhuholho.”

8. N’ithwamu lyahi eryathuwithe?

⁸ Abakowa “omukali mukiru” bawithe erithwamu: Mbwino bakendi ligha erikokya liwe kutse bakendi lighana? Thwangana yisanga ithuwithe erithwamu ng’eryo. Eby’obusingiri kutse eponografe byamasa okwa media n’okwa Intaneti isithuyitsulirye, ithukendi kolhaki?

9-10. Ni nzumwa nga syahi esikaleka ithwabya ithutholere eriyihighulha okwa busingiri?

⁹ Hali nzumwa mbuya esikaleka ithwabya ithutholere eriyihighulha okwa by’obusingiri. “Omukali mukiru” akakanibawako ng’oyukabugha athi: “Amaghetse w’eribwa asihire.” “Amaghetse w’eribwa” wa wahi? E Biblia yikasosekanaya emyatsi y’engyingo eyo abathahenie bakakolha ng’amaghetse awakahumulikanaya. (Emi. 5:15-18) Omulhume na mukali  wiwe bangana bana etseme omwa by’emyatsi y’engyingo eyitholere omwa butheke bwabu obulighirwe omwa bilhaghiro. Aliwe ekyo kiri mbaghane okwa “maghetse w’eribwa.” Anganamanyisya emyatsi y’engyingo eyithalighirwe. Mughulhu mungyi ekyo kikakolhawa omwa bubiso-biso ngoku omwibi akan’iba omwa bubiso-biso. “Amaghetse w’eribwa” anganabya ng’asihire abalyakikolha bamayowa nga sihali oyukendi minya. Eryo ka n’ithebwa! Yehova akalhangira ebyosi. Sihali ekikalhuma ng’erithendi simwa na Yehova, neryo sihali ‘ekisihire’ bikahika okw’ikolha ekibi ng’ekyo. (1 Kor. 6:9, 10) Aliwe hane n’ebindi.

¹⁰ Obusingiri bwangana letha ekihemu, eriyowa mwa wa bbule, amakule awathanzibirwe, n’amatheke erithwika. Kwesi, ni ky’amenge eriyihighulha okwa “nyumba” y’omukali mukiru n’ebyalya biwe. Eryongera okw’iholha bunyakirimu, abasingiri bangyi bakahambawa amalhwere awakaleka ibaholha lhuba. (Emi. 7:23, 26) Omulhondo 18 ow’esura 9 akaghunzerera athi: ‘Abagheni biwe bali omo mirindi y’Ekulimu.’ Neryo busana naki abangyi bakaligha erikokya ly’omukali w’amathebo erikakolhaya okwa bitsibu?—Emi. 9:13-18.

11. Busana naki erilebya eponografe ni ky’akabi kutsibu?

¹¹ Ekithegho ekikanyirire y’eponografe. Abandi bakalengekanaya bathi erilebya eponografe sikiwithe butsibu. Mbaghane n’ekyo, eponografe ni y’akabi, yikakughunzamo ekitsumbi n’erikuyiramo mukobe wayu. Ebisasani by’obutswatswa sibirilhua omwa bwongo; kikalire eribisimura omwa bwongo. Ibbwa eky’akabi kutsibu, eponografe siyiritha esyongumbu nyibi; yikasyongera. (Kol. 3:5; Yak. 1:14, 15) Omo kwenene, abangyi abakalebaya eponografe erighunzerera bakakolha obusingiri.

12. Thukakanganaya thuthi ku thukayitheghaya okwa bisasani ebikabukaya esyongumbu sy’emyatsi y’engyingo?

¹² Ithwe ng’Abakristayo thutholere ithwakolhaki ekisasani ky’eponografe kyamasa okwa kyuma kyethu ky’ekielekitroniki? Thutholere ithwakilhusyako aho n’aho. Ithukendi thoka erikolha ekyo thwamibuka ngoku ekindu ky’obughuli bunene ekya thuwithe bw’obughuma bwethu na Yehova. Nibya n’ebisasani ebyo abangyi bakalhangira nga si by’eponografe byangana bukya esyongumbu sy’emyatsi y’engyingo. Busana naki ithwayihighulha kubyo? Kundi sithwanzire erikolha akandu n’akake akangaleka ithwasingira omwa muthima. (Mt. 5:28, 29) Omusyakulhu e Thailand ya David akabugha athi: “Ngayibulhaya: ‘Nomwakine indi ebisasani ebi byanganabya isi by’eponografe, Yehova anemwendi tsema namalholha embere eribisamalira?’ Erighanirya ng’eri likaleka ingathwamu ndeke.”

13. Ni kyahi ekikathuwathikaya erithwamu ndeke?

¹³ Erisagha erikolha ekyosi-kyosi ekikendi ponesya Yehova likendi leka ithwathwamu ndeke. Eryubaha Nyamuhanga “ni nzuko y’amenge.” (Emi. 9:10) Eki kikanganibwe ndeke okw’itsuka lye Emisyo sura 9, aho thukasoma okwa wundi mukali w’omusyo, oyukanibweko ‘ng’amenge’ w’okwenene.

14. N’ikokya lyahi eriri mbaghane eriri omwa Emisyo 9:1-6?

¹⁴ Soma Emisyo 9:1-6. Hano thukasoma okw’ikokya erikalhua okwa Nzuko kandi Engununuko y’amenge w’okwenene, Omuhangiki wethu ow’amenge wosi. (Emi. 2:6; Abar. 16:27) Eky’erileberyako ekikolesibirwe hano kikahulha enyumba nene eyiwithe esyonduyi musanju. Eki kikakanganaya ngoku Yehova ni mwenge kandi ak’angirira abosi abanzire erighendera okwa menge wiwe.

15. Nyamuhanga akathukokaya athi thukoleki?

¹⁵ Yehova ni mwenge oyukahithaya omwa bungyi. Emibere eyi yikalhangirika omwa  “menge” w’okwenene, awakanibweko omwa Emisyo sura 9 ng’omukali. Omwatsi oyu akabugha athi omukali oyu abirithegheka ndeke enyama yiwe, abirithulhungania ebinyu biwe, n’erisesa ndeke emeza yiwe omwa nyumba yiwe. (Emi. 9:2) N’ekindi, erikwamana n’omulhondo 4 na 5: ‘[Omukali oyukanibweko ng’amenge] akabwira oyuthe n’obwowika athi, asa, ulye oko bundu bwaghe.’ Busana naki thutholere ithwasa omwa nyumba y’amenge w’okwenene n’erirya ebyalya eby’akathuha? Yehova anzire abaana biwe ibabya n’amenge kandi ibabya omwa butheya. Syanzire thuk’igha amasomo omwa nzira eyikalire—erilhabira omwa bitsibu ebya thukabana n’eriyikubya bwomo. Ky’ekikaleka iniabikira “abathunganene b’amenge awahikene.” (Emi. 2:7) Thwamubaha Yehova omwa nzira eyitholere, ithukendianza erimutsemesya. Thukowa erihabulha liwe ly’amenge, kandi ithwanza erilighenderako.—Yak. 1:25.

16. Eryubaha Nyamuhanga mulyawathikya lithi Alain erithwamu ndeke, kandi mumwalhwiririraki?

¹⁶ Thulebaye ngoku eryubaha Nyamuhanga lyawathikaya Alain erithwamu ndeke. Omusyakulhu w’ekithunga oyu kandi omusomesya w’esukuru mwabugha athi, “Abangyi b’okw’abangakolha nabu ibakalhangira esyofilimu sy’eponografe ng’omulingo w’eribakangirirya eby’emyatsi y’engyingo.” Aliwe Alain mwathathebibwa. Mwabugha athi, “Busana n’eryubaha Nyamuhanga, munaghanira ighuma esyofilimu esyo. Kandi munasoborera abo ngakolha nabo ekikaleka ingaghana ekyo.” Abya iniakaghendera okw’ihabulha erikalhua okwa “menge” w’okwenene ‘ery’erilendera omo nzira y’obwowika.’ (Emi. 9:6) Busana n’eritsemera emimanire ya Alain, lino abaghuma b’okwa basomesya balikyabo banemw’igha e Biblia n’erihindana.

17-18. Abakaligha erikokibwa erikalhua okwa “menge” w’okwenene banemubana mighisa yahi, kandi balindirireki? (Lebaya n’ekisasani.)

¹⁷ Omw’ikolesya eky’erileberyako ky’abakali babiri ab’omusyo, Yehova abirithuhiriraho omusingyi w’eritsemera emighisa eyikalhwiririramo. Abakaligha erikokya ‘ly’omukali mukiru’ bakahira amalengekania w’okw’itsemera eby’eriyitsemesya ‘ebisihire’ aliwe eby’obubiso-biso. Erithabugha okwenene, bakabyaho busana namunabwire, ibagheghena eby’obuthuku obukasa. Ekikalhwiririramo ni hwera omwa “mirindi y’Ekulimu.”—Emi. 9:13, 17, 18.

¹⁸ Ekyo ka kiri mbaghane okwa bakaligha erikokya erikalhua okwa “menge” w’okwenene! Abagheni biwe banemutsemera ebyalya bingyi ebitheghekirwe ndeke kandi eby’ekirisya, erirya inene eritheghekirwe ndeke ery’ebyalya  by’obunyakirimu. (Isa. 65:13) Erilhabira omu muminyereri Isaya, Yehova akabugha athi: “Mumbulikirire ndeke, kandi mulye ekibuya, wuyitsemesaye omo binunire.” (Isa. 55:1, 2) Thunemw’igha erianza ebya Yehova anzire n’eripona eby’aponire. (Esy. 97:10) Kandi thukabana erithekana omw’ikokya abandi nuku baghasirawe omwa “menge” w’okwenene. Thuli ng’abakabirikira ‘omo syosingyi sy’omuyi thuthi: Omukiru akithe muno.’ Emighisa eyo ithwe haghuma n’abakaligha erikokibwa thukabana si ya munabwire musa. Yikakotha, erileka ‘ithwabyaho’ kera na kera ‘thunemulendera omo nzira y’obwowika.’—Emi. 9:3, 4, 6.

19. Ngoku kiri omwa Omugambuli 12:13, 14, thutholere ithwathwamu erikolhaki? (Lebaya n’akasanduko “ Eryubaha Nyamuhanga Likathughasira.”)

¹⁹ Soma Omugambuli 12:13, 14. Ambi eryubaha Nyamuhanga iryalholha embere eritheya emithima yethu n’erithuwathikya eribya ithunahenirye omwa by’esyongeso na bunyakirimu omwa biro by’enyuma-nyuma bino ebitsandire. Eryubaha eritholere eryo likendi thuhira mw’omuhwa w’erilholha embere erikokya abangyi ngoku thwanga thoka nuku basondaye “amenge” w’okwenene n’erighasirwa mugho.