Busana naki sihali oyulighirwe erihira ebitabu by’Abema ba Yehova okwa yindi mithahulha ye Intaneti kutse ey’erikanirania n’abandi?

Abandi bandu bakalengekanaya bathi kundi sithulighulhaya ebitabu byethu, bangana bikopa kutse ibabihira okwa yindi mithahulha ye Intaneti kutse ey’erikanirania n’abandi. Aliwe eki kyanganaletha ebitsibu kandi sikirilighirana n’eby’Erighenderako * (lebaya omwatsi ahikwa) eby’omuthahulha wethu. Eby’Erighenderako ebi bikabugha ndeke-ndeke bithi omundu wosi-wosi syalighirwe “erihira ebisasani, ebitabu ebiri omwa mulingo w’elekitroniki, ehiminyikalho, omuziki, esyovidiyo, kutse emyatsi y’okwa muthahulha ono okwa wundi muthahulha we Intaneti (omuthahulha wosi-wosi, emithahulha ey’erithumirana kw’emyatsi, esyovidiyo, kutse ey’erikanirania n’abandi).” Busana naki ebilhaghiro ebi bitholere?

Obuli kindu ekiri okwa muthahulha wethu kiriko e copyright, erimanyisya indi hali ebilhaghiro ebikatheghayakyo. Eki ni kikulhu kundi kikaleka iniathakolesibwa nabi. Abakayisamambulha okw’ikirirya n’abandi bandu abakanza eritsandya omubiiri wethu bakanahira ebitabu byethu okwa mithahulha yabu erikura amalengekania w’Abema ba Yehova n’abandi bandu. Aliwe kandi okwa mithahulha eyo bakahirako emyatsi eyikaletha omwa bandu mw’erithika-thika. (Esyonyimbo 26:4; Emisyo 22:5) Abandi babirikolesya emyatsi ey’okwa muthahulha wethu kutse akaminyikalho k’omuthahulha wethu aka jw.org omw’ithererera, omwa sya apps, n’okwa bindu ebya bakaghulhaya. Aliwe kundi hali ekilhaghiro ekikatheghaya emyatsi yethu n’akaminyikalho kethu, ithwangana ghenda omwa batsweri neryo ibaleka erithasyakolha ekyo. (Emisyo 27:12) Aliwe abatsweri bangana ghana erithusighika thwamabya thukalighira abandu balebe, nibya n’abalikyethu, erihira ebitabu byethu okwa yindi mithahulha kutse erikolesya akaminyikalho ke jw.org erighulya emyatsi yethu.

Ikyanganabya ky’akabi thwamakimya ebitabu byethu by’okwa yindi mithahulha yithe jw.org. Yehova akathuha ebyalya by’obunyakirimu erilhabira omwa “mughombe oyuthereghulha n’ow’amenge” musa. (Matayo 24:45) “Omughombe” oyo akakolesaya omuthahulha wethu ow’ahamulirwe musa erihulhukya ebyalya by’obunyakirimu—e www.pr418.com, e jw.org tivi na wol.pr418.com. Kandi thuwithe esya apps isathu nyisa esihamulirwe—e JW Language^®, e JW Library^®, na JW Library Sign Language^®. Okwa mithahulha n’omwa apps esi, sithwangabana erithererera lyosi-lyosi kutse ekindu kyosi-kyosi erilhua omwa kihugho kya Sitani. Aliwe thwamathunga ebitabu byethu erilhua okwa yindi mithahulha kutse e app, hali akabi kundi banganabya ibabiribihindulha omwa yindi mibere.—Esyonyimbo 18:26; 19:8.

Eryongera okw’ekyo, thwamahira ebitabu byethu okwa mithahulha eyo abandu bangana bikaniako, ikikendileka abakayisamambulha okw’ikirirya n’abandi bandu ibatsambulikania ekithunga kya Yehova. Neryo abandi balikyethu bakakuba obuhaka n’abandu aba, kandi ekyo ikyongera eritsandya oku Yehova kw’erina. Erikanirania ng’eri okwa Intaneti si y’enzira mbuya y’erihengulha amalengekania w’omundu n’erimuwathikya eriyitheghererya okwenene. (1 Timoteo 6:3-5; 2 Timoteo 2:23-25) Kandi, abandi bandu bakanakolha emithahulha kutse emithahulha y’erikanirania n’abandi eyikabya nga yilhuire okwa kithunga kutse oku baghalha bethu abali okwa Kathunga Akakasondolha. Aliwe si y’okwenene. Sihali n’omughuma w’okwa Kathunga Akakasondolha oyuwithe Omuthahulha kutse oyuli omwa mithahulha yosi-yosi y’erikanirania n’abandu.

Thukabya thukakangirira abandu omuthahulha wethu owe jw.org, thukasighika omubiiri w’erithulhughania “engulhu yuwene.” (Matayo 24:14) Omuthahulha wethu n’esya apps binemughenda bik’uwana kutsibu. Thwanzire obuli mundu iniaghasirwa mubyo. Neryo thukalighirawa erithumira abandi ebitabu byethu kutse eribathumira e linki eyikabathuma okwa muthahulha wethu. Omwa nzira eyi thukasondolha abandu okwa nzira nyisa eyo Yehova akaheramu ebyalya by’obunyakirimu, “omughombe oyuthereghulha n’ow’amenge.