KUNDI engebe yabirikalha kutsibu omwa biro “by’enyuma-nyuma” bino, thukayithagha eriyibombeka kutse erighumisirizya kwilhaba kera. (2 Timoteo 3:1-5) Abandu bangyi munabwire sibali ghumisirizaya. Bayitsomene, banzire erikakalhukana, kandi sibali yikakiraya. Neryo thutholere ithwayibulya: ‘Mbwino nabiribya mundu oyutheghumisirizaya ng’abandi bandu abanyithimbireko? Kikamanyisayaki erighumisirizya omo kwenene? Nangakolhaki eribya n’omubere w’erighumisirizya?’

Ekinywe “eriyibombeka” kutse erighumisirizya ngoku kikakolesibawa omwa Biblia kikamanyisayaki? Sikirisubulira okw’ikwama kya ghumira ekitsibu. Oyukaghumisirizaya akayiyinaya inianawithe ekighendererwa, ni bugha ambu, akabya n’amaha ngoku emyatsi yikendyuwana. Syali yirengekanayako iyo musa, aliwe kandi akatsomana eriyowa ly’abandi, nibya n’abangabya ibabirimuhithania kutse erimukolha nabi. Akabya inianawithe amaha ngoku obughuma bwabu bukendi syuwana. Sikiriswekaya e Biblia eribugha yithi erighumisirizya likalhua omo lhwanzo. * (Lebaya omwatsi ahikwa.) (1 Abanya Korinto 13:4) Kandi erighumisirizya ni kitsweka ky’okwa “mikolere eyikalhua oko mulimu.” (Abanya Galatia 5:22, 23) Neryo, thutholere ithwakolhaki eribya abakaghumisirizaya?

Eribya oyukaghumisirizaya thutholere ithwasaba Yehova y’obuwathikya bw’omulimu, obw’akaha abakamuyikethera. (Luka 11:13) Omulimu oyo awithe obuthoki bunene, aliwe thutholere ithwakolha erikwamana n’emisabe yethu. (Esyonyimbo 86:10, 11) Eki kikamanyisaya kithi thutholere ithwakolha ekyosi-kyosi erikangania erighumisirizya obuli kiro n’eriyiragho mwa mubere wethu. Aliwe hakanayira ithwalemwa. Ni kyahi ekyanga thuwathikya?

Thutholere ithw’igha n’erigherererya eky’erileberyako kya Yesu ekihikene. Paulo abere akakania okwambalha ‘omundu muhya-muhya,’ imwamuli erighumisirizya, mwathuhira mw’omuhwa ono: “Muleke obuholho bwa Kristo buthabale emithima yenyu.” (Abanya Kolosai 3:10, 12, 15) Erikolha ekyo, thutholere ithwakwama eky’erileberyako kya Yesu n’eriyikethera ndeke ngoku okwa buthuku obutholere, Nyamuhanga akendyuwania emyatsi. Thwamabya n’eriyikethera eryo, isithwendi herya omubere wethu w’erighumisirizya, nomohangabyaki.—Yoane 14:27; 16:33.

Ithwe bosi thwanzire ekihugho kihya-kihya ikyasa lhuba. Aliwe thukigha eryongera erighumisirizya thukalengekania ngoku Yehova abirithughumisirizya. E Biblia yikathukakasaya yithi: “Omukama syali malha busana n’erilhagha liwe, ng’abandi kubakaghaniraya. Nikwa akayitsingirira busana nenyu isyanzire omundu n’omughuma akahera, nikwa anzire abandu abosi ibabindulha emithima yabu n’erileka ebibi.” (2 Petero 3:9) Neryo thukabya thukalengekania okw’ighumisirizya erya Yehova akathukanganaya, nethu thukongera erighumisirizya abandi. (Abanya Roma 2:4) Ni mibere nga yahi eyikathuyithaghako erighumisirizya?

Ni mibere mingyi omwa ngebe eyikathuyithaghako erighumisirizya. Ng’eky’erileberyako, kikayithagha erighumisirizya erithendi bughira omwa bandi wamabya wuwithe ekindu ky’omughaso eky’eribugha. (Yakobo 1:19) Kandi thukayithagha erighumisirizya omundu amathuhithania. Omwakanya k’erithendi ghumisirizya, ni kibuya eryibuka ngoku Yehova na Yesu bakaghumisirizaya erilemererwa lyethu. Sibali hweraya amalengekania w’okwa hisobyo hyethu hingyi ehyo thukakolha. Omwakanya k’ekyo, bakasamalira emibere yethu emibuya kandi omw’ighumisirizya ibathuha obuthuku bw’eryuwania emyatsi.—1 Timoteo 1:16; 1 Petero 3:12.

Kandi thukayithagha erighumisirizya, omundu amabugha athi muthukabugha kutse erikolha ekithuwene. Obundi ithwangana tsuka erihithana n’eriyilhwirako. Aliwe Ekinywe kya Nyamuhanga kikabugha kithi isithwakolha ekyo. Kikabugha kithi: “Eriyibombeka [erighumisirizya] ly’ekirimu lyuwene kwilhaba eriyiheka ly’ekirimu. Siwanguhe omo kirimu kyawu erihithana, kusangwa erihithana likere omo kikuba ky’abakiru.” (Omugambuli 7:8, 9) Neryo nomuthwangabya ithulyahangirirawa, thutholere ithwaghumisirizya n’eritsuka erilengekania thuthe thwabugha. Ekyo kya Yesu akolha omughulhu abandu bamuhangirira.—Matayo 11:19.

Kutsibu-tsibu ababuthi bakayithagha erighumisirizya bakawathikya abaana babu erihengulha amalengekania wabu kutse eriyitheya okwa syongumbu nyibi. Thalengekania okwa ky’erileberyako kya Mattias, oyukakolera okwa Beteli e Scandinavia. Mattias iniakine mulere, abo akasoma nabu ibakamusekereraya busana n’ebyo ikirirye. Erimbere, ababuthi biwe sibabya bakyasiko. Aliwe neryo mubalhangira iniali mutsuka erithika-thikira ebyo ikirirye. Gillis, thatha wa Mattias akabugha athi iyo na mukali wiwe mubayithagha erighumisirizya eki. Mattias iniakabulhaya ebibulyo nga bino: “Nyamuhanga nindi? Kandi ibbwa e Biblia yamabya isi Kinywe kya Nyamuhanga? Thukaminya thuthi ku ni Nyamuhanga oyukabugha athi thukole kino kutse kirya?” Kandi iniakabulhaya thatha wiwe athi: “Busana naki ingalhangirwa nabi ambu kundi sindiyowa n’erikirirya ng’inywe?”

Gillis akasoborera athi: “Ihakanayira omwana wethu iniabulya omwa kinigha, isibugha ambu ahithene oku mama wiwe kutse okw’ingye, aliwe iniahithene okwa kwenene, eyo abya akayowa ngayikamukaliraya engebe.” Gillis mwawathikya  athi mughalha wiwe? “Ingye na mughalha waghe ithuk’ikalha n’erikania habw’esyosaha.” Gillis iniakanakwama ky’erihulikirira Mattias n’erimubulya ebibulyo erilengaho eriyitheghererya eriyowa n’amalengekania wiwe. Ihakanayira Gillis iniasoborera mughalha wiwe y’ekindu n’erimubwira athi akilengekanayeko habw’ekiro kyosi kutse bathali bakikaniako kandi. Okwa bundi buthuku, Gillis iniakanabugha athi nayu iyuwene akayithagha biro nga by’ebyo erilengekania okwa ekya mughalha wiwe amabugha. Busana n’erikanirania eri, Mattias mwatsuka eriyitheghererya omughaso w’embanulho n’eriminya ngoku Yehova athwanzire kandi ngoku awithe ehamuli y’erithuthabalhako. Thatha wiwe akabugha athi: “Mukyathwalha buthuku, kandi mughulhu mungyi ikikalire, aliwe lyolho-lyolho, olhwanzo lhwa Yehova mulhwatsuka eryasa omwa muthima wiwe. Ingye na mukali waghe thutsemire kundi akaghalha ako thwahiraho omw’ighumisirizya eriwathikya omwana wethu omwa myaka yiwe y’obulengwa mukathakwa busa kandi muthwahika okwa muthima wiwe.”

Gillis na mukali wiwe babere banemuwathikya omwana wabu ibanaghumisirizirye, mubayikethera ngoku Yehova akendi bawathikya. Gillis akabugha athi: “Iningabya ikungane mubwira Mattias indi ingye na mama wiwe eribya ithumwanzire kutsibu ky’ekikaleka ithwasaba kutsibu thuthi Yehova amuwathikaye eriyitheghererya.” Ababuthi aba batsemire kundi mubaghumisirizya kandi mubathabikyako!

Thukanathasya yithagha erighumisirizya thukathwanira ow’omw’eka kutse omunywani oyulhwere obulhwere obukaghunza buthuku buuli. Lebaya eky’erileberyako kya Ellen * (lebaya omwatsi ahikwa), nayu oyuwikere e Scandinavia.

Enyuma w’emyaka nga munani, mwira wa Ellen mwasanyarara kabiri ekindu ekyabiritsandya obwongo bwiwe. Busana n’ekyo, abiribya isyangathasya tsema, eripona, kutse erikwa obulighe. Emibere eyi yabirikalira Ellen kutsibu. Akabugha athi: “Kyabirinyiyithaghako erighumisirizya linene n’emisabe mingyi.” Ak’ongerako athi: “Erisako lyaghe erikanyihumulikanaya ly’erya Abanya Filipi 4:13, NW, erikabugha lithi: ‘Omwa byosi ngwithe amaaka busana n’oyukamba amaaka.’” Busana n’amaaka n’obuwathikya bwa Yehova, Ellen akathoka erighumisirizya.—Esyonyimbo 62:5, 6.

Omo kwenene, Yehova ni ky’erileberyako ekyuwene eky’erikangania erighumisirizya. (2 Petero 3:15) Omwa Biblia, thukabya ithunemusoma okw’ighumisirizya linene lya Yehova. (Nehemia 9:30; Isaya 30:18) Wanam’ibuka ekya Yehova akolha Abrahamu akamubulya ebibulyo bingyi okw’ithwamu liwe ly’erithoghothya e Sodomo? Yehova mwathabughira omu Abrahamu. Omw’ighumisirizya mwahulikirira obuli kibulyo n’eriyilhalikirira lya Abrahamu. Neryo, Yehova mwakangania ngoku abiriowa eriyilhalikirira lya Abrahamu n’erimukakasya ngoku syangathoghothya e Sodomo nomumwangabya abathunganene ikumi basa omwa muyi oyo. (Enzuko 18:22-33) Mughulhu wosi Yehova akahulikirira inianaghumisirizirye kandi syalitsuruma!

Erighumisirizya ni kitsweka kikulhu ky’omundu muhya-muhya ekya Bakristayo abosi batholere ibathunga. Thwamalengaho eribya abakaghumisirizaya, ithukendiha olhukengerwa oku Thatha wethu Yehova, oyukathutheghaya n’erithughumisirizya, kandi ithwabya omw’abo “ab’ikiriraya n’eriyiyinia n’eriangirira ebyo Nyamuhanga alhagha.”—Abaebrania 6:10-12.