ERITHENDILEGHULHA, ni bugha ambu erikirirya, liwithe amaaka manene. Ng’eky’erileberyako, nomwakine indi Sitani anzire erithwitha bunyakirimu, erikirirya likathuthokesaya “erilimya emisoha yosi y’omuliro y’omubi.” (Efe. 6:16) Erikirirya lyanganaleka ithwathoka erighumira ebitsibu ebiri ng’ebithwa. Yesu mwabwira abigha biwe athi: “Mwamabya n’erikirirya ng’embutho y’eharadali, mwasyabwira ekithwe eki muthi, ‘Wuhumire erya,’ nakyo kyasyahuma.” (Mt. 17:20) Kundi erikirirya likathughumaya bunyakirimu, thutholere ithwayibulya ebibulyo bino: Erikirirya niki? Emibere y’omuthima wethu yikahamba yithi okw’ikirirya lyethu? Thwanga ghumya thuthi erikirirya lyethu? Kandi thutholere ithwikirirya omundi?​—Abar. 4:3.

Erikirirya siririsubulira okw’iligha n’eriminya ekwenene lisa, kundi nibya “esyombinga nasyo sikikiriraya [ngoku Nyamuhanga aneho], kandi sikasuka-sukana.”(Yak. 2:19) Neryo, erikirirya niki?

Erikwamana ne Biblia, erikirirya liwithe mibere ibiri. Ow’erimbere, “erikirirya ni minya kundu emyatsi eyathukahirako amaha.” (Ebr. 11:1a) Wamabya iwuwithe erikirirya, wukaligha ndeke-ndeke ngoku ebyosi ebya Yehova akabugha ni kwenene kandi ngoku bikendi syabererera. Ng’eky’erileberyako, Yehova mwabwira Abaisraeli athi: “Mwamathoka erithwa endaghano yaghe busana n’omusibo, n’endaghano yaghe busana n’ekiro, isihabya omusibo kutse ekiro omwa mighulhu yabyo, neryo kwesi endaghane yaghe oku Dawudi omughombe waghe iyangathoka erithw’ibwa.” (Yer. 33:20, 21) Wunewathasagha wuthi eryuba siryendiasa kutse erilenga, ikyaleka ihathabya ekiro n’omusibo? Wamabya isiwuli thika-thikira ebilhaghiro ebikasondolha ekihugho eribya ikinemuyithimbako n’erithimba okwa lyuba, iwanathika-thika wuthi Omuhangiki oyuwahiraho ebilhaghiro ebi syendi syaberererya emilhaghe yiwe? Eyihi nahake!​—Isa. 55:10, 11; Mt. 5:18.

Owakabiri, erikirirya “n’irigha kwenene emyatsi eyo thuthelhangira.” (Ebr. 11:1b) Omu nziraki? Omwana amakubulya athi, ‘Wukaminya wuthi ku hane omuka?’ Nomwakine indi siwuli wathalhangira omuka, iwangana wathikya omwana erilengekania okwa bikakanganaya ngoku aneho ng’erihumulha, kutse ebya muyagha akakolha, n’ebindi n’ebindi. Omwana akendibya abiriligha ekyo, iniaminya ngoku hane ebindu ebyo athelhangira. Kuthya, erikirirya liseghemere okwa bwema obulhangirikire.​—Abar. 1:20.

Kundi erikirirya liseghemere okwa bwema obulhangirikire, eribya n’erikirirya omundu atholere iniatsuka “eriminya ndeke omwatsi w’ekwenene.” (1 Tim. 2:4) Aliwe ekyo sikirighunza. Omukwenda Paulo mwahandika athi: ‘Omundu akikiriraya omo muthima.’ (Abar. 10:10) Omundu atholere inialigha ekwenene n’erilhangirayo mwa y’omughaso. Neryo aho imwakendi thunga erikirirya, ni bugha ambu, eritsemesya Nyamuhanga. (Yak. 2:20) Omundu oyuthesima ekwenene erilhua okwa muthima anganaghana n’obwema obunalhangirikire kundi syanzire erihindulha ebyo ikirirye kutse  anzire erighendera okwa ngumbu siwe sy’omubiri. (2 Pet. 3:3, 4; Yuda 18) Ky’ekyaleka omwa buthuku bwe Biblia, si bugha indi abosi abalhangira ebithiko-thiko mubabya n’erikirirya. (Emig. 14:11; Yn. 12:37) Omulimu abuyirire wa Nyamuhanga akaha erikirirya okwa bandu abanzire ekwenene basa.​—Gal. 5:22; 2 Tes. 2:10, 11.

Omwami Dawudi ni mughuma w’okwa babya bawithe erikirirya erighumire. (Ebr. 11:32, 33) Aliwe, si bugha indi obuli mundu omw’eka yabu Dawudi abya awithe erikirirya ng’eryo. Ng’eky’erileberyako, thalengekania oku mughalha wobu Dawudi omukulhu ya Eliabu. Goliata abere akahemya-hemya Abaisraeli, Dawudi mwahithana. Eliabu mwakaramira Dawudi busana n’ekyo kandi Eliabu erikolha ekyo mwakangania kwa thawithe erikirirya omu Yehova. (1 Sam. 17:26-28) Sihali oyukabuthawa n’erikirirya; kutse oyukasighalhaya erikirirya okwa babuthi biwe, neryo kwesi erikirirya lya Dawudi lyabya busana n’obughuma bwiwe na Nyamuhanga.

Omwa Esyonyimbo 27, Dawudi akakanganaya ngoku athunga erikirirya erighumire ng’eryo. (Omulhondo 1) Dawudi mwaghanirya okwa by’alhabamo n’ebya Yehova akolera esyonzighu siwe. (Omulhondo 2, 3) Mwalhangira endegheka ya Yehova y’eriramya mwa y’obughuli. (Omulhondo 4) Dawudi iniakaramaya Nyamuhanga haghuma n’abandi baramya balikyabo omwa hema y’eriramiryamo. (Omulhondo 6) Iniakasondekanaya Yehova omw’imusaba. (Omulhondo 7, 8) Dawudi kandi inianzire erikangiriribwa omwa nzira ya Nyamuhanga. (Omulhondo 11) Oku Dawudi, omubere oyu abya mukulhu kyaleka iniabugha athi: “Nangabere hayi kunathabya n’erikirirya?”​—Omulhondo 13, NW.

Wanganabya n’erikirirya eriri ng’erya Dawudi wamabya n’amalengekania n’emibere eyikanibweko omu Esyonyimbo 27. Kundi erikirirya liseghemere okw’iminya omwatsi w’ekwenene, wukabya wuk’ongera erigha Ekinywe kya Nyamuhanga n’ebitabu ebiseghemere okwa Biblia, ku kikan’olhoba eribya n’omubere oyu ow’okwa mikolere y’omulimu wa Nyamuhanga. (Esy. 1:2, 3) Ghaniraya ndeke wukayeghesya. Thwamaghanirya okwa bya thuk’igha, ithukendiongera erisima Yehova. Wukendibya wunemwongera erisima Yehova, wukendianza erikangania erikirirya lyawu omw’imuramya okwa mihindano n’eribwira abandi okwa maha wawu. (Ebr. 10:23-25) Kandi thukakanganaya erikirirya lyethu thukalholha embere ‘erisaba emighulhu yosi butsira erilhuha.’ (Lk. 18:1-8) Neryo kwesi, ‘saba Yehova butsira eriumbya’ iwunayikethere ngoku ‘akakutheghaya.’ (1 Tes. 5:17; 1 Pet. 5:7) Erikirirya likaleka ithwakolha ebihikire, neryo ikyaghumya erikirirya lyethu.​—Yak. 2:22.

Erigholho-gholho Yesu athali aholha, mwabwira  abigha biwe athi: “Mw’ikiriraye Nyamuhanga, naghe munyikiriraye.” (Yn. 14:1) Neryo kwesi thutholere ithwahira erikirirya lyethu omu Yehova na Yesu. Wang’ikirirya wuthi omu Yesu? Thulebaye esyonzira isathu.

Ey’erimbere, lhangira embanulho ng’ekihembo ekikakughasira ahabwawu. Omukwenda Paulo mwabugha athi: “Engebe eyo nyiri nayo lino omo mubiri, nyiri nayo busana n’erikirirya Omughalha wa Nyamuhanga, oyuwanyanza, n’eriyiha busana naghe.” (Gal. 2:20) Wam’ikirirya omu Yesu, wukaligha ndeke-ndeke ngoku embanulho yikakughasira, yikaleka iwaghanyirwa ebibi byawu, yikakuha amaha w’engebe y’erikotha, kandi yikakanganaya ndeke-ndeke ngoku Nyamuhanga akwanzire. (Abar. 8:32, 38, 39; Efe. 1:7) Eki kikendi leka iwuthabera eriyowa nabi.​—2 Tes. 2:16, 17.

Eyakabiri, yithunde hakuhi na Yehova omw’isaba erilhabira omwa kihongwa kya Yesu. Busana n’embanulho, thwangana saba Yehova “n’obwiranda . . . thuthoke eribana erighanyira, kandi thwang’irire olhukogho okwa mughulhu w’obwagha.” (Ebr. 4:15, 16; 10:19-22) Erisaba likaghumaya erithwamu lyethu ery’erighana erikolha ekibi.​—Lk. 22:40.

Eyakasathu, owa Yesu. Omukwenda Yoane mwabugha athi: “Oyukikiriraya Omughalha awithe engebe y’erikotha; nikwa oyuthekenga Omughalha syendisyalholha oko ngebe, nikwa erihithana lya Nyamuhanga limw’ikereko kera na kera.” (Yn. 3:36) Lhangira ngoku Yoane mwakangania embaghane eyiri ahakathi-kathi k’eribya n’erikirirya n’obuthowa. Neryo kwesi, wukakanganaya erikirirya lyawu omu Yesu wukamwowa. Wukowa Yesu omw’ikwama “emighambo ya Kristo,” ni bugha ambu, ebyosi ebyo akangiriraya n’erilhaghira. (Gal. 6:2) Kandi wukowa Yesu omw’ighendera okwa busondoli obw’akaha erilhabira omwa “mughombe oyuthereghulha n’ow’amenge.” (Mt. 24:45) Wam’owa Yesu, iwukendi thunga akaghalha k’erighumira ebitsibu ebiri ng’ekihunga.​—Mt. 7:24, 25.

Kiro kighuma, omulhume mwabugha athi: “Nangwithe erikirirya! Wungwathikaye aho ngathasyayithagha erikirirya!” (Mk. 9:24, NW) Anabya awithe erikirirya like, aliwe omulhume oyu, omw’iyikehya mwaminya ngoku atholere erikanyia erikirirya liwe. Ng’omulhume oyu, ithwe bosi hanganabya emibere eyo thukayithaghiramo eryongera erikirirya lyethu. Kandi ithwe bosi thwangana ghumya lino erikirirya lyethu. Ngoku thwabirilhangira, thukaghumaya erikirirya lyethu omw’isoma Ekinywe kya Nyamuhanga n’erikighaniryako, ekindu ekikendi thuwathikya eryongera erisima Yehova. Kandi erikirirya lyethu likongera erighuma ithwe haghuma na balikyethu thukaramya Yehova, thukabwira abandi okwa maha wethu, n’erisaba buthumbya. N’ekindi, thukabya thukaghumya erikirirya lyethu, thukabana ekihembo ekilengire ebyosi. Ekinywe kya Nyamuhanga kikathubwira kithi: “Abanzwa bethu, muyihimbe okw’ikirirya lyenyu eribuyirire kutsibu . . . muyibike omo lhwanzo lhwa Nyamuhanga.”​—Yuda 20, 21.