1. Isaya mwaminyerera athiki oku Yesu, kandi busana naki obuminyereri obu bukahumulikanaya?

OBUMINYERERI bwa Isaya obuhambire oku Yesu Kristo bukathuhimba n’erithuha amaha. Isaya mwalhaghulha ngoku Yesu ‘syendisya tswera busana n’ebyo akalholhako omwa meso wiwe kutse erisoha busana n’ebyo akowa omwa mathwe wiwe’ kandi athi “omwa lithunganene asyatswera abera.” (Isaya 11:3, 4) Busana naki eki kikaleka ithwasika? Kundi thuli omwa kihugho ekyoswire mw’akasolholho, kandi abandu bakatswera abandi erikwamana n’ebyo bakalhangira. Omo kwenene thukayithagha Omutsweri oyuhikene iya Yesu, oyuthe wanga thutswera erikwamana n’emisosere yethu y’omubiri!

2. Yesu mwathulhaghira erikolhaki, kandi thukendikania okuki omwa mwatsi ono?

² Obuli kiro thukathunga okwa bandi kw’amalengekania malebe. Aliwe ithwe sithuhikene nga Yesu kw’ahikene, neryo amalengekania agho thukathunga okwa bandi nagho syahikene. Kyolhobire ithwe erighendera okwa bya thukalhangira. Aliwe, Yesu mwalhaghira athi: “Simutswere [“erikwamana n’emisosere y’eyihya,” NW]  nikwa mutswere eritswera lithunganene.” (Yoane 7:24) Kwesi Yesu anzire thubye ng’iyo n’erithend’itswera abandi erikwamana n’emisosere yabo. Omo mwatsi ono, thukendikania okwa bindu bisathu ebyangabya omwa menge wethu: erangyi y’omundu kutse ekihugho ekyo alhuiremo, esyosente esy’awithe, kandi n’emyaka yiwe. Omwa buli kighuma, thukendi lhangira ngoku thwang’owa Yesu neryo ithwaleka eritswera abandi erikwamana n’emisosere yabo.

3, 4. (a) Ni kyahi ekyaleka Petero iniahindulha amalengekania agho aby’awithe okwa Banya Bihanda? (Lebaya ekisasani ekiri okw’itsuka.) (b) Ni kwenene yahi nyihya-nyihya eya Yehova akangiriraya Petero?

³ Thalengekania omukwenda Petero nga mwayowa athi akabwirwa erighenda e Kaisaria, okwa muyi w’omulhume w’Ebihanda iya Kornelio! (Emibiri 10:17-29) Erikulha liwe lyosi Petero abya asi athi Abanya bihanda ni batsandirya. Aliwe habya ihabiribya ebya hindulha amalengekania wiwe. Ng’eky’erileberyako, Nyamuhanga abya iniabirimukangya esyonzoli. (Emibiri 10:9-16) Omwa nzoli, Petero mwalhangira olhuli ng’olhukimba lhukandaghalha erilhua elhubulha ilhwoswire mw’ebisoro ebyabya bikalhangirwa mwa bithuwene. Neryo omulenge mwamubwira athi: “Petero, hangana, usinze, wulye.” Petero mwaghanira ighuma. Neryo omulenge oyo erilhua elhubulha mwamubwira athi: “Ebyo Nyamuhanga abirierya, isiwaswahulhabyo mwa bithabuyirire.” Enyuma w’esyonzoli, Petero mwathayitheghererya ekya mulenge abya akanza erimubwira. Neryo enyuma waho, abandu erilhua ewa Kornelio mubahika. Omulimu abuyirire mwasondolha Petero erighenda ewa Kornelio, neryo mwaghenda n’abandu abo.

⁴ Petero kwa tswera erikwamana n’emisosere y’eyihya, syanga ghendire ewa Kornelio. Abayuda babya isibanga ghenda omwa miyi y’Abanya Bihanda. Neryo ni kyahi ekyaleka Petero iniaghenda? Nomwakine indi aby’akasolholha Abanya Bihanda, esyonzoli esyo alhangira n’obusondoli bw’omulimu abuyirire mubyahindulha amalengekania wiwe. Petero abere abirihulikirira Kornelio, mwabugha athi: “Namaminya ndeke lino ngoku Nyamuhanga syawithe ebithagha. Nikwa omwa buli kihanda omundu oyukubaha Nyamuhanga, n’erikolha ebithunganene akalighawa nayu.” (Emibiri 10:34, 35) Eriyitheghererya lihya-lihya eri mulyaswekya Petero, kandi lyanga hambire okwa Bakristayo abosi. Lithi?

5. (a) Yehova anzire Abakristayo abosi ibaminyaki? (b) Nomwakine indi thunasi ekwenene, ni malengekania wahi agho thwanganabya ithukinawithe?

⁵ Yehova mwakolesya Petero eriwathikya Abakristayo abosi eriminya ngoku Iyo syawithe akasolholho. Oku Yehova, erangyi yethu, ekihugho ekya thulhuiremo, ekihanda kyethu, kutse omubughe wethu si bikulhu. Nyamuhanga akathuligha, ekikulhu thwamabya ithukamubaha n’erikolha ebihikire. (Abanya Galatia 3:26-28; Eribisulirwa 7:9, 10) Wanganabya iwunasi eki. Aliwe ibbwa wamabya imuwakulira  omwa kihugho kutse omw’eka eyoswiremo akasolholho? Nomwakine indi wangana lengekania wuthi siwuli mw’akasolholho, kinathokekene indi wanganabya iwukine mw’amalengekania w’akasolholho? Nibya Petero iniabiriwathikya abandi erilhangira ngoku Nyamuhanga syawithe akasolholho, mwasolholha. (Abanya Galatia 2:11-14) Neryo thwang’owa thuthi Yesu n’erileka eritswera abandi busana n’emisosere yabu?

6. (a) Ni kyahi ekyanga thuwathikya eriyilhusya mw’akasolholho? (b) Eripoti ya mughalha wethu mughuma oyuwithe olhusunzo muyamubisulha mwaki?

⁶ Eriminya nga thune mw’amalengekania wosi-wosi w’akasolholho, thutholere ithwayilebya. Thutholere ithwalebya amalengekania wethu ng’anahambene n’awali omwa Kinywe kya Nyamuhanga. (Esyonyimbo 119:105) Kandi ithwangana bulya omunywani ng’anabirithulhangira mw’amalengekania wosi-wosi w’akasolholho agho thuthe thwanga yilhangiramo. (Abanya Galatia 2:11, 14) Thwanganabya ithwabiribeghera amalengekania ayo neryo ithuthaminya ku thune mw’akasolholho! Eki ky’ekyabya oku mughalha wethu mughuma oyuwithe olhusunzo omwa kithunga. Mwahandika eripoti eyihambire okwa bathahenie abakakolha kutsibu ababya omwa mubiiri w’omughulhu wosi. Omulhume ini w’ekihanda ekyo bandu bakalhangira ini ky’ahisi. Mughalha wethu oyuwithe olhukwamirwa mwahandika okwa mulhume kw’ebindu bingyi ebyuwene aliwe am’ongerako athi: “Nomwakine indi [alhuire omwa kihugho eki], emibere yiwe n’engebe yiwe bikawathikaya abandi erilhangira ngoku erilhua [omwa kihanda eki] sikirilhuaho kikamanyisya engebe eyithunda-thundire, ey’ahisi, eya bandu bangyi abalhuire omwa kihanda [eki].” Thuk’ighaki? Nomuthwangabya ithuwithe esyonzunzo nyingyi omwa kithunga kya Yehova, thutholere ithwayilebya n’eriligha obuwathikya nuku thulhangire amalengekania wosi-wosi awathusigheremo. Ni kindi kyahi ekyo thwanga kolha?

7. Thwanga kangania thuthi ku ‘thwabirikangania ebiri omwa muthima wethu’?

⁷ ‘Thwamakangania ebiri omwa mithima yethu,’ ithukendisubya omo mwanya w’akasolholho, mw’olhwanzo. (2 Abanya Korinto 6:11-13) Mbwino wukanza iwabya haghuma n’abandu ab’erangyi yawu, ekihugho kyawu, ekihanda kyawu, kutse ab’omubughe wawu basa? Kyamabya iky’ekyo, lengesaya erisiba n’abandi. Wangana kokya balikyethu abalhuire omwa yindi mibere imwakolha haghuma omw’ithulira. Kutse iwanganabakokya ewawu erirya nabu kutse eribya haghuma. (Emibiri 16:14, 15) Endambi iyikendi hika, omuthima wawu iniosulha mw’olhwanzo neryo akasolholho ikabya isikangabanamo omwanya. Hathya thukanaye okwa yindi nzira eyanganaleka ithwatswera erikwamana n’emisosere y’eyihya.

8. Ebiri omu Abalawi 19:15 byanga thweghesyaki okwa mibere obughuda kutse obunakwa bwanga hamba okwa mibere thukalhangiriramu abandi?

⁸ Amalengekania agho thuwithe okwa bandi angana sighikira okwa bughuda kutse obunakwa bwabo. Abalawi 19:15 hathi: “Susyekolha  ebithathunganene omw’itswera. Susyesombolha mundu mwera, kutse erisikya omundu w’amaaka [omughuda]; nikwa wasyatswera mulikyenyu omo lithunganene.” Obughuda bw’omundu kutse obunakwa bwiwe bwanga hamba buthi okwa mibere thukamuthwaliramu?

9. Ni kwenene yahi eyik’itha bulighe eyo Solomona ahandika, kandi yikathweghesayaki?

⁹ Solomona mwasondolibwa erihandika ekwenene eyik’itha obulighe eno: “Omwera akaponawa na mulikyabu; nikwa omutheke akayira abira bangyi.” (Emisyo 14:20) Omusyo oyu akathweghesayaki? Thwamathendi yitheya, ithwangananywana balikyethu abawitheko basa-basa ithuthanywana abera. Busana naki ni ky’akabi eritswera abandu erikwamana n’ebyo bawithe kutse ebyo bathawithe?

10. Yakobo mwakunga Abakristayo okwa kitsibu kyahi?

¹⁰ Thwamatswera balikyethu erikwamana n’obughuda kutse obunakwa bwabu, ithwangana letha erighabana omwa kithunga. Eki mukyanabya omwa bindi bithunga omwa kighonye ky’erimbere, neryo Yakobo mwakunga Abakristayo abo okw’ekyo. (Soma Yakobo 2:1-4.) Sithwanga lighira erighabana eribya omwa kithunga kyethu. Neryo kwesi, thwanga yitheya thuthi okw’itswera abandu erikwamana n’ebyo bawitheko?

11. Mbwino ebindu by’ekinyamubiri binawithe ku bihambire okwa bughuma bw’omundu na Yehova? Soborera.

¹¹ Thutholere ithwalhangira balikyethu nga Yehova kw’akabalhangira. Omundu syalibya  w’obughuli embere sya Yehova busana n’eribya mughuda kutse munakwa. Obughuma bwethu na Yehova si buwithe ku buhambene n’esyosente kutse ebindu ebyo thuwithe. Ni kwenene Yesu mwabugha athi “likalire busana n’omundu w’ebindu eringira omo Bwami bw’elhubulha,” aliwe mwathabugha athi sikyanga thokekana. (Matayo 19:23) Kandi Yesu mwabugha athi: “Obutseme buli nenyu inywe bera, kusangwa Obwami bwa Nyamuhanga ni bwenyu.” (Luka 6:20) Aliwe eki mukithamanyisya kithi abanakwa abosi banga hulikirire Yesu n’eribana emighisa y’embaghane. Habya abanakwa bangyi abaghana erikwama Yesu. Okwenene kuli kuthi, si thwanga tswera obughuma bw’omundu na Yehova erikwamana n’ebyo awithe.

12. Amasako akeghesayaki abaghuda n’abanakwa?

¹² Omwa bandu ba Yehova, mune abaghuda n’abanakwa. Aliwe abosi banzire Yehova kandi bakamukolera n’omuthima wosi. Amasako akabwira abaghuda athi sibahire “amaha wabu oko bindu ebyanga hwaho, nikwa bahire amaha wabu oku Nyamuhanga.” (Soma 1 Timoteo 6:17-19.) Kandi e Biblia yikakunga abaghombe ba Yehova abosi, abaghuda n’abanakwa, ngoku ni ky’akabi erianza esyosente. (1 Timoteo 6:9, 10) Thwamalhangira balikyethu ngoku Yehova akabalhangira, isithwendi batswera erikwamana n’ebyo bawithe kutse ebyo bathawithe. Kandi ibbwa emyaka y’omundu? Eyi nina nzumwa eyitholere y’eritswera abandi?

13. E Biblia yikathweghesayaki okw’isikya abandu abakulire?

¹³ Mughulhu mungyi e Biblia yikabugha yithi thutholere ithwasikya abakulire. Abalawi 19:32 hathi: “Wuhanganire ow’omuthwe w’esyombwe, n’erikenga obusu b’omusyakulhu, wasyubaha Nyamuhanga wawu.” Emisyo 16:31 hakathubwira hathi “omuthwe w’esyombwe ni mbiitha y’olhukengerwa; asyabanika omwa nzira y’erithunganene.” Paulo mwabwira Timoteo athi isyahayira abalhume bakulhu aliwe atholere iniabalhangira nga bathatha wiwe. (1 Timoteo 5:1, 2) Nomwakine indi Timoteo anabya awithe obuthoki bulebe obw’erihererya baghalha bethu abakulire b’obusondoli, abya atholere mughulhu wosi eribya w’olhukeri n’oyukasikaya.

14. Ni mughulhu wahi thwanga yithagha erihengulha omukulhu okw’ithwe?

¹⁴ Kandi ibbwa oyukulire amakolha erilholho omw’ikighenderera kutse erikulha-kulhania ekindu ekikaponesaya Yehova? Yehova syanga ghanyira omundu oyukasobaya omw’ikighenderera, nomwangabya mukulhu kutse iniasikibirwe. Lebaya omusingyi owali omu Isaya 65:20. Omwa New World Translation hathi: “Omukolha nabi asyatsumwa, nibya n’omwangabya w’emyaka kikumi.” Owundi musingyi owali ng’oyu ane omwa nzoli sya Ezekieli. (Ezekieli 9:5-7) Neryo kwesi ekikulhu kutsibu, ly’erisikya Yehova, Omukulhu w’Ebiro. (Danieli 7:9, 10, 13, 14) Ithwe erimusikya kikendi thuha obuthubaha obo thukayithagha erihengulha omundu oyukayithagha obuwathikya, nomwangabya ini mukulhu.​—Abanya Galatia 6:1.

15. Thuk’ighaki oku mukwenda Paulo bikahika okw’isikya baghalha bethu abalere?

¹⁵ Kandi ibbwa mughalha wethu amabya ini mulere? Mbwino eki kikamanyisaya kithi syatholere erisikibwa? Eyihi. Paulo mwahandikira Timoteo athi: “Siwuleke mundu akakupona busana n’obulhwana bwawu, nikwa wuyikangaye embere sy’abikirirye ng’olhulengo lhubuya lhw’ebinywa, n’emikolere, n’omo lhwanzo, n’omw’ikirirya, n’omwa muthima athe kw’ebibi.” (1 Timoteo 4:12) Paulo akahandika ebi, Timoteo angabya iniabya awithe myaka 30. Nomwabine Paulo abya iniabirimuha esyongwamirwa esirithohire. Thukighaki? Si  thutholere thukatswera baghalha bethu abalere erikwamana n’emyaka yabu. Thalengekania okwa bya Yesu abya iniamabirikolha akahikya emyaka 33 misa!

16, 17. (a) Abasyakulhu bakathwamu bathi mughalha wethu ng’anatholere eribya mughombe omuwathikya kutse omusyakulhu? (b) Amalengekania w’omundu kutse emibere y’ewabu byangana hukana bithi n’ebya Masako akabugha?

¹⁶ Omwa bindi bihanda, abandu sibali sikaya abalhwana. Neryo abandi basyakulhu banganaghana erihamya okwa mulhwana eribya mughombe omuwathikya kutse omusyakulhu, nomwangabya inianatholere. Aliwe sihali aho e Biblia yikabugha yithi mughalha wethu atholere iniatsuka erihikya myaka milebe imwatholera eribya mughombe omuwathikya kutse musyakulhu. (1 Timoteo 3:1-10, 12, 13; Tito 1:5-9) Omusyakulhu amahiraho ekilhaghiro oko mwatsi oyu busana n’emibere ey’ewabu, iniakendibya isyathaghendera okwa Kinywe kya Nyamuhanga. Abasyakulhu sibatholere bakaghendera okwa malengekania kutse emibere y’ewabu bakalebya baghalha bethu abalere nga banatholere, batholere ibaghendera okwa biri omwa Biblia.​—2 Timoteo 3:16, 17.

¹⁷ Abasyakulhu bamathendi ghendera okwa bihano bye Biblia bakasombolha abaghombe abawathikya kutse abasyakulhu, ibangana kakirya baghalha bethu abatholere erisombolhwa. Omwa kihugho kighuma, omughombe omuwathikya iniakakolha ndeke esyongwamirwa esirithohire, n’abasyakulhu mubaligha ngoku akaberereraya ebyo Biblia yikayithagha omundu eritholera eribya musyakulhu. Aliwe, abandi basyakulhu abakulire mubabugha bathi akabya ng’akine mulere kutsibu eribya musyakulhu, neryo mubathamuhamyako. Eky’obulighe, mughalha wethu oyu mwathasombolhwa, kandi eki kyabya busana n’emisosere yiwe. Kandi kikalhangirika amalengekania aya oswire omwa bitsweka bingyi by’ekihugho. Ni kikulhu erighendera okwa Biblia omwakanya k’erighendera okwa malengekania wethu kutse emibere y’ewethu. Neryo ithukendi kenga Yesu kandi ithwaleka eritswera abandi erikwamana n’emisosere yabu.

18, 19. Ni kyahi ekikendi thuwathikya erilhangira balikyethu nga Yehova kw’akakolha?

¹⁸ Sithuhikene, aliwe thwangan’igha erithendi solholha abandi, nga Yehova kw’akakolha. (Emibiri 10:34, 35) Neryo mughulhu wosi thutholere ithwaghendera okwa bya Biblia yikabugha. Thukabya thukabighenderako, thukakenga ekihano kya Yesu ekya “simutswere [“erikwamana n’emisosere y’eyihya,” NW].”​—Yoane 7:24.

¹⁹ Omwa buthuku obuthe bwahali, Omukama wethu, Yesu Kristo, akendi tswera abandu bosi. Eritswera liwe likendi seghemera okwa bihano bya Nyamuhanga ebithunganene, butsira okwa by’akalhangira kutse eriowa. (Isaya 11:3, 4) Ka thulindirire kutsibu obuthuku obuwenenga obo!