1. Ni kyahi ekyo ithwe bosi thukasunzira abahughu bethu?

MWALI wethu oyukahulhawamo Pauline akabugha athi: “Nabere nabiriminya ekwenene, munasunzira obuli mundu omw’eka yethu erisyabya naghe omwa Paradiso. * Kutsibu-tsibu inganzire mwira waghe, Wayne, na mughalha waghe erinyiyiyungako erikolera Yehova.” Wunawithe abahughu abathe baminya Yehova n’erimwanza? Obundi nawu nga Pauline wanzire nabu ibakolera Yehova.

2. Ni bibulyo byahi ebya thukendi kaniako omo mwatsi ono?

² Sithwangakaka abahughu bethu eriligha engulhu yuwene, aliwe thwangana bahira mw’omuhwa w’erilengekania n’erihulikirira omwatsi we Biblia. (2 Tim. 3:14, 15) Busana naki thutholere ithwathulira abahughu bethu? Busana naki thutholere ithwalengesya eriyitheghererya eriyowa lyabu? Thwanga kolhaki eriwathikya abahughu bethu nabu erianza Yehova? Kandi abosi abali omwa kithunga kyethu banga thuwathikya bathi?

3. Ngoku kiri omu 2 Petero 3:9, busana naki thutholere ithwathulira abahughu bethu?

³ Yehova akisiya iniaghunzaho omughulhu ono. Abali “n’amalengekania awakaleka ibatholera eribana engebe y’erikotha” basa babakendi syalhamibwa. (Emib. 13:48, NW) Thukakolesaya endambi nene n’akaghalha erithulira abathuthasi abali omwa bulhambu bwethu, neryo ni kya buli kiro eribya ithwanzire  n’abahughu bethu nabu bakolere Yehova. Thatha wethu w’olhwanzo, Yehova, “syanzire omundu n’omughuma akahera, nikwa anzire abandu bosi ibabindulha emithima yabu n’erireka ebibi.”​—Soma 2 Petero 3:9.

4. Ni sobya yahi eyo thwangana kolha thukathulira abahughu bethu?

⁴ Thutholere ithwabya ithun’ibukire ngoku hane enzira eyitholere n’eyithatholere ey’erithuliramu omwatsi w’omulhamu. Nomwakine indi thukakolesaya amenge thukathulira abathuthasi, thwangana yisanga ithwabiribwiririra abahughu bethu thukakania nabu.

5. Thutholere ithwabya ithun’ibukireki thuthe thwalengesya erithulira abahughu bethu?

⁵ Abangyi omw’ithwe thwanganabya ithukanayikubaya bwomo thuk’ibuka omurundi w’erimbere thukathulira abahughu bethu. Omukwenda Paulo mwahana Abakristayo athi: “Erikania lyenyu libye omwa lhukogho kandi libye lyuwene, imwathoka erisubirya ndeke obuli mundu.” (Kol. 4:5, 6) Ambi ithwabya ithun’ibukire erihano eri thukathulira abahughu bethu. Bithe bithya, ithwangana bahithania omwakanya k’eribawathikya.

6-7. Iha eky’erileberyako ekikakanganaya ekiyithawa ky’eriyitheghererya eriyowa ly’omwanze oyuthe Mwema wa Yehova.

⁶ Yitheghereraye eriyowa lyabu. Pauline, oyuli ahighulhu akabugha athi: “Erimbere, munanza eribya ingakanirya mwira waghe okwa by’obunyakirimu bisa-bisa. Isithuli kanaya okwa bindi.” Aliwe, mwira wa Pauline, ya Wayne, aby’asi bike okwa Biblia kandi isyaliyitheghereraya ebya Pauline akabugha. Mwalengekania athi ebiri omwa muthwe wa Pauline by’eby’edini yiwe bisa-bisa. Mwasagha athi mukali wiwe am’ingira omwa kadini akangamutsandya kandi athi abirithebwa.

 ⁷ Pauline akaligha athi obuthuku bwiwe bunene obw’erigholho n’esyowikendi iniakabughunza n’abalikyethu​—okwa mihindano, omw’ithulira, kutse eribabungira ewabu. Pauline akabugha athi: “Ihakanayira Wayne iniahika eka isiyiri mundu, neryo iniabya omo mbwera.” Ahathe erithika-thika, Wayne iniakanayisunza eribya na mukali wiwe n’omwana wabu. Iniakabya isyasi nga bali n’abandu muthinaki, kandi abanywani abahyaka aba Pauline mubabya nga babamalenga mwira wiwe. Ekya Wayne abya akolire mwahaya athi bathwe embeta. Hane ekya Pauline angakolire erikangania ku akayitheghereraya eriyowa lya mwira wiwe?

8. Ngoku kiri omu 1 Petero 3:1, 2, ni kyahi ekyanga hamba kutsibu okwa bahughu bethu?

⁸ Ibya n’emibere eyuwene. Mughulhu mungyi, ebya thukakolha bikahamba kutsibu okwa bahughu bethu kwilhaba ebya thukabugha. (Soma 1 Petero 3:1, 2.) Endambi muyahika Pauline amalhangira ekyo. Akabugha athi: “Ngabya inganasi ngoku Wayne athwanzire kandi ngoku nibya syanzire erithwa embeta. Aliwe erihaya liwe mulyaleka namalhangira ku ngatholere ingakolesya ebya Yehova akabugha. Omwakanya k’eribera erimuthulira, nabya ngayithagha erihiraho eky’erileberyako ekyuwene omwa mibere yaghe.” Pauline mwaleka eribya akakaka Wayne erikania okwa Biblia, kandi amatsuka n’eribya akakania nayu okwa yindi myatsi. Wayne mwamulhangira iniabiryongera eribya w’obuholho, na mughalha wiwe iniabiryongera eribya mwowa. (Emi. 31:18, 27, 28) Wayne abere alhangira ngoku omwatsi we Biblia abirihamba ndeke okw’eka yiwe, mwatsuka eribya akahulikirira n’erilengekania okwa Kinywe kya Nyamuhanga.​—1 Kor. 7:12-14, 16.

9. Busana naki thutholere ithwahathikana eriwathikya abahughu bethu?

 ⁹ Hathikana eriwathikya abahughu bawu. Yehova akathuhiriraho eky’erileberyako. “Kandi n’akandi” akaha abandu b’akanya k’erihulikirira engulhu yuwene nuku babane engebe. (Yer. 44:4) Kandi n’omukwenda Paulo mwabwira Timoteo athi ayitsinge omw’iwathikya abandi. Busana naki? Kundi Timoteo erikolha ekyo angayilhamirye n’abakamuhulikirira. (1 Tim. 4:16) Thwanzire abahughu bethu, neryo thwanzire nabu ibaminya ekwenene eyiri omwa Kinywe kya Nyamuhanga. Endambi muyahika ebinywe bya Pauline n’emibere yiwe byamahamba ndeke okw’eka yiwe. Hathya atsemire eribya iyo na mwira wiwe ibakakolera Yehova. Abosi ni batemburi, kandi Wayne ni musyakulhu w’ekithunga.

10. Busana naki thutholere ithwaghumisirizya?

¹⁰ Ghumisirizaya. Thukabya thukathwamu erighendera okwa bihano bya Nyamuhanga, kyanganakalira abahughu bethu erilighirana n’erikirirya lyethu lihyaka n’emibere. Mughulhu mungyi, ekya bakatsuka erilhangira, ly’eribya isithukisangira nabu omwa biro bikulhu by’amadini n’eby’epolitiki. Okw’itsuka, abandi bangana thuhithanako kutsibu. (Mt. 10:35, 36) Aliwe, isithwalengekanaya thuthi sibanga hinduka. Thwamaleka erilengesya eribawathikya eriyitheghererya ebya thwikirirye, ithukendibya nga thwamathwamu thuthi sibatholere eribana engebe y’erikotha. Yehova syathathuha omubiiri w’eritswera​—aheregho Yesu. (Yn. 5:22) Thwamaghumisirizya, endambi iyangana hika abahughu bethu ibanza erihulikirira omwatsi wethu.​—Lebaya akasanduko “ Kolesaya Omuthahulha Wethu we Intaneti Erikangirirya.”

11-13. Emibere Alice akolonganiramu na mama wiwe yikathweghesayaki?

¹¹ Ibya iwunasikire kandi kolesaya amenge. (Emi. 15:2) Thalengekania oku Alice. Aminya Yehova inianikere haali kutsibu okwa babuthi biwe abanzire epolitiki kandi abikirirye bathi sihali Nyamuhanga. Mwalhangira isyatholere erilindirirya eribabwira okwa myatsi mibuya eyo ak’igha. Alice akabugha athi: “Wamalindirirya eribwira abahughu bawu oko myatsi mihyaka eyo wikirirye n’ebya wukakolha, ibakendi syasweka kutsibu bakakiminya.” Iniakahandikira ababuthi biwe esyobaruha, iniababulya amalengekania wabu okwa myatsi ye Biblia eyo akalengekanaya athi bangana tsemera, ng’ow’olhwanzo. (1 Kor. 13:1-13) Mwasima ababuthi biwe eribya imubamukulya n’erimutsomana, kandi mwabathumira n’ebihembo. Iniakabya akababungira iniakayikasa kutsibu eriwathikya mama wiwe okwa mibiiri y’eka. Okw’itsuka, ababuthi biwe mubathatsema Alice akababwira okwa nyikirirya yiwe nyihyaka.

¹² Alice iniane eka n’ababuthi biwe, mwalholha embere n’endegheka yiwe y’erisoma e Biblia. Alice akabugha athi: “Eki mukyaleka mama waghe inialhangira ngoku e Biblia ni y’omughaso embere syaghe.” Na thatha wa Alice mwathwamu erigha myatsi mirebe omwa Biblia nuku aminye ekyalekire mwali wiwe iniahindulha amalengekania, kandi mwanza erisondya omwa Biblia mw’ebisobyo. Alice akabugha athi: “Munamuha e Biblia, kandi munahandikamu ebinywe bike ebyanga thulha okwa muthima wiwe.” Mumwalhwiririraki? Omwakanya k’eribana omwa Biblia mw’ebisobyo, ebya thatha wa Alice igha omwa Biblia mubyamuhambako kutsibu.

¹³ Thukayithagha eribya ithunasikire n’eribya n’amenge, nomuthwangabya ithutholere erighumira ebitsibu. (1 Kor. 4:12b) Ng’eky’erileberyako, Alice mwaghumira erihakanisya erikalhua oku mama wiwe. “Nabere ingabatizibwa, Mama mwanyahulhamo ‘mwana mubi.’” Alice mwakolhaki? “Mungathaleka erikania okwa dini yaghe mbyaka, aliwe omw’isikya  munasoborera ngoku nabirithwamu eribya Mwema wa Yehova kandi ngoku singendi hindulha erithwamu lyaghe. Munalengaho erikakasya mama waghe ngoku ngamwanzire. Ithwe bosi muthwalira, kandi munamutsumbira ebyalya ebyuwene. Eritsuka-tsukana n’aho, mama waghe mwatsuka erilhangira ngoku e Biblia yikanyiwathikaya eribya mundu mubuya.”

14. Busana naki sithutholere thukaghendera okwa kahathikano k’abahughu bethu?

¹⁴ Kyangana thwalha obuthuku abahughu bethu eriyitheghererya ngoku thwabirithwamu erikolera Yehova. Ng’eky’erileberyako, Alice abere akathwamu erikolha obutemburi omwakanya k’erikolha omubiiri agho ababuthi biwe babya banzire iniakolha, mama wiwe kandi mwalira. Aliwe Alice mwabya inianasikire. Alice akabugha athi: “Wamaligha erikolha ekindu kighuma ekya bahughu bawu balyakuhathikana erikolha, iwukendi leka ibakuhathikana n’erikolha ebindi. Aliwe wamabya mwolho kandi iwunasikire embere sy’abahughu bawu, abandi ibangana kuhulikirira.” Ekyo ky’ekyabya oku Alice. Lino ababuthi biwe ni batemburi, kandi thatha wiwe ni musyakulhu w’ekithunga.

15. Ngoku kiri omu Matayo 5:14-16 n’omu 1 Petero 2:12, ‘emibiiri mibuya’ y’abandi yanga wathikya yithi abahughu bethu?

¹⁵ Yehova akaletha abandu okwa lhuhandi lhwiwe erilhabira omwa ‘mibiiri mibuya’ y’ekithunga. (Soma Matayo 5:14-16; 1 Petero 2:12.) Oyo muli nayu omwa butheke, amabya isi Mwema wa Yehova, ane aminya abali omwa kithunga kyenyu? Pauline, oyothulyakanayako, mwakokya balikyethu b’ewiwe nuku mwira wiwe, Wayne, abaminye. Wayne akibuka ngoku  mughalha wethu amuwathikaya eriminya ndeke Abema ba Yehova: “Mwathaghenda okwa mubiiri nuku thulebaye omupira haghuma. Neryo munaminya ngoku nayu akanayitsemesaya.”

16. Busana naki thutholere ithwakokya abahughu bethu okwa mihindano?

¹⁶ Enzira eyuwene ey’eriwathikiryamu abahughu bethu ly’eribakokya okwa mihindano yethu. (1 Kor. 14:24, 25) Omuhindano w’erimbere owa Wayne ahindanako abya iw’omukonga w’Eryibuka kundi mwabya Wayne iniabirikulhuka okwa mibiiri yiwe kandi omuhindano oyo anabya mukuhi. Akabugha athi: “Mungathayitheghererya omukania, aliwe abandu mubanyitsemesya. Mubanyihikako, bamanyithangirira n’erinyihamba omwa byalha. Munalhangira ini bandu babuya.” Mughalha wethu na mukali wiwe babya ibabiriyihira oku Pauline, omw’iwathikya mughalha wiwe okwa mihindano n’omw’ithulira. Erighunzerera, Wayne abere akathwamu erianza eriminya bingyi ebihambire okw’ikirirya lya Pauline, mwasaba mughalha wethu oyo athi abye akamweghesya e Biblia.

17. Busana naki sithutholere thukayitsweba, aliwe busana naki sithutholere thukabikyako erithulira abahughu bethu?

¹⁷ Thuwithe amaha thuthi abahughu bethu abosi bakendi thuyiyungako omw’ikolera Yehova. Aliwe, nomwakine indi thukahiraho akaghalha eriwathikya abahughu bethu eribya baghombe ba Nyamuhanga, bangana ghana eriasa omwa kwenene. Byamabya bithya, sithutholere thukayitsweba busana n’erithwamu lyabu. Nomwabine, sithwanga kaka omundu eriligha ebyo thwikirirye. Aliwe abahughu bawu bamalhangira iwunatsemire busana n’erikolera Yehova, ikyangana bahambako kutsibu. Bahire omwa misabe. Kanaya nabu omwa menge. Isiwabikyako! (Emib. 20:20) Yikethere ngoku Yehova akendi tsumulha akaghalha kawu. Kandi abahughu bawu bamathwamu erikuhulikirira, ibakendi syalhamibwa!