OMWAKA owahwere, baghalha bethu bangyi omwa kihugho kyosi mubasombwerwe eribya basyakulhu n’abaghombe abawathikya. Wamabya iwuli mughuma w’okw’ibo, ahathe erithika-thika wutsemire eribya iwangana kolera Yehova n’abalikyethu omwa nzira mbyaka eyi.

Nomwabine, ni kya buli kiro, nawu erihangya-hangya. Jason, omusyakulhu omulere, akabugha athi: “Nabere ingasombolhwa, munayibulha-bulha busana n’esyongwamirwa syaghe mbyaka.” Musa na Yeremia mubayowa nga sibatholere esyongwamirwa mbyaka esyo Yehova abaha. (Eriluayo 4:10; Yeremia 1:6) Wamabya ikwa wukayowa wuthya, wangakolhaki nuku wusike n’erilholha embere erikulha-kulhana? Eky’erileberyako kya Timoteo kyangana kw’eghesya bingyi.​—Emibiri 16:1-3.

Timoteo angabya iniabya awithe myaka nga 20 akatsuka erighenda n’omukwenda Paulo. Omughulhu athunga erikokibwa eri, Timoteo angabya imwayowa nga syatholere erikangirirya n’erihabulha abandi kundi abya mulere. (1 Timoteo 4:11, 12; 2 Timoteo 1:1, 2, 7) Aliwe mwalholha embere erikulha-kulhana, n’enyuma w’emyaka ikumi Paulo mwabwira Abanya Filipi athi: “Omukama Yesu amanza, nasyabathumira Timoteo yo lhuba.” Busana naki Paulo mwayowa athya? Akasoborera athi: ‘Singwithe owundi oyuwithe omuthima ng’owiwe.’​—Abanya Filipi 2:19, 20.

Busana naki Timoteo ni ky’erileberyako ekyuwene kutsibu okwa basyakulhu? Thulebaye esyonzumwa mukagha.

1. Mwatsomana ndeke abandu. Paulo mwabwira balikyethu be Filipi athi Timoteo ‘abahirire kw’omuthima wiwe’. (Abanya Filipi 2:20) Timoteo abya anzire balikyethu ibasighalha hakuhi na Yehova, kandi abya inianayitheghekire erihayo obuthuku bwiwe n’akaghalha kiwe eribawathikya.

William, oyuwamabirighunza emyaka eyilhabire oku 20 iniane musyakulhu, akabera eribwira abasyakulhu abahyaka athi: “Mwanze balikyethu. Mutsomane ebiyithawa byabu omwakanya k’erihwerya amalengekania okwa mibiiri y’ekithunga misa.” Isimwabya ng’oyukaghendaya ebbasi oyukatsomana erihikya ebbasi aha yik’imana okwa ndambi omwakanya k’eritsomana eringirya abandu b’omwa bbasi.

2. Mwahira omubiiri wa Yehova w’embere. Paulo mwabugha athi Timoteo abya mbaghane okw’abo ababya “bakakwama emyatsi yabo butsira emyatsi ya Yesu Kristo.” (Abanya Filipi 2:21) Paulo mwalhangira abandi baghalha bethu ibakahweraya amalengekania wabu w’okwa ngebe syabu. Ihakanayira ebyabu ibyabahira embere omwakanya k’ebya Yehova. Aliwe Timoteo syabya athya! Abere akanabana akaghisa k’erikolha bingyi omwa mubiiri wa Nyamuhanga, mwakolha nga Isaya, oyuwabugha athi: “Ingye yono hano. Wunyithume!”​—Isaya 6:8.

Wangakangania wuthi erithendyeghemera olhuhandi lhughuma wukatsomana ebiyithawa byawu n’ebiyithawa by’ekithunga? Eky’erimbere, kwama obusondoli bwa Paulo buno: “Minya ndeke eby’omughaso munene.” (Abanya Filipi 1:10, NW) Hira omubiiri wa Yehova w’embere. Ekyakabiri, yihighule okwa mibiiri eyanga kuthwalira obuthuku bwawu bunene n’akaghalha. Paulo mwabwira Timoteo athi: “Wusaghe esyongumbu sy’obulhwana, wukwamirire ekithunganene, erikirirya, olhwanzo, obuholho.”​—2 Timoteo 2:22.

3. Mwakolha kutsibu omubiiri wa Yehova. Paulo mwabugha oku Timoteo athi: “Ng’omwana kw’akakolera ise, abirikolha haghuma naghe omwa mubiiri w’erighendya-ghendya engulhu yuwene.” (Abanya Filipi 2:22) Timoteo syabya mughatha. Mwakolha  kutsibu haghuma na Paulo, kandi eki mukyaghumya obunywani bwabu.

Munabwire, hali mubiiri munene w’erikolha omwa kithunga kya Yehova. Omubiiri oyu akatsemesaya kandi akendi kuwathikya eriyithunda hakuhi na balikyethu. Neryo lhangira wuthi mughulhu wosi wukabya iwune “n’ebingyi by’erikolha omwa mubiiri w’Omukama.”​—1 Abanya Korinto 15:58, NW.

4. Mwakolesya ebyo igha. Paulo mwahandika oku Timoteo athi: “Iwe wabirikwama ndeke erikangirirya lyaghe, n’emikolere yaghe, n’eriyisunza lyaghe; kandi wabirikwama erikirirya lyaghe, n’eriyibombeka lyaghe, n’olhwanzo lhwaghe, n’eriyiyinia lyaghe.” (2 Timoteo 3:10) Timoteo mwakolesya ebyo igha, neryo mwathunga esyonzunzo nyingyi.​—1 Abanya Korinto 4:17.

Busana naki iwuthasondya omusyakulhu oyuwasi bingyi oyo wanga gherererya? Tom, oyuwamabirighunza myaka mingyi inina musyakulhu, ak’ibuka ngoku omusyakulhu oyuwasi bingyi mwamutsomana kandi mwamuthendeka ndeke. Akabugha athi: “Iningabya ingane mumusondya kw’amahano n’erikolesyagho. Eki mukyaleka inathunga lhuba erisika.”

5. Mwalholha embere eriyithendeka. Paulo mwahana Timoteo athi: “Wuyikalha-kalhaye busana n’erikenga Nyamuhanga.” (1 Timoteo 4:7) Nomwakine indi omuthibithi akabya inianawithe oyukamuthendeka, akabya inianayithaghire eriyithendeka. Paulo mwabwira Timoteo athi: “Wuyihe okwa mubiiri w’erisomera abandu ekitabu kya Nyamuhanga, kandi wuyihe okw’ihana n’erikangirirya. . . . Wukole emyatsi eyi, wukwamirireyo, erilholya embere lyawu liminyikale okwa bosi.”​—1 Timoteo 4:13-15.

Nawu wukayithagha eribya iwunemuwania ebya wasi. Yeghesaye e Biblia n’omuhwa, kandi ghenda-ghendanaya n’obusondoli buhya-buhya bw’ekithunga. Isiwayikethera kutsibu amaaka wawu. Ikikendibya isikihikire erilengekania wuthi wasi bingyi kutsibu neryo wuthi wangana kolha oko mwatsi wosi-wosi isiwuthasekulya nibya. Nga Timoteo, “wuyitheghaye kandi wutheghaye erikangirirya lyawu.”​—1 Timoteo 4:16.

6. Mwayikethera omulimu wa Yehova. Paulo abere akakania okw’ithulira lya Timoteo, mwamw’ibukya kino: “Wutheghaye emyatsi mibuya eyo wabirihabwa, omwa maaka w’omulimu abuyirire ow’ikere omw’isi wethu.” (2 Timoteo 1:14) Timoteo abya atholere iniayikethera omulimu wa Nyamuhanga.

Donald, oyuwabirikolha ng’omusyakulhu habw’emyaka mingyi, akabugha athi: “Abasyakulhu n’abaghombe abawathikya batholere ibatsomana ndeke obughuma bwabu na Nyamuhanga. Abakakolha ekyo bakendiongera eribana amaaka. Bamasaba omulimu abuyirire wa Nyamuhanga n’erikangania emikolere yagho, ibakendi wathikya kutsibu balikyethu.”​—Esyonyimbo 84:7; 1 Petero 4:11.

Kikatsemesaya erilhangira abaghombe abawathikya n’abasyakulhu bahya-bahya nabu, ng’iwe, abanzire erilholha embere erikulha-kulhana bakakolera Yehova. Jason, oyo thulyakanayako okw’itsuka, akabugha athi: “Obuthuku obwa namabirighunza ingane musyakulhu, nabirigha bingyi n’eryongera erisika. Lino ngatsemera olhukwamirwa lhwaghe n’erilhangira ini lhusunzo olhuwenenga!”

Wunemwendi lholha embere erikulha-kulhana? Wamagherererya eky’erileberyako kya Timoteo, nawu iwukendibya mughisa oko balikyethu.