OMWATSI W’ERIGHA 34
Ngoku Wangabya Iwunatsemire Wamalhua Okwa Lhusunzo Lhwawu
“Nyamuhanga syalikolha ekithathunganene. Siangibirirwa omubiiri wenyu, n’olhwanzo lhwenyu olho mwakangaya busana nayu.”—EBR. 6:10.
OLHWIMBO 38 Akendi Kuha Amaaka
EBIKENDI KANIBWAKO *
1-3. Ni byahi ebyangana letha embinduka okwa abali omwa mubiiri w’omughulhu wosi?
ROBERT na Mary Jo bak’ibuka bino: “Ithwamabirighunza emyaka 21 ithune bamisyonare, ababuthi bethu abosi bbani mubatseka. Muthwatsema eribathwanira. Aliwe kandi, muthwapona kutsibu thukalhua eyo thwabya thukakolera obumisyonare.”
2 William na Terrie bathi: “Thwabere thukaminya ngoku amaghalha wethu syendi thasyathulighira erisuba eyo thulhue, muthwalira. Ithwanzire kutsibu erikolera Yehova omwa kindi kihugho, aliwe muthwabya isithwanga thasyathoka.”
3 Aleksey akabugha athi: “Thwabya ithunasi ngoku egavumente yanzire erikyinga ekyaghanda ky’omuthahulha eyo nabya ingakolera. Aliwe kyabere kikabya muthwahwa amani kandi muthwabya ithuli b’erilhua okwa Beteli.”
4. Ni bibulyo byahi ebya thukendi kaniako omo mwatsi ono?
4 Kandi n’abandi bangyi abali omwa mubiiri w’omughulhu wosi imwamune n’Abanya Beteli bangyi babiribana esyombinduka. * Balikyethu abathaleghulha aba kyangana bakalira erisighania olhusunzo olho banzire kutsibu. Ni kyahi ekyanga bawathikya erighenda-ghendania n’embinduka? Wanga bawathikya wuthi? Eby’erisubirya okwa bibulyo ebyo byangana thuwathikya ithwe bosi thukabana esyombinduka omwa ngebe.
EKY’ERIKOLHA HAKABYA EMBINDUKA
Busana naki kyangana kalira abali omwa mubiiri w’omughulhu wosi bamalhua kugho? (Lebaya enungu 5) *
5. Embinduka omwa lhusunzo lhw’omubiiri yanga thuhambako yithi?
5 Mbulha thuli okwa Beteli kutse omwa yindi miringo y’omubiiri w’omughulhu wosi, thuk’igha erianza kutsibu abandu n’eya thukakolera nibya. Neryo ithukendi pona kutsibu, hamabanika ekyosi-kyosi ekyangaleka ithwalhuayo. Ithwanganakwa balikyethu ab’eyo thulhue b’olhukando, ithwabulha nga bali omwa mibereki, kutsibu-tsibu thwamabya ithulyalhuayo busana n’eriendereribwa. (Mt. 10:23; 2 Kor. 11:28, 29) Eryongera okw’ekyo, erihebwa olhusunzo lhuhyaka—kutse nibya erisuba eka—mughulhu mungyi kikayithagha eribeghera emibere mihyaka. Robert na Mary Jo bakabugha bathi: “Thwabya isithukibeghere emibere y’ewethu nibya n’erithulira omwa mubughe wethu. Muthwabya nga bagheni ewethu.” Abandi abakathunga embinduka omwa mubiiri w’omughulhu wosi banganabana n’ebitsibu eby’esyosente. Banganabulha eky’erihikako, ibayilhalikirira, n’erihwa amani. Ni kyahi ekyanga wathikya?
Ni kikulhu eriyithunda hakuhi na Yehova n’erimuyikethera (Lebaya enungu 6-7) *
6. Thwanga sighalha thuthi ithunayithundire oku Yehova?
6 Sighalha iwunayithundire oku Yehova. (Yak. 4:8) Thwanga kolha ekyo kya thuthi? Omw’iyikethera ku ‘akasubiraya erisaba.’ (Esy. 65:2) Esyonyimbo 62:8 hathi: “Mumubwire amalighe wenyu wosi.” Yehova angana kolha ‘ebyosi ebyo thukasaba kutse ebyo thukalengekanaya.’ (Efe. 3:20) Syalithuha ebya thukamusaba bisa. Angana thukolera n’ebya thuthalengekenie, iniaghunzaho ekitsibu kyethu omwa nzira thuthalengekenie.
7. (a) Ni kyahi ekyanga thuwathikya eribya ithunayithundire hakuhi na Yehova? (b) Ngoku kiri omu Abaebrania 6:10-12, ni byahi ebyanga lhwiririra omw’ilholha embere erikolera Yehova buthaleghulha?
7 Erisighalha iwune hakuhi na Yehova, soma Amasako buli kiro n’erighanirya kugho. Mughalha wethu oyuwabya mumisyonare kera akabugha athi: “Kwama-kwamanaya endegheka y’eriramya ly’eka n’erithegheka emihindano, ngoku wunalhue wukakolha eya wulhue.” Kandi, lholha embere erisangira ndeke omw’ithulira haghuma n’ekithunga kyawu ekihyaka. Yehova syalibirirawa abakalholha embere erimukolera buthaleghulha, nomubangabya isibangathasyakolha ebyosi ebyo babya bakakolha.—Soma Abaebrania 6:10-12.
8. Ebinywe ebiri omu 1 Yoane 2:15-17 byanga kuwathikya bithi eribya iwun’olhobirye engebe?
8 Ibya n’engebe nyolho. Isiwalighira amaghaniryo w’ekihugho kya Sitani akakukakirya erikolera Yehova. (Mt. 13:22) Isiwaligha eby’abanywani kutse abahughu eby’eribugha ambu wuhire esyosente sy’embere omwa kihugho kya Sitani kino. (Soma 1 Yoane 2:15-17.) Yikethere Yehova, oyukayilhagha erithuha ebya thukayithagha bunyakirimu, kinyamubiri, n’omw’iyowa “oko mughulhu w’obwagha.”—Ebr. 4:16; 13:5, 6.
9. Ngoku kiri omu Emisyo 22:3, 7, busana naki ni kikulhu eriyitheya okwa mabanza, kandi ni kyahi ekyanga thuwathikya erithwamu ndeke?
9 Yitheghaye okw’iyibweka-bweka. (Soma Emisyo 22:3, 7.) Erihuma lyanganalya esyosente, kandi kyolhobire eringira omwa mabanza. Eriyitheya okwa mabanza, ambi isiwayibweka wukanza erighulha ekindu ekyo wuthe yithagha na kutsibu. Omughulhu thuli omwa birengekanio, obundi ng’omughulhu thuwithe omulhwere, ikyanganakalha erithwamu nga wuyibweke singahi. Omwa mibere ng’eyo, iwibuka ngoku ‘erisaba n’erihathikana’ ibikendi kuwathikya erithwamu ndeke. Yehova erikusubirya anganakuha obuholho ‘eritheya omuthima wawu n’amaghanirya wawu,’ ikyakuwathikya erithwamu iwunathekene.—Fil. 4:6, 7; 1 Pet. 5:7.
10. Thwangabana thuthi abanywani bahyaka?
10 Sighalha iwune mukolongana ndeke n’abanywani. Bwira banywani bawu okw’iyowa lyawu n’ebya wunemulhabamu, kutsibu-tsibu abanalhabire omwa biri ng’ebyo. Ekyo kyangana leka iwathasyayowa ndeke. (Omu. 4:9, 10) Abanywani abo wathunga eyo wabya bakendibya inina banywani bawu. Neryo kundi wuli omwa mwanya muhyaka, wukayithagha erithasyanywana abandi. Wibuke ngoku erithunga omunywani, wutholere iwakangya obunywani. Wangabana wuthi abanywani bahyaka? Kanaya okwa bibuya ebyo wabiribana omwa mubiiri wa Yehova nuku balhangire etseme yawu. Abandi bangana lemwa erilhangira ekikaleka iwanza omubiiri w’omughulhu wosi, aliwe abandi bangananza eky’erileberyako kyawu neryo ibabya banywani abuwene. Aliwe ibbwa, ambi iwayitheya eriyikaniako kutsibu, n’okw’iyowa lyosi-lyosi erithuwene eryo wangabya iwuwithe.
11. Mwanga kolhaki obutheke bwenyu eribya imune etseme?
11 Wamabya w’erileka omubiiri w’omughulhu wosi busana n’amaghalha w’omwanze wawu, isiwamutsweba. Okwa lhundi lhuhandi, wamabya in’iwe wulhwere, isiwayitsweba, eriyowa iwabirilhabirya omwanze wawu y’ahisi. Wibuke, muli “mubiri mughuma,” kandi mumwalhagha Yehova eritsomanangana nomuhangabyaki. (Mt. 19:5, 6) Kyamabya ikiryabya busana n’obukule obuthalhue omwa ndegheka yenyu, mulhangire muthi omwana wenyu akaminya ku ni w’omughaso kwilhaba olhusunzo olho mwaheraya. Mumubwire ku mukamulhangira “ini lhusunzo” olhukalhua oku Nyamuhanga. (Esy. 127:3-5) Kandi, mumubwire okwa bibuya ebyo mwabana omwa lhusunzo lhwenyu lhw’omubiiri olho. Ekyo kyanganaleka inianza erikolera Yehova omwa mubiiri w’omughulhu wosi ng’inywe.
ABANDI NGOKU BANGA WATHIKYA
12. (a) Thwanga wathikya thuthi abali omwa mubiiri w’omughulhu wosi erilholha embere mugho? (b) Thwanga bawathikya thuthi bang’uhirawe eribeghera emibere mihyaka?
12 Ni ky’obutseme ebithunga bingyi n’abalikyethu eribya ibanemukolha ngoku banga thoka eriwathikya abali omwa mubiiri w’omughulhu wosi erilholha embere. Bakakolha ekyo omw’ibahiramo omuhwa w’erilholha embere, eribawathikya omwa kasente kutse ebindu by’ekinyamubiri, kutse eribawathikya obulembere bw’ababuthi babu. (Gal. 6:2) Abali omwa mubiiri w’omughulhu wosi bamasa omwa kithunga kyenyu, isiwalengekanaya wuthi obo balemirwe kutse basobirye. * Aliwe bawathikaye eribeghera lhuba embinduka. Mubangirire ndeke n’eribasima busana n’ebyo babirikolha, nomubangabya isibanga thasyakolha bingyi busana n’amaghalha erighana. Baminye ndeke. Ighira okwa menge wabu, erithendekwa lyabu, n’ebya basi.
13. Thwanga wathikya thuthi abakabana embinduka omwa lhusunzo lhwabu?
13 Okw’itsuka, abakabana embinduka omwa lhusunzo, bakayithagha obuwathikya bwawu eribana enyumba, omwa by’etraspoti, omubiiri, n’ebindi biyithawa. Kandi bangana yithagha omwatsi owali okwa buthuku owahambire ng’okwa misolho. Kandi ekikulhu kutsibu yitheghereraye emibere eyo balimu. Obundi ibo kutse ow’okw’ibo anganabya inialhwere. Banganabya ibali omwa bulighe bw’eriholerwa. * Kandi nomubanga ghan’ibugha, banganabya omwa bulighe bw’erisighania erihiika lyabu ly’obunyakirimu eyo balhue. Kikayithagha obuthuku erighumira eriyowa ng’eryo, eryangana balyambya kutsibu.
14. Abathuliri mubawathikya bathi mwali wethu eribeghera obulhambu buhyaka?
14 Erithulira nabu n’eky’erileberyako kyawu kibuya byangana bawathikya eribeghera. Mwali wethu oyuwaghunza myaka mingyi inianemukolera omwa kindi kihugho akabugha athi: “Eyo nabya, obuli kiro iningasondolha abigha be Biblia. Aliwe eyo nasuba ikikalire n’eribana ow’erisomera erisako kutse erikangania evidiyo omw’ithulira. Aliwe balikyethu omwa kithunga kihyaka ibakanyithwalha okwa banzisibwa n’abigha babu. Erilhangira balikyethu b’omuhwa kandi bathubaha aba bakasondolha abigha abakakulha-kulhana, mukyaleka namathunga amalengekania awuwene. Mun’igha eritsukisya omukania omwa bulhambu buhyaka obu. Ebyosi ebi mubyaleka inabana etseme kandi.”
LHOLHA EMBERE!
Sondaya emibere y’eryongera erithulira lyawu omwa bulhambu bw’ewenyu (Lebaya enungu 15-16) *
15. Wanga thoka wuthi erilholha embere hamabya embinduka?
15 Wangana thoka erilholha embere erikolha ngoku wanga thoka hamabya embinduka. Isiwalhangira embinduka nga ni bulemwa kutse ng’erisuba enyuma. Lengekanaya okwa nzira nyingyi esyo Yehova anemukuwathikiryamo kandi lholha embere erithulira. Gherereraya Abakristayo abathaleghulha ab’omwa kighonye ky’erimbere. Ehosi-hosi ayo babya, “mubaya eyi n’eyi bakathulha engulhu yuwene.” (Emib. 8:1, 4) Wamalholha embere erithulira, akaghalha kawu ikanganaghanduka. Ng’eky’erileberyako, abatemburi abathibithawako omwa kihugho kighuma mubasokera omwa kindi eyabya obuyithawa bunene omwa mubughe wabu. Omwa mezi make, muhabya esyogurupu mbyaka omwa mubughe oyo.
16. Wangabana wuthi etseme omwa lhusunzo lhwawu olhuhyaka?
16 “Obutseme bw’Omwami Mukulhu ni kaghalha kenyu.” (Neh. 8:10) Etseme yethu yitholere iyabya omu Yehova butsira omwa lhusunzo lhwethu nomuthwangabya ithulhwanzire bungahi. Neryo lholha embere erilendera na Yehova, musabe amenge, obusondoli, n’obuwathikya. Wibuke ngoku wanza olhusunzo lhwawu busana n’eribya imuwakolha kutsibu eriwathikya abandu b’eyo. Hira amalengekania w’okwa lhusunzo lhwawu lhuhyaka n’erilhangira ngoku Yehova akakuwathikaya erilhwanza.—Omu. 7:10.
17. Thutholere ithw’ibukaki okwa lhusunzo lhw’omubiiri olhwa thwangabya ithuwithe lino?
17 Thutholere ithwibuka ngoku thukendi syakolera Yehova kera na kera, aliwe ebya thukakolha munabwire ni bya buthuku buke. Omwa kihugho kihyaka, ithwe bosi thwangana syahebwa eyindi mibiiri. Aleksey, oyukanibweko okw’itsuka akabugha athi, ebyo alhabamo bikamuthegheka busana n’ekyo. Aleksey akabugha athi: “Inganasi ngoku Yehova aneho n’ekihugho kihyaka ku kineyo, aliwe ibikabya nga biri haali. Hathya ngayowa ingali hakuhi na Yehova n’ekihugho kihyaka nga kiri hakuhi-kuhi.” (Emib. 2:25) Mbulha thwathungire mbindukaki, thuyithunde hakuhi na Yehova. Syanga thusighania, aliwe akendi thuwathikya eritsemera ekyosi-kyosi ekya thwanga thoka omwa mubiiri wiwe—ehosi-hosi eyo thwangabya.—Isa. 41:13.
OLHWIMBO 90 Thuhimbangane
^ enu. 5 Hakanayira balikyethu abali omwa mubiiri w’omughulhu wosi ibabya ibakendi lekagho, kutse ibahebwa olhusunzo lhuhyaka. Omwatsi ono akakanaya okwa bitsibu ebyo bakabana n’ekyanga bawathikya erighenda-ghendania ndeke n’emibere mihyaka. Kandi akakanaya okwa bya bandi bangakolha eribaghumya n’eribasighika, n’emisingyi eyanga wathikya ithwe bosi thukabana esyombinduka.
^ enu. 4 Kuthya, baghalha bethu bangyi abawithe esyongwamirwa, bakabya bakahikya myaka mirebe, ibasighira esyongwamirwa esyo sy’abaghalha bethu abalere. Lebaya omwatsi “Abakristayo Abakulire—Yehova Akalhangira Obuthaleghulha Bwenyu mwa bw’Obughuli,” omwa Watchtower ey’Okwomwenda 2018, na “Ibya Iwunathekene Omwa Muthima Emibere Nomuyangahinduka,” omwa Kaleberyo ak’Okwerikumi 2018.
^ enu. 12 Abasyakulhu b’omwa kithunga ekyo balhuemo batholere ibahandika lhuba ebaruha eyikabakanayako, nuku baleke erilinda habw’obuthuku bunene erilholha embere n’obutemburi, erikolha ng’omusyakulhu, kutse ng’omughombe omuwathikya.
^ enu. 13 Lebaya emyatsi eyikwamangene eya “Eriwathikya Abali Omwa Bulighe bw’Eriholerwa,” omwa Awake! 2018, Na. 3, olhup. 3, 4-5, 6-13 na 14.
^ enu. 57 ERISOBORERA EBISASANI: Mughalha wethu na mukali wiwe abamayithagha erileka omubiiri w’obumisyonare omwa kindi kihugho ibanemulira bakalhagha ekithunga kyabu.
^ enu. 59 ERISOBORERA EBISASANI: Ibabirihika omwa kihugho ky’ewabu, balikyethu iba n’abo bakasaba Yehova ya kutsibu abawathikaye erighumira ndeke ebitsibu byabu.
^ enu. 61 ERISOBORERA EBISASANI: Busana n’obuwathikya bwa Yehova, abathahenie aba, bamasuba omwa mubiiri w’omughulhu wosi. Bakakolesaya amenge wabu w’omubughe agho b’igha omwa bumisyonare erithulira abakahumira omwa kihugho kyabu abali omwa bulhambu bw’ekithunga kyabu ekihyaka.
