1, 2. (a) Ni maaka wahi aw’omughaso agho thutholere ithwabya nagho, kandi busana naki? (b) Omo mwatsi ono thukendi kania okuki?

ITHWE bosi thutholere ithw’igha ngoku thwanga kubungulha ndeke omwatsi n’erikolesyagho eribana eky’erighenderako ekihikire. (Emisyo 3:21-23; 8:4, 5) Bithe bithya, ikikendyolhobera Sitani n’ekihugho kiwe eritsandya amalengekania wethu. (Abanya Efeso 5:6; Abanya Kolosai 2:8) Aliwe, erithoka eribana eky’erighenderako ekihikire, thutholere ithwaminya okwenene kw’omwatsi. Emisyo 18:13 hathi: “Oyukasubiraya athaliowa [“okwenene kw’omwatsi,” NW], ni bukiru n’esisoni busana nayu.”

² Omo mwatsi ono, thukendi lebya ekyanga leka ikyakalha eribana okwenene kw’omwatsi n’eribana eky’erighenderako ekihikire. Kandi thukend’igha okwa misingyi ye Biblia n’eby’erileberyako ebyanga thukangirirya ngoku thwanga kubungulha ndeke omwatsi.

3. Busana naki thutholere ithwaghendera okwa musingyi owali omu Emisyo 14:15? (Lebaya ekisasani ekiri okw’itsuka.)

³ Munabwire, emyatsi yikasira okwa mbande syosi.  Yikasira okwa Intaneti, okwa tivi, n’ebindi bindu by’amakuru. Kandi abanywani bangana thuthumira emyatsi mingyi okwa Intaneti, esyomeseji, kutse ibathukanirya emyatsi. Hakanayira emyatsi eyi iyabya nga siyangahwayo. Neryo thutholere ithwayitheya. Banywani bethu banganabya ibawithe ebighendererwa ebyuwene, aliwe hane abandi abakakighenderera erilhalhania omwatsi owathahikire kutse erihengemya omwatsi. Ni musingyi wahi we Biblia owanga thuwathikya erilebya ndeke ebya thuk’owa? Emisyo 14:15 hathi: “Omukiru akikiriraya obuli kinywe; nikwa omugherekania akalebaya ndeke ngoku angaghenda.”

4. Abanya Filipi 4:8, 9 hakathuwathikaya hathi erisombolha ebya thwanga soma, kandi busana naki ni kikulhu eriminya okwenene kw’omwatsi? (Lebaya n’akasanduko “ Ebindu Birebe Ebyanga Thuwathikya Eriminya Okwenene kw’Omwatsi.”)

⁴ Erithoka erithwamu ndeke, thukayithagha omwatsi owahikire. Neryo kwesi, thutholere ithwayitheya thukasombolha ebya thukasoma. (Soma Abanya Filipi 4:8, 9.) Sithutholere thukatsandya obuthuku bwethu erilebya emithahulha ye Intaneti eyiri kw’emyatsi ey’erithika-thikira kutse erisoma esyomeseji esikalhalhanaya ebinyambwirwa. Kutsibu-tsibu ni kikulhu eriyitheya okwa mithahulha ye Intaneti eyikakulha-kulhanaya eby’abakayisamambulha okw’ikirirya. Banzire eritsekya erikirirya ly’abandu ba Nyamuhanga n’erihengemya ekwenene. Omwatsi owathahikire akaleka omundu iniathwamu nabi. Isiwalengekanaya wuthi omwatsi w’amabehi syanga kuhambako.​—1 Timoteo 6:20, 21.

5. Ni mwatsi wahi w’amabehi owa Baisraeli bowa, kandi mwabahambako athi?

⁵ Emyatsi y’amabehi yanganalhua mw’ebitsibu ebikalire. Omwa buthuku bwa Musa, abalingyi 12 mubaghenda omwa Kihugho Ekyalhaghanisibawa. Abalingyi ikumi mubasubulha n’engulhu eyikaghunza amani. (Emiganzo 13:25-33) Mubahira omo mwatsi mw’omunyu, n’abandu ba Yehova mubakwa obuba n’erihwa amani. (Emiganzo 14:1-4) Ni kyahi ekyaleka ibabya bathya? Obundi mubalengekania bathi omwatsi ahikire kundi abalingyi abanene mubabugha kighumerere. Neryo mubaghana erihulikirira ebyuwene ebyo abandi balingyi babiri babugha okwa Kihugho Ekyalhaghanisibawa. (Emiganzo 14:6-10) Omwakanya k’erisondekania okwenene n’eriyikethera Yehova, omwa bukiru, abandu mubathwamu eriligha ebithahikire.

6. Busana naki sithutholere thukasweka thukowa okwa bandu ba Yehova kw’emwatsi y’amabehi?

 ⁶ Thutholere ithwayitheya kutsibu thukowa emyatsi eyihambire okwa bandu ba Yehova. Wibuke ngoku enzighu yethu Sitani akahulhawa mwa “omutsongeri w’abalikyethu.” (Eribisulirwa 12:10) Yesu mwabugha athi abahakani bakendi ‘syathulegha omo misindo yosi y’ebibi.’ (Matayo 5:11) Thwamayitheghererya ekyo kya ndeke, isithwendi kukubalha thukowa abandu bakabugha emyatsi y’amabehi okwa bandu ba Yehova.

7. Ni byahi ebya thutholere ithwayibulya thuthe thwathuma omwatsi?

⁷ Wukananza erithumira banywani bawu b’emyatsi okwa Intaneti kutse okwa simu? Wukabya wukalhangira omwatsi okwa tivi owakasisimulha kutse eriowa ekindu ky’embaghane, wukananza eribya ng’ow’amakuru kutse omunya myatsi iwanza erilhalhaniagho aho n’aho? Wuthe wathuma omwatsi okwa Intaneti kutse okwa simu, yibulhaye: ‘Nganakakasirye indi omwatsi oyu ni kwenene? Nganasigho ndeke?’ Wamabya isiwasigho ndeke, iwanganabya iwukalhalhanaya amabehi. Neryo wamabya isiwasi omwatsi nga nina kwenene, isiwathumagho. Lhusaya ghomo!

8. Ni byahi ebya bahakani babirikolha omwa bindi bihugho, kandi thwanga yisanga thuthi ithwabiribawathikya isithwasi?

⁸ Hane eyindi nzumwa eyikaleka ikyabya ky’akabi erithumira abandi b’emyatsi buthalengekania. Omwa bindi bihugho, omubiiri wethu ali kw’olhukako kutse erighanibwa. Abakathuhakanisaya omwa bihugho ebi bangana kighenderera erilhalhania emyatsi ey’erithubahisya kutse eyangaleka ithwayilhalikirirana.  Thalengekania okwa kyabya kera omwa Soviet Union. Abapolisi esyombegga, ababya basibwe mwa KGB, mubalhalhania amabehi bathi baghalha bethu balebe abasibwe babirighoberya abandu ba Yehova. * (Lebaya omwatsi ahikwa.) Eky’obulighe, balikyethu bangyi mubikirirya amabehi ayo n’erisighania ekithunga kya Yehova. Abangyi mubasubulha enyuma waho, n’abandi mubabulirayo. Mubalighira amabehi ayo eritsandya erikirirya lyabu. (1 Timoteo 1:19) Thwanga yitheya thuthi okwa kabi ng’aka? Isiwalhalhanaya emyatsi eyikaghunza amani kutse eya wuthawithe kw’obwema. Isiwikiriraya obuli kindu ekya wukowa. Omwakanya k’ekyo, ambi iwakakasya okwenene kw’omwatsi oyo.

9. Ni kindi kyahi ekikanaleka ikyakalha eribana omwatsi owahikire?

⁹ Hakanayira ithwowa emyatsi eyine mw’ebighuma-bighuma ebihikire. Eyindi myatsi yikanabya isi w’omwatsi wosi. Eki kikaleka ikyakalha eriminya eky’erighenderako ekihikire. Sithwanga yikethera omwatsi owali mw’ebighuma-bighuma ebihikire! Thwanga kolhaki nuku sithuthebibawe omo myatsi ng’eyo?​—Abanya Efeso 4:14.

10. Busana naki abandi Baisraeli babalha erilhwa n’abaghalha babu, ni kyahi ekya bawathikaya erithend’ilhwa?

¹⁰ Thwangan’ighira okwa kyabya okwa Baisraeli ababya bikere ebulengera lyuba bw’Olhusi Yorodani omwa buthuku bwa Yosua. (Yosua 22:9-34) Mubowa ngoku Abaisraeli abikere okwa wundi musirya we Yorodani babirihimba ekiherero kinene hakuhi n’olhusi. Ebindi omwa mwatsi oyo byabya bihikire, aliwe ebyosi sibyabya bihikire. Kandi mukyaleka Abaisraeli ababya ebulengera lyuba ibalengekania bathi balikyabo ab’okwa lhundi lhuhandi babiriyisamambulha oku Yehova, neryo mubayihindania haghuma eriyalhwa nabu. (Soma Yosua 22:9-12.) Aliwe bathe bayalhwa, Abaisraeli b’okwa lhuhandi lhw’ebulengera lyuba mubathuma y’abalhume eriyaminya okwenene. Mubaminyaki? Abaisraeli b’okwa lhundi lhuhandi sibahimba ekiherero busana n’erihererako esyonyamuhanga sy’amabehi. Bakihimba eribya kibukyo okwa buli mundu ngoku nabu bakaramaya Yehova. Abaisraeli bangabya imubatsema eribya imubathayalhwa n’abaghalha babu, kundi mubatsuka erisondya okwenene kwosi kw’omwatsi.

11. (a) Mefiboseti mwakanganibwa athi obuthe bulingirirania? (b) Dawudi anganakanganirye athi Mefiboseti y’obulingirirania?

¹¹ Obuthuku bwangana hika nethu ithwayowa nabi kutsibu busana n’abandu erithukania kw’omwatsi owali mw’ebighuma-bighuma ebihikire. Eki ky’ekyabya oku Mefiboseti. Omwami Dawudi abya iniabiriha Mefiboseti y’amalima wosi wa sokulhu wiwe Saulo. (2 Samweli 9:6, 7) Enyuma waho, Dawudi mwowa emyatsi eyithahikire oku Mefiboseti. Mwathatsuka erilebya omwatsi ng’anahikire, neryo mwalhusya oku Mefiboseti kw’ebyosi. (2 Samweli 16:1-4) Enyuma waho, Dawudi abere akakania na Mefiboseti, Dawudi mwaminya kw’abirisobya. Neryo mwamusubulirya kubyo. (2 Samweli 19:24-29) Dawudi kw’anatsuka  eriminya okwenene kw’omwatsi omwakanya k’erighendera okwa mabehi, Mefiboseti syangabanire obuthe bulingirirania obu.

12, 13. (a) Yesu mwakolhaki abandu bakamubughako amabehi? (b) Thwanga kolhaki omundu amathubughako amabehi?

¹² Wangakolhaki omundu amakulhalhania kw’amabehi? Eki mukyabya oku Yesu na Yoane Mubatizya. (Soma Matayo 11:18, 19.) Yesu mwakolhaki? Mwathakolesya obuthuku n’akaghalha kiwe erisoborera abandu balighe ngoku emyatsi eyo ni mabehi. Omwakanya k’ekyo, mwahira omwa bandu mw’omuhwa w’erisondya okwenene. Abya anzire ibahwerya amalengekania wabu okwa byakakolha n’erikangirirya. Yesu mwabugha athi: “Amenge wa Nyamuhanga akaminyikalha omwa mibiiri yagho.”​—Matayo 11:19.

¹³ Thwangan’ighira oku Yesu kw’erisomo likulhu. Hanganayira abandu ibathukaniako ebithuwene, kandi ithwayilhalikirira eki eribya ikyangana thutsandya kw’erina. Aliwe emibere yethu yangana kangania nga thuli bandu abali bathi. Erikwamana n’eky’erileberyako kya Yesu, emibere yethu mibuya yangana ghania amabehi agho bakathubughako.

14, 15. Busana naki sithutholere thukayikethera obuminya bwethu?

¹⁴ Thwamabirilhangira ngoku kikalire eribana omwatsi owahikire. Ekindi kitsibu bw’obuthahikana bwethu. Thwanganabya ithwabirikolera Yehova habw’emyaka mingyi kandi ithwabirithunga amenge omwa syonzira ndebe. Abandi bangana thusikya kundi thukathoka erilengekania ndeke okwa kindu. Mbwino eki ikyana thubera kitsibu?

¹⁵ Ee. Ithwangana tsuka eriyikethera amenge wethu. Ithwangana lighira eriyowa n’ebyathwasi erisondolha amalengekania wethu. Ithwangana tsuka erilengekania thuthi thunasi omwatsi nomuthwangabya isithuwithe okwenene kwagho kwosi. Eki ni ky’akabi! E Biblia yikathukunga ndeke-ndeke yithi sithutholere thukayeghemerya obuminya bwethu.​—Emisyo 3:5, 6; 28:26.

16. Omwa ky’erileberyako eki, ni kyahi ekyabya okwa huteri, kandi Tom mwalengekaniaki?

¹⁶ Ng’eky’erileberyako, thalengekania erigholho lighuma omusyakulhu w’ekithunga oyukahulhawa mwa Tom iniaghenda omwa huteri neryo inialhangira owundi musyakulhu iya, John, inianikere okwa meza n’omukali oyuthe mukali wiwe. Ibabya ng’abali okw’itsema haghuma. Tom iniabalhangira bakaseka n’eriwanako. Iniasweka n’eriyibulya athi: ‘Mbwino John akendi komolha mukali wiwe? Ibbwa abaana babu?’ Tom anabirilhangira ebiri ng’ebi bikabya. Wulhue in’iwe Tom iwukendiyowa wuthi?

17. Omwa ky’erileberyako eki, ni kyahi ekya Tom aminya enyuma waho, kandi thwang’ighaki okw’eki?

¹⁷ Aliwe thalinda hake. Nomwakine  indi Tom ali okw’ilengekania athi John ali okw’ithetha abandi bakali, anasi ekwenene yosi? Enyuma waho omw’igholho-gholho, Tom amatherera John neryo amaminya ngoku omukali oyo ni mwali wabu John, oyuw’ikere haali neryo alhue iniasire. John na mwali wabu bamabirighunza myaka mingyi isibali bathalholhanako. Neryo kundi mwakabya iniakendi ghunza buthuku buke, John mwakakolesaya akathuku kake ako eriyalya nayu ebyalya omwa huteri. Mukali wa John mwathethoka eribya nabu. Tom amatsema eribya imwathethabwira mundu wosi-wosi ebyo alhue iniabirilengekania! Eki kikathweghesayaki? Mbulha thwamaghunza buthuku bungahi ithunemukolera Yehova, thutholere ithwasondya okwenene kw’omwatsi thuthe thwahamya kugho.

18. Ni kyahi ekyangaleka ithw’ikirirya omwatsi owathahikire owahambire oku mulikyethu?

¹⁸ Kandi kyangana kalha erilebya ndeke omwatsi amabya iniahambire oku mughalha wethu oyo thuthekolongana nayu ndeke. Thwamabera erilengekania okw’ithendi yitheghererania erya thuwithe nayu, ithwangana muyilhalikirira. Neryo thwamamwowako omwatsi ow’athuwene, ithwangananza erilighagho, nomwakine indi sithuwithe obwema. Thuk’ighaki? Thwamaligha eribya n’amalengekania awathuwene oku balikyethu, ikyangana leka ithwahamya okwa kithahikire. (1 Timoteo 6:4, 5) Isithwalighira amalengekania awathuwene ng’erihali n’obuha eribya omwa mithima yethu. Isithw’ibirirawa ngoku Yehova anzire ithwanza balikyethu n’eribaghanyira erilhua okwa muthima.​—Soma Abanya Kolosai 3:12-14.

19, 20. (a) Ni misingyi yahi ye Biblia eyikendi thuwathikya erilebya ndeke omwatsi? (b) Thukendisyakania okuki omwa mwatsi ow’akakwamako?

¹⁹ Munabwire, kikalire eribana omwatsi owahikire n’erilebyagho ndeke. Busana naki? Ebighuma-bighuma by’okwa myatsi mingyi sibihikire kutse bihikire kwa mbindi-mbindi, kandi nethu sithuhikene. Ni kyahi ekyanga thuwathikya? Y’emisingyi eyathukabana omwa Kinywe kya Nyamuhanga! Ng’eky’erileberyako, omusingyi mughuma akathubwira athi ni bukiru erisubirya thuthethwowa okwenene kw’omwatsi. (Emisyo 18:13) Owundi akathuwathikaya erilhangira ngoku sithutholere thuk’ikirirya obuli kindu ekya thukowa isithuthalebya nga nina kwenene. (Emisyo 14:15) Kandi nomuthwangabya ithwamabirighunza buthuku bungahi ithunemukolera Yehova, sithutholere thukayikethera obuminya bwethu. (Emisyo 3:5, 6) Emisingyi ye Biblia yikendi thutheya thwamakolesya okwenene kw’emyatsi eribana eky’erighenderako ekihikire n’erithwamu ndeke.

²⁰ Aliwe hane eyindi nzumwa eyangana leka ikyakalha eribana okwenene kw’omwatsi. Ithwe ng’abandu, thukanguhirawa eritswera erikwamana n’ebya thukalhangira. Omo mwatsi owakakwamako, thukendi syakania okwa syonzira esya thwangana yisanga ithwabirikolha ekisobyo eki kandi ngoku thwanga yihighulha kukyo.