1. Ni kyahi ekikakanganaya ngoku Yehova ni mwenge?

HANABYA obuthuku omughulhu Yehova abya iyuwene musa. Neryo mwathwamu eriha ebihangikwa by’amenge ekihembo ky’engebe, ebiri mwa lhubulha n’ebiri okwa kihugho. Yehova “Nyamuhanga oyutsemire,” anzire erihithya ebindu ebyuwene. (1 Timoteo 1:11, NW; Yakobo 1:17) Kandi kundi Yehova anzire nethu ithwatsema, akathukangiriraya eribya benge.​—Abanya Roma 1:20.

2, 3. (a) Busana naki thukatsema thwamahithya? (b) Omo mwatsi ono thukendi kania okuki?

² Nyamuhanga mwahangika abandu omwa kisosekanio kiwe. (Enzuko 1:27) Eki kikamanyisaya kithi Yehova mwathuhangika n’emibere ey’awithe. Ithwe eritsema ndeke n’eribana emighisa ya Yehova, thutholere ithwamugherererya. Thutholere ithwatsomana abandi bandu n’eribya benge. (Abanya Filipi 2: 3, 4; Yakobo 1:5) Busana naki? Kundi Yehova kw’athuhangika athya. Nomwakine indi sithuhikene, thwangana gherererya Yehova kandi ithwabya benge.

³ Thukayakanaya okwa masomo malebe agho e Biblia yikakangiriraya okw’ibya benge. Thukendi minya ekikaleka Yehova iniatsema thwamabya benge. Kandi thukendi minya ngoku erihithya likathuwathikaya erikolha omubiiri ogho Yehova abirithuha n’ekikaleka ithwatsema thukahithya. Kandi thukendi kania okwa kyangaleka ithwabya ithutholere erilholha embere eribya benge.

4, 5. Yehova na Yesu babirikangania bathi omubere w’erihithya, kandi busana naki thutholere ithwabagherererya?

⁴ Yehova anzire ithwamugherererya, neryo kikamutsemesaya thwamabya benge. (Abanya Efeso 5:1) Kandi Yehova anzire abandu ibatsema. Thukaminya eki kundi mwathuhangika omwa nzira y’eriswekya, kandi mwakokothya ekihugho ekyuwene n’obuli kindu ekiriko nuku thubitsemere. (Esyonyimbo 104:24; 139:13-16) Neryo thukabya ithukaha Yehova y’olhukengerwa thukalengaho eritsemesya abandi.

⁵ Kandi thukagherereraya Yesu, oyuwahiriraho abandu eky’erileberyako ekihikene ngoku bangabya benge. Mwabugha athi: “Kusangwa Omughalha w’Omundu mwathasa erikolerwa, nikwa asa erikolha, n’eriha engebe yiwe mwa bughuli busana n’abandu bangyi.” (Matayo 20:28) Kandi omukwenda Paulo mwahabulha Abakristayo athi: “Mubye n’obulengekania obu obwa Kristo Yesu . . . Mwayithuthulha olhukengerwa lhwiwe, mwayiyira ng’omughombe.” (Abanya Filipi 2:5, 7) Neryo ithwangana yibulya, ‘Nangana kwama ndeke olhughobe lhwa Yesu?’​—Soma 1 Petero 2:21.

6. Ni kyahi ekya Yesu athukangiriraya omo musyo w’Omusamaria? (Lebaya ekisasani ekiri okw’itsuka.)

⁶ Yehova akatsema thwamakwama eky’erileberyako ekihikene ekyo iyo na Yesu babirithuhiriraho. Eki thukakikolha omw’itsomana abandu n’erilebya ngoku thwanga bawathikya. Yesu mwakangania obukulhu bw’eki akaha omusyo w’Omusamaria mubuya. (Soma Luka 10:29-37.) Mwakangirirya abigha biwe athi batholere ibawathikya abandi, mbulha ni bahi kutse mbulha bakalhua hayi. Wanam’ibuka ekyaleka Yesu iniaha omusyo oyo? Ni kusangwa omulhume Omuyuda mwamubulya athi: “Mulikyethu nindi kwehi?” Ekya Yesu asubiraya kikathukangiriraya ngoku ng’Omusamaria, thutholere ithwabya benge thwamabya thwanzire eritsemesya Yehova.

7. Thukakanganaya thuthi ku thwikirirye ngoku emibere Yehova akakolera mw’emyatsi y’eyuwene kutsibu? Soborera.

⁷ Eyindi nzumwa eyangaleka ithwabya benge yihambene n’ekyabya omw’irima ly’Edeni. Sitani mwabugha athi Adamu na Eva ibakendi tsema bamathendiowa Yehova n’eriyilengekaniako ibobene. Eva mwayitsomana kandi mwanza eribya nga Nyamuhanga. Adamu mwayitsomana kandi mwanza eritsemesya Eva kwilhaba eritsemesya Nyamuhanga. (Enzuko 3:4-6) Ebyalhwiririramu byabya by’akabi. Omo kwenene, sihali oyuwanga tsema amayitsomana iyuwene. Aliwe thwamatsomana abandi n’eribya  benge, thukakanganaya ku thwikirirye ngoku emibere Yehova akakolera mw’emyatsi y’eyuwene kutsibu.

8. Busana naki Adamu na Eva babya batholere ibalengekania okwa bandi?

⁸ Nomwakine indi Adamu na Eva babya omw’irima ly’Edeni ibobene, bangana lengekenie okwa bandi. Busana naki? Yehova abya iniabiribaha omubiiri w’erikolha. Mwababwira athi babuthe busulhaye ekihugho n’erikolha mwa paradiso. (Enzuko 1:28) Adamu na Eva babya batholere ibasunzira abaana babu b’etseme, ngoku Yehova aby’anzire abosi ibatsema. Abosi haghuma banga kolire ekihugho kyosi mwa paradiso. Oyo angabere mubiiri munene!

9. Busana naki abandu bangabere n’etseme banemukolha ekihugho mwa paradiso?

⁹ Kandi abandu abahikene babya batholere ibakolha haghuma na Yehova nuku bangakolha ekihugho mwa paradiso n’eriberererya erisonda liwe. Omwa nzira eyi, bang’ingire omw’ilhuhuka liwe. (Abaebrania 4:11) Thalengekania omubiiri oyu ng’angatsemesirye bungahi! Yehova angabatsumwire kutsibu busana n’eritsomana ndeke abandi.

10, 11. Ni kyahi ekikendi thuwathikya erithulira n’eriyira abigha?

¹⁰ Munabwire, Yehova abirithuha omubiiri w’erikolha ow’embaghane. Anzire  ithwathulira n’eriyira abigha. Erikolha omubiiri oyu, thutholere ithwatsomana abandu. Erithwalira haghuma, ithukendi lholha embere erikolha eki ithunalyabya n’ekilhubirirwa kibuya: erianza Yehova n’erianza abandu.

¹¹ Paulo mwabugha athi iyo n’abandi Bakristayo ab’omwa kighonye ky’erimbere ‘mubakolha haghuma na Nyamuhanga’ kundi mubathulira n’erikangirirya abandu ekwenene. (1 Abanya Korinto 3:6, 9) Kuthya nethu munabwire, ‘thwanganakolha haghuma na Nyamuhanga’ omw’ihithya obuthuku bwethu, akaghalha, n’ebindu by’ekimubiri thukakolha omubiiri w’erithulira ogho Nyamuhanga abirithuha. Eki ka ni kitsumbi kinene!

12, 13. Wangabugha wuthi ni mighisa yahi eyikalhua omw’iyira abigha?

¹² Erihithya obuthuku bwethu n’akaghalha thukathulira n’erikangirirya kikathulethera etseme nene. Ekyo kya balikyethu bangyi ababirithunga akaghisa ak’eryeghesya abigha be Biblia bakabugha. Thukatsema kutsibu thukalhangira abigha bethu be Biblia bakasima busana n’eriyitheghererya ebya Biblia yanga thukangirirya, bakathunga erikirirya, ibakolha esyombinduka omwa ngebe yabu, n’eritsuka eribwira abandi oko bya bak’igha. Yesu nayu mwatsema abathuliri 70 abo athuma ‘bakasubulha n’obutseme’ busana n’ebibuya ebyo babana.​—Luka 10:17-21.

¹³ Balikyethu omo kihugho kyosi bakatsema bakalhangira ngoku omwatsi we Biblia akawathikaya abandu eryuwania esyongebe syabu. Ng’eky’erileberyako, mwali wethu omulere oyukahulhawa mwa Anna mwanza erikolera Yehova ya bingyi. * (Lebaya omwatsi ahikwa.) Neryo mwaghenda omwa bulhambu obuli Ebulhua lyuba bwe Yuropu eyabya obuyithawa bw’abathuliri. Mwahandika athi: “Hano omundu syangabulha ow’erigha nayu, kandi ekyo kikanyitsemesaya kutsibu. Omubiiri waghe akanyiha etseme nene. Ngabya ngahika eka, sindibana obuthuku bw’eriyilengekaniako. Ngalengekanaya okwa bang’igha nabu​—ebitsibu byabu n’amaghaniryo wabu. Ngasondekanaya esyonzira n’emibere ey’eribahimbiramo kandi ngoku nanga bawathikya. Kandi nabiriligha ndeke-ndeke ngoku ‘erihithya likaletha obutseme.’”​—Emibiri 20:35.

14. Wangatsemera wuthi erithulira abandu nomubanga ghana erihulikirira?

¹⁴ Abandu nomubangaghana erithuhulikirira thukathulira, thutholere ithwatsema kundi thukabya ithwamabaha akaghisa ak’eriowa engulhu yuwene. Yehova anzire ithwakolha ekindu ekiri ng’ekyo abwira Ezekieli erikolha: “Nawu wasyabwirabo ebinywe byaghe, bamowa kutse bamathendiowa.” (Ezekieli 2:7; Isaya 43:10) Neryo mbulha bahulikirire kutse eyihi, Yehova akasima akaghalha kethu. (Soma Abaebrania 6: 10.) Mughalha wethu mughuma mwabugha bino okw’ithulira liwe: “Thwabiribiba, n’eryuthangirira, n’erisaba ithunawithe amaha thuthi Yehova akendi leka erianzisibwa iryakulha.”​—1 Abanya Korinto 3:6.

15. Mbwino thutholere ithwahithya abandu bamabya ibakasima? Soborera.

¹⁵ Yesu anzire ithwabya benge kundi kikaleka ithwatsema. Thwamahithya, abandu bangyi nabu ibakendihithya. Neryo akathuhira mw’omuhwa athi: “Muhithaye, na Nyamuhanga asyabaha, mwasyabaghalira olhulengo olhuwene, olhusokire, olhutsingire, olhuli kw’omutswogho. Kusangwa olhulengo olho mukalengamo, mwasyalengerwalho.” (Luka 6:38) Omo kwenene, sibugha indi abandu abosi, bakendi sima wukahithya. Aliwe nomubangaghana erisima, iwe lholha embere erihithya. Siwangaminya erihithya lyawu nga mwangalhua bibuya bingahi.

16. Ni bahi abo thutholere ithwahererya, kandi busana naki?

¹⁶ Omo kwenene abenge sibali hithaya n’amaha bathi nabu bahebawe. Yesu mwabugha athi: “Omughulhu wukayira erirya, wubirikire abera, n’ebirema, n’abakasindoghera, n’esyondimethime, nawu wasyatsema; kusangwa sibangathoka erisyakuthuha.” (Luka 14:13, 14) Kandi e Biblia yikabugha yithi: “Oyuwithe eriso ly’obwenge asyatsumulhwa,” kandi yithi “Obutseme buli oko mundu oyukatsomana [omwera].” (Emisyo 22:9; Esyonyimbo 41:1) Thutholere ithwahithya kundi thwanzire eriwathikya abandi.

17. Ni nzira nga syahi esy’erihithiryamu esyangaleka ithwatsema?

¹⁷ Paulo abere akasuba omwa binywe bya Yesu athi “erihithya likaletha obutseme kwilhaba erihebwa,” syakanaya okw’ihithya  ebindu by’ekinyamubiri bisa. Ithwangana humulikania n’abandu, ithwabaha erihabulha lye Biblia, n’eribawathikya. (Emibiri 20:31-35) Omwa bya Paulo abugha n’erikolha, mwathukangirirya ngoku ni kikulhu erihithya obuthuku, akaghalha kethu, erihulikirira lyethu, n’olhwanzo lhwethu.

18. Abakasekulhaya bangyi bakabugha bathiki okw’ihithya?

¹⁸ Abakasekulhaya okwa by’emibere y’abandu nabu babiriminya ngoku erihithya likaleka abandu ibatsema. Erikwamana n’omwatsi mughuma, abandu bakabugha bathi bakatsema kutsibu bamakolera abandi b’ebibuya. Abakasekulhaya bakabugha bathi omughulhu thukawathikaya abandi, thukayowa engebe yethu iyiwithe ekighendererwa. Neryo abasi bingyi bakabugha bathi abandu bakakolha emibiiri y’eriyihayo nuku bangabya n’amaghalha awuwene n’etseme. Kandi, erisekulya lyabu siririthuswekaya, kundi Omuhangiki wethu w’olhwanzo, Yehova, mughulhu wosi akabugha athi erihithya likathulethera etseme.​—2 Timoteo 3:16, 17.

19, 20. Busana naki wanzire iwabya mwenge?

¹⁹ Abandu abathuthimbireko bamabya ibayitsomene ibo basa, kyangana thukalira kutsibu erilholha embere eribya benge. Aliwe Yesu mwathw’ibukya ngoku ebihano bikulhu-bikulhu bibiri ly’erianza Yehova n’omuthima wosi, engebe yawu kyosi, n’obulengekania bwawu bwosi, n’amaaka wawu wosi, n’erianza mulikyenyu ngoku wuyanzire. (Mariko 12:28-31) Omo mwatsi ono thwamabiriminya ngoku abanzire Yehova bakamugherereraya. Yehova na Yesu ni benge. Bakathuhira mw’omuhwa ow’eribagherererya, kundi banasi eki kikendileka ithwatsema. Thwamabya benge omwa byathukakolera Nyamuhanga n’abataka, ithukend’iha Yehova y’olhukengerwa kandi ithukendi ghasirwa kuthya n’abandi.

²⁰ Ahathe erithika-thika, wune mukolha kutsibu erihithya n’eriwathikya abandi, kutsibu-tsibu balikyethu. (Abanya Galatia 6:10) Wamalholha embere erikolha ekyo, abandu ibakendi sima n’erikwanza, kandi iwukendi tsema. E Biblia yithi: “Omuthima w’erisunza [erihithya] asyanenehibwa, n’oyukaha omundu y’amaghetse, nayu asyahabwagho.” (Emisyo 11:25) Omwa ngebe yethu n’omubiiri wethu, mune esyonzira nyingyi esyothwanga tsomaniramu abandu n’eribya b’olhukeri n’erihithya. Leka thukanaye okwa syonzira nguma-nguma sy’okw’isyo omo mwatsi owakakwamako.