1. Thwanga kolha na Yehova omwa nzira syahi?

YEHOVA abere akahangika abandu, abya anzire ibakolha haghuma nayu. Nomwakine indi munabwire abandu sibahikene, abandu abathaleghulha bangana kolha na Yehova buli kiro. Ng’eky’erileberyako, ‘thukakolha haghuma na Nyamuhanga’ thukathulira engulhu yuwene y’Obwami bwiwe n’eriyira abigha. (1 Abanya Korinto 3:5-9) Ni kitsumbi kinene eribya Omuhangiki w’ebyosi iniabirithusombolha erikolha omubiiri mukulhu oyu! Aliwe, sibugha indi erithulira ya nzira nyisa y’erikolha haghuma na Yehova. Omo mwatsi ono, thukendiminya ngoku thukabya ithwamakolha haghuma nayu thukawathikya ab’eka yethu n’ab’omwa kithunga, thukakokya, thukawathikya okwa mibiiri y’ekithunga eyikakolhawa omwa kihugho, kandi thukakanyirirya omubiiri wethu.​—Abanya Kolosai 3:23.

2. Busana naki si thutholere thukalinganisya ebya thwangakolera Yehova n’eby’abandi?

² Thukendibya thunemw’igha omwatsi ono, ni kikulhu  eryibuka ngoku sithusosene. Emyaka yethu, amaghalha, n’amaaka wethu sibisosene. Neryo isiwalinganisaya ebya wangakolera Yehova n’ebya bandi bangakolha. Omukwenda Paulo mwabugha athi: “Obuli mundu alenge omubiiri wiwe iyuwene, neryo iniabana eky’eriyihalhambira mugho, butsira eriringiriraniagho n’omubiiri w’owundi mundu.”​—Abanya Galatia 6:4.

3. Busana naki ithwabugha thuthi obuli mundu oyukatsomana ab’eka yiwe anemukolha haghuma na Nyamuhanga?

³ Yehova anzire ithwatsomana ab’eka yethu. Ng’eky’erileberyako, wukayithagha eribana esyosente esyanga kuwathikya okwa biyithawa by’eka yawu. Abamama bangyi bakabya eka erilembera abaana babu abalere. Kandi n’omughulhu ababuthi bethu sibangathasya thoka eriyitsomana, ithwanganabya ithutholere eribatsomana. Ebi ni bindu ebikayithaghisibawa. E Biblia yithi: ‘Nikwa omundu amathendi lembera ab’ekithunga kiwe, kutse kwilhaba ab’enyumba yiwe, omundu oyo iniabirighana ekisomo, kandi ni mubi kwilhaba oyuth’ikirirye.’ (1 Timoteo 5:8) Wamabya iwuwithe esyongwamirwa sy’amaka, iwangana lemwa erikolera Yehova ya bingyi ngoku wanzire. Aliwe isiwahwa amani! Yehova akatsema wukaha ab’eka yawu b’ebiyithawa.​—1 Abanya Korinto 10:31.

4. Ababuthi banga hira bathi Obwami bw’embere, kandi bikabya bithi bamakolha ekyo?

⁴ Ababuthi Abakristayo bangana kolha na Yehova omw’iwathikya abaana babu eribya n’ebilhubirirwa omwa mubiiri wa Yehova. Ababuthi bangyi babirikolha eki. Ekyabirilhwiririramu, abaana babu ab’obulhume n’ab’obukali babirithwamu erikolera Yehova omwa mubiiri w’omughulhu wosi, nibya haali okw’eka. Abandi ni bamisyonare, abandi bakakolha obutemburi ahali obuyithawa, n’abandi bakakolera okwa Beteli. Ni kwenene, omughulhu abaana bali haali, ababuthi sibanga ghunza nabu obuthuku bunene ngoku banganzire eribya nabu. Aliwe bakahira omwa baana babu mw’omuhwa w’erilholha embere erikolera Yehova ehosi-hosi eyo bali. Busana naki? Kundi batsemire kutsibu eribya abaana babu ibabirihira Yehova y’embere omwa ngebe yabu. (3 Yoane 4) Abangyi b’okwa babuthi abo bakayowa nga Hana, oyuwabugha athi ‘amaha’ mughalha wiwe iya Samweli oku Yehova. Bakayowa ini kitsumbi erikolha haghuma na Yehova omwa nzira eyi.​—1 Samweli 1:28.

5. Wangawathikya wuthi balikyethu omwa kithunga kyenyu? (Lebaya ekisasani ekiri okw’itsuka.)

⁵ Wamabya isiwuwithe ebikakuhambirira omw’eka, wangana wathikya balikyethu abalhwere kutse abakekelhuhire kutse abawithe ebindi biyithawa? Kutse wangana wathikya abakabalembera? Sondaya omwa kithunga kyenyu mw’abo abanga yithagha obuwathikya ng’obo. Ng’eky’erileberyako, obundi hali mwali wethu oyunemutsomana omubuthi wiwe oyukulire. Mbwino wangana sighalha n’omubuthi wiwe nuku nayu akole ebindi? Kutse wangana wathikya omundu mulebe erighenda okwa mihindano, erimughendera omwa kathali, kutse eriyalebya omundu okwa sipatara. Wamakolha ekyo, iwanganabya iwunemukolha na Yehova erisubirya omusabe.​—Soma 1 Abanya Korinto 10:24.

6. Thwanga kokya thuthi?

⁶ Abakakolha haghuma na Nyamuhanga basibwe ng’abakakokaya. Omwa Biblia, ekinywe ky’Ekigiriki ekikahindulhawa mwa “erikokya,” kikamanyisaya “erikangania abawuthasi b’olhukeri.” (Abaebrania 13:2) Thwangana bana omwa Kinywe kya Nyamuhanga mw’eby’erileberyako ebikathukangiriraya ngoku thwanga kangania olhukeri olhu. (Enzuko 18:1-5) Thwangana wathikya kandi thutholere ithwawathikya abandi thukabana akaghisa k’erikolha ekyo, mbulha bali “omo kithunga ky’abikirirye” kutse eyihi.​—Abanya Galatia 6:10.

7. Hali mighaso yahi ey’erikokya abali omwa mubiiri w’omughulhu wosi?

⁷ Wangana kolha na Yehova omw’ikokya abali omwa mubiiri w’omughulhu wosi abakayithagha ah’eribya? (Soma 3 Yoane 5, 8.) Thwamakolha ekyo, ibakendi ghasirwa nethu kuthya. E Biblia yikahulha ekyo mwa “erisikania emithima.” (Abanya Roma 1:11, 12) Lengekanaya okwa ky’erileberyako kya Olaf. Iniakine mulere, omulebererya w’omuthimbo omuhuru mwabungira ekithunga kyabu kandi abya akayithagha ah’erikesya, aliwe omwa kithunga simwabya oyuwanga muwathikya. Olaf mwasaba ababuthi biwe, abathabya Bema ba Yehova, athi omulebererya w’omuthimbo akesaye ewabu. Mubaligha aliwe mubabwira Olaf bathi iniakendikesya omwa kithumbi. Ekyo kya Olaf akolha, kandi mwathayikubya bwomo. Eyenga eyo muyamuwanira eribya n’omulebererya w’omuthimbo! Obuli ngyakya-ngyakya ibakabuka n’erikania okwa myatsi mingyi eyikatsemesaya bakalya eky’engyakya. Omulebererya w’omuthimbo mwahira omu Olaf mw’omuhwa indi mwathwamu eritsuka erikolera Yehova omwa mubiiri w’omughulhu wosi. Olaf amabirighunza myaka 40 inianemukolha ng’omumisyonare omwa bihugho bingyi.

8. Busana naki thutholere ithwakangania abandi b’olhukeri nomubanga ghana erisima okw’itsuka? Iha eky’erileberyako.

⁸ Thwangana kangania abo thuthasi b’olhwanzo omwa nzira nyingyi, nomubangaghana erisima okw’itsuka. Ng’eky’erileberyako, mwali wethu e Spain mw’eghesya Yesica, omukali owe Ecuador, ye Biblia. Kiro kighuma ibanemw’igha, Yesica mwalira buthahuna. Neryo mwali wethu mwamubulya ng’akaliraki. Yesica mwabugha athi abere athali asa e Spain, abya mwera kutsibu. Kiro kighuma abya isyawithe n’ak’erirya ako angaha mwali wiwe, iwana maghetse masa. Yesica mwasaba Nyamuhanga y’obuwathikya inianemulhalirirya omwana. Enyuma w’akathambi kake, Abema babiri mubabungira Yesica neryo bamamuha egazeti. Mwatsuruma n’erisathangya egazeti, iniane mubugha athi: “Ebi bya byalya ebyo mwanzire ingaha mwali waghe?” Bali bethu mubalengaho erimuhumulikania, aliwe Yesica mwathahulikirira. Enyuma waho, bali bethu mubamusighira ebyalya okwa lhukyo lhwiwe. Neryo, babere bak’igha, alira kundi  mw’ibuka ngoku mwagheghena erisubirya lya Nyamuhanga okwa musabe wiwe. Neryo Yesica mwathwamu erikolera Yehova. Omo kwenene, erihithya ly’abali bethu abo mumwalhwiririra ebibuya.​—Omugambuli 11:1, 6.

9, 10. (a) Ni highisa hyahi ehyo Abaisraeli babya bawithe omw’ikolha emibiiri y’eriyihayo? (b) Munabwire, ni nzira syahi esy’abaghalha bethu banga wathikiryamu omwa kithunga?

⁹ Kera, Abaisraeli babya bawithe ehighisa hingyi muthina-muthina ehy’erikolha emibiiri y’eriyihayo. (Eriluayo 36:2; 1 Emyatsi y’Emigulu 29:5; Nehemia 11:2) Na munabwire, wunawithe ehighisa hingyi ehy’erihayo endambi yawu, ebya wuwitheko, n’amenge eriwathikya balikyethu. Wamakolha ekyo, iwukendi tsema kandi Yehova iniakendi kutsumulha.

¹⁰ Ekinywe kya Nyamuhanga kikahira omwa balhume ab’omwa kithunga mw’omuhwa w’erikolha haghuma na Yehova omw’ikolera abandi ng’abaghombe bawathikya n’abasyakulhu. (1 Timoteo 3:1, 8, 9; 1 Petero 5:2, 3) Abakakolha eki bakabya ibanzire eriwathikya abandi kinyamubiri kuthya n’omw’iramya lyabu. (Emibiri 6:1-4) Abasyakulhu banabirikusaba eribya muthangiriri kutse eriwathikya okwa bitabu, amalhambu, erisugha, kutse ekindi kindu kyosi? Baghalha bethu abakawathikaya omw’ebi bakabugha bathi bakabitsemera kutsibu.

11. Mwali wethu mughuma abirighasirwa athi omw’ikolha okwa by’obuhimbe?

¹¹ Abakayihayo omwa by’obuhimbe bakabana abanywani abahyaka. Mwali wethu oyukahulhawamu Margie mwakolha okwa mubiiri w’obuhimbe bw’Ebisenge by’Obwami habw’emyaka 18. Okwa mibiiri eyi, iniakayihira okwa bali bethu abalere n’eribawathikya omw’ibathendeka. Akabugha athi eyi  ni nzira mbuya kutsibu ey’erihirana mw’omuhwa. (Abanya Roma 1:12) Erithwalira haghuma, abere akabana ebitsibu ebikalire omwa ngebe yiwe, abanywani abo abya iniabiribana omwa mubiiri oyu mubamuhumulikania. Wune wathayihayo eriwathikya okwa by’obuhimbe? Wangana kolha okwa mibiiri eyi, nomuwangabya isiwubisomerere.

12. Wanga wathikya wuthi enyuma w’ekitsinduli?

¹² Kandi thwangana kolha haghuma na Yehova omw’iwathikya balikyethu ababiriwa kw’ekitsinduli. Ng’eky’erileberyako, wanganahayo esyosente. (Yoane 13:34, 35; Emibiri 11:27-30) Eyindi nzira eya thwanga wathikiryamu ly’erikolha obuyonzo kutse erisuba-subania ahalyatsandibawa n’ekitsinduli. Gabriela, mwali wethu owe Poland oyo enyumba yiwe yatsandibawa kutsibu omw’ibogha ly’amaghetse, mwatsema kutsibu akalhangira baghalha bethu ab’omwa bithunga bya hakuhi bakasyamuwathikya. Akabya akalengekania okw’ekyo, akabugha athi syatsomene ebyo aheraya, aliwe akahweraya amalengekania w’okw’ebyo bana. Akabugha athi: “Eki kikanyikakasaya ngoku eribya omwa kithunga ky’Ekikristayo ni lhusunzo lhw’embaghane kandi kikaletha erithekana n’obutseme.” Abangyi abakabana obuwathikya enyuma w’ekitsinduli bakabugha bathi ku bakanayowa bathya. Kandi n’abakakolha haghuma na Yehova eriwathikya balikyethu aba bakatsema kutsibu.​—Soma Emibiri 20:35; 2 Abanya Korinto 9:6, 7.

13. Thukaghumaya thuthi olhwanzo lhwethu oku Yehova thwamayihayo? Iha eky’erileberyako.

¹³ Mwali wethu oyukahulhawamo Stephanie n’abandi bathuliri omwa kitsweka kyabu mubakolha haghuma na Nyamuhanga omw’iwathikya Abema ba Yehova abathibitha e Amerika busana n’olhuhi olhwabya omwa kihugho ky’ewabu. Mubawathikya abathibithi aba eribana ah’erikalha. Akabugha athi: “Mukyathutsemesya thukalhangira etseme n’erisima lyabu bakayilhangirira olhwanzo lhw’olhughanda lhwabu lhw’ekihugho kyosi. Balikyethu abathibithi aba bakalengekanaya bathi mbwino thwabiribawathikya, aliwe omo kwenene, babirithuwathikya kwilhaba aho. Olhwanzo, obughuma, erikirirya, n’eriyikethera Yehova ebya thwabirilhangira byabirighumya olhwanzo lhwethu oku Yehova, n’eryongera erisima lyethu busana n’ebyosi ebyo thukabana omwa kithunga kiwe.”

14, 15. (a) Omuminyereri Isaya abya withe malengekaniaki? (b) Abakristayo banga mugherererya bathi?

¹⁴ Wunanzire eryongera erikolha haghuma na Yehova? Wunanzire erighenda  eyiri obuyithawa bw’abathuliri? Sibugha ambu thukayithagha erighenda haali imuthwahithya. Aliwe hane balikyethu abanga thoka. Bawithe amalengekania awali ng’aw’omuminyereri Isaya. Yehova abere akamubulya athi: “Ngendi thumandi, nandi akendi thughendera kwehi?” mwabugha athi: “Ingye yono hano! Wunyithume!” (Isaya 6:8) Mbwino wunayitheghekire kandi wangana thoka eriwathikya ekithunga kya Yehova? Ni hayi aho wanga wathikya?

¹⁵ Yesu mwakania okw’ithulira n’eriyira abigha athi: “Eby’erighesa ni bingyi, nikwa abanga ghesa ni bake. Neryo musabe Omukama w’erighesa yo kutsibu athume abahingyi omw’ighesa liwe.” (Matayo 9:37, 38) Mbwino wangana kolha obutemburi omwa bulhambu obukayithagha abathuliri? Kutse wangana wathikya owundi erikolha ekyo? Balikyethu bangyi bakayowa bathi enzira eyuwene ey’erikanganiryamu olhwanzo lhwabu oku Yehova n’abaliranwa ly’eribya mutemburi aho abathuliri bakayithaghisibawa. Mbwino wangana lengekania okwa sindi nzira esyo wanga kanyiriryamu omubiiri wawu? Wamakolha ekyo, iwukendi tsema kutsibu.

16, 17. Ni sindi nzira syahi esyo wanga kanyiriryamu omubiiri wawu ow’erikolera Yehova?

¹⁶ Wunanzire erikolera okwa Beteli kutse eriwathikya okwa by’obuhimbe, kutse eriwathikya habw’omughulhu mulebe kutse eribya wukakolha kiro kighuma kutse binene okw’aho obuli wiki? Ekithunga kya Yehova kikabya ikine muyithagha abandu abanzire erikolha ahali obuyithawa n’abanga kolha ekyosi-kyosi ekyo bakasabawa erikolha nomubangabya ibanasi erikolha owundi mubiiri mulebe. Yehova akasima obuli mundu oyukayihayo eriwathikya ahali obuyithawa.​—Esyonyimbo 110:3.

¹⁷ Wunanzire eryongera erithendekwa nuku wanga kolera Yehova ya bingyi? Obundi iwanganasaba erighenda okwa Sukuru y’Abathuliri b’Obwami. Esukuru eyi yikathendeka balikyethu abane omwa mubiiri w’omughulhu wosi nuku ekithunga kya Yehova kyanga bakolesya erikolha bingyi. Abakaghenda okwa sukuru eyi batholere ibabya ibanayitheghekire erighenda ahosi-hosi aho bangathumwa. Wunanzire erikolera Yehova ya bingyi omwa nzira eyi?​—1 Abanya Korinto 9:23.

18. Ni mighaso yahi ey’erikolha haghuma na Yehova?

¹⁸ Kundi thuli bandu ba Yehova, thuli benge, babuya, ab’olhukeri, kandi ab’olhwanzo. Thukatsomana abandi kandi buli kiro. Eki kikathulethera obuthekane, obuholho, n’obutseme. (Abanya Galatia 5:22, 23) Mbulha wuli omwa mibere eyiri yithi, iwukendi tsema wamagherererya omubere wa Yehova ow’erihithya kandi wuli mughuma w’okwa bakoli biwe b’obughuli!​—Emisyo 3:9, 10.